Ngiitá ꞌiiⁿꞌyāⁿ chi ꞌáámá ciento canéé ꞌuūvī ngɛɛcu cuūuⁿ mil yeⁿꞌe chí nanguaⁿꞌai yā
14
Cuayiivi ní nꞌdiichí ꞌiiⁿꞌyāⁿ chi nguuvi ꞌiiti cuūchī chi chééndii yā ná yiīcū chi nguuvi Sión. Ní nduucú yā canéé ꞌáámá ciento ꞌuūvī ngɛɛcu cuūuⁿ mil ꞌiiⁿꞌyāⁿ chi ndɛɛ yā chi duuchí yā ndúúcū chi duuchi chiidá yā chi canee nguūⁿ nchɛɛtɛ́ yā. 2 Ní chꞌiindiveéⁿ ꞌáámá nduudu chí ngeⁿꞌē na vaꞌai chɛɛti nguuvi. Ní nduudu miiⁿ tanꞌdúúcā chi yuūdūu nꞌgɛɛtɛ chi chíi yā nꞌdai nuūⁿnīⁿ o tanꞌdúúcā chi nꞌgɛɛcu ꞌáámá daavi chꞌɛɛtɛ; ní nduudu miiⁿ ní tanꞌdúúcā chi nꞌgɛɛcu nꞌdeee nꞌdáí arpas chi idiꞌcuɛɛ̄cú ꞌiiⁿꞌyāⁿ. ꞌTíícā nduudu miiⁿ. 3 Ní ꞌiiⁿꞌyāⁿ chi nꞌdeee nꞌdáí miiⁿ chi snée yā nanááⁿ trono miiⁿ ní nanááⁿ nduꞌu cuūúⁿ ꞌiiⁿꞌyāⁿ miiⁿ ní nanááⁿ ꞌiīⁿntyéⁿꞌē miiⁿ ní ngiitá yā ꞌáámá canto chi ngai. Ní mar ꞌáámá ꞌiiⁿꞌyāⁿ nguɛ́ɛ́ ngii nꞌgeeⁿ yā canto miiⁿ, dámaāⁿ nduꞌu chi ꞌáámá ciento ꞌuūvī ngɛɛcu cuūuⁿ mil ꞌiiⁿꞌyāⁿ chí Ndyuūs nadanguáⁿꞌai yā nguaaⁿ ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. 4 Ní ꞌiiⁿꞌyāⁿ sꞌeeⁿ chi saⁿꞌā chi nguɛ́ɛ́ ngaⁿꞌá yā ndúúcū mar ꞌáámá nꞌdaataá ní nguɛ́ɛ́ nꞌgiindivaacú yā. Ní caⁿꞌa yā ndúúcū ꞌiiⁿꞌyāⁿ chi nguuvi ꞌiiti cuūchī ꞌāā tií nūuⁿ cuaaⁿ naachi caⁿꞌá yā. Ní ꞌiiⁿꞌyāⁿ sꞌeeⁿ Ndyuūs yaaꞌví yā chi cuuvi yeⁿꞌe yā yeⁿꞌe nducyaaca ꞌiiⁿꞌyāⁿ. Ní ꞌiiⁿꞌyāⁿ sꞌeeⁿ ꞌiiⁿꞌyāⁿ chi vmnááⁿ vmnaaⁿ chi chꞌīi yā cáávā chi diíⁿ yā ntiiⁿnyuⁿ yeⁿꞌé Ndyuūs ní yeⁿꞌe ꞌiiⁿꞌyāⁿ chi duuchi ꞌiiti cuūchī. 5 ꞌIiⁿꞌyāⁿ sꞌeeⁿ nguɛ́ɛ́ ngaⁿꞌá yā mar ꞌáámá nduudu yaadi ní nguɛ́ɛ́ vɛ́ɛ́ nuuⁿndi yeⁿꞌe yā nanááⁿ trono yeⁿꞌe Ndyuūs.Yeⁿꞌe chi ngaⁿꞌā ꞌiīnū ángeles
6 Tuuꞌmi ní nꞌdiichí tááma ángel ngaá yā naavtaⁿꞌā nanguuvi. Ní ángel miiⁿ ní ndɛ́ɛ yā nduudu chí canéé cueⁿꞌe daāⁿmaⁿ chi nduudu ngai chi nanguaⁿꞌai ꞌiiⁿꞌyāⁿ. Ní ngaⁿꞌá yā nduudu ngai miiⁿ nanááⁿ nducyaaca ꞌiiⁿꞌyāⁿ yeⁿꞌe iⁿꞌyeeⁿdí ꞌcūū, nanááⁿ nducuéⁿꞌē naciones ndúúcū nducuéⁿꞌē tribus yeⁿꞌe ꞌiiⁿꞌyāⁿ ndúúcū nducyaaca davaacu yeⁿꞌe tanducuéⁿꞌē ꞌiiⁿꞌyāⁿ ndúúcū nducyaaca ꞌiiⁿꞌyāⁿ chi snée yā na yáⁿꞌāa ꞌcūū. 7 Ní ángel miiⁿ caⁿꞌá yā ndúúcū ꞌáámá nduudu díítūu: Ndísꞌtiī ꞌvaꞌá nī Ndyuūs, dichꞌɛɛtɛ́ nī ꞌiiⁿꞌyāⁿ ti ꞌāā ndaa hora chi diíⁿ yā juzgar nducyaaca ꞌiiⁿꞌyāⁿ. Dichꞌɛɛtɛ́ nī ꞌiiⁿꞌyāⁿ chi dinꞌdái yā nanguuvi ndúúcū yáⁿꞌāa ndúúcū nuūⁿnīⁿꞌyáⁿꞌā ndúúcū naachí icānꞌdaa nuūⁿnīⁿ.
