2 ꞌÚú ní nꞌdiichí ní mííⁿ cánéé ꞌyúudūu cuɛ́ɛ̄ ndúúcū ꞌáámá saⁿꞌā candúu sa ꞌiiti miiⁿ. Ní ndɛɛ sa ꞌáámá arco na taꞌa sa. Ní caꞌa yā ꞌáámá corona saⁿꞌā miiⁿ ní canꞌdaā sa chi ꞌcuuⁿꞌmiⁿ sa. Ní diiⁿ sa chí cuchɛɛ sa yeⁿꞌe enemigo yeⁿꞌe sa.

3 Ní taachi ꞌiiⁿꞌyāⁿ chi nguuvi ꞌiiti cuūchī nanꞌguaaⁿ yā ndii chííⁿ ndii ꞌúúví sello yeⁿꞌe libro miiⁿ chꞌiindiveéⁿ nduudu yeⁿꞌe ndii chííⁿ ndii ꞌuuvi ꞌiiⁿꞌyāⁿ chí naachi cuuúⁿ yā, ní caⁿꞌa yā: Cuchíi di ní nꞌdiichi di.

4 Tuuꞌmi ní nꞌdiichí. Canꞌdaā táámá ꞌyúúdūu chi cuáꞌa tī ndúúcū ꞌáámá saⁿꞌā candúu sa ꞌiiti miiⁿ. Ní saⁿꞌā miiⁿ staꞌa sa ꞌáámá machete chí chꞌɛɛtɛ chí ꞌuūvī lados ꞌcaāiⁿ chi táámá yā caꞌa sa. Ní saⁿꞌā miiⁿ ndɛɛ sa poder chi diītiinú miiⁿ chi divíi sa vaadī ꞌdiiíⁿ yeⁿꞌe iⁿꞌyeeⁿdí ꞌcūū ní ꞌíícú ꞌiiⁿꞌyāⁿ yeⁿꞌe iⁿꞌyeeⁿdí ꞌcūū caⁿꞌá yā ꞌcaaⁿꞌnúⁿ yā ꞌáámá yā taama yā.

5 Ní taachi ꞌiiⁿꞌyāⁿ chi nguuvi ꞌiiti cuūchī nanꞌguaaⁿ yā ndii chííⁿ ndii ꞌíínú sello chꞌiindiveéⁿ nduudu yeⁿꞌe ndii chííⁿ ndii ꞌíínú ꞌiiⁿꞌyāⁿ miiⁿ chi caⁿꞌa yā ꞌtúúcā: Cuchíi di ní nꞌdiichi di. Ní nꞌdiichí ꞌáámá ꞌyuūdūu cuáīⁿ. Ní saⁿꞌā chi candúu sa ꞌyuūdūu miiⁿ ndɛɛ sa ꞌáámá cūū caadi na taꞌa sa. 6 Ní chꞌiindiveéⁿ nduudu naavtáⁿꞌā yeⁿꞌe na cuūuⁿ ꞌiiⁿꞌyāⁿ sꞌeeⁿ chí caⁿꞌa ꞌtíícā: ꞌÁámá kilo yeⁿꞌe trigo ní nditiiⁿꞌyuⁿ caadi, ní ꞌiiⁿnū kilos yeⁿꞌe cebada ní nditiiⁿꞌyuⁿ caadi. Nguɛ́ɛ́ diiⁿ di daño yeⁿꞌe aceite, ndíí nguɛ́ɛ́ ndúú yeⁿꞌe vino ti nduu ꞌuuvi naaⁿ ní nduuví nꞌdeee nꞌdáí.

7 Ní taachi ꞌiiⁿꞌyāⁿ chi nguuvi ꞌiiti cuūchī miiⁿ nanꞌguaaⁿ yā ndii chííⁿ ndíí cúūuⁿ sello miiⁿ chꞌiindiveéⁿ nduudu yeⁿꞌe ꞌiiⁿꞌyāⁿ chi ndii chííⁿ ndíí cuūuⁿ ꞌiiti miiⁿ chi caⁿꞌa ꞌtúúcā: Cuchíi di ní nꞌdiichi di.

