9
Cuayiivi ní nꞌdiichí ndíí nyuⁿꞌu ángel miiⁿ diꞌcuɛɛcú yā trompeta yeⁿꞌe yā ní nꞌdiichí ꞌáámá ꞌííⁿnyúⁿ chi chiīcā nanguuvi ní chiiya na yáⁿꞌāa. Ní ꞌáámá ꞌiiⁿꞌyāⁿ ndɛ́ɛ yā llave yeⁿꞌe abismo chi ꞌáámá yiivɛ yáⁿꞌāa chꞌɛɛtɛ́ chí nanꞌguāāⁿ yáaⁿnūuⁿ nꞌdáí. Ní ꞌáámá ángel chi nguɛ́ɛ́ nꞌdaacā caꞌa yā llave miiⁿ na taꞌa ꞌííⁿnyúⁿ miiⁿ. 2 Ní ángel miiⁿ nꞌguaaⁿ yā yiivɛ yáⁿꞌāa ní canꞌdáá ꞌyaaⁿꞌmiⁿ yeⁿꞌē tanꞌdúúcā ꞌyaaⁿꞌmiⁿ chi canꞌdaā yeⁿꞌē ꞌáámá horno chꞌɛɛtɛ. Ní ꞌyaaⁿꞌmiⁿ miiⁿ chi canꞌdaā yeⁿꞌē yiivɛ́ miiⁿ ní diīiⁿ chi nduuvi maāiⁿ na ꞌyáⁿꞌā ndúúcū ꞌyúúné. 3 Ní yeⁿꞌe ꞌyaaⁿꞌmiⁿ miiⁿ canꞌdaā langostas na yáⁿꞌāa. Ní ꞌiiti sꞌeeⁿ ní taáⁿ tī, ní chingaá tī. Ní tanꞌdúúcā ꞌiiti dáⁿꞌāi diíⁿ tī, ꞌtíícā cuuvi diíⁿ tī. 4 Ní ꞌiiⁿꞌyāⁿ dichóꞌo yā langostas chi nguɛ́ɛ́ diíⁿ tī daño yeⁿꞌe yaātā chi vɛ́ɛ́ na yáⁿꞌāa ndúúcū mar ꞌáámá naaⁿ chi yaātā cueeé ndíí mar ꞌáámá yáⁿꞌá, naati dámaāⁿ cuuvi diíⁿ tī daño ꞌiiⁿꞌyāⁿ chi nguɛ́ɛ́ ndɛɛ yā sello yeⁿꞌe Ndyuūs ná nchɛɛtɛ́ yā. 5 Naati caⁿꞌá yā chii yā langostas chi nguɛ́ɛ́ cuuvi ꞌcaaⁿꞌnúⁿ tī ꞌiiⁿꞌyāⁿ sꞌeeⁿ naati cuuvi diíⁿ tī chí ꞌcueenu yā cuuvi chi yaꞌai cá yā chɛɛti nyúⁿꞌú ꞌííyú. Ní diíⁿ tī chi yaꞌai cá yā tanꞌdúúcā chi yaꞌai ca ꞌiiⁿꞌyāⁿ taachi cāꞌa ꞌiiti daⁿꞌāī ꞌiiⁿꞌyāⁿ. 6 Ní nguuvi sꞌeeⁿ ní ꞌiiⁿꞌyāⁿ yeⁿꞌe iⁿꞌyeeⁿdí ꞌcūū inꞌnuúⁿ yā taacā chi cuuvi ꞌcuūví yā ti neⁿꞌe yā chi ꞌcuūví yā, naati nguɛ́ɛ́ cuuvi ꞌcuūví yā.7 Ní langostas miiⁿ ní tanꞌdúúcā ꞌaama ꞌyúúdūu chi canee listo tī chi ꞌcuuⁿꞌmáⁿ tī ꞌtíícā langostas miiⁿ. Na tiíⁿ tī cánduūu cosa tanꞌdúúcā corona yeⁿꞌe ꞌdííⁿnguāaⁿ. Ní naáⁿ tī ní tanꞌdúúcā nááⁿ ꞌiiⁿꞌyāⁿ. 