3 Ní ꞌúú canéé maáⁿ poder Espíritu Nꞌdai yeⁿꞌé Ndyuūs ní ángel miiⁿ candɛ́ɛ yā ꞌúú na yáāⁿ cuuⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ. Ní mííⁿ nꞌdiichí ꞌáámá nꞌdaataá candúu tá ꞌáámá monstruo cuáꞌa tī chi chꞌɛɛtɛ ca. Ní nééné nꞌdeēe chi duuchi chi contra yeⁿꞌe Ndyuūs sꞌnééⁿ nguūⁿ na cuerpo yeⁿꞌe ꞌiiti miiⁿ. Ní vɛ́ɛ́ ndɛɛchɛ tiíⁿ tī ní vɛ́ɛ́ ndiichi duuⁿniiⁿníⁿ tī. 4 Ní nꞌdaataá chi candúu ta monstruo cuáꞌa tī ní canuuⁿ tá vestido chi morado ndúúcū cuáꞌā. Ní vɛ́ɛ́ adorno yeⁿꞌē tá chi ꞌdííⁿnguāaⁿ ndúúcū tuūu chi nééné yaⁿꞌai chííꞌvɛ̄ ndúúcū perlas. Ní ndɛɛ tá ná taꞌa tá ꞌaama taza yeⁿꞌe ꞌdííⁿnguāaⁿ chi diituú ndúúcū denduꞌū chi nguɛɛ nꞌdaacā chi nuūⁿndī vaatii ndúúcū chi dendúꞌū yeⁿꞌe chi cueⁿꞌe tá ndúúcū saⁿꞌā sꞌeeⁿ chi nguɛ́ɛ́ yeⁿꞌe tá. 5 Ní canéé nguūⁿ ꞌáámá chi duuchi ná nchɛɛtɛ̄ tá chi canúúⁿ nꞌdeꞌei chi neⁿꞌe caaⁿꞌmaⁿ chi ꞌtúúcā. Yáāⁿ Babilonia chꞌɛɛtɛ chi chɛɛcuú nducyaaca nꞌdaataá chi caⁿꞌá yā ndúúcū saⁿꞌā chi nguɛ́ɛ́ yeⁿꞌe yā ndúúcū nducuéⁿꞌē cosas chí nguɛ́ɛ́ nꞌdaacā na iⁿꞌyeeⁿdí ꞌcūū chi diiⁿ ꞌiiⁿꞌyāⁿ sꞌeeⁿ. 6 Ní ꞌúú chicadiinúúⁿ chi nꞌdaata miiⁿ ní cuuꞌvi tá caati cuꞌu ta yuūuⁿ yeⁿꞌe ꞌiiⁿꞌyāⁿ chi nꞌdíi yā ti yeⁿꞌe Ndyuūs ní yeⁿꞌe ꞌiiⁿꞌyāⁿ chí ngaⁿꞌá yā nduudu cuaacu yeⁿꞌe Cristo. Ní taachi nꞌdiichí chuū cueⁿꞌe yiinú yeⁿꞌē. 7 Tuuꞌmi ní ángel chi ndɛɛ yā ꞌúú ngaⁿꞌa yā ngīi yā ꞌúú: ¿Dɛꞌɛ̄ cúúví chí ngeⁿꞌe yiinu dí yeⁿꞌe chuū? ꞌÚú ní cuuví dii chi canúúⁿ nꞌdeꞌei yeⁿꞌē nꞌdaataá miiⁿ ndúúcū yeⁿꞌe monstruo chꞌɛɛtɛ chi ndɛɛ́ tī ndaataá miiⁿ, monstruo miiⁿ chi vɛ́ɛ́ ndɛɛ̄chɛ̄ tiíⁿ tī ní ndiichi duuⁿniiⁿníⁿ tī. 8 ꞌIiti monstruo chi nꞌdiīchī di ní ꞌáámá tī chi ndii tiempo vmnaaⁿ canduuchí tī naati maaⁿ ní ꞌāā ntɛ́ɛ́ tī, naati ꞌiiti miiⁿ cáámá canéé chí canꞌdaá tī na yiivɛ́ɛ̄ yeⁿꞌe yáⁿꞌāa vmnááⁿ vmnaaⁿ chi caⁿꞌá ti diꞌcuiinú tī. Ní ꞌiiⁿꞌyāⁿ chi snée yā na yáⁿꞌāa ní nguɛ́ɛ́ snéé chi duuchí yā na libro yeⁿꞌe vida cueⁿꞌe daāⁿmaⁿ ndíí taachi Ndyuūs dinꞌdái yā iⁿꞌyeēⁿdī. ꞌIiⁿꞌyāⁿ sꞌeeⁿ ní ngeⁿꞌe yiinú yā taachi nꞌdiichí yā ꞌiiti miiⁿ chi vmnaaⁿ canduuchí tī naati maaⁿ ní ꞌāā ntɛ́ɛ́ tī. ꞌĀā chꞌií tī naati nnguaacunée tī ndaá tī.