8 Nꞌdiichí ní snaáⁿ ꞌáámá ꞌyúúdūu cuaaaⁿ dɛɛvɛ́ ndúúcū saⁿꞌā chi cundúu sa ꞌyúudūu miiⁿ. Saⁿꞌā miiⁿ ní nguuvi sa vaadī nꞌgii. Ní cuaaⁿ daami sa cuchiī taama saⁿꞌā chi mensajero yeⁿꞌe vaadī nꞌgíí chí táꞌāa ní nguainꞌdai almas yeⁿꞌe ꞌiiⁿꞌyāⁿ chi nꞌdíí. Tuuꞌmi ní ꞌiiⁿꞌyāⁿ caꞌá yā poder saⁿꞌā sꞌeeⁿ yeⁿꞌe ꞌáámá cuarto parte yeⁿꞌe yáⁿꞌāa yeⁿꞌe iⁿꞌyeeⁿdí ꞌcūū chi saⁿꞌā sꞌeeⁿ diiⁿ sa caandaá sꞌeeⁿ. Ní ꞌíícú chꞌiīⁿꞌnūⁿ sa ꞌiiⁿꞌyāⁿ ndúúcū machete chi ꞌuūvī lados ꞌcaāiⁿ ní ndúúcū ꞌáámá vaadī cuiicu ní ndúúcū caꞌai ní ndúúcū ꞌiiti taaⁿ. Ní ꞌtíícā saⁿꞌā sꞌeeⁿ chꞌiīⁿꞌnūⁿ sa ꞌiiⁿꞌyāⁿ.

9 Ní taachi ꞌiiⁿꞌyāⁿ chi nguuvi ꞌiiti cuūchī nanꞌguaaⁿ yā ndii chííⁿ ndii nyuⁿꞌu sello miiⁿ, nꞌdiichí mááⁿ nátaī ní nꞌdiichí almas yeⁿꞌe ꞌiiⁿꞌyāⁿ chi nꞌdíí. Ní ꞌiiⁿꞌyāⁿ chꞌiiⁿꞌnúⁿ yā ꞌiiⁿꞌyāⁿ sꞌeeⁿ cáávā chi ngaⁿꞌá yā nduudu cuaacu yeⁿꞌé Ndyuūs ní cáávā chi ngaⁿꞌa cuaacú yā yeⁿꞌe Ndyuūs. 10 Ní almas yeⁿꞌe ꞌiiⁿꞌyāⁿ sꞌeeⁿ yuudu nꞌdáí ꞌcaí yā ní caⁿꞌa yā: Nꞌdii Señor chi vɛ́ɛ́ tanducuéⁿꞌē poder yeⁿꞌe nī, nꞌdii chi dɛɛvɛ nī ní cuaacú nī, ¿ndíí dɛꞌɛ̄ tiempo caⁿꞌá nī nꞌdiichí nī nuuⁿndi yeⁿꞌe ꞌiiⁿꞌyāⁿ chi snée yā iⁿꞌyeeⁿdí ꞌcūū ní diíⁿ nī castigar ꞌiiⁿꞌyāⁿ sꞌeeⁿ cáávā chi chꞌiiⁿꞌnúⁿ yā núꞌsuu?

11 Ní ꞌiiⁿꞌyāⁿ miiⁿ caꞌá yā ꞌáámá ꞌáámá yā catecai cuɛ́ɛ yā. Ní ꞌiiⁿꞌyāⁿ miiⁿ ngaⁿꞌá yā ꞌtíícā: Ndísꞌtiī ní ntaaviꞌtuunúúⁿ nī ꞌtɛɛ ꞌtɛ́ɛ́ cá ndíí taachi ꞌiiⁿꞌyāⁿ yeⁿꞌe iⁿꞌyeeⁿdí ꞌcūū ꞌcaaⁿꞌnúⁿ yā tanáⁿꞌā ca ꞌiiⁿꞌyāⁿ chi diiⁿ ntiiⁿnyúⁿ yeⁿꞌe Cristo, ꞌiiⁿꞌyāⁿ chi hermanos yeⁿꞌé nī. Ní canéé chi ꞌcuūvi yā tanꞌdúúcā ndísꞌtiī chꞌií nī.

