2 Ní ángel vmnááⁿ vmnaaⁿ cheⁿꞌe yā nꞌdaaviyaí yā chi snúūⁿ ꞌcuutií yeⁿꞌe yā vmnaaⁿ yáⁿꞌāa ní vmnaaⁿ nducyaaca ꞌiiⁿꞌyāⁿ chi ndɛ́ɛ yā sello yeⁿꞌe ꞌiiti monstruo na cuerpo yeⁿꞌe yā, ꞌiiⁿꞌyāⁿ chi iꞌtéénu yā ꞌiiti santo yeⁿꞌé tī. Ní canꞌdáā nꞌdúúꞌví nꞌgɛɛtɛ chi neené yaꞌai na cuerpo ꞌiiⁿꞌyāⁿ sꞌeeⁿ.

3 Tuuꞌmi ní ndii chííⁿ ndii ꞌuūvī ángel miiⁿ nꞌdaaviyái yā ꞌcuutií yeⁿꞌe yā vmnaaⁿ nuūⁿnīⁿꞌyáⁿꞌā ní nduuví yuuúⁿ tanꞌdúúcā yuuúⁿ yeⁿꞌē ꞌaama tináⁿꞌā. Ní tanducuéⁿꞌē ꞌiiti chi snduuchí chɛɛti nuūⁿnīⁿꞌyáꞌā miiⁿ chꞌīi tī.

4 Ní ndii chííⁿ ndii ꞌíínú ángel miiⁿ nꞌdaaviyaí yā ꞌcuutií yeⁿꞌe yā vmnaaⁿ yeⁿꞌe yíícú ní vmnaaⁿ yeⁿꞌē naachi canꞌdaā nuūⁿnīⁿ miiⁿ. Ní nducuéⁿꞌē nuūⁿnīⁿ miiⁿ nduuvi yuuúⁿ. 5 Ní niiⁿnuúⁿ nūuⁿ chꞌiindiveéⁿ ángel yeⁿꞌe nuūⁿnīⁿ miiⁿ chi ngaⁿꞌa yā: Dii Señor, ꞌāā canéé dí cuááⁿ vmnaaⁿ, ní canee di maaⁿ. Dii ní cuaacu di ti nꞌdiichi di nuūⁿndī ꞌiiⁿꞌyāⁿ sꞌeeⁿ. 6 Ní ꞌtíícā diiⁿ di caati ꞌiiⁿꞌyāⁿ sꞌeeⁿ ní chꞌiiⁿꞌnúⁿ yā ꞌiiⁿꞌyāⁿ yeⁿꞌe di ndúúcū ꞌiiⁿꞌyāⁿ chi ꞌáámá diíⁿ yā ntiiⁿnyuⁿ yeⁿꞌe di ndúúcū ꞌiiⁿꞌyāⁿ chí caⁿꞌa nduudu cuaacu yeⁿꞌe di. Ní maaⁿ ní dii ncaꞌa di yuuúⁿ yeⁿꞌē nuūⁿnīⁿ miiⁿ chi cuꞌú yā caati ꞌtíícā chi nꞌdaacā chi cuꞌú yā yuūuⁿ miiⁿ cucáávā chi diiⁿ yā chí nguɛ́ɛ́ nꞌdaacā.

7 Ní chꞌiindiveéⁿ nduudu yeⁿꞌe ꞌáámá yeⁿꞌe nátai chi ngaⁿꞌa ngii Ndyuūs, ní ngaⁿꞌa: Dii, Ndyuūs, chi vɛ́ɛ́ tanducuéⁿꞌē denduꞌū poder ndúúcū di, cuaacu nííⁿnyúⁿ nꞌdiichi di nuuⁿndi yeⁿꞌe ꞌiiⁿꞌyāⁿ. Ní diiⁿ di chi cuaacu ní nꞌdai taavi.

