3 Ní nꞌdeee nꞌdáí ꞌiiⁿꞌyāⁿ ngaⁿꞌa ntúuⁿ yā: Aleluya. Dichꞌɛɛtɛ yú Ndyuūs. ꞌYaaⁿꞌmiⁿ yeⁿꞌe nꞌdaataá miiⁿ chi cuucu yaⁿꞌā táⁿꞌā ꞌáámá chɛɛ ꞌyaaⁿꞌmiⁿ yeⁿꞌe tá chi castigo yeⁿꞌe tá cueⁿꞌe daāⁿmaⁿ.

4 Ní nduꞌu ndiicú cuūuⁿ ꞌiiⁿntyéⁿꞌē ndúúcū nduꞌu cuūuⁿ ꞌiiⁿꞌyāⁿ chꞌeēndiitínꞌdii yā nanááⁿ Ndyuūs chi vɛ́ɛ yā na trono yeⁿꞌé yā ní nducyaaca yā ndúúcū naáⁿ yā na yáⁿꞌāa chiꞌtéénu yā Ndyuūs ní caⁿꞌa yā ꞌtíícā: Aleluya. Díchꞌɛɛtɛ yú Ndyuūs.

5 Ní chꞌiindiveéⁿ ꞌáámá nduudu yeⁿꞌe trono miiⁿ chi ngaⁿꞌa ꞌtíícā:

6 Ní táámá vmnéⁿꞌēe chꞌiindiveéⁿ ꞌáámá nduudu yeⁿꞌē nꞌdeee nꞌdáí ꞌiiⁿꞌyāⁿ tanꞌdúúcā chi nꞌgɛɛcú naachí ꞌyaaⁿ nꞌdáí nuūⁿnīⁿ ní tanꞌdúúcā chi nꞌgɛɛcu diituu nꞌdáí daavi. Ní ngaⁿꞌa yā:

9 Tuuꞌmi ní ángel chi candɛ́ɛ yā ꞌúú caⁿꞌa yā chii yā ꞌúú. Díí, Juan, dingúuⁿ di ꞌtíícā: Dɛꞌɛ chúúcā nꞌdai cáávā ꞌiiⁿꞌyāⁿ sꞌeeⁿ chi ꞌáámá ꞌcaí yā ꞌiiⁿꞌyāⁿ sꞌeeⁿ chi cuchií yā naachi ꞌiiⁿꞌyāⁿ chi nguuvi ꞌiiti cuūchī ꞌcaandavaacú yā ní ꞌiiⁿꞌyāⁿ sꞌeeⁿ cheꞌe nguiinú yā yeⁿꞌe ꞌviicu miiⁿ. Ní ángel miiⁿ caⁿꞌa yā chii yā ꞌúú: Nduudú ꞌcūū ní yeⁿꞌé Ndyuūs ní cuaacu.

10 Ní ꞌúú chiintiiꞌyá na caꞌa ángel miiⁿ chi dichꞌɛɛtɛ́ ángel miiⁿ. Ní caⁿꞌa yā: Nguɛ́ɛ́ ꞌtíícā diiⁿ di. ꞌÚú ntúūⁿ dichiiꞌvɛ́ Ndyuūs tanꞌdúúcā díí ndúúcū hermanos yeⁿꞌē di dichííꞌvɛ nī Ndyuūs ní ngaⁿꞌa nī nduudu cuaacu yeⁿꞌe Jesucristo. Dii, cuꞌtéénu di Ndyuūs. Ní ꞌiiⁿꞌyāⁿ chi ngaⁿꞌa yā nduudu cuaacu yeⁿꞌé Cristo ní ngaⁿꞌá yā cáávā chi Ndyuūs chꞌiⁿꞌí yā ꞌiiⁿꞌyāⁿ sꞌeeⁿ chiiⁿ chi ngaⁿꞌá yā.

