Nꞌdaataá ndúúcū ꞌiiti dragón
12
Tuuꞌmi ní vɛ́ɛ́ ꞌáámá seña chi nééné chꞌɛɛtɛ chi chꞌiⁿꞌi na vaꞌai chɛɛti nguuvi. Nꞌdiichí ꞌáámá nꞌdaataá chi canuuⁿ tá catecai tanꞌdúúcā ꞌyáⁿꞌā. Ní ꞌiiⁿnyuⁿ miiⁿ ní canéé maaⁿ caꞌa tá. Ní canúūⁿ tiiⁿ tá ꞌáámá corona ndúúcū ndichuuvi ꞌiiⁿnyuⁿ. 2 Ní hora mííⁿ nūuⁿ ní cuuvi ꞌcuundiyáāⁿ daiya tá ní ꞌcāi yiicu tá ndúúcū vaadī yaꞌai chi cuuvi ꞌcuundiyáāⁿ daiya tá. Neené chꞌeenu tá chiī ní ꞌāā ꞌcuɛ́ɛ́ ꞌcuundiyáāⁿ daiya tá. 3 Ní nííⁿnuúⁿ nūuⁿ vɛ́ɛ́ táámá seña chi nééné chꞌɛɛtɛ chi chꞌiⁿꞌi nanguuvi. Nꞌdiichí ꞌáámá ꞌiiti cuáꞌāa chi chꞌɛɛtɛ ca chi nguuvi dragón. Ní vɛ́ɛ́ ndɛɛ̄chɛ̄ tiíⁿ tī ní ndiichí duuⁿniiⁿníⁿ tī. Ní canduu tiíⁿ tī ndɛɛ̄chɛ̄ coronas ꞌáámá ꞌáámá caꞌáámá cāꞌaama tiíⁿ tī. 4 Ní dragón miiⁿ ndúúcū ndúúcudaⁿꞌai tī diíⁿ tī chínꞌdaā na ꞌiinu parte yeⁿꞌe ꞌiiⁿnyúⁿ yeⁿꞌe nanguuvi ní chiiya ndii na yáⁿꞌāa. ꞌIiti dragón miiⁿ chééndii tī nanááⁿ nꞌdaataá chí ꞌcuundiyáāⁿ daiya tá ní ꞌíícú cuuvi cheꞌé tī daiya tá miiⁿ taachi ꞌcuundiyáāⁿ. 5 Tuuꞌmi ní nꞌdaataá miiⁿ ní chꞌiiⁿndiyáāⁿ ꞌáámá saⁿꞌā ꞌlííⁿ. Saⁿꞌā ꞌlííⁿ miiⁿ canéé chi diituu caaⁿꞌmaⁿ ntiiⁿnyuⁿ sa yeⁿꞌe tanducuéⁿꞌē naciones yeⁿꞌe iⁿꞌyeēⁿdī ndúúcū ꞌáámá nduucu cūū. Ní nííⁿnuúⁿ nūuⁿ ꞌáámá yā staꞌa yā saⁿꞌā ꞌlííⁿ mííⁿ ni cunaⁿꞌá yā ndúúcū dacuáꞌāa miiⁿ na vaꞌai chɛɛti nguuvi naachi canéé Ndyuūs chi vɛ́ɛ yā na trono yeⁿꞌe yā. 6 Nꞌdaata miiⁿ ní chéénū ta na yáⁿꞌāa cuūⁿmaⁿ naachi nguɛ́ɛ́ chꞌɛɛtinéé ꞌiiⁿꞌyāⁿ ní miiⁿ nūuⁿ Ndyuūs dinꞌdái yā ꞌáámá lugar cáávā táⁿꞌā miiⁿ. Ní miiⁿ Ndyuūs caꞌá yā chi cheꞌe tá ꞌáámá mil canee ꞌuūvī ciento nduuyu canéé ꞌiinū ngɛɛcu nguuvi.7 Cuayiivi ní vɛ́ɛ́ ꞌaama caandaá chꞌɛɛtɛ na vaꞌai chɛɛti nguuvi. Angel Miguel chi ngaⁿꞌa ntiiⁿnyuⁿ ndúúcū ángeles yeⁿꞌé yā ꞌcuⁿꞌu yā contra yeⁿꞌe ꞌiiti dragón. Ní ꞌiiti dragón miiⁿ ndúúcū ángeles yeⁿꞌé tī ꞌcuⁿꞌu tī ndúúcū ángel Miguel miiⁿ. 8 Naati ꞌiiti dragón miiⁿ nguɛ́ɛ́ diíⁿ tī ganar caandaá chꞌɛɛtɛ miiⁿ. Ní ꞌāā ntɛ́ɛ́ vɛ́ɛ́ lugar cááva tī na vaꞌai chɛɛti nguuvi. 9 ꞌÁámá ꞌiiⁿꞌyāⁿ chꞌɛɛcú yā ꞌiiti dragón miiⁿ ndúúcū nducyaaca ángeles yeⁿꞌé tī ndíí iⁿꞌyeeⁿdí ꞌcūū. ꞌIiti dragón miiⁿ chi chꞌɛɛtɛ ní ꞌiiti cúú miiⁿ ndíí vmnááⁿ vmnaaⁿ chi yááⁿnꞌguiinūuⁿ chi Satanás. ꞌIiti cúú miiⁿ ní chinncheꞌéí tī núúⁿmáⁿ íⁿꞌyeeⁿdī.
10 Tuuꞌmi ní chꞌiindiveéⁿ ꞌáámá nduudu chí diītūū nꞌdai yeⁿꞌe na vaꞌai chɛɛti nguuvi chi ngaⁿꞌa ꞌtíícā: Maaⁿ ní ndaā tiempo chi Ndyuūs yeⁿꞌe yú nadanguáⁿꞌai yā ꞌiiⁿꞌyāⁿ yeⁿꞌé yā. Ní chꞌiⁿꞌí yā poder yeⁿꞌé yā chi rey yā. Ní ngaⁿꞌa ntiiⁿnyúⁿ yā yeⁿꞌe tanducuéⁿꞌē denduꞌū yeⁿꞌe yā. Ní Cristo chꞌiⁿꞌí yā chi ꞌiiⁿntyéⁿꞌe yā caati saⁿꞌā miiⁿ chi Satanás chí caꞌa sa nuuⁿndi yeⁿꞌe hermanos yeⁿꞌe yú ndíí ngúúví ndíí nꞌgááⁿ nanááⁿ Ndyuūs, ꞌiiⁿꞌyāⁿ chꞌɛɛcú yā saⁿꞌā miiⁿ ndii vaꞌai chɛɛti nguuvi ndii na yáⁿꞌāa. 11 Ní hermanos yeⁿꞌe yú chichɛɛ́ yā yeⁿꞌe yááⁿnꞌguiinūuⁿ cáávā yuūuⁿ yeⁿꞌe Cristo chi nguuvi ꞌiiti cuūchī, ní cáávā chi ngaⁿꞌá yā nduudu cuaacu yeⁿꞌe Ndyuūs, ni cáávā chi nguɛ́ɛ́ ꞌvaꞌá yā yeⁿꞌe vida yeⁿꞌe maáⁿ yā chi chꞌīi ya cáávā Señor Jesucristo yeⁿꞌe yú. 12 Ndísꞌtiī chi canéé na vaꞌai chɛɛti nguuvi yeenú nī, naati dɛꞌɛ̄ chúúcā yaꞌāī yeⁿꞌé nducyaaca chi snéé na yáⁿꞌāa ꞌcúū ndúúcū nducyaaca chi snéé na nuūⁿnīⁿꞌyáⁿꞌā caati yááⁿnꞌguiinūuⁿ ndaa sa nanáaⁿ yā. Ní neené taaⁿ sa ti deenu sa chí ꞌāā ntɛ́ɛ́ cuuvi ꞌnaaⁿ sa na iⁿꞌyeēⁿdī.
13 Taachi ꞌiiti dragón miiⁿ ní chicadíínuuⁿ tī chi ꞌāā candiití tī ndíí na yáⁿꞌāa, cheⁿꞌe tī canꞌdáa tī nꞌdaataá chi chꞌiiⁿndiyáāⁿ daiya tá chi ꞌcueenu tá cuuvi. 14 Naati ꞌáámá yā caꞌa yā nꞌdaata miiⁿ ꞌuūvī ngɛɛchi tá tanꞌdúúcā ngɛɛchi ꞌííꞌyāa chi chꞌɛɛtɛ ca. Ní ꞌiicú cuuvi caavā tá nanguuvi ní caⁿꞌa tá lugar yeⁿꞌe tá naachi nguɛ́ɛ́ ꞌiiⁿꞌyāⁿ. Ní yaⁿꞌai canee tá yeⁿꞌe ꞌiiti cúú chi yááⁿnꞌguiinūuⁿ. Ní ꞌiiⁿꞌyāⁿ caꞌá yā chi cheꞌe tá ꞌiīnū ndúuyū canéé maⁿꞌa. 15 Ní cúú miiⁿ tunꞌdáa tī na cheendi tī nꞌdeee nꞌdáí nuūⁿnīⁿ tanꞌdúúcā nuūⁿnīⁿ yeⁿꞌe ꞌáámá yíícú. Ní nuūⁿnīⁿ miiⁿ ní nduuvi yíícú chí cuuvi candɛɛ̄ táⁿꞌā miiⁿ ti ꞌtíícā neⁿꞌe cúú miiⁿ. 16 Naati yáⁿꞌāa miiⁿ chinnee nꞌdaataá mííⁿ ti nꞌdaꞌai tanꞌdúúcā ꞌiiⁿꞌyāⁿ nꞌdaꞌáí yā cheendí yā ní yáⁿꞌāa mííⁿ chiꞌi nuūⁿnīⁿ miiⁿ ní cheēnū nuūⁿnīⁿ miiⁿ chɛɛti yáⁿꞌāa, nuūⁿnīⁿ chi ꞌiiti dragón miiⁿ tunꞌdáa tī ndúúcū cheendí tī. 17 Ní ndúúcū chuū ꞌiiti dragón miiⁿ neené taaⁿ nꞌdáí tī ndúúcū nꞌdaataa mííⁿ ní chéⁿꞌe tī cuⁿꞌú tī ndúúcū tanáⁿꞌā ꞌiiⁿꞌyāⁿ ndaata yeⁿꞌē nꞌdaataa miiⁿ, ꞌiiⁿꞌyāⁿ chi diíⁿ yā chi ngaⁿꞌa mandamiento yeⁿꞌé Ndyuūs. Ní ꞌáámá caneé yā ndúúcū nduudu cuaacu yeⁿꞌe Jesucristo.