Nducyáácá yā chi snée yā na vaꞌai chɛɛti nguuvi dichꞌɛɛtɛ́ yā Ndyuūs
4
Chóꞌōo denduꞌū chi ꞌtúúcā ní cuayiivi ní ꞌúú nꞌdiichí cuaaⁿ ꞌnííⁿnúⁿ ní miiⁿ canéé ꞌáámá cheendi vaꞌāī yeⁿꞌe vaꞌai chɛɛti nguuvi chi canéé candáꞌāī. Ní chꞌiindiveéⁿ ꞌáámá nduudu chi tanꞌdúúcā chi nꞌgɛɛcu trompeta. Ní nduudu miiⁿ dáámá ndúúcū nduudu chi chꞌiindiveéⁿ vmnááⁿ vmnaaⁿ. Ní nduudu miiⁿ ní caⁿꞌa nduucú ꞌtíícā: Dii cūchɛɛ dí ꞌmúúⁿ ní ꞌúú ní ꞌcuuⁿꞌmíⁿ dii denduꞌū chi cuchiī cuayiivi.2 Hora mííⁿ nūuⁿ ꞌúú caneé maaⁿ poder Espíritu Nꞌdai yeⁿꞌé Ndyuūs ní nꞌdiichí ꞌáámá trono na vaꞌai chɛɛti nguuvi. Ní Ndyuūs vɛ́ɛ yā na trono miiⁿ. 3 ꞌIiⁿꞌyāⁿ chi vɛ́ɛ́ yā na trono miiⁿ ní núúⁿmáⁿ cuerpo yeⁿꞌé yā naáⁿ yā tanꞌdúúcā ꞌáámá tuūu chi ꞌáámá ngíí nꞌgai tanꞌdúúcā tuūu jaspe ndúúcū tuūu sardio. ꞌTíícā cuerpo yeⁿꞌé yā. Ní nuuⁿmaⁿ ndiivií cuaaⁿ ꞌdiituú trono miiⁿ canee ꞌáámá cunꞌgúúⁿnꞌdí tanꞌdúúcā color yeⁿꞌe tuūu esmeralda. 4 Ní nuuⁿmaⁿ ndiivií cuááⁿ ꞌdiituú trono miiⁿ nꞌdiīchí ndiicu cuūuⁿ tronos yeⁿꞌe ꞌiiⁿntyéⁿꞌē sꞌeeⁿ naachi vɛ́ɛ yā. Ní nducyáácá yā vɛ́ɛ́ catecaí yā chi cuɛ́ɛ̄. Ní nducyáácá yā snúúⁿ tiíⁿ yā ꞌáámá corona yeⁿꞌe ꞌdííⁿnguāaⁿ. 5 Ní yeⁿꞌe trono chi naavtaⁿꞌā canꞌdáā ꞌcuaī ndúúcū dɛɛvɛ ndúúcū nduudu. Ní nanááⁿ trono miiⁿ canéé ndúúcū ndɛɛ̄chɛ̄ yaⁿꞌā ngiichi chi ndɛɛ̄chɛ̄ espíritus yeⁿꞌe Ndyuūs. 6 Ní canéé ntúūⁿ nanááⁿ trono miiⁿ ꞌáámá cosa tanꞌdúúcā nuūⁿnīⁿꞌyáⁿꞌā tanꞌdúúcā ꞌáámá vidrio chi ngiī dɛɛvɛ nꞌdai. Ní naavtaⁿꞌā yeⁿꞌe trono miiⁿ ní nuuⁿmaⁿ ndiivii cuaaⁿ ꞌdiituú yeⁿꞌe trono miiⁿ snéé cuūuⁿ ꞌiiⁿꞌyāⁿ yeⁿꞌē vaꞌai chɛɛti nguuvi chi snéé ꞌyaaⁿ nꞌdáí nduutináaⁿ yā ndii cuááⁿ vmnaaⁿ yā ndii cuááⁿ daamí