Sello chi ndii chííⁿ ndíí ndɛɛ̄chɛ̄ ndúúcū incensario yeⁿꞌe ꞌdííⁿnguāaⁿ
8
Ní taachi ꞌiiⁿꞌyāⁿ chi nguuvi ꞌiiti cuūchī nanꞌguaaⁿ yā ní divíi yā ndii chííⁿ ndíí ndɛɛ̄chɛ̄ sellos miiⁿ yeⁿꞌe libro miiⁿ tuuꞌmi ní chóꞌōo tanꞌdúúcā maⁿꞌa hora chí chiī ꞌdiiíⁿ canéé na vaꞌai chɛɛti nguuvi. 2 Tuuꞌmi ní nꞌdiichí chi nduꞌu ndɛɛ̄chɛ̄ ángeles chi chééndii yā nanááⁿ Ndyuūs. Ní ángeles staꞌá yā ꞌáámá trompeta ꞌáámá ꞌaamá yā yeⁿꞌe ꞌiiⁿꞌyāⁿ miiⁿ chi caꞌá yā trompetas. 3 Ní cuayiivi táámá ángel chi ndɛɛ yā ꞌáámá incensario yeⁿꞌe ꞌdííⁿnguāaⁿ ní ndaa yā nanááⁿ nátai yeⁿꞌe ꞌdííⁿnguāaⁿ ní chééndii yā miiⁿ. Ní ángel miiⁿ ní staꞌá yā nꞌdeee nꞌdáí cúⁿꞌúyaa. Ní caꞌá yā cáávā ofrenda dáámá ndúúcū chi ngaⁿꞌanguaꞌá yā ꞌiiⁿꞌyāⁿ chi yeⁿꞌé Ndyuūs. Ní sꞌnéeⁿ yā incienso nanááⁿ nátai yeⁿꞌe ꞌdííⁿnguāaⁿ chi canéé nanááⁿ trono miiⁿ. 4 Ní ꞌyááⁿꞌmíⁿ yeⁿꞌē cúⁿꞌúyaa chí canéé na taꞌa ángel miiⁿ ndúúcū yeⁿꞌe chi ngaⁿꞌanguaꞌa ꞌiiⁿꞌyāⁿ yeⁿꞌe iⁿꞌyeēⁿdí ꞌcūū chi yeⁿꞌe Ndyuūs ní dáámá cuchɛɛ nanááⁿ Ndyuūs. 5 Tuuꞌmi ní ángel miiⁿ staꞌá yā incensario yeⁿꞌe ꞌdííⁿnguāaⁿ chiitú yā ndúúcū nduucyaⁿꞌā yeⁿꞌe nátai miiⁿ. Ní chingée yā vmnaaⁿ yáⁿꞌāa yeⁿꞌe iⁿꞌyeeⁿdí ꞌcūū. Ní ndaā daavi chi diituu nꞌgɛɛcúū ndúúcū dɛɛvɛ yeⁿꞌe ꞌcuai ndúúcū chi ꞌnuⁿꞌu yáⁿꞌāa.Yeⁿꞌe trompetas
6 Ní nduꞌu ndɛɛ̄chɛ̄ ángeles chi ndɛ́ɛ yā trompetas chꞌɛɛtinéé yaáⁿ yā chi diꞌcuɛɛcú yā trompetas yeⁿꞌé yā.
7 Ní ángel chi vmnááⁿ vmnaaⁿ diꞌcuɛɛcú yā trompeta yeⁿꞌe yā ní chingéē vmnaaⁿ yáⁿꞌāa yuūuⁿ ndúúcū nguuchi yaⁿꞌā ndístáⁿꞌā ndúúcū yuūúⁿ. Ní chiichi ꞌiinū parte yeⁿꞌe yáⁿꞌāa yeⁿꞌe iⁿꞌyeeⁿdí ꞌcūū ndúúcū ꞌiinū parte yeⁿꞌe yáⁿꞌá chi vɛ́ɛ́. Dáámá chiichi ndúúcū ꞌiinū parte yeⁿꞌe yáⁿꞌá ndúúcū nducuéⁿꞌē yaātā cueēe yéⁿꞌē.
