Angeles ndúúcū tá ndɛɛ̄chɛ̄ yáꞌāī
15
Cuayiivi ní nꞌdiichí táámá señal na vaꞌai chɛɛti nguuvi chí chꞌɛɛtɛ nꞌdai ní cheⁿꞌe yiinú yeⁿꞌē. Ní vɛ́ɛ́ ndɛɛ̄chɛ̄ ángeles ndúúcū ndɛɛ̄chɛ̄ chi cuuvi ꞌnuūcáꞌai chí ꞌcuiinu. Ní ndúúcū ndɛɛ̄chɛ̄ chi cuuvi ꞌnuūcáꞌai chí ꞌcuiinu, ndúúcū chuú nūuⁿ ꞌcuiīnū tiempo chi Ndyuūs nduuvi taáⁿ yā.2 Tuuꞌmi nꞌdiichí ꞌáámá nuūⁿnīⁿꞌyáⁿꞌā chi tanꞌdúúcā vidrio ndístaⁿꞌa ndúúcū nguūchī yáⁿꞌā. Ní ꞌiiⁿꞌyāⁿ sꞌeeⁿ chi chɛɛ́ yā cuⁿꞌu yā ndúúcū ꞌiiti monstruo miiⁿ ndúúcū ꞌiiti chi santo yeⁿꞌé tī ndúúcū ꞌiiⁿꞌyāⁿ chi canéé chi duuchí tī ní número yeⁿꞌé tī na cuerpo yeⁿꞌe yā, ꞌiiⁿꞌyāⁿ chi ichɛ́ɛ yā yeⁿꞌe ꞌiiⁿꞌyāⁿ sꞌeeⁿ chééndii yā niiⁿnuúⁿ ná nuūⁿnīⁿꞌyáⁿꞌā chi vidrio miiⁿ, ní ndɛɛ yā arpas chi Ndyuūs caꞌá yā ꞌiiⁿꞌyāⁿ sꞌeeⁿ. 3 Ní chiitá yā canto yeⁿꞌe Moisés, chi saⁿꞌā chi dichííꞌvɛ sa Ndyuūs. Ní chiitá yā canto yeⁿꞌe ꞌiiⁿꞌyāⁿ chi nguuvi ꞌiiti cuūchī. Ní ꞌtíícā nduudu chi chiitá yā:
Dii Señor Ndyuūs chi vɛ́ɛ́ tanducuéⁿꞌē denduꞌū poder ndúúcu di. Nꞌgɛɛtɛ taavi ca dii ní ngeⁿꞌe yiinu yú yeⁿꞌe tanducuéⁿꞌē denduꞌū chi diiⁿ di. Dii rey yeⁿꞌe tanducuéⁿꞌē nación ní yúúní yeⁿꞌe di ní cuaacu.
4 Díí, Señor, ¿duꞌū nguɛ́ɛ́ ꞌvaꞌā dii? ¿Duꞌū nguɛ́ɛ́ caaⁿꞌmaⁿ chi dii ní neené chꞌɛɛtɛ dii ti dámaaⁿ dii chi dɛɛvɛ di? Ní ndaa ꞌiiⁿꞌyāⁿ yeⁿꞌe tanducuéⁿꞌē naciones nanááⁿ dii chi dichꞌɛɛtɛ́ yā dii caati nducyáácá ꞌiiⁿꞌyāⁿ nꞌdiichi yā chi diiⁿ di tanducuéⁿꞌē denduꞌū chi cuaacu ní nꞌdaacā nꞌdai.
5 Ní cuayiivi ní nꞌdiichí chi nanguaaⁿ cheendi vaꞌāī yeⁿꞌe yáacū chi canéé na vaꞌai chɛɛti nguuvi, ní chɛɛti yaācū miiⁿ, miiⁿ canéé cuarto chí yaānūu naachi canéé tuūu chꞌɛɛtɛ́ chi canéé nguūⁿ ley yeⁿꞌe Moisés. 6 Ní yeⁿꞌe yaācū miiⁿ canꞌdáā ndɛɛ̄chɛ̄ ángeles. Ní ndɛɛ yā nduꞌu ndɛɛ̄chɛ̄ chí nꞌnuu cáꞌai yā. Ní vɛ́ɛ́ catecai yā yeⁿꞌe tiīnūuⁿ chi nguuvi lino chi cuɛ́ɛ̄ ní dɛɛvɛ. Ní nꞌdɛɛ̄ chiīchí niiⁿnuⁿ yā ndúúcū cinta yeⁿꞌe ꞌdííⁿnguāaⁿ. 7 Núúⁿmáⁿ chɛɛtí nūuⁿ ꞌáámá ꞌiiⁿꞌyāⁿ naachi na cuuúⁿ yā ní caꞌa yā nduꞌu ndɛɛ̄chɛ̄ ángeles ndɛɛ̄chɛ̄ ꞌcuutií yeⁿꞌe ꞌdííⁿnguāaⁿ caꞌáámá caꞌáámá yā ꞌáámá ꞌcuutií chi ndiituú yeⁿꞌē castigo chi neene taaⁿ chi yeⁿꞌe Ndyuūs chi canduuchi cueⁿꞌe daāⁿmaⁿ. 8 Ní yaācū miiⁿ ndiituú ꞌyaaⁿꞌmiⁿ chi canꞌdaā yeⁿꞌe vaadī chꞌɛɛtɛ taavi ca yeⁿꞌe Ndyuūs ní yeⁿꞌe poder yeⁿꞌe yā. Ní mar ꞌáámá ꞌiiⁿꞌyāⁿ cuuví cundaa yā na yaācū miiⁿ ndíí taachi chóꞌōo ndɛɛ̄chɛ̄ vaadī yaꞌai chi ndɛ́ɛ nduꞌu ndɛɛ̄chɛ̄ ángeles.