Yeⁿꞌe ꞌuūvī ꞌiiti taaⁿ chi nguuvi monstruo
13
Tuuꞌmi ní taachi chééndií vmnaaⁿ yáⁿꞌāa ndúútīi yeⁿꞌe nuūⁿnīⁿꞌyáⁿꞌā miiⁿ nꞌdiichí chi canꞌdaa ꞌáámá ꞌiiti chi chꞌɛɛtɛ taavi ca yeⁿꞌe nuuⁿnīⁿꞌyáⁿꞌā. ꞌIiti miiⁿ ní nguuvi monstruo ní vɛ́ɛ́ ndɛɛ̄chɛ̄ tiíⁿ tī ndúúcū ndiichi duuⁿniiⁿníⁿ tī. Ní vmnaaⁿ ꞌáámá ꞌaama duuⁿniiⁿníⁿ tī sndúūⁿ ꞌáámá corona. Ní canéé nguūⁿ caꞌáámá cāꞌaama tiíⁿ tī chi duuchi chi nguɛ́ɛ́ inee yíínūu Ndyuūs. 2 ꞌIiti chí monstruo chí chꞌɛɛtɛ mííⁿ chí nꞌdiichí ní tanꞌdúúcā ꞌiiti chi leopardo, ꞌtiicá tī. Caꞌa tī ní tanꞌdúúcā caꞌa oso, ꞌtíícā caꞌa tī. Cheendí tī ní tanꞌdúúcā cheendi ꞌyáíⁿyāaⁿ cuáꞌaá, ꞌtíícā cheendí tī. ꞌIiti dragón miiⁿ caꞌá tī poder yeⁿꞌé tī ndúúcū trono yeⁿꞌé tī na taꞌa ꞌiiti monstruo chí chꞌɛɛtɛ miiⁿ chi ngaⁿꞌa ntiiⁿnyúⁿ tī. 3 Ní nꞌdiichí chi ꞌáámá chɛ́ɛ́ tíīⁿ ꞌiiti monstruo chi chꞌɛɛtɛ taavi ca ní tanꞌdúúcā chi ncaꞌāī ꞌáámá ꞌiiti chi nꞌdíí ní nduūvā yeⁿꞌé tī, ꞌtíícā ꞌáámá tiíⁿ tī. Ní nducyáácá ꞌiiⁿꞌyāⁿ yeⁿꞌe iⁿꞌyeeⁿdí ꞌcūū nééné cheⁿꞌe yiinú yā yeⁿꞌe chuū. Ní cueⁿꞌé yā ndúúcū ꞌiiti monstruo miiⁿ. 4 Ní nducyaacá yā sꞌtéénu yā ꞌiiti dragón miiⁿ cáávā chi caꞌá tī poder yeⁿꞌé tī táámá ꞌiiti chi monstruo chi chꞌɛɛtɛ taavi ca. Ní ꞌiiⁿꞌyāⁿ ꞌtiicá ntúūⁿ chiꞌtéénu yā ꞌiiti monstruo miiⁿ. Tuuꞌmi ní caⁿꞌa yā: ¿Duꞌu vɛ́ɛ́ poder yeⁿꞌē tanꞌdúúcā ꞌiiti monstruo ꞌcūū? ¿Duꞌu cúúví ꞌcuuⁿꞌmaⁿ ndúúcū ꞌiiti monstruo ꞌcūū ní cuchɛɛ ndúúcū ꞌiití ꞌcūū?5 Ní ꞌiiti dragón caꞌá tī poder ꞌiiti monstruo miiⁿ chi caaⁿꞌmáⁿ tī denduꞌū chi chꞌɛɛtɛ. Ní cunncáā ngaⁿꞌa tī contra yeⁿꞌe Ndyuūs. Ní diꞌtiinuú tī chi ngaⁿꞌa ntiiⁿnyuⁿ tī ꞌtúúcā chɛ́ɛ́ti ꞌuūvī ngɛɛcu ꞌuūvī ꞌiiyū. 