ꞌUuvi ꞌiiⁿꞌyāⁿ chi ngaⁿꞌa yā nduudu cuaacu
11
Tuuꞌmi ní ángel miiⁿ tee yā ꞌaama taaⁿ nduu ꞌúú ti tanꞌdúúcā ꞌáámá nduucu chi dicaadí yā, ꞌtíícā. Ní ángel miiⁿ ngaⁿꞌa yā ngii yā ꞌúú: Cuééndii di ní dícaadí dí yáacū yeⁿꞌe Ndyuūs ndúúcū nátaī. Ní dīduuchɛ di chɛɛti yaācū ꞌiiⁿꞌyāⁿ chi iꞌtéénu yā Ndyuūs. 2 Naati chuvaꞌāī yeⁿꞌe yáacū na patio miiⁿ nguɛ́ɛ́ dícaadí dí miiⁿ ti chiiⁿ ní caⁿꞌá ꞌiiⁿꞌyāⁿ chi nguɛ́ɛ́ iꞌtéénu yā Ndyuūs. ꞌIiⁿꞌyāⁿ sꞌeeⁿ ní ꞌcaancaꞌa yā nducuéⁿꞌē yáāⁿ miiⁿ chi yeⁿꞌé Ndyuūs ꞌuūvī ngɛɛcú ꞌuūvī ꞌiiyū. 3 Ní ngaⁿꞌá yā ꞌtíícā. ꞌÚú ní dichoꞌó ꞌuūvī ꞌiiⁿꞌyāⁿ chi ngaⁿꞌa cuaacú yā yeⁿꞌé, chi caaⁿꞌmáⁿ yā nduudu cuaacu yeⁿꞌé ꞌáámá mil canee ꞌuūvī ciento ndúúcū ꞌiinu ngɛɛcu nguuvi. Ní catecai yā ní ꞌiiⁿꞌyāⁿ chi luto yā.4 Ná ꞌuūvī ꞌiiⁿꞌyāⁿ sꞌeeⁿ chi ngaⁿꞌa cuaacu yeⁿꞌé, ꞌiiⁿꞌyāⁿ sꞌeeⁿ ní tanꞌdúúcā ꞌuūvī yáⁿꞌá yeⁿꞌe olivas ndúúcū ꞌuūvī candeleros chi snéé nanááⁿ Señor chi ꞌiivi yeⁿꞌe yáⁿꞌāa. 5 Ní nduuti chi ꞌáámá ꞌiiⁿꞌyāⁿ neⁿꞌe yā diíⁿ yā daño ꞌuuvi ꞌiiⁿꞌyāⁿ chi ngaⁿꞌa cuaacu yeⁿꞌé tuuꞌmi ní canꞌdáā nguuchi yaⁿꞌā na cheendi ꞌuūvī ꞌiiⁿꞌyāⁿ ní chꞌiīnū ꞌiiⁿꞌyāⁿ chi contra yeⁿꞌe yā. Ní ꞌtíícā cuuvi ꞌiiⁿꞌyāⁿ chi neⁿꞌé yā diíⁿ yā daño ꞌuuvi ꞌiiⁿꞌyāⁿ sꞌeeⁿ, canéé chi ꞌcuūvi yā ndúúcū nguuchi yaⁿꞌā. 6 ꞌUuvi ꞌiiⁿꞌyāⁿ chi caaⁿꞌmaⁿ cuaacu yeⁿꞌé ni vɛ́ɛ́ poder yeⁿꞌe yā chi cuuvi nnꞌgaadí yā nanguuvi ní ꞌíícú nguɛ́ɛ́ cueeⁿ cúúvī ꞌnaaⁿ tiempo chi ngaⁿꞌá yā nduudu cuaacu yeⁿꞌé Ndyuūs. Ní cuuví yā diíⁿ ntúuⁿ yā chi nuuⁿnīⁿ nduuvi yuūúⁿ. Ní diíⁿ yā chi ndáá nꞌdeee nꞌdáí caꞌai yeⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū, ní diíⁿ yā chuū ꞌāā dɛꞌɛ́ nūuⁿ tiempo taachi neⁿꞌe yā. 7 Ní cuayiivi taachi ꞌcuiinu caaⁿꞌmáⁿ yā nduudu cuaacu yeⁿꞌé Ndyuūs tuuꞌmí ꞌiiti taaⁿ chi nguuvi monstruo ní canꞌdáa tī yeⁿꞌe yiivɛ yáⁿꞌāa ní diīíⁿ caandaá tī ndúúcū ꞌuuvi ꞌiiⁿꞌyāⁿ sꞌeeⁿ. Ní cuchɛɛ tī yeⁿꞌe yā ní ꞌcaaⁿꞌnúⁿ tī ꞌuuvi ꞌiiⁿꞌyāⁿ sꞌeeⁿ. 