8 Ní yuūdūū tiíⁿ tī tanꞌdúúcā yuūdūū tiiⁿ nꞌdaataá. Ní ꞌdiiⁿꞌyuⁿ tī tanꞌdúúcā ꞌdiiⁿꞌyuⁿ ꞌyáíⁿyāaⁿ cuáꞌaá. 9 Ní snúuⁿ cuerpo yeⁿꞌé tī catecai tanꞌdúúcā catecai cūū chi armadura cūū yeⁿꞌe soldado. Ní nꞌgɛ́ɛ́cú ngɛɛchi tī tanꞌdúúcā chi nꞌgɛɛcu ꞌyaaⁿ nꞌdáí carros ndúúcū ꞌyaaⁿ nꞌdáí ꞌyúúdūu chi ngéénu tī ndɛɛ tī carro yeⁿꞌe tī tanꞌdúúcā chi ngéénu tī cueⁿꞌe tī neⁿꞌe chí ꞌcuuⁿꞌmáⁿ yā. 10 Ní vɛ́ɛ́ nduucudaⁿꞌai tī tanꞌdúúcā nduucudaⁿꞌai ꞌiiti daⁿꞌāī ní vɛɛ ꞌiini chꞌɛɛtɛ na nduucudaⁿꞌai tī. Ní ndúúcū ꞌiini chꞌɛɛtɛ yeⁿꞌé nduucudaⁿꞌai tī chi diíⁿ tī daño chi chꞌeenu yā chiī chɛɛti nyúⁿꞌú ꞌííyú. 11 Ní canéé ꞌáámá ángel ndíí tiīiⁿ yeⁿꞌe ꞌiiti sꞌeeⁿ, chííⁿ chí ángel yeⁿꞌē yiivɛ yáⁿꞌāa miiⁿ. Ní ángel miiⁿ chi duuchi Abadón na nduudu hebreo, ní Apolión ná nduudu griego chi neⁿꞌe caaⁿꞌmaⁿ ꞌiiⁿꞌyāⁿ chi nadaꞌtuūví tanducuéⁿꞌē.
12 Maaⁿ ní chóꞌōo ꞌáámá vaadī yaꞌāī chi canéé chi chóꞌōo naati vɛ́ɛ́ na ꞌuūvī vaadī yaꞌāī chi canéé chi choꞌoó.
13 Tuuꞌmi ní ndii chííⁿ ndii niyaaⁿ ángel miiⁿ idiꞌcuɛɛcú yā trompeta yeⁿꞌé yā ní chꞌiindiveéⁿ ꞌáámá nduudu chi cuchiī naavtaⁿꞌā yeⁿꞌe chi cuūuⁿ nííⁿniⁿ tī chi adorno yeⁿꞌē nátai yeⁿꞌe ꞌdiiⁿnguāaⁿ chi canéé nanááⁿ Ndyuūs naachi dichꞌɛɛtɛ́ yā Ndyuūs. 14 Ní nduudu miiⁿ caⁿꞌa chiī ndii niyaaⁿ ángel miiⁿ chi ndɛɛ́ yā trompeta yeⁿꞌé yā: Dii, ángel, nꞌdaatíí di nduꞌu cuūuⁿ ángeles chi snée iꞌyúú yā niiⁿnuúⁿ na yíícú chꞌɛɛtɛ chí nguuvi Eufrates.
15 Ní nínꞌdaatíi yā ndúꞌū cuūuⁿ ángeles sꞌeeⁿ caati cuuvi ꞌcaāⁿꞌnuⁿ yā ꞌiinū parte yeⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. Ní canéé listo yā hora yeⁿꞌē. 16 Ní chꞌiindiveéⁿ chi chɛɛ̄ dúúchɛ́ yā soldados chi sndúu sa ꞌyuūdūu chí ngii sa tanꞌdúúcā ꞌuuvī ciento millones.