6 Ní ꞌtíícā idiiⁿ ꞌiiti monstruo. Ní cunncáā ngaⁿꞌa tī contra yeⁿꞌe Ndyuūs ní ngaⁿꞌa tī cunncáā contra yeⁿꞌe chi duuchi Ndyuūs ní contra yeⁿꞌe vaꞌai chɛɛti nguuvi naachi Ndyuūs chꞌɛɛtinée yā ní contra yeⁿꞌe ꞌiiⁿꞌyāⁿ chi snée yā ndúúcū Ndyuūs. 7 Ní ꞌtiicá ntúūⁿ ꞌiiti dragón caꞌá tī poder ꞌiiti monstruo miiⁿ chi diíⁿ tī vaadī ꞌcaaꞌva ndúúcū ꞌiiⁿꞌyāⁿ chi yeⁿꞌé Ndyuūs ndíí chi chɛɛ tī ndúúcū ꞌiiⁿꞌyāⁿ sꞌeeⁿ. Ní caꞌá tī poder ꞌiiti monstruo chi ngaⁿꞌa ntiiⁿnyúⁿ tī yeⁿꞌe tanducuéⁿꞌē raza yeⁿꞌe ꞌiiⁿꞌyāⁿ yeⁿꞌe tanducuéⁿꞌē yáāⁿ ndúúcū yeⁿꞌe tanducuéⁿꞌē davaacu ndúúcū yeⁿꞌe tanducuéⁿꞌē nación. 8 Ní nducyáácá ꞌiiⁿꞌyāⁿ chi snée yā na yáⁿꞌāa cuꞌtéénu yā ꞌiiti monstruo miiⁿ. ꞌTíícā néⁿꞌe Ndyuūs. Ní nguɛ́ɛ́ canéé nguūⁿ chi duuchi ꞌiiⁿꞌyāⁿ sꞌeeⁿ na libro yeⁿꞌe vida cueⁿꞌe daāⁿmaⁿ chi yeⁿꞌe ꞌiiⁿꞌyāⁿ chi duuchi ꞌiiti cuūchī. Ní ꞌiiⁿꞌyāⁿ sꞌeeⁿ chꞌiiⁿꞌnúⁿ yā Cristo ndii tiempo chi Ndyuūs dinꞌdái yā iⁿꞌyeēⁿdī.
9 Nduuti chi ꞌáámá ꞌiiⁿꞌyāⁿ vɛ́ɛ́ veéⁿ yā ꞌcaandiveéⁿ yā nduudu ꞌcūū. 10 ꞌIiⁿꞌyāⁿ chi canꞌdaa yā ꞌiiⁿꞌyāⁿ chi cuuvi preso yā, ꞌtiicá ntúūⁿ maáⁿ yā canéé chí cuuvi preso yā. ꞌIiⁿꞌyāⁿ chi nꞌgiiⁿꞌnuⁿ yā ꞌiiⁿꞌyāⁿ ndúúcū machete ꞌuūvī lados ꞌcaāiⁿ canéé chí ꞌcuuvi ntúuⁿ yā ꞌtíícā. Ní cáávā chuū ꞌiiⁿꞌyāⁿ chi yeⁿꞌé Ndyuūs canéé chi vɛ́ɛ́ ꞌviichɛɛꞌtíínūuⁿ ndúúcu yā ní canéé chi iꞌtéénu yā Ndyuūs.
