Juan idingúuⁿ yā carta ꞌcūū yeⁿꞌe ꞌiiⁿꞌyāⁿ yeⁿꞌe yáāⁿ Sardis
3
Díí Juan, idingúuⁿ di yeⁿꞌe ꞌiiⁿꞌyāⁿ ndíí tiīiⁿ yeⁿꞌe ꞌiiⁿꞌyāⁿ yeⁿꞌe yáacū yeⁿꞌe yáāⁿ Sardis: Chuū ngaⁿꞌa Cristo chí vɛ́ɛ́ ndɛɛ̄chɛ̄ espíritus yeⁿꞌe Ndyuūs ndúúcū ndɛɛ̄chɛ̄ ꞌííⁿnyúⁿ sꞌeeⁿ. ꞌÚú deenú chiiⁿ chi diiⁿ di. Ní deenú chi ꞌáárá chí ꞌiiⁿꞌyāⁿ sꞌeeⁿ deenú yā dii cáávā cosas chi diiⁿ di ti cánduuchi di naati nanááⁿ ꞌúú dii canéé dí tanꞌdúúcā chi nꞌdíí di cucáávā nuuⁿndi yeⁿꞌe di. 2 Nandúúchí dí. Cunéé diītū di ní cuꞌtéénu ca di yeⁿꞌe cosas chi vɛ́ɛ́ caati vmnááⁿ vmnaaⁿ nguɛ́ɛ́ diiⁿ di cuidado yeⁿꞌe nducuéⁿꞌē. Cuꞌtéénu ca di ní nguɛ́ɛ́ cuuvi choꞌōo yeⁿꞌē chi vɛ́ɛ́ chi yeⁿꞌe di. Ní ꞌúú nꞌdiichí ntiiⁿnyuⁿ chi diiⁿ di. Ní nguɛ́ɛ́ nꞌdaacā ca nanááⁿ Ndyuūs. 3 Nꞌgaacú di yeⁿꞌe chi nꞌgiindiveeⁿ di chi ꞌiiⁿꞌyāⁿ chiꞌcueeⁿ yā dii. Maaⁿ ní diiⁿ di tanꞌdúúcā chi ꞌcueeⁿ di ní ndaacadaami di yeⁿꞌe chi diiⁿ di chi nguɛ́ɛ́ nꞌdaacā. Ní nduuti chi nguɛ́ɛ́ diiⁿ di cuidado tuuꞌmi ní ꞌúú ndaá tanꞌdúúcā ꞌáámá chi duucu ní nguɛ́ɛ́ cadíínuuⁿ di hora chí ndaá nanááⁿ dii. 4 Vɛ́ɛ́ duuꞌvi ꞌiiⁿꞌyāⁿ nguaaⁿ ndísꞌtiī chi snée yā na yáāⁿ Sardis, ꞌiiⁿꞌyāⁿ chi nguɛ́ɛ́ dinuuⁿndí yā tanꞌdúúcā tanáⁿꞌā ꞌiiⁿꞌyāⁿ chi dinuuⁿndí yā. ꞌIiⁿꞌyāⁿ sꞌeeⁿ caⁿꞌá yā nduucú ndúúcū catecai cuɛ́ɛ yā ti ꞌiiⁿꞌyāⁿ sꞌeeⁿ ní nꞌdai taaví yā chí cuuvi ꞌtíícā ndúúcu yā. 5 ꞌIiⁿꞌyāⁿ chi cuchɛɛ́ yā yeⁿꞌe tanducuéⁿꞌē nndaāca yā catecai cuɛ́ɛ yā. Ní ꞌúú nguɛ́ɛ́ nadatuūví chi duuchi yā naachi canéé nguūⁿ na libro yeⁿꞌe vida cueⁿꞌe daāⁿmaⁿ. Ní ꞌúú ní caaⁿꞌmáⁿ chi duuchí yā nanááⁿ chiidá ní nanááⁿ ángeles dendúꞌū. 6 ꞌIiⁿꞌyāⁿ chi vɛ́ɛ́ veéⁿ yā ꞌcaandiveéⁿ yā chííⁿ chi ngaⁿꞌā Espíritu Nꞌdai yeⁿꞌé Ndyuūs ngii ꞌiiⁿꞌyāⁿ sꞌeeⁿ yeⁿꞌe yaācū sꞌeeⁿ.Juan idingúuⁿ yā carta ꞌcūū yeⁿꞌe ꞌiiⁿꞌyāⁿ yeⁿꞌe yáāⁿ Filadelfia