9 Ní yeⁿꞌē chúū vɛ́ɛ́ cá chi cuuvi déénu ꞌiiⁿꞌyāⁿ. Nduꞌu ndɛɛ̄chɛ̄ tiíⁿ tī ní chííⁿ tanꞌdúúcā chí ndɛɛ̄chɛ̄ yiīcū chꞌɛɛtɛ naachi nꞌdaataá miiⁿ ní vɛ́ɛ yā vmnaaⁿ yeⁿꞌē. 10 Ní vɛ́ɛ́ ndɛɛ̄chɛ̄ reyes. Nyuⁿꞌu reyes ní chꞌīi yā. Maaⁿ ní ꞌáámá rey miiⁿ ní ngaⁿꞌa ntiiⁿnyuⁿ yā yeⁿꞌe ꞌiiⁿꞌyāⁿ chi vɛ́ɛ́ maaⁿ. Ní táámá rey ní canéé chi ndaá yā. Ní taachi ndaá rey miiⁿ chi nduꞌu chi ndɛɛ̄chɛ̄ nguɛ́ɛ́ ꞌnaaⁿ tiempo caneé yā íⁿꞌyeēⁿdī. 11 Ní táámá ꞌiiti monstruo chi vmnaaⁿ canduuchí tī ní maaⁿ ní ꞌāā ntɛ́ɛ́ tī ti chꞌií tī ní ꞌiiti miiⁿ chi rey miiⁿ ní nduuvidáámá tī ndúúcū ta ndɛɛ̄chɛ́ tī. Ní cuayiivi ní rey miiⁿ caⁿꞌá yā cuuvi ndai yā chi vaadī nꞌgii yeⁿꞌe ndii ꞌuūvī cuuvi chi infierno.

12 Ní nduꞌu ndiichi duuⁿniiⁿníⁿ tī chi nꞌdiīchi di chííⁿ chí nduꞌū ndiichi reyes chi ꞌāā cuɛ́ɛ́ cutaꞌá yā poder yeⁿꞌé yā naachi ngaⁿꞌā ntiiⁿnyúⁿ yā. Taachi cutaꞌá yā poder ní chi cuuvi reyes ndúúcū ꞌiiti monstruo miiⁿ ꞌáámá hora nūuⁿ. 13 Ní reyes sꞌeeⁿ ní dáámá nūuⁿ vaanicadíínūuⁿ yeⁿꞌé yā. Ní caꞌa yā poder yeⁿꞌé yā ndúúcū fuerzas yeⁿꞌe yā na taꞌa ꞌiiti monstruo miiⁿ. 14 Ní reyes ní ꞌcuuⁿꞌmaⁿ yā ndúúcū ꞌiiⁿꞌyāⁿ chí nguuvi ꞌiiti cuūchī naati ꞌiiⁿꞌyāⁿ miiⁿ chí nguuvi ꞌiiti cuūchī cuchɛ́ɛ yā yeⁿꞌe reyes. Ní Señor chꞌɛɛtɛ ca ní ꞌiivi nducyaaca ꞌiiⁿꞌyāⁿ señores ní rey chꞌɛɛtɛ ca yeⁿꞌē nducyaaca reyes. Ní ꞌiiⁿꞌyāⁿ sꞌeeⁿ chi canée yā ndúúcū ꞌiiⁿꞌyāⁿ miiⁿ ní Ndyuūs yaaꞌví yā ꞌiiⁿꞌyāⁿ sꞌeeⁿ chi cuuvi yeⁿꞌé yā. Ní Ndyuūs ndɛɛvɛ́ yā ꞌiiⁿꞌyāⁿ sꞌeeⁿ chi yeⁿꞌé yā. Ní ꞌiiⁿꞌyāⁿ sꞌeeⁿ ní ꞌaama canee yā ndúúcū chi iꞌtéénu yā Ndyuūs.

15 Ní ángel miiⁿ caⁿꞌa yā chii yā ꞌúú: Nuūⁿnīⁿꞌyáⁿꞌā sꞌeeⁿ chí nꞌdiīchī di naachi vɛ́ɛ nꞌdaataá chi caⁿꞌa tá ndúúcū saⁿꞌa sꞌeeⁿ, nuūⁿnīⁿꞌyáⁿꞌā sꞌeeⁿ ní chííⁿ chi yáāⁿ sꞌeeⁿ ndúúcū nꞌdeee nꞌdáí ꞌiiⁿꞌyāⁿ ndúúcū ꞌiiⁿꞌyāⁿ chi ngaⁿꞌa nꞌdeee nꞌdáí davaacu chi n̄ꞌdááⁿ ndúúcū naciones. 16 Ní nduꞌu ndiichí duuⁿniiⁿníⁿ tī chi vɛ́ɛ́ yeⁿꞌe monstruo miiⁿ, nguɛ́ɛ́ neⁿꞌe nꞌdaataa mííⁿ. Ní cutaꞌa tī nducuéⁿꞌē yeⁿꞌe nꞌdaataa miiⁿ. Ní divíi tī catecai nꞌdaataa miiⁿ ní sꞌneēⁿ táⁿꞌā chi yuucúū tá. Ní cheꞌé tī yuūtɛ̄ yeⁿꞌe tá. Ní ꞌneeⁿ yaⁿꞌā nꞌdaataa miiⁿ ndúúcū nguuchi yaⁿꞌā. 17 Caati Ndyuūs sꞌnéeⁿ yā na staava yeⁿꞌe reyes chi diíⁿ yā ꞌtúúcā tanꞌdúúcā chi Ndyuūs neⁿꞌé yā chi diíⁿ yā. Ní ndiichi duuⁿniiⁿníⁿ tī nduuvidaamí tī ní caꞌá tī poder yeⁿꞌé tī na taꞌa ꞌiiti monstruo miiⁿ chi caaⁿꞌmaⁿ ntiiⁿnyúⁿ tī. Ní ꞌtíícā diíⁿ tī chi cuuví cuaacu nduudu chí ngaⁿꞌa Ndyuūs. 18 Ní nꞌdaataá chi nꞌdiichī di chííⁿ chí yáāⁿ chꞌɛɛtɛ chi caaⁿꞌmaⁿ ntiiⁿnyuⁿ yeⁿꞌe nducyaaca reyes chi snée yā ná iⁿꞌyeēⁿdī.