8 Ní cuerpo yeⁿꞌe ꞌuūvī tináⁿꞌā sꞌeeⁿ cunéé na yúúní yeⁿꞌe yáāⁿ chꞌɛɛtɛ miiⁿ chi dáámá yáāⁿ miiⁿ naachi ꞌiiⁿꞌyāⁿ caꞌnééⁿngaꞌá yā Señor Jesucristo yeⁿꞌe yú na cruz. Ní ndúúcū táámá nduudu yáāⁿ chꞌɛɛtɛ miiⁿ tanꞌdúúcā yáāⁿ Sodoma o yáⁿꞌāa Egipto ti ꞌiiⁿꞌyāⁿ chi nguɛ́ɛ́ nꞌdaacā chꞌɛɛtinée yā miiⁿ. 9 Ní ꞌiiⁿꞌyāⁿ yeⁿꞌe yáāⁿ sꞌeeⁿ ndúúcū ꞌiiⁿꞌyāⁿ ndaataa sꞌeeⁿ ndúúcū ꞌiiⁿꞌyāⁿ yeⁿꞌe nꞌdeee nꞌdáí davaacu chi n̄ꞌdááⁿ ndúúcū ꞌiiⁿꞌyāⁿ yeⁿꞌe ꞌnaaⁿ naciones caⁿꞌá yā nꞌdiichi yā ꞌuūvī cuerpo chi tináⁿꞌā yeⁿꞌe ꞌiiⁿꞌyāⁿ chi nꞌdiī chɛ́ɛtī na ꞌíínú nguuvi canéé maⁿꞌa. Ní ꞌiiⁿꞌyāⁿ sꞌeeⁿ nguɛ́ɛ́ ꞌcuaáⁿ yā chi ꞌiiⁿꞌyāⁿ ꞌcuɛɛchi yā cuerpos yeⁿꞌe tináⁿꞌā yeⁿꞌe ꞌiiⁿꞌyāⁿ chi nꞌdíí miiⁿ. 10 Ní ꞌiiⁿꞌyāⁿ chi chꞌɛɛtinée yā na yáⁿꞌāa ní neené cuuvi yeenú yā chi nꞌdíí nduu ꞌuūvī profetas. Ní diíⁿ yā ꞌviicu. Ní dichoꞌó yā regalos yeⁿꞌe ꞌaamá yā taama yā caati ꞌuuvi profetas chi ngaⁿꞌa nduudu cuaacu yeⁿꞌé Ndyuūs diíⁿ yā chi ꞌiiⁿꞌyāⁿ sꞌeeⁿ nééné chꞌeenu yā chiī. 11 Naati cuayiivi chi chóꞌōo ꞌiinu nguuvi canéé maⁿꞌa Ndyuūs nadacuéeⁿ yā nduu ꞌuuvi ꞌiiⁿꞌyāⁿ sꞌeeⁿ yeⁿꞌe nguaaⁿ tináⁿꞌā. Ní nducyaaca ꞌiiⁿꞌyāⁿ diꞌvaꞌa yā yeⁿꞌe chi nꞌdiichi yā. 12 Ní cuayiivi mííⁿ ꞌuuvi ꞌiiⁿꞌyāⁿ sꞌeeⁿ chꞌiindiveéⁿ yā ꞌáámá nduudu yuudu nꞌdáí yeⁿꞌe ná vaꞌai chɛɛti nguuvi chi caⁿꞌā: Ndísꞌtiī, cuchɛ́ɛ nī ꞌmuuⁿ. Ní ꞌiiⁿꞌyāⁿ sꞌeeⁿ ní cuchɛ́ɛ yā na vaꞌai chɛɛti nguuvi na ꞌáámá meēeⁿ. Ní ꞌiiⁿꞌyāⁿ sꞌeeⁿ chi taaⁿ yā yeⁿꞌe yā nꞌdiichí yā chuū. 13 Ní hora mííⁿ nūuⁿ ꞌnuⁿꞌu taaⁿ yáⁿꞌāa ní ꞌáámá ndiichi parte yeⁿꞌe yáāⁿ miiⁿ chi nꞌdaā ní ndɛɛ̄chɛ̄ mil ꞌiiⁿꞌyāⁿ chꞌīi yā taachi nꞌnuⁿꞌu yáⁿꞌāa miiⁿ. Tanáⁿꞌa yā ní díꞌváꞌa yā ní dichꞌɛɛtɛ́ yā Ndyuūs chi canéé na vaꞌai chɛɛti nguuvi.