7 Díí, Juan, idingúuⁿ ntúūⁿ di yeⁿꞌe ꞌiiⁿꞌyāⁿ ndii tiīiⁿ yeⁿꞌe ꞌiiⁿꞌyāⁿ yeⁿꞌe yaācū yeⁿꞌe yáāⁿ Filadelfia. Denduꞌū chi ꞌtúúcā ngaⁿꞌá ꞌiiⁿꞌyāⁿ chi dɛɛvɛ taavi ca yā ní cuaacu yā. ꞌIiⁿꞌyāⁿ miiⁿ chi ndɛ́ɛ yā llave yeⁿꞌe David, ꞌiiⁿꞌyāⁿ miiⁿ taachi nnꞌguaaⁿ yā puerta mar ꞌáámá ꞌiiⁿꞌyāⁿ nguɛ́ɛ́ cuuvi nnꞌgaadí yā. Ní taachi nnꞌgaadí yā ꞌtiicá ntúūⁿ mar ꞌáámá ꞌiiⁿꞌyāⁿ nguɛ́ɛ́ cuuvi nnꞌguaaⁿ yā. 8 ꞌÚú nꞌdiichí tanducuéⁿꞌē chi diiⁿ di. ꞌÚú nꞌneéⁿ cucáávā di ꞌáámá cheendi vaꞌāī chi maaⁿ ní cándaꞌāī ní mar ꞌáámá ꞌiiⁿꞌyāⁿ nguɛ́ɛ́ cuuvi nnꞌgaadí yā cheendi vaꞌāī miiⁿ. ꞌÁárá chi vɛ́ɛ́ duuꞌvi fuerzas yeⁿꞌe di chꞌiindiveeⁿ di nduudu cuaacu yeⁿꞌé ní nguɛ́ɛ́ ndaacadaami di yeⁿꞌé. 9 ꞌCaandiveeⁿ di yeⁿꞌé. ꞌIiⁿꞌyāⁿ sꞌeeⁿ ní yeⁿꞌe yááⁿnꞌguiinūuⁿ ti ngaⁿꞌá yā nduudu yaadi. Ngaⁿꞌá yā chi ꞌiiⁿꞌyāⁿ judíos yā chi Israel yā ní nguɛ́ɛ́ ꞌtúúcā diíⁿ yā tanꞌdúúcā ꞌiiⁿꞌyāⁿ judíos yā. Cuinꞌdiichi di. ꞌÚú idiíⁿ chi ꞌiiⁿꞌyāⁿ sꞌeeⁿ ní ndaá yā nanaaⁿ di ní caantiiꞌyá yā nanááⁿ caꞌa di ní cuꞌtéénu yā dii. Ní ꞌiiⁿꞌyāⁿ sꞌeeⁿ cuuvi cadíínuuⁿ yā chi ꞌúú ní neⁿꞌé dii. 10 Dii ní ndɛɛ di cuidado yeⁿꞌe nuuⁿndi chi ngaⁿꞌá yeⁿꞌe chi cuchɛɛ di, ní cuchɛ́ɛ di. Ní cáávā chuū ꞌúú ndɛɛ́ cuidado yeⁿꞌe dii yeⁿꞌe tiempo chi cuchiī chi caaⁿmaⁿ ndaá cosas chi nꞌdiichineeⁿ yā dii. Ní cosas miiⁿ ndaa yeⁿꞌe ꞌiiⁿꞌyāⁿ chi snée yā núúⁿmáⁿ iⁿꞌyeēⁿdī. Ní nꞌdiichineéⁿ nducyaaca ꞌiiⁿꞌyāⁿ chi sꞌnéeⁿ yā na iⁿꞌyeeⁿdí ꞌcūū. 11 Cuinꞌdiichi di. Niiⁿnuⁿ ndaá nanááⁿ dii. Cundɛ́ɛ ca di cuidado yeⁿꞌē chi vɛ́ɛ́ yeⁿꞌe di ní mar ꞌáámá ꞌiiⁿꞌyāⁿ cuuvi cutaꞌá yā corona chi cuuvi yeⁿꞌe di. 12 ꞌIiⁿꞌyāⁿ chi cuchɛɛ́ yā yeⁿꞌe tanducuéⁿꞌē, ꞌúú idiíⁿ chi ꞌiiⁿꞌyāⁿ sꞌeeⁿ ꞌáámá caneé yā na yaācū yeⁿꞌé tanꞌdúúcā ꞌáámá pilar yeⁿꞌe yaācū yeⁿꞌe Ndyuūs, ꞌtííca yā. Ní ꞌāā ntɛ́ɛ́ canꞌdaa yā yeⁿꞌe yaācū miiⁿ. Ní ꞌúú idinguúⁿ nchɛɛtɛ́ yā chi dúúchí Ndyuūs yeⁿꞌé ndúúcū chi duuchi yeⁿꞌe yáāⁿ yeⁿꞌe Ndyuūs yeⁿꞌé. Ní yáāⁿ miiⁿ nguuvi Jerusalén chí ngai chi ndaā yeⁿꞌe vaꞌai chɛɛti nguuvi ní yeⁿꞌe Ndyuūs yeⁿꞌé. 13 ꞌIiⁿꞌyāⁿ chi vɛ́ɛ́ veéⁿ yā ꞌcaandiveéⁿ yā chi ngaⁿꞌā Espíritu Nꞌdai yeⁿꞌé Ndyuūs ngii ꞌiiⁿꞌyāⁿ sꞌeeⁿ yeⁿꞌe yaācū sꞌeeⁿ.