12 Ní nꞌdiichí ꞌiiⁿꞌyāⁿ chi nguuvi ꞌiiti cuūchī taachi nanꞌguaaⁿ yā ndii chííⁿ ndii niyaaⁿ sello miiⁿ. Ní nꞌdiichí chi díítūu nꞌdáí nuⁿꞌu yáⁿꞌāa yeⁿꞌē iⁿꞌyeeⁿdí ꞌcūū. Nꞌdiichí ꞌyáⁿꞌā miiⁿ chíí tanꞌdúúcā chi cuáíⁿ catecaí yā chi cuáíⁿ yeⁿꞌe luto. Ní ꞌiiyū miiⁿ ní nduuví cuaꞌāa tanꞌdúúcā yuūúⁿ. 13 Ní ꞌííⁿnyúⁿ sꞌeeⁿ yeⁿꞌe nanguuvi ní snꞌdaā ndii na yáⁿꞌāa. Ní tanꞌdúúcā chi ingéē táꞌā nꞌguiꞌi yáⁿꞌá yeⁿꞌe nꞌguíídīi taachi ndaā ꞌáámá ꞌyúúné tááⁿ ꞌtíícā snꞌdaā ꞌííⁿnyú sꞌeeⁿ. 14 Ní nanguuvi ní chꞌiinu yeⁿꞌē ní nduuvi ꞌlííⁿ tanꞌdúúcā chi nꞌgɛɛ̄cu yú ꞌáámá caaca. Ní ꞌáámá ꞌáámá yiīcū ndúúcū ꞌáámá ꞌáámá isla ní nuⁿꞌu yeⁿꞌe na lugar yeⁿꞌē. 15 Ní ꞌiiⁿꞌyāⁿ yeⁿꞌe iⁿꞌyeeⁿdí ꞌcūū, reyes ndúúcū ꞌiiⁿꞌyāⁿ chí chꞌɛɛtɛ ndúúcū ꞌiiⁿꞌyāⁿ ꞌcuiica ndúúcū ꞌiiⁿꞌyāⁿ comandantes ndúúcū ꞌiiⁿꞌyāⁿ chi vɛ́ɛ́ poder yeⁿꞌé yā ndúúcū ꞌiiⁿꞌyāⁿ chi ꞌáámá diíⁿ yā ntiiⁿnyuⁿ yeⁿꞌe ꞌiiví yā ndúúcū ꞌiiⁿꞌyāⁿ chi libre yā, nducyáácá yā chɛɛti núúⁿ nꞌdeꞌei yā na yiivi yáává ní nguááⁿ na tuūu yeⁿꞌe yiīcū. 16 Ní ꞌiiⁿꞌyāⁿ sꞌeeⁿ caⁿꞌa yā chii yā icyáⁿꞌā ndúúcū tuūu: Ndísꞌtiī icyáⁿꞌā ndúúcū tuūu, cunꞌdáá nduú nī vmnaaⁿ yeⁿꞌe núsꞌuu ní cunūūⁿ nꞌdéꞌei nī núsꞌuu yeⁿꞌē nanááⁿ Ndyuūs chí vɛ́ɛ yā na trono miiⁿ ní yeⁿꞌe castigo chi neené diītūu nꞌdai chí Jesucristo chí nguuvi ꞌiiti cuūchī tée yā núsꞌuu.

17 Caati ꞌāā ndaā nguuvi chꞌɛɛtɛ miiⁿ taachi Ndyuūs caꞌa yā castigo ꞌiiⁿꞌyāⁿ sꞌeeⁿ ní ¿Duꞌū cuuvi cuchɛ́ɛ́ castigo ꞌcūū?