14 Chóꞌōo ndii ꞌuuvi vaadī yáꞌāī naati ní ndii chííⁿ ndii ꞌiinu miiⁿ ndaa núúⁿ.
Yeⁿꞌe ángel chí diꞌcuɛɛcú yā ndíí ndɛɛ̄chɛ̄ trompeta
15 Ní ndii chííⁿ ndii ndɛɛ̄chɛ̄ ángel miiⁿ diꞌcuɛɛcú yā trompetas yeⁿꞌe yā ní chꞌiindiveéⁿ ꞌnaaⁿ nduudu yuudu na vaꞌai chɛɛti nguuvi chi ngaⁿꞌā:
Maaⁿ ní Señor Ndyuūs yeⁿꞌe yú ndúúcū Cristo ní vɛɛ poder yeⁿꞌé yā tiempo maaⁿ chi caaⁿꞌmaⁿ ntiiⁿnyuⁿ yā cueⁿꞌe daāⁿmaⁿ yeⁿꞌe nducuéⁿꞌē ꞌiiⁿntyéⁿꞌē yeⁿꞌe íⁿꞌyeeⁿdī ndúúcū naachi ngaⁿꞌa ntiiⁿnyuⁿ yā ti nducuéⁿꞌē ní yeⁿꞌe Cristo maaⁿ. 16 Tuuꞌmi ní nduꞌu ndiicú cuūuⁿ ꞌiiⁿntyéⁿꞌē chi vɛ́ɛ yā na trono yeⁿꞌe yā nanááⁿ Ndyuūs chꞌɛɛti ndiitinꞌdíi yā ndúúcū naaⁿ yā na yáⁿꞌāa nanááⁿ Ndyuūs ní dichꞌɛɛtɛ́ yā Ndyuūs. 17 Ní ngaⁿꞌa yā:
Nꞌdiī Señor Ndyuūs chi vɛ́ɛ́ tanducuéⁿꞌē denduꞌū poder yeⁿꞌe nī, nꞌdiī chi canée nī tiempo maaⁿ ní canée nī tiempo ndíí vmnaaⁿ ní canéé nī ndíí tiempo chi cuchiī. Teé ꞌnū gracia nꞌdiī, Ndyuūs, ti nꞌdiī ní staꞌá nī poder chi yeⁿꞌé nī chí chꞌɛɛtɛ nꞌdai. Ní nꞌdiī ngaⁿꞌa ntiiⁿnyúⁿ nī maaⁿ.
18 Ní maaⁿ ní ndaa tiempo chi dituūví nī ꞌiiⁿꞌyāⁿ sꞌeeⁿ chi idituuví yā íⁿꞌyeeⁿdī. ꞌIiⁿꞌyāⁿ yeⁿꞌe naciones chi nguɛ́ɛ́ iꞌtéénu yā ní nduuvi taáⁿ yā ti ndaā nguuvi chi caꞌá nī castigo yeⁿꞌe ꞌiiⁿꞌyāⁿ sꞌeeⁿ ní hora chi cuuvi nꞌdiichí nī nuuⁿndi yeⁿꞌe tináⁿꞌā sꞌee. Ní caꞌá nī premio ꞌiiⁿꞌyāⁿ profetas chi dichííꞌvɛ̄ nꞌdiī ní ngaⁿꞌá yā nduudu cuaacu yeⁿꞌé nī. Ní caꞌá nī nducyáácá ꞌiiⁿꞌyāⁿ chi neⁿꞌe yā nꞌdiī ndúúcū ꞌiiⁿꞌyāⁿ chi dichꞌɛɛtɛ́ yā nꞌdiī, ꞌiiⁿꞌyāⁿ chi ngaⁿꞌa ntiiⁿnyúⁿ yā ndúúcū tanáⁿꞌā ꞌiiⁿꞌyāⁿ, nducyáácá ꞌiiⁿꞌyāⁿ chi iꞌtéénu yā Ndyuūs.
19 Tuuꞌmi ní ꞌáámá yā nꞌguaaⁿ yā cheendi vaꞌāī yeⁿꞌe yáacū yeⁿꞌe Ndyuūs, yáacū chi canéé na vaꞌai chɛɛti nguuvi. Ní mííⁿ canéé arca chi caja naachi canéé compromiso yeⁿꞌe Ndyuūs. Ní canéé chɛɛti yáacū miiⁿ. Ní nꞌdiichí ꞌcuāī ndúúcū nꞌdeee nꞌdáí ruido ndúúcū daavi nꞌnuⁿꞌu na yáⁿꞌāa ndúúcū ꞌaama cúúvī yuūūⁿ.