8 Ní nꞌdiichí taama ángel canꞌdáa yā ángel miiⁿ ní ngaⁿꞌá yā: Yáāⁿ Babilonia ꞌāā ntuūvīi. Yáāⁿ Babilonia chi yáāⁿ chꞌɛɛtɛ miiⁿ ꞌāā ntuūvīi ti ꞌiiⁿꞌyāⁿ yeⁿꞌe yáāⁿ miiⁿ ní diíⁿ yā chi tanáⁿꞌā ꞌiiⁿꞌyāⁿ yeⁿꞌe nducuéⁿꞌē nación dinuuⁿndi cá yā ní caⁿꞌá yā ndúúcū nꞌdaataá ó isaⁿꞌā chi nguɛ́ɛ́ yeⁿꞌé yā ti diíⁿ yā nuuⁿndi tanꞌdúúcā chi diiⁿ ꞌiiⁿꞌyāⁿ sꞌeeⁿ.
9 Ní cuayiivi ní nꞌdiichí ndii ꞌíínú ángel miiⁿ canꞌdáa yā ángel sꞌeeⁿ ní caⁿꞌa yuudu yā: Nduuti chi ꞌáámá ꞌiiⁿꞌyāⁿ cuꞌtéénu yā ꞌiiti monstruo miiⁿ ndúúcū ꞌiiti santo chi dáámá ndúúcū ꞌiiti miiⁿ ni ꞌiiⁿꞌyāⁿ ndɛ́ɛ yā sello yeⁿꞌé tī nchɛɛtɛ́ yā o na taꞌá yā, 10 canéé chi cutaꞌá yā neené taaⁿ castigo chi Ndyuūs caⁿꞌá yā caꞌa yā ꞌiiⁿꞌyāⁿ miiⁿ. Ní castigo miiⁿ tanꞌdúúcā ꞌáámá copa diituu ndúúcū vaadī taaⁿ yeⁿꞌe Ndyuūs. ꞌTíícā va. Ní castigo miiⁿ ní chiiⁿ chi ꞌiiⁿꞌyāⁿ sꞌeeⁿ cuuvi yáꞌáí yeⁿꞌé yā ndúúcū nguuchi yáⁿꞌā ní ndúúcū tuūu chi nguuvi azufre chi nguuchi yaⁿꞌā ní cuuvi chóꞌōo chuū nanááⁿ ángeles yeⁿꞌé Ndyuūs ní nanááⁿ ꞌiiⁿꞌyāⁿ chi duuchi ꞌiiti cuūchī. 11 Ní ꞌyááⁿꞌmíⁿ yeⁿꞌē nguuchi yáⁿꞌā miiⁿ chi castigo miiⁿ ngɛɛ cueⁿꞌe daāⁿmaⁿ yeⁿꞌe lugar chi nꞌgeenu yā ngii. Ní ꞌiiⁿꞌyāⁿ sꞌeeⁿ chi nꞌgeenú yā ngii ní iꞌtéénu yā ꞌiiti monstruo miiⁿ chí chꞌɛɛtɛ taavi ca ndúúcū ꞌiiti chi santo yeⁿꞌé tī. Ní ndɛɛ́ yā seña yeⁿꞌé chi duuchí tī na cuerpo yeⁿꞌé yā. ꞌIiⁿꞌyāⁿ sꞌeeⁿ nguɛ́ɛ́ ntaaviꞌtuunúúⁿ yā yeⁿꞌe chi yaꞌáí yā ndíí nguɛ́ɛ́ nguuvi ndíí nguɛ́ɛ́ nꞌgaaⁿ. 12 Ní cáávā chuū ꞌiiⁿꞌyāⁿ chi yeⁿꞌe Ndyuūs ní nꞌgiindiveéⁿ yā mandamiento yeⁿꞌé yā ní ꞌáámá canéé yā chi iꞌtéénu yā Cristo ní canéé chi vɛɛ paciencia yeⁿꞌe yā.