17 Ní ꞌtíícā nꞌdiichí ꞌyuūdūu sꞌeeⁿ taachi ꞌúú, Juan, cueⁿꞌé ndúúcū espíritu yeⁿꞌé. Ní ꞌiiⁿꞌyāⁿ chi sndúu yā ꞌyúúdūu sꞌééⁿ vɛ́ɛ́ catecaí yā chi armadura yeⁿꞌe pecho yeⁿꞌé yā ní color cuáꞌā tanꞌdúúcā chi nguuchi yaⁿꞌā ndúúcū color cueēé nanguuvi ndúúcū color cuaaáⁿ. Ní ꞌyúúdūu sꞌeeⁿ ní tiíⁿ tī tanꞌdúúcā tiíⁿ ꞌyáíⁿyāaⁿ cuáꞌaá. Ní na cheendí tī icanꞌdaā nguuchi yaⁿꞌā ndúúcū ꞌyaaⁿꞌmiⁿ ndúúcū azufre. 18 Ní yeⁿꞌe ꞌiinū naaⁿ denduꞌū sꞌtúúcā chi canꞌdaā yeⁿꞌe cheendí tī ní ꞌáámá ꞌiinū parte yeⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū chꞌīi yā ndúúcū nguuchi yáⁿꞌā miiⁿ ndúúcū ꞌyaaⁿꞌmiⁿ miiⁿ ndúúcū azufre miiⁿ. 19 Ní chi ditiīnú yeⁿꞌe ꞌyúúdūu sꞌééⁿ canúúⁿ cheendí tī ndúúcū nduucudaⁿꞌai tī ti nduucudaⁿꞌai tī miiⁿ ní yaaaⁿ ní tanꞌdúúcā tíiⁿ cúú, ꞌtíícā nduucudaⁿꞌai tī. Ní ndúúcū cheendí tī ndúúcū nduucudaⁿꞌai tī diíⁿ tī daño ꞌiiⁿꞌyāⁿ sꞌeeⁿ.
20 Tanáⁿꞌā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū chi nguɛ́ɛ́ chꞌīi yā yeⁿꞌe daños nguɛ́ɛ́ ndaācādaamí yā yeⁿꞌe denduꞌū chi diíⁿ yā chi nguɛ́ɛ́ nꞌdaacā. Ní iꞌtéénu yā espíritu yeⁿꞌe yááⁿnꞌguiinūuⁿ ndúúcū santos ídolos yeⁿꞌe ꞌdííⁿnguāaⁿ ndúúcū santos ídolos yeⁿꞌe ꞌdííⁿnguɛɛ ndúúcū santos ídolos yeⁿꞌē cúú cuaaáⁿ ndúúcū santos ídolos yeⁿꞌe tuūu ndúúcū santos ídolos yeⁿꞌe yáⁿꞌá. Dendúꞌū santos ídolos nguɛ́ɛ́ cuuvi inaaⁿ, ní nguɛ́ɛ́ cuuvi nꞌgiindiveéⁿ, ndíí nguɛ́ɛ́ cuuvi ngiicá. 21 Ní ꞌiiⁿꞌyāⁿ sꞌeeⁿ ꞌtiicá ntúūⁿ nguɛ́ɛ́ ndaācādaamí yā yeⁿꞌe chí nꞌgiiⁿꞌnúⁿ yā ꞌiiⁿꞌyāⁿ, ndíí nguɛ́ɛ́ ndúú yeⁿꞌe ngaatu chi diíⁿ yā, ndíí nguɛ́ɛ́ ndúú yeⁿꞌe chi caⁿꞌá yā ndúúcū isaⁿꞌā o nꞌdaataá chi nguɛ́ɛ́ yeⁿꞌé yā, ndíí nguɛ́ɛ́ ndúú yeⁿꞌe chi duucu yā.