Libro ndúúcū ꞌiiti cuūchī
5
Ní nꞌdiichí na taꞌa cuaacú yā ꞌiiⁿꞌyāⁿ chi vɛ́ɛ yā na trono miiⁿ ꞌáámá libro chi tanꞌdúúcā ꞌáámá rollo caaca naachi canéé nguūⁿ cuááⁿ chɛɛti ndii cuaaⁿ dáámí. Ní libro miiⁿ nduudi ndúúcū ndɛɛ̄chɛ̄ sellos. 2 Ní nꞌdiichí ꞌáámá ángel chi vɛ́ɛ́ poder yeⁿꞌé yā. Ní yuudu nꞌdáí ꞌcai yā ní caⁿꞌa yā ꞌtúúcā. ¿Dúꞌū chi nꞌdai taavi ca chi cuuvi nnꞌguaaⁿ libro ꞌcūū ní ndivíī sellos chi nduudí?3 Naati mar ꞌáámá ꞌiiⁿꞌyāⁿ yeⁿꞌe vaꞌai chɛɛti nguuvi ndíí nguɛ́ɛ́ mar ꞌáámá ꞌiiⁿꞌyāⁿ yeⁿꞌe iⁿꞌyeeⁿdí ꞌcūū ndíí nguɛ́ɛ́ ndúú mar ꞌáámá ꞌiiⁿꞌyāⁿ chi canúúⁿ maaⁿ yáⁿꞌāa cuuvi nanꞌguaáⁿ yā libro miiⁿ ndíí nguɛ́ɛ́ ndúú cuuvi nꞌdiichí yā libro miiⁿ. 4 Ní ꞌúú Juan neené chɛɛ̄cu taaví ti nguɛ́ɛ́ ndaaca yā mar ꞌáámá ꞌiiⁿꞌyāⁿ chi nꞌdai taavi cá yā chi cuuvi nanꞌguaaⁿ yā libro miiⁿ ní ꞌcueeⁿ yā yeⁿꞌē. Ndíí nguɛ́ɛ́ ndúú cuuvi snaaⁿ yā libro miiⁿ. 5 Tuuꞌmi ní ꞌáámá ꞌiiⁿntyéⁿꞌē caⁿꞌa yā chii yā ꞌúú: Díí nguɛ́ɛ́ cuɛɛcu di. Cuinꞌdííchí dí. Jesucristo chi duuchi ꞌyáíⁿyāaⁿ cuáꞌaá, chi yeⁿꞌe ndaata yeⁿꞌe ꞌiiⁿꞌyāⁿ Judá chi yeⁿꞌe ꞌiiⁿꞌyāⁿ yeⁿꞌe ndaata David, ꞌiiⁿꞌyāⁿ miiⁿ chichɛɛ́ yā yeⁿꞌe tanducuéⁿꞌē ní cuuví nanꞌguaáⁿ yā libro miiⁿ ní cuuvi cáánteéⁿ yā nduꞌu ndɛ̄ɛ̄chɛ̄ sellos.
6 Tuuꞌmi ní nꞌdiichí chi naavtaⁿꞌā yeⁿꞌe trono miiⁿ ní naavtaⁿꞌā yeⁿꞌe nduꞌu cuūuⁿ ꞌiiⁿꞌyāⁿ miiⁿ ní naavtaⁿꞌā yeⁿꞌe ꞌiiⁿntyéⁿꞌē sꞌeeⁿ nꞌdiichí ꞌáámá ꞌiiⁿꞌyāⁿ chi nguuvi ꞌiiti cuūchī chi chééndii yā. Ní nꞌdiichí chi vɛ́ɛ́ seña na cuerpo yeⁿꞌe yā chi ꞌiiⁿꞌyāⁿ chꞌiiⁿꞌnúⁿ yā ꞌyā. Ní ꞌiiⁿꞌyāⁿ chi nguuvi ꞌiiti cuūchī miiⁿ vɛ́ɛ́ ndɛɛ̄chɛ̄ duuⁿnííⁿníⁿ yā ní ndɛɛ̄chɛ̄ nduutináaⁿ yā chi ndɛɛ̄chɛ̄ espíritus yeⁿꞌé Ndyuūs chi Ndyuūs dichoꞌó yā núúⁿmáⁿ íⁿꞌyeēⁿdī. 7 ꞌIiⁿꞌyāⁿ miiⁿ ní cueⁿꞌé yā ní ndaá yā ní staꞌá yā libro miiⁿ yeⁿꞌe taꞌā cuaācú yā ꞌiiⁿꞌyāⁿ chi vɛ́ɛ yā na trono miiⁿ. 8 Ní taachi staꞌá yā libro miiⁿ ní ndúú cuūuⁿ ꞌiiⁿꞌyāⁿ miiⁿ ndúúcū ndiicú cuūuⁿ ꞌiiⁿntyéⁿꞌē chintiiꞌyá yā nanááⁿ ꞌiiⁿꞌyāⁿ chi nguuvi ꞌiiti cuūchī miiⁿ. Ní caꞌáámá caꞌáámá ꞌiiⁿntyéⁿꞌē sꞌeeⁿ candɛɛ yā arpas yeⁿꞌe yā. Ní ndɛɛ́ yā chiitɛ yeⁿꞌe ꞌdííⁿnguāaⁿ ndiituú ndúúcū cúⁿꞌúyaa. Ní ꞌyaaⁿꞌmiⁿ yeⁿꞌe cúⁿꞌúyaa miiⁿ chííⁿ chi ngaⁿꞌanguáꞌāa ꞌiiⁿꞌyāⁿ na iⁿꞌyeeⁿdí ꞌcūū, ꞌiiⁿꞌyāⁿ chí yeⁿꞌe Ndyuūs. 9 Ní chiitá yā ꞌáámá canto chí ngai chi ꞌtíícā:
Díí ní nꞌdai taavi di chi cutaꞌa di libro miiⁿ ní cáánteeⁿ di sellos yeⁿꞌē caati ꞌiiⁿꞌyāⁿ chꞌiiⁿꞌnúⁿ yā dii. Ní dii cáávā yuūúⁿ yeⁿꞌe di cái di núsꞌūū chi cuuví ꞌnū yeⁿꞌe Ndyuūs núsꞌuu. Ní núsꞌuu ní yeⁿꞌe nducyáácá raza yeⁿꞌe ꞌiiⁿꞌyāⁿ, ní yeⁿꞌē tanducuéⁿꞌē idioma ní yeⁿꞌē tanducuéⁿꞌē yáāⁿ, ní yeⁿꞌe tanducuéⁿꞌē nación. ꞌTíícā núsꞌuu.
10 Ní dii ní dinꞌdái di núsꞌuu ní diiⁿ di chi reyes núsꞌuu, ní diiⁿ di chi chiiduú núsꞌuu cucáávā Ndyuūs yeⁿꞌe yú. Ní ꞌiicú cuuvi caaⁿꞌmaⁿ ntiiⁿnyuⁿ ꞌnū nanááⁿ ꞌiiⁿꞌyāⁿ yeⁿꞌe iⁿꞌyeeⁿdí ꞌcūū.
11 Ní cuaaⁿ ꞌnííⁿnúⁿ nꞌdiichí ní chꞌiindiveéⁿ nduudu yeⁿꞌē ꞌyaaⁿ nꞌdáí ángeles chi snée yā cuaaⁿ ꞌdiituú yeⁿꞌe trono miiⁿ ní yeⁿꞌe nduu cuūuⁿ ꞌiiⁿꞌyāⁿ miiⁿ, ní yeⁿꞌe ꞌiiⁿntyéⁿꞌē sꞌeeⁿ. Ní ángeles ní nꞌdeee nꞌdáí yā chi ngii yā ndiichi millares ndii chííⁿ cuuvi millares ndúúcū millares ndúúcū millares. 12 Ní yuudu nꞌdai caⁿꞌa nducyaaca sꞌeeⁿ:
ꞌIiⁿꞌyāⁿ chi nguuvi ꞌiiti cuūchī chi ꞌiiⁿꞌyāⁿ chꞌiiⁿꞌnúⁿ yā ní nꞌdai taavi cá yā chi nducyaaca ꞌiiⁿꞌyāⁿ dichꞌɛɛtɛ́ yā. ꞌIiⁿꞌyāⁿ miiⁿ staꞌá yā tanducuéⁿꞌē denduꞌū poder ndúúcū tanducuéⁿꞌē vaadī ꞌcuiica ndúúcū tanducuéⁿꞌē vaadī deenu ndúúcū tanducuéⁿꞌē fuerzas ndúúcū tanducuéⁿꞌē honra ndúúcū tanducuéⁿꞌē vaadī dɛɛvɛ ngíí ndúúcū chi nducyaaca ꞌiiⁿꞌyāⁿ dichꞌɛɛtɛ́ yā ꞌiiⁿꞌyāⁿ miiⁿ.
13 Ní chꞌiindiveéⁿ ntuúⁿ nduudu yeⁿꞌe nducyaaca chi snéé na vaꞌai chɛɛti nguuvi ndúúcū nducyaaca chi snéé vmnaaⁿ yáⁿꞌāa ꞌcūū ndúúcū nducyaaca chi snéé maaⁿ yáⁿꞌāa ndúúcū nducyaaca chi snéé ná nuūⁿnīⁿꞌyáⁿꞌā, nducyaaca chi vɛ́ɛ́ yeⁿꞌe nducueⁿꞌē chi vɛ́ɛ́ ní ngiita yā ꞌtíícā:
Cueⁿꞌe daāⁿmaⁿ cueⁿꞌe daāⁿmaⁿ dichꞌɛɛtɛ́ ꞌnū dii ní diíⁿ ꞌnū honrar dii. Ní caⁿꞌa ꞌnū chi vaadī dɛɛvɛ ngii ndúúcū poder ní yeⁿꞌé ꞌiiⁿꞌyāⁿ chi vɛ́ɛ yā na trono miiⁿ ní yeⁿꞌé ꞌiiⁿꞌyāⁿ chi nguuvi ꞌiiti cuūchī.
14 Ní nduꞌu cuūuⁿ ꞌiiⁿꞌyāⁿ sꞌeeⁿ ní caⁿꞌa yā: Tíícā cuuvi. Ní nduꞌu ndiichi cuūuⁿ ꞌiiⁿntyéⁿꞌē chintiiꞌyá yā ní sꞌtéénu yā ꞌiiⁿꞌyāⁿ chi ꞌáámá canéé yā cueⁿꞌe daāⁿmaⁿ.