11 Cuayiivi ní nꞌdiichí táámá ꞌiiti monstruo chi chꞌɛɛtɛ ca chi canꞌdáa tī nguaaⁿ yáⁿꞌāa miiⁿ. Vɛ́ɛ́ ꞌuūvī duuⁿniiⁿníⁿ tī tanꞌdúúcā ꞌáámá duuⁿniiⁿniⁿ ꞌiiti cuūchī ꞌtiicá tī. Ní ꞌiiti monstruo ndii ꞌuūvī indeé tī tanꞌdúúcā ꞌáámá ꞌiiti dragón. 12 Ní vɛ́ɛ́ tanducuéⁿꞌē poder yeⁿꞌe ꞌiiti monstruo chi ndii ꞌuuvi chi chꞌɛɛtɛ taavi ca tanꞌdúúcā poder yeⁿꞌē ꞌiiti monstruo chꞌɛɛtɛ ca chí vmnaaⁿ. Ní diíⁿ tī chi ꞌiiⁿꞌyāⁿ yeⁿꞌē iⁿꞌyeeⁿdí ꞌcūū ní cuꞌtéénu yā ꞌiiti vmnááⁿ vmnaaⁿ chi ꞌiiti monstruo chi nacaꞌáí tī ní nduūvā yeⁿꞌé tī. 13 Ní ꞌiiti chi monstruo chí ndii ꞌuūvī diíⁿ tī vaadī nꞌgiinu chꞌɛɛtɛ nꞌdai. Diíⁿ tī chí canꞌdaa yaⁿꞌā yeⁿꞌē nanguuvi ndíí vmnaaⁿ yáⁿꞌāa ꞌcúū ní nꞌdeee nꞌdáí ꞌiiⁿꞌyāⁿ nꞌdiichí yā chuū. 14 Ní caavā vaadī nꞌgiinu chi diíⁿ tī taachi cheendií tī nanááⁿ ꞌiiti monstruo chi vmnááⁿ vmnaaⁿ chi teé tī lugar chi diíⁿ tī ꞌtúúcā, tuuꞌmi ní chinncheꞌéí tī ꞌiiⁿꞌyāⁿ chi chꞌɛɛtinée yā iⁿꞌyeeⁿdí ꞌcūū. Ní caꞌa tī orden ꞌiiⁿꞌyāⁿ sꞌeeⁿ chi dinꞌdái yā ꞌáámá santo ídolo tanꞌdúúcā ꞌiiti monstruo chi ncaꞌáí tī ndúúcū machete ꞌuūvī lados ꞌcaāiⁿ ní cunduuchi tī chi cuuvi santo yeⁿꞌe yā. 15 Ní ꞌiiti monstruo chi vmnááⁿ vmnaaⁿ ní caꞌá tī poder ꞌiiti monstruo chiiⁿ ndíí ꞌuuví tī chi caꞌá tī vida santo ꞌiiti ídolo miiⁿ. Ní ꞌíícú ꞌiiti santo tī cuuvi ꞌcaaⁿꞌmáⁿ tī ní diíⁿ tī chi ꞌcuūvi nducyáácá ꞌiiⁿꞌyāⁿ chi nguɛ́ɛ́ iꞌtéénu yā ꞌiiti santo miiⁿ. 16 Ní cuayiivi ní ꞌiiti monstruo chi ndii ꞌuūvī ní diíⁿ tī ntúūⁿ chi nducyaaca ꞌiiⁿꞌyāⁿ chi ngaⁿꞌa ntiiⁿnyúⁿ yā ndúúcū tanáⁿꞌā ꞌiiⁿꞌyāⁿ ndúúcū ꞌiiⁿꞌyāⁿ chi ꞌcuiica ndúúcū ꞌiiⁿꞌyāⁿ pobre yā ndúúcū ꞌiiⁿꞌyāⁿ chi libre yā ní ndúúcū ꞌiiⁿꞌyāⁿ chi ꞌáámá dichííꞌvɛ yā ꞌiivi yā, ꞌiiti monstruo miiⁿ diíⁿ tī chi nducyaaca yā canéé chi ndɛɛ yā ꞌáámá sello na taꞌa cuaacú yā o nchɛɛtɛ́ yā. 17 Ní diíⁿ ntúuⁿ tī ꞌtíícā. Mar ꞌáámá ꞌiiⁿꞌyāⁿ nguɛ́ɛ́ cuuvi cuái yā o nꞌdiicui yā nduuti chi nguɛ́ɛ́ ndɛɛ yā sello yeⁿꞌe ꞌiiti monstruo ndii ꞌuūvī o chi duuchí tī o número yeⁿꞌe chi duuchí tī. 18 Ní chuū ní ꞌiiⁿꞌyāⁿ chi déénu yā cuuvi diiⁿ yā. ꞌIiⁿꞌyāⁿ chi déénu yā caⁿꞌá yā ngaⁿꞌa duuchi yā chi dúúchí ꞌiiti monstruo ndíí ꞌuūvī miiⁿ ti número miiⁿ ní lado yeⁿꞌe chi duuchi ꞌáámá saⁿꞌā. Ní número miiⁿ ní ngii jaāⁿ ciento canduū ꞌiinu ngɛɛcu jaaⁿ.