8 Tuuꞌmi ní ndii chííⁿ ndii ꞌúúví ángel diꞌcuɛɛcú yā trompeta yeⁿꞌe yā ní nꞌdiichí ꞌáámá cosa tanꞌdúúcā ꞌáámá yiīcū chꞌɛɛtɛ́ chí ngiichi chí ꞌáámá ꞌiiⁿꞌyāⁿ chɛɛcú yā yeⁿꞌe vaꞌai chɛɛti nguūvi. Ní sndaā vmnaaⁿ yeⁿꞌe nuūⁿnīⁿꞌyáⁿꞌā. Ní yeⁿꞌē iⁿꞌyeeⁿdí ꞌcūū ná ꞌiinū parte yeⁿꞌe nuūⁿnīⁿꞌyáⁿꞌā nduuvi yuuúⁿ. 9 Ní chꞌiī ꞌáámá ꞌiinū parte yeⁿꞌe ꞌiiti chi vɛ́ɛ́ chɛɛti nuuⁿniⁿꞌyáⁿꞌā miiⁿ ndúúcū ꞌiinū parte yeⁿꞌe nducuéⁿꞌē barcos chi chiica vmnaaⁿ nuūⁿnīⁿꞌyáⁿꞌā ní ntuūvií.
10 Tuuꞌmi ní ángel ndii chííⁿ ndii ꞌiinū miiⁿ diꞌcuɛɛcú yā trompeta yeⁿꞌe yā ní snꞌdaā ꞌáámá ꞌííⁿnyúⁿ chꞌɛɛtɛ ca yeⁿꞌē nanguuvi tanꞌdúúcā ꞌáámá tááⁿ yáácá chi ngiichi. Ní snꞌdaā vmnaaⁿ yeⁿꞌe ꞌiinū parte yeⁿꞌē yíícú sꞌeeⁿ ndúúcū nuūⁿnīⁿ chi canꞌdaā chi vɛ́ɛ́ na iⁿꞌyeeⁿdí ꞌcūū. 11 Ní ꞌííⁿnyúⁿ chꞌɛɛtɛ ca miiⁿ ní chi duuchi Ajenjo chí neⁿꞌe caaⁿꞌmaⁿ chí yaaá. Ní ꞌiinū parte yeⁿꞌe nuūⁿnīⁿ yeⁿꞌe yiīcū ndúúcū nuūⁿnīⁿ chi canꞌdaā ní nduūvī Ajenjo chí yaaá. Ní neené ꞌyaaⁿ ꞌiiⁿꞌyāⁿ chꞌīi yā chí chiꞌi yā nuūⁿnīⁿ miiⁿ ti neené yaaá nuūⁿnīⁿ miiⁿ.
12 Tuuꞌmi ní ángel ndii chííⁿ ndii cuūuⁿ diꞌcuɛɛcú yā trompeta yeⁿꞌe yā ní ꞌiinū parte yeⁿꞌe ꞌyáⁿꞌā ncaꞌāí ndúúcū ꞌiinū parte yeⁿꞌē ꞌiīyū ndúúcū ꞌiinū parte yeⁿꞌe ꞌííⁿnyúⁿ. Ní ꞌíícú ꞌiinū parte yeⁿꞌe denduꞌū chi ꞌtúucā ní chii maāiⁿ. Ní nguɛ́ɛ́ canuuⁿ dɛɛvɛ yeⁿꞌē na ꞌiinū parte yeⁿꞌe nguuvi. ꞌTiicá ntúūⁿ nꞌgaaⁿ.
13 Tuuꞌmi ní nꞌdiichí ꞌáámá ángel tanꞌdúúcā ꞌííꞌyāa ní nꞌgiindiveéⁿ chi nꞌgaí yā naachi cueⁿꞌe yā naavtaⁿꞌā nanguuvi. Ní ngaⁿꞌa yuudú yā ꞌtíícā: Dɛꞌɛ̄ chúúcā yaꞌāī, dɛꞌɛ̄ chúúcā yaꞌāī, dɛꞌɛ̄ chúúcā yaꞌāī yeⁿꞌé ꞌiiⁿꞌyāⁿ chi snée yā na yáⁿꞌāa yeⁿꞌe chi cuuvi taachi táꞌiinū ángeles caⁿꞌá yā diꞌcuɛɛcú yā trompetas yeⁿꞌé yā.