11 Tuuꞌmi ní nꞌdiichí chi candaꞌāī vaꞌai chɛɛti nguuvi ní canꞌdáā ꞌáámá ꞌyuūdūu cuɛ́ɛ̄. Ní Cristo chi canduú yā ꞌyuūdūu miiⁿ chi duuchí yā ní ꞌÁámá Nꞌdaacā Nꞌdai yā ní Cuaacú yā. Ní ꞌiiⁿꞌyāⁿ miiⁿ ní diíⁿ yā tanducuéⁿꞌē chi cuaacu taachi diíⁿ yā caandaá ní nꞌdiichí yā nuuⁿndi yeⁿꞌe ꞌiiⁿꞌyāⁿ sꞌeeⁿ. 12 Ní nduutinaáⁿ yā miiⁿ ní tanꞌdúúcā nguuchi yaⁿꞌā, ꞌtíícā nduutinaáⁿ yā. Ní canéé nꞌdeee nꞌdáí coronas na tiíⁿ yā. Ní canéé nguūⁿ ꞌáámá chi duuchi yā chi mar ꞌáámá ꞌiiⁿꞌyāⁿ nguɛ́ɛ́ nꞌdiichí yā. Dámaāⁿ ꞌiiⁿꞌyāⁿ miiⁿ deenú yā dɛꞌɛ̄ chi duuchí yā. 13 Ní catecaí yā chi canuuⁿ yā ndiituú yúuúⁿ. Ní chi duuchí yā ní Nduudu yeⁿꞌé Ndyuūs. 14 Ní cuaaⁿ daamí yā ní nꞌdáa nꞌdeee nꞌdáí soldados yeⁿꞌe vaꞌai chɛɛti nguuvi ndúúcū catecaí yā chi lino chi yaⁿꞌai chííꞌvɛ̄ chi cuɛ́ɛ̄ ní dɛɛvɛ. Ní soldado candúu ntúuⁿ yā ꞌyuūdūu cuɛ́ɛ̄ yeⁿꞌe yā. 15 Ní na cheendí Cristo canꞌdaā ꞌáámá machete nduu ꞌuūvī lados ꞌcaāiⁿ. Ní ndúúcū chuū nꞌnuū cáꞌai yā ꞌiiⁿꞌyāⁿ yeⁿꞌe naciones. Tuuꞌmi ní caaⁿꞌmaⁿ ntiiⁿnyúⁿ yā diituú yeⁿꞌe naciones ndúúcū ꞌáámá nduucu cūū. Ní ngii caꞌa yā lugar chi ꞌiiⁿꞌyāⁿ sꞌeeⁿ staꞌá yā vino chi nuūⁿnīⁿ yeⁿꞌe nꞌguiꞌi uvas chi ꞌiiⁿꞌyāⁿ dindeꞌéí yā ndúúcū caꞌá yā. Ní Cristo caꞌa yā ꞌiiⁿꞌyāⁿ sꞌeeⁿ chi cuꞌu yā vino miiⁿ chi castigo yeⁿꞌe vaadī taaⁿ yeⁿꞌé Ndyuūs chi vɛ́ɛ́ tanducuéⁿꞌē poder chi vɛ́ɛ́ ní yeⁿꞌe yā. 16 Ní canéé nguūⁿ na vestido yeⁿꞌe yā ní na ꞌdiiⁿꞌmá yā chi duuchí ꞌcūū: Rey chꞌɛɛtɛ yeⁿꞌē nducuéⁿꞌē reyes chi vɛ́ɛ́, Señor ꞌiiví yā chꞌɛɛtɛ yeⁿꞌe nducyaaca señores ꞌiivi chi vɛ́ɛ́.