13 Cuayiivi ní ꞌúú chꞌiindiveéⁿ ꞌáámá nduudu yeⁿꞌe vaꞌai chɛɛti nguuvi chi ngaⁿꞌa ngii ꞌúú ꞌtíícā: Díí, Juan, dingúuⁿ di chuū. Dɛꞌɛ̄ chúúcā yeenu ꞌiiⁿꞌyāⁿ chi caⁿꞌá yā ꞌcuūvi yā tiempo ꞌcūū ndíí tiempo chi cuchiī, ꞌiiⁿꞌyāⁿ chi iꞌtéénu yā Señor. Ní ꞌtíícā cuuvi ngaⁿꞌa Espíritu Nꞌdai yeⁿꞌé Ndyuūs. Ní ꞌiiⁿꞌyāⁿ sꞌeeⁿ ntaaviꞌtuunuúⁿ yā yeⁿꞌe ntiiⁿnyuⁿ yeⁿꞌé yā ní candɛɛ́ yā ndúúcu yā yeⁿꞌe chi díiⁿ yā.
Cosecha yeⁿꞌe yáⁿꞌāa ꞌcūū
14 Cuayiivi miiⁿ ní nꞌdiichí ꞌáámá meēeⁿ cuɛ́ɛ̄. Ní ꞌáámá ꞌiiⁿꞌyāⁿ vɛ́ɛ yā vmnaaⁿ meēeⁿ miiⁿ ní tandúúcā Jesucristo chi duuchi Sáⁿꞌā chi Daiya ꞌIiⁿꞌyāⁿ yeⁿꞌe iⁿꞌyeeⁿdí ꞌcūū. Canduu tiíⁿ yā ꞌáámá corona yeⁿꞌe ꞌdííⁿnguāaⁿ ní na caꞌá yā ní ndɛ́ɛ yā ꞌáámá hoz chi ꞌcaāiⁿ. 15 Ní nꞌdiichí táámá ángel canꞌdáa yā yeⁿꞌe yaācū miiⁿ yeⁿꞌe Ndyuūs ní yuudu caⁿꞌa yā ndúúcū ꞌiiⁿꞌyāⁿ chi vɛ́ɛ yā na meēéⁿ miiⁿ. ꞌCáácá dí cosecha ndúúcū hoz yeⁿꞌe di ti maaⁿ ní ꞌāā tiempo yeⁿꞌe chi diiⁿ di cosechar ti cosecha yeⁿꞌē yáⁿꞌāa miiⁿ ꞌāā nꞌdaacā.
16 Nííⁿnuúⁿ nūuⁿ ꞌiiⁿꞌyāⁿ chi vɛ́ɛ yā na meēeⁿ miiⁿ chꞌiicá yā cosecha yeⁿꞌe yā chi canéé na yáⁿꞌāa ní ntaꞌá yā.
17 Tuuꞌmi ní táámá ángel canꞌdáa yā yeⁿꞌe yaācū miiⁿ chiiⁿ canéé na vaꞌai chɛɛti nguuvi. Ní ꞌtiicá ntúūⁿ ángel miiⁿ ndɛ́ɛ yā ꞌáámá hoz chi ꞌcaāiⁿ. 18 Ní táámá ángel chi candɛɛ́ yā cuidado yeⁿꞌe nguuchi yaⁿꞌā vmnaaⁿ nátaī yeⁿꞌe yaācū miiⁿ canꞌdáa yā yeⁿꞌe nátaī ní caⁿꞌa yuudu yā ángel chi ndɛɛ yā hoz chí ꞌcaāiⁿ. Dii ꞌcaaca di ndúúcū hoz ꞌcaāiⁿ yeⁿꞌe di duuⁿnē ꞌlííⁿ yeⁿꞌe yáⁿꞌá ꞌlííⁿ miiⁿ ndúúcū nꞌguiꞌi chi uvas chi canéé na yáⁿꞌāa ní cutaꞌa di uvas miiⁿ ti nꞌguíꞌí yeⁿꞌē ꞌāā nꞌdaacā maaⁿ.
19 Tuuꞌmi ní ángel miiⁿ ndúúcū hoz ꞌcaāiⁿ yeⁿꞌé yā chꞌiica yā duuⁿne ꞌlííⁿ yeⁿꞌe yáⁿꞌá chi snéé ndúúcū nꞌguiꞌi uvas yeⁿꞌe chi canee vmnaaⁿ yáⁿꞌá. Ní ntaꞌá yā nꞌguiꞌi uvas ní sꞌnéeⁿ yā nꞌguiꞌi uvas miiⁿ na trapiche naachi cutaꞌá yā nuūⁿnīⁿ uvas miiⁿ chi vino. Ní trujal miiⁿ ní tanꞌdúúcā castigo chi chꞌɛɛtɛ nꞌdai chi Ndyuūs caⁿꞌa yā chí caꞌa yā ꞌiiⁿꞌyāⁿ. 20 Ní trapiche naachi cutaꞌá yā nuūⁿnīⁿ yeⁿꞌe uvas miiⁿ canéé ꞌáámá lado yeⁿꞌē yáāⁿ miiⁿ. Ní yeⁿꞌe trapiche canꞌdaā nꞌdeee nꞌdáí yuūuⁿ chí yaacu. Ní yuūuⁿ miiⁿ tanꞌdúúcā ꞌáámá yíícú chꞌɛɛtɛ yuūuⁿ chi ngii caadi ꞌiīnū ciento kilómetros yeⁿꞌē. Ní yaacu nꞌdáí indáá ndii na freno yeⁿꞌe ꞌyúudūu.