yā. Ní ndiituú nduutinaáⁿ yā núúⁿmáⁿ chꞌɛɛtɛ cuerpo yeⁿꞌé yā. 7 ꞌIiⁿꞌyāⁿ yeⁿꞌe vaꞌai chɛɛti nguuvi chi vmnááⁿ vmnaaⁿ tanꞌdúúcā ꞌáámá ꞌyáíⁿyāaⁿ cuáꞌaá ꞌtiicá yā. Ndii chííⁿ ndii ꞌuuví yā tanꞌdúúcā ꞌáámá itiindu ꞌlííⁿ ꞌtiicá yā. Ní ꞌiiⁿꞌyāⁿ ndii chííⁿ ndii ꞌiinū miiⁿ vɛɛ naáⁿ yā tanꞌdúúcā naáⁿ ꞌiiⁿꞌyāⁿ ꞌtííca yā. Ní ndii chííⁿ ndii cuūúⁿ ꞌiiⁿꞌyāⁿ ní tanꞌdúúcā íꞌyāa chi ngeꞌe tī na ꞌyúúné ꞌtiicá yā. 8 Ní nduu cuūuⁿ ꞌiiⁿꞌyāⁿ sꞌeeⁿ ní vɛ́ɛ́ niyaaⁿ ngɛɛchi yā ꞌáámá ꞌaamá yā ni núúⁿmáⁿ cuááⁿ ꞌdiituú yā ní cuaaⁿ nááⁿ ngɛɛchi yā ní ndiitūú nduuti náaⁿ yā. Nguɛ́ɛ́ intaaviꞌtuunuúⁿ yā ndíí nguɛ́ɛ́ ndúú nguuvi ndíí nguɛ́ɛ́ ndúú nꞌgaaⁿ chi caⁿꞌa yā:
Dɛꞌɛ̄ chúúcā dɛɛvɛ yā, dɛꞌɛ̄ chúúcā dɛɛvɛ yā, dɛꞌɛ̄ chúúcā dɛɛvɛ yā, Señor Ndyuūs, chi vɛ́ɛ́ tanducuéⁿꞌē poder yeⁿꞌé yā. ꞌIiⁿꞌyāⁿ chi canéé ndii vmnááⁿ vmnaaⁿ ꞌiiⁿꞌyāⁿ chi maaⁿ canée yā, ní ꞌiiⁿꞌyāⁿ chí canéé chí ndaa yā.
9 Ní caꞌáámá caꞌáámá vmnéⁿꞌēe chi ꞌiiⁿꞌyāⁿ sꞌeeⁿ dichꞌɛɛtɛ́ yā ꞌiiⁿꞌyāⁿ miiⁿ chi vɛ́ɛ yā na trono miiⁿ ní diíⁿ yā honrar ꞌiiⁿꞌyāⁿ miiⁿ ní caꞌá yā gracias ꞌiiⁿꞌyāⁿ miiⁿ chi candúúchí yā cueⁿꞌe daāⁿmaⁿ ꞌtíícā diiⁿ yā. 10 Nduꞌu ndiicú cuūuⁿ ꞌiiⁿntyéⁿꞌē candiitínꞌdíi yā nanááⁿ ꞌiiⁿꞌyāⁿ miiⁿ chi vɛ́ɛ yā na trono miiⁿ ní dichꞌɛɛtɛ́ yā ꞌiiⁿꞌyāⁿ chi ꞌáámá canée yā cueⁿꞌe daāⁿmaⁿ. Ní ꞌiiⁿꞌyāⁿ sꞌeeⁿ sꞌneeⁿ yā coronas yeⁿꞌe yā nanááⁿ trono miiⁿ ní caⁿꞌa yā ꞌtúúcā:
11 Díí Señor chi Ndyuūs yeⁿꞌe yú, díí ní nꞌdai taavi di chi dichꞌɛɛtɛ́ yā dii, ní diíⁿ yā honrar dii, ní ngaⁿꞌá yā chi tanducuéⁿꞌē poder ní yeⁿꞌe di caati dii ní dinꞌdái di tanducuéⁿꞌē denduꞌū chi vɛ́ɛ́. Ní cáávā chi maaⁿ di neⁿꞌe di dinꞌdái di tanducuéⁿꞌē denduꞌū, ꞌtíícā diiⁿ di.