17 Ní cuayiiví nūuⁿ nꞌdiichí ꞌaama ángel cheendii yā vmnaaⁿ ꞌyáⁿꞌā. Ní ángel miiⁿ yuudu nꞌdáí nꞌgai yā ní caⁿꞌa yā chii yā nducyaaca ꞌiiti chi ngaá tī nánguuvi: Ndísꞌtiī ꞌiiti sꞌeeⁿ cuchií nī ní nduuvidaamá nī chi cheⁿꞌe nguiinú nī chi yeⁿꞌē ꞌviicu yeⁿꞌé Ndyuūs chi chꞌɛɛtɛ. 18 Cuchií nī ní cheꞌé nī yuutɛ yeⁿꞌe reyes ndúúcū yuutɛ yeⁿꞌē capitanes ndúúcū yuutɛ yeⁿꞌe saⁿꞌā chi vɛ́ɛ́ ca fuerzas yeⁿꞌe yā ndúúcū yuutɛ yeⁿꞌe ꞌyuūdūu ní yeⁿꞌe nducyaaca ꞌiiⁿꞌyāⁿ chi snduú yā ꞌyuūdūu ndúúcū yuutɛ̄ yeⁿꞌe nducyáácá ꞌiiⁿꞌyāⁿ, ꞌiiⁿꞌyāⁿ chi libre yā ní ꞌiiⁿꞌyāⁿ chi esclavo yā, ꞌiiⁿꞌyāⁿ chi ngaⁿꞌa ntiiⁿnyuⁿ ndúúcū tanáⁿꞌā ꞌiiⁿꞌyāⁿ.

19 Tuuꞌmi ní nꞌdiichí ꞌiiti monstruo chi chꞌɛɛtɛ ca ndúúcū reyes yeⁿꞌe iⁿꞌyeeⁿdí ꞌcūū ndúúcū soldados yeⁿꞌé yā chi nduuvidaamá yā ndúúcū ꞌiiti miiⁿ chi diíⁿ yā caandaá ndúúcū ꞌiiⁿꞌyāⁿ chi canduú yā ꞌyuūdūu cuɛ́ɛ̄ miiⁿ ndúúcū soldados yeⁿꞌé yā. 20 Ní ꞌiiⁿꞌyāⁿ miiⁿ chi canduú yā ꞌyuūdūu cuɛ́ɛ̄ miiⁿ staꞌá yā monstruo miiⁿ chi ꞌiiti preso tī. ꞌTiicá ntúūⁿ staꞌá yā chi preso sa ꞌáámá saⁿꞌā chi ngaⁿꞌa sa chi profeta sa, ní nguɛ́ɛ́ profeta sa. Naati saⁿꞌā miiⁿ diiⁿ sa señas ndúúcū vaadī nꞌgíínūu ní chinncheꞌéí yā ꞌiiⁿꞌyāⁿ chi canéé ndúúcū sello yeⁿꞌé tī na cuerpo yeⁿꞌé yā. Ní iꞌtéénu yā ꞌiiti santo yeⁿꞌé tī. Níícú nduu ꞌuuví sa chi preso sa, ꞌiiⁿꞌyāⁿ miiⁿ staꞌá yā nduu ꞌuuví sa neⁿꞌe chi canduuchi sa ní chinꞌdáá nuúⁿ yā nduu ꞌuuví sa na nuūⁿnīⁿꞌyáⁿꞌā yeⁿꞌe ngiichi yaⁿꞌā chi ngiichi ndúúcū tuūu chi azufre. 21 ꞌÁámá yā ndúúcū machete ꞌuuvi lados ꞌcaāiⁿ chi canéé na cheendí yā chi canduú yā na ꞌyuūdūu cuɛ́ɛ̄ chꞌiiⁿꞌnúⁿ yā tanáⁿꞌā soldados yeⁿꞌe ꞌiiti monstruo. Ní nducyaaca ꞌyáádá cheꞌé tī nducuéⁿꞌē yuūtɛ̄ yeⁿꞌe soldados ní chiitu ꞌyáádá sꞌééⁿ yeⁿꞌe yúútɛ̄ yeⁿꞌe yā.