Yeⁿꞌé ꞌiiⁿꞌyāⁿ chi señalado yā yeⁿꞌe tribus yeⁿꞌe ꞌiiⁿꞌyāⁿ Israel
7
Nꞌdiichí dendúꞌū chi ꞌtúúcā, ní cuayiivi ꞌúú nꞌdiichí cuūuⁿ ángeles chi chééndii yā nduꞌu cuuúⁿ esquinas yeⁿꞌē iⁿꞌyeeⁿdí ꞌcūū. Ní ángeles sꞌeeⁿ índɛɛnee yā ndii chííⁿ ndii cuuúⁿ ꞌyúúné yeⁿꞌe yáⁿꞌāa ꞌcūū. Ní ꞌíícú ꞌyúúné sꞌeeⁿ nguɛ́ɛ́ chéenū diituú na yáⁿꞌāa ndíí nguɛ́ɛ́ ndúú vmnaaⁿ mar ꞌáámá nuūⁿnīⁿꞌyáⁿꞌā, ndíí nguɛ́ɛ́ ndúú vmnaaⁿ mar ꞌáámá yáⁿꞌá. 2 Ní nꞌdiichí ntuúⁿ táámá ángel chi cuchii yā naachi canꞌdaa ꞌyáⁿꞌā. Ní ndɛɛ yā na taꞌa yā ꞌáámá sello yeⁿꞌé Ndyuūs chí canduuchi. Ní ángel miiⁿ yúúdú nꞌdáí ngaⁿꞌa yā nduꞌu cuūuⁿ ángeles chi staꞌá yā poder chi ditiīnú yā chi diíⁿ yā daño na yáⁿꞌāa ꞌcūū ndúúcū ná nuuⁿnīⁿꞌyáⁿꞌā.3 Ní ángel miiⁿ ngaⁿꞌá yā ꞌtúúcā: Ndísꞌtiī ángeles, nguɛ́ɛ́ diíⁿ nī daño yeⁿꞌe yáⁿꞌāa ꞌcūū, ndíí nguɛ́ɛ́ ndúú yeⁿꞌe nuūⁿnīⁿꞌyáⁿꞌā, ndíí nguɛ́ɛ́ ndúú yeⁿꞌe yáⁿꞌá ndíí taachi sꞌnuúⁿ ꞌnū ꞌáámá sello yeⁿꞌe Ndyuūs na nchɛ́ɛtɛ̄ ꞌiiⁿꞌyāⁿ chi dichííꞌvɛ̄ Ndyuūs yeⁿꞌe yú.
4 Ní chꞌiindiveéⁿ chi duuchi ꞌiiⁿꞌyāⁿ chi chiī sellado yā ní ngii yā ꞌáámá ciento ꞌuūvī ngɛɛcú cuūuⁿ mil ꞌiiⁿꞌyāⁿ chi ꞌiiⁿꞌyāⁿ yeⁿꞌe nducuéⁿꞌē tribus yeⁿꞌe ndaata yeⁿꞌe ꞌiiⁿꞌyāⁿ Israel. 5 ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Judá ní ndií yā sellado yā ndiichúúví mil. ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Rubén ní ndií yā sellado yā ndiichúúví mil. ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Gad ní ndií yā sellado yā ndiichúúví mil. 6 ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Aser ní ndií yā sellado yā ndiichúúví mil. ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Neftalí ní ndií yā sellado yā ndiichúúví mil. ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Manasés ní ndií yā sellado yā ndiichúúví mil. 7 ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Simeón ní ndií yā sellado yā ndiichúúví mil. ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Leví ní ndií yā sellado yā ndiichúúví mil. ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Isacar ní ndií yā sellado yā ndiichúúví mil. 8 ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Zabulón ní ndií yā sellado yā ndiichúúví mil. ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā José ní ndií yā sellado yā ndiichúúví mil. ꞌIiⁿꞌyāⁿ yeⁿꞌe tribu yeⁿꞌe ndaata saⁿꞌā Benjamín ní ndií yā sellado yā ndiichúúví mil.
Nducyáácá ꞌiiⁿꞌyāⁿ chi vɛ́ɛ́ catecai cuɛ́ɛ yā
9 Cuayiivi ní nꞌdiichí nꞌdeee nꞌdáí ꞌiiⁿꞌyāⁿ yeⁿꞌe tanducuéⁿꞌē nación, yeⁿꞌe tanducuéⁿꞌē raza, yeⁿꞌe ꞌiiⁿꞌyāⁿ yeⁿꞌe tanducuéⁿꞌē daveedi ndúúcū tanducuéⁿꞌē davaacu chi n̄ꞌdááⁿ, yeⁿꞌe tanducuéⁿꞌē yáāⁿ yeⁿꞌe tanducuéⁿꞌē ꞌiiⁿꞌyāⁿ chi vɛ́ɛ́ na iⁿꞌyeeⁿdí ꞌcūū. Ní nducyaaca ꞌiiⁿꞌyāⁿ sꞌeeⁿ chééndii yā nanááⁿ trono miiⁿ ní nanááⁿ ꞌiiⁿꞌyāⁿ chi nguuvi ꞌiiti cuūchī. Ní mar ꞌáámá ꞌiiⁿꞌyāⁿ nguɛ́ɛ́ cuuvi didúúchɛ́ yā. Nducyáácá yā vɛ́ɛ́ catecai yā cuɛ́ɛ̄ ní ndɛ́ɛ yā yiiⁿnyúⁿ na taꞌá yā. 10 Ní nducyáácá yā ꞌcai yā yiicú yā ní caⁿꞌa yā ꞌtíícā:
Ndyuūs chi vɛ́ɛ yā na trono miiⁿ ndúúcū Cristo chi nguuvi ꞌiiti cuūchī nadanguáⁿꞌai yā sꞌuuúⁿ. 11 Ní nducyaaca ángeles sꞌeeⁿ ní chꞌɛɛtɛ yā núúⁿmáⁿ ꞌdiituú yeⁿꞌe trono miiⁿ ndúúcū nduꞌū ndiicú cuūuⁿ ꞌiiⁿntyéⁿꞌē ndúúcū nduꞌu cuūuⁿ ꞌiiⁿꞌyāⁿ sꞌeeⁿ. Ní nducyaaca yā candiītínꞌdii yā nanááⁿ ꞌiiⁿꞌyāⁿ chi vɛ́ɛ yā na trono miiⁿ ní dichꞌɛɛtɛ́ yā Ndyuūs. 12 Ní ꞌtíícā caⁿꞌa yā:
ꞌTíícā va. Diꞌchɛɛtɛ yú Ndyuūs chi dɛɛvɛ ngii yā chí deenu yā tanducuéⁿꞌē denduꞌū chi vɛ́ɛ́. Caⁿꞌa yú gracias Ndyuūs. Ní diiⁿ yú honrar ꞌiiⁿꞌyāⁿ. Ní nducuéⁿꞌē poder ndúúcū nducuéⁿꞌē fuerzas ní yeⁿꞌe yā. Ní ꞌtíícā canéé Ndyuūs yeⁿꞌe yú cueⁿꞌe daāⁿmaⁿ cueⁿꞌe daāⁿmaⁿ. ꞌTíícā.
13 Cuayiivi ní ꞌáámá ꞌiiⁿntyéⁿꞌē nanꞌguɛɛcútaⁿꞌa yā ní itiinguuneéⁿ yā ꞌúú: ¿Dúꞌu rá ꞌiiⁿꞌyāⁿ chi vɛ́ɛ́ catecai cuɛ́ɛ yā ní tií chiicá yā?
14 Ní ꞌúú ní ngaⁿꞌá: Nꞌdii, Señor, deenú nī yeⁿꞌe yā. Tuuꞌmi ní ꞌiiⁿntyéⁿꞌē miiⁿ caⁿꞌa yā: ꞌIiⁿꞌyāⁿ sꞌeeⁿ ní chiica yā yeⁿꞌē chi chꞌeenu taaví yā chiī ní ꞌāā dɛɛvɛ́ yā catecai yā ndúúcū yuuúⁿ yeⁿꞌe Cristo chi nguuvi ꞌiiti cuūchī. 15 Ní cáávā chuū ꞌiiⁿꞌyāⁿ sꞌeeⁿ snée yā nanááⁿ Ndyuūs chi vɛ́ɛ yā na trono yeⁿꞌé yā. Ní dichííꞌvɛ yā Ndyuūs ndii nguuvi ndii nꞌgaaⁿ na yáacū yeⁿꞌe yā. Ní ꞌiiⁿꞌyāⁿ chi vɛ́ɛ yā na trono miiⁿ ní canéé yā miiⁿ ní candɛɛ́ yā cuidado nducyaaca ꞌiiⁿꞌyāⁿ sꞌeeⁿ. 16 Ní ꞌiiⁿꞌyāⁿ sꞌeeⁿ ꞌāā ntɛ́ɛ́ cuuvi cuiicú yā, ní ꞌāā ntɛ́ɛ́ cuuvi yaācá yā. Ní ꞌāā ntɛ́ɛ́ cundáā yaⁿꞌā vmnaaⁿ yeⁿꞌe yā ndíí nguɛ́ɛ́ ndúú cuuvi cuucu ꞌiiⁿꞌyāⁿ ndúúcū yaⁿꞌā. 17 Caati ꞌiiⁿꞌyāⁿ chi nguuvi ꞌiiti cuūchī chi vɛ́ɛ yā na trono miiⁿ ní diíⁿ yā cuidado ꞌiiⁿꞌyāⁿ sꞌeeⁿ tanꞌdúúcā chi ꞌiiⁿꞌyāⁿ sꞌeeⁿ ní ꞌiiti cuūchī yeⁿꞌé yā. ꞌTíícā diíⁿ yā. Ní canꞌdáá naaⁿ yā ní ꞌcuuⁿꞌmíⁿ yā ꞌiiⁿꞌyāⁿ sꞌeeⁿ naachí candaā nuūⁿnīⁿ yeⁿꞌe vida cueⁿꞌe daāⁿmaⁿ. Ní Ndyuūs nadidɛɛvɛ́ yā tanducuéⁿꞌē nuūⁿnīⁿ nduutináaⁿ yā.