8 Ní nꞌdiichí ndíí cuūuⁿ ángel miiⁿ nꞌdaaviyaí yā ꞌcuutií yeⁿꞌe yā vmnaaⁿ yeⁿꞌe ꞌyáⁿꞌā. Ní caꞌá yā poder ꞌyáⁿꞌā miiⁿ chi ꞌneeⁿ ꞌyáⁿꞌā ꞌiiⁿꞌyāⁿ ndúúcū ꞌyáⁿꞌā yeⁿꞌē. 9 Ní nducyaaca ꞌiiⁿꞌyāⁿ ní chiichi yā ndúúcū ꞌiiⁿꞌnūⁿ taáⁿ yeⁿꞌe ꞌyáⁿꞌā miiⁿ. Ní neené taaⁿ yaꞌai yeⁿꞌé yā. Ní cunncáā caⁿꞌa yā yeⁿꞌe chi duuchi Ndyuūs chi vɛ́ɛ́ poder yeⁿꞌé yā yeⁿꞌē ndɛɛ̄chɛ̄ cáꞌai ꞌcūū. Naati ꞌiiⁿꞌyāⁿ sꞌeeⁿ nguɛ́ɛ́ ndaacadaamí yā yeⁿꞌe nuuⁿndi yeⁿꞌé yā ní nguɛ́ɛ́ dichꞌɛɛtɛ́ yā Ndyuūs.

10 Ní nꞌdiichí ndii nyuⁿꞌu ángel miiⁿ nꞌdaaviyaí yā ꞌcuutií yeⁿꞌe yā vmnaaⁿ yeⁿꞌe trono yeⁿꞌe ꞌiiti monstruo miiⁿ ní vmnaaⁿ yeⁿꞌe tanducuéⁿꞌē chi ngaⁿꞌá tī ntiiⁿnyuⁿ yeⁿꞌē ní canéé ná ꞌáámá maāiⁿ. Ní ꞌiiⁿꞌyāⁿ sꞌeeⁿ ní cheⁿꞌenéé yā chiiya yā cáávā chi yaꞌai yā. 11 Ní ꞌiiⁿꞌyāⁿ sꞌeeⁿ cunncáā caⁿꞌa yā yeⁿꞌe Ndyuūs chi canée yā na vaꞌai chɛɛti nguuvi cucáávā chi yaꞌai yeⁿꞌe yā ndúúcū nꞌduuꞌvi yeⁿꞌé yā. Ní nguɛ́ɛ́ nandaacadaamí yā yeⁿꞌe nuuⁿndi yeⁿꞌe yā.

12 Tuuꞌmi ní ndii chííⁿ ndii niyaaⁿ ángel miiⁿ nꞌdaaviyaí yā ꞌcuutií yeⁿꞌé yā vmnaaⁿ yíícú chꞌɛɛtɛ chi nguuvi Eufrates ní nuūⁿnīⁿ yeⁿꞌe yíícú chꞌɛɛtɛ miiⁿ ntiꞌi. Ní nꞌguaāⁿ ꞌaama yúúní ní ꞌiicu ꞌiiⁿꞌyāⁿ reyes cuuvi cuchii yā cuaaⁿ naachi canꞌdaā ꞌyáⁿꞌā na yúúní miiⁿ.

13 Tuuꞌmi ní nꞌdiichí chí canꞌdaā ꞌiinū espíritus yeⁿꞌe yááⁿnꞌguiinūuⁿ chi tanꞌdúúcā sapo, ꞌtíícā espíritus. Ní canꞌdaā yeⁿꞌē cheendi ꞌiiti dragón miiⁿ ní yeⁿꞌē cheendi ꞌiiti monstruo chi chꞌɛɛtɛ taavi cá tī ní yeⁿꞌe cheendi profeta chi ngaⁿꞌa yā chi yeⁿꞌe Ndyuūs ꞌyā, ní nguɛ́ɛ́ ngaⁿꞌa yā nduudu cuaacu yeⁿꞌe maáⁿ yā. 14 Espíritus ndúúcū espíritus yeⁿꞌe yááⁿnꞌguiinūuⁿ ní diíⁿ yā señas yeⁿꞌe vaadī nꞌgiinu. Ní cueⁿꞌe yā nanááⁿ nducyáácá reyes yeⁿꞌē núúⁿmáⁿ iⁿꞌyeeⁿdí ꞌcūū chi nadaama yā ꞌiiⁿꞌyāⁿ sꞌeeⁿ chi cuuvi ꞌcuuⁿꞌmaⁿ yā nguuvi chi chꞌɛɛtɛ chi yeⁿꞌé Ndyuūs chi vɛ́ɛ́ nducuéⁿꞌē denduꞌu poder yeⁿꞌe yā. 15 Ní Cristo ngaⁿꞌá yā. Cuinꞌdiichí nī. ꞌÚú ní cuchií tanꞌdúúcā ꞌáámá chíduucu. Dɛꞌɛ̄ chúúcā nꞌdai ꞌiiⁿꞌyāⁿ chi snduuchí yā ní snúuⁿ yā catecai yā ní nguɛ́ɛ́ ꞌcuɛɛtinée yā chi chiica yā chi yuucú yā chi ꞌiiⁿꞌyāⁿ sꞌeeⁿ inaáⁿ yā ní ꞌíícú cuuvi ꞌcuináaⁿ yā. 16 Ní espíritus nduuvidaami yā reyes yeⁿꞌe yáⁿꞌāa na ꞌáámá lugar chi nguuvi Armagedón na davaacu hebreo.

17 Tuuꞌmi ní ndii chííⁿ ndii ndɛɛ̄chɛ̄ ángel miiⁿ nꞌdaaviyaí yā ꞌcuutií yeⁿꞌe yā na ꞌyúúné. Ní yeⁿꞌe yáacū miiⁿ chi canéé na vaꞌai chɛɛti nguuvi mííⁿ canꞌdaā ꞌáámá nduudu neene díítūu lado yeⁿꞌe trono miiⁿ chí ngaⁿꞌā ꞌtúúcā: Āā tunééⁿ nducuéⁿꞌē.

18 Tuuꞌmi ní vɛ́ɛ́ ꞌcuaī ndúúcū nduudu sꞌeeⁿ ndúúcū daavi ndúúcū chi diituu nꞌdáí nꞌnuⁿꞌu yáⁿꞌāa. Ní chꞌɛɛtɛ ca nguɛ́ɛ́ ti tanꞌdúúcā chi cunee ndii tiempo chi ꞌiiⁿꞌyāⁿ canée yā iⁿꞌyeeⁿdí ꞌcūū. 19 Ní yáāⁿ chꞌɛɛtɛ chi yáāⁿ Babilonia miiⁿ chiī ꞌiīnū taaⁿ ní nducuéⁿꞌē yáāⁿ yeⁿꞌē iⁿꞌyeeⁿdí ꞌcūū ní sndɛɛvɛ. Ní Ndyuūs nnꞌgáácú yā yeⁿꞌe yáāⁿ chꞌɛɛtɛ chi yáāⁿ Babilonia miiⁿ. Ní caꞌá yā ꞌiiⁿꞌyāⁿ chi canéé na yáāⁿ sꞌeeⁿ chi cuꞌú yā vino yeⁿꞌé yā chi vino yeⁿꞌe vaadī taaⁿ yeⁿꞌé Ndyuūs. Ní vino miiⁿ chi caꞌá yā ní castigo chi neené díítūu. 20 Ní tanducuéⁿꞌē yáⁿꞌāa islas ndúúcū tanducuéⁿꞌē yiīcū nꞌgɛɛtɛ ní ndáá inaaaⁿ. 21 Ní yeⁿꞌe nanguuvi ní ndɛɛvɛ nꞌdeee nꞌdáí yuūúⁿ chi neené diituú vmnaaⁿ ꞌiiⁿꞌyāⁿ yeⁿꞌe iⁿꞌyeeⁿdī. ꞌÁámá áámá yuūuⁿ miiⁿ nꞌgii tanꞌdúúcā ꞌuūvī ngɛɛcu kilos. Ní ꞌiiⁿꞌyāⁿ yeⁿꞌe iⁿꞌyeeⁿdī caaⁿꞌmaⁿ taáⁿ yā yeⁿꞌé Ndyuūs cáávā yeⁿꞌe vaadī yaꞌai miiⁿ yeⁿꞌe yuūuⁿ ti castigo yeⁿꞌē vaadī yaꞌai miiⁿ ní nééné díítūu.