Juan idingúuⁿ yā carta ꞌcūū yeⁿꞌe ꞌiiⁿꞌyāⁿ yeⁿꞌe yáāⁿ Laodicea
14 Díí, Juan, idingúuⁿ di yeⁿꞌe ꞌiiⁿꞌyāⁿ ndii tiīiⁿ yeⁿꞌe ꞌiiⁿꞌyāⁿ yeⁿꞌe yaācū yeⁿꞌe yáāⁿ Laodicea: Nduudú ꞌcūū ní yeⁿꞌe ꞌiiⁿꞌyāⁿ chi nguuví yā Amén chi neⁿꞌe caaⁿꞌmaⁿ chí cuaacu yā. ꞌIiⁿꞌyāⁿ miiⁿ chi testigo yā ní ngaⁿꞌa cuaacu yā cueⁿꞌe daāⁿmaⁿ. ꞌIiⁿꞌyāⁿ miiⁿ ní yeⁿꞌé yā tanducuéⁿꞌē chi Ndyuūs dinꞌdái yā. 15 ꞌÚú deenú tanducuéⁿꞌē chi diiⁿ di. Ní díí canee di tanꞌdúúcā chi nguɛ́ɛ́ ndúú ꞌiiⁿꞌnūⁿ di ndíí nguɛ́ɛ́ ndúú ꞌiichɛ di. Dɛꞌɛ chúúcā nꞌdaacā cáávā dii ndúútī chí ꞌiiⁿꞌnūⁿ di o ꞌiichɛ di. 16 Cáávā chi dii ní cuūtū di, ní nguɛ́ɛ́ ꞌiiⁿꞌnūⁿ di, ndíí nguɛ́ɛ́ ndúú ꞌiīchɛ̄ di, ꞌúú ní diíⁿ ndúúcū di tanꞌdúúcā chi caachí dii yeⁿꞌē na cheendí ti dii tanꞌdúúcā chi nuūⁿnīⁿ daaíⁿ dii, ní ꞌtíícā diíⁿ. 17 Díí ní ꞌtúúcā ngaⁿꞌa di chi ꞌcuiica di ní nguɛ́ɛ́ dɛꞌɛ̄ vɛɛ neⁿꞌe di ti neené nꞌdeēe dendúꞌū yeⁿꞌe di vɛ́ɛ́. Naati díí nguɛ́ɛ́ deenu di chi nguɛ́ɛ́ dɛꞌɛ̄ vɛɛ yeⁿꞌe di. Ní ndaachí canée di caati canée di tanꞌdúúcā chi díí ní pobre di ní nguɛ́ɛ́ catecai di, ní ngueenáaⁿ di. ꞌTíícā canée di. 18 ꞌÚú ní teé consejo dii. Cuai di yeⁿꞌe ꞌúú ꞌdííⁿnguāaⁿ chi ꞌiiⁿꞌyāⁿ dinꞌdái yā cáávā nguuchi yaⁿꞌā ní ꞌíícú cuuvi cuaacu chi ꞌcuiica di. Ní cuai di catecai cuɛ́ɛ̄ chi cuꞌnuuⁿ di cuerpo yeⁿꞌe maaⁿ di ní nguɛ́ɛ́ cuuvi ꞌcuináaⁿ di caavā chi nguɛ́ɛ́ catecai di. Ní cuai di yiīcū ní cuꞌneeⁿ di na nduutináaⁿ di ní ꞌíícú cuuvi snaaⁿ di. 19 ꞌÚú yaaꞌvineé nducyaaca ꞌiiⁿꞌyāⁿ chi idineⁿꞌé ní diíⁿ castigar ꞌiiⁿꞌyāⁿ sꞌeeⁿ. Maaⁿ ní canéé chi nndáácádáámí dí yeⁿꞌe chi diiⁿ di chi nguɛ́ɛ́ nꞌdaacā. Ní serio canee di ndii staava yeⁿꞌe di. 20 Cuinꞌdiichi di. ꞌÚú ní caneé cheendi vaꞌāī ní ꞌcuaí ꞌiiⁿꞌyāⁿ. Nduuti chi ꞌáámá ꞌiiⁿꞌyāