Yeⁿꞌe ángel ndúúcū libro ꞌlííⁿ
10
Cuayiivi ní nꞌdiichí ꞌáámá ángel chi vɛ́ɛ́ nꞌdeee nꞌdáí poder yeⁿꞌe yā. Ní chiicá yā yeⁿꞌe vaꞌai chɛɛti nguuvi ní chiiyá yā. Ní vɛ́ɛ́ catecaí yā yeⁿꞌe meēeⁿ. Ní vmnaaⁿ tiíⁿ yā canéé cuuⁿnꞌgúúⁿndí yeⁿꞌe nanguuvi. Ní naáⁿ yā tanꞌdúúcā dɛɛvɛ yeⁿꞌe ꞌyáⁿꞌā, ꞌtíícā ngii naáⁿ yā. Ní caꞌá yā ní tanꞌdúúcā columnas chi nguuchi yaⁿꞌā. 2 Ní na taꞌá yā ndɛɛ yā ꞌáámá libro ꞌlííⁿ chi candaꞌāī. Ní ángel miiⁿ sꞌneeⁿ yā caꞌá yā lado ta cuaacú yā vmnaaⁿ na nuūⁿnīⁿꞌyáⁿꞌā. Ní sꞌneeⁿ yā caꞌá yā lado tá ꞌcuee yā vmnaaⁿ na yáⁿꞌāa. 3 Tuuꞌmi ní yuudu nꞌdáí ꞌcaí yā tanꞌdúúcā chi nꞌgaī ꞌáámá ꞌyáíⁿyāaⁿ cuáꞌaá. Ní chꞌíínú ꞌcai yā ní ndɛɛ̄chɛ̄ daavi ní caⁿꞌā ndúúcū nduudu yeⁿꞌē. 4 Taachí chꞌíínú ngaⁿꞌā nduꞌū ndɛɛ̄chɛ̄ daavi mííⁿ ꞌúú ní canéé listo chi dinguúⁿ chiiⁿ chi nꞌdiichí taachi chꞌiindiveéⁿ ꞌáámá nduudu yeⁿꞌe ná vaꞌai chɛɛti nguuvi chí caⁿꞌa chiī ꞌúú: Nguɛ́ɛ́ dinguuⁿ di nduudu chi ngaⁿꞌā nduꞌu ndɛɛchɛ daavi miiⁿ naati canúúⁿ nꞌdeꞌei di na staava yeⁿꞌe di nduudu miiⁿ.5 Ní ángel miiⁿ chi nꞌdiichí chi chééndii vmnaaⁿ na nuūⁿnīⁿꞌyáⁿꞌā ndúúcū vmnaaⁿ na yáⁿꞌāa chꞌɛɛ́ yā taꞌa yā lado ta cuaacú yā ndíí nanguuvi. 6 Ní diíⁿ yā ꞌáámá compromiso ní ngaⁿꞌa yā: “Por Dios”, Ndyuūs chi canduuchi cueⁿꞌe daāⁿmaⁿ, Ndyuūs chí dinꞌdái yā nánguuvi ndúúcū tanducuéⁿꞌē denduꞌū chi vɛɛ yeⁿꞌē, ndúúcū yáⁿꞌāa ndúúcū tanducuéⁿꞌē denduꞌū chi vɛɛ yeⁿꞌē, ndúúcū nuuⁿnīⁿꞌyáⁿꞌā ndúúcū tanducuéⁿꞌē denduꞌū chi vɛɛ yeⁿꞌē. Ní ángel miiⁿ caⁿꞌa yā: ꞌĀā ntɛ́ɛ́ tiempo chi cuuvi ꞌnaaⁿ. 7 Ti nguuvi taachi ndii chííⁿ ndii ndɛɛ̄chɛ̄ ángeles ní tucáꞌa yā ꞌcuɛɛcú yā trompetas yeⁿꞌe yā tuuꞌmi ní chiiⁿ chi Ndyuūs cunee nꞌdeꞌéí yā ní ꞌcuiinu. Ní Ndyuūs tucáꞌa yā diíⁿ yā tanducuéⁿꞌē chi ngaⁿꞌa yā ngii yā ꞌiiⁿꞌyāⁿ profetas chi dichííꞌvɛ yā Ndyuūs.
8 Tuuꞌmi ní nduudu chi chꞌiindiveéⁿ ndii nanguuvi caⁿꞌa ntúuⁿ yā ndúúcū ꞌúú táámá vmneⁿꞌēe ní caⁿꞌa ꞌtíícā: Dii, Juan, cueⁿꞌe di ní cutaꞌa di libro ꞌlííⁿ chi ngaadi chi ángel miiⁿ ndɛ́ɛ yā na taꞌá yā, ángel chi chééndii yā vmnaaⁿ na nuūⁿnīⁿꞌyáⁿꞌā ndúúcū vmnaaⁿ na yáⁿꞌāa.
9 Ní cheⁿꞌé nanááⁿ ángel miiⁿ ní caⁿꞌá chií ángel: Díí, ángel, tee di libro ꞌlííⁿ ꞌúú. Ní teé yā libro ꞌlííⁿ ꞌúú. Ní ángel miiⁿ caⁿꞌa yā chiiyā ꞌúú: Cutaꞌa di ní chéꞌé dí libro ꞌlííⁿ. Ní cuuvi yaadi na cheendi di tanꞌdúúcā n̄diꞌi naati nduūvī yaāá ná chɛɛ̄ti di.
10 Tuuꞌmi ní staꞌá libro ꞌlííⁿ mííⁿ chi canéé na taꞌa ángel miiⁿ ní cheꞌé. Ní chii yaadi cheendí tanꞌdúúcā n̄diꞌi. Taachi ꞌāā chꞌíínú cheꞌé ní nduūvī yaāá yeⁿꞌe chɛɛ̄tí. 11 Angel miiⁿ ní nííⁿnúúⁿ nūuⁿ ngaⁿꞌa yā ngii yā ꞌúú: Díí, Juan, taama vmnéⁿꞌēe canéé chí caaⁿꞌmaⁿ di nduudu cuaacu yeⁿꞌé Ndyuūs yeⁿꞌē nꞌdeee nꞌdáí ꞌiiⁿꞌyāⁿ ndúúcū ꞌyaaⁿ nꞌdáí naciones ndúúcū ꞌyaaⁿ taavi ꞌiiⁿꞌyāⁿ chi ngaⁿꞌa davaacu sꞌeeⁿ chi n̄ꞌdááⁿ ní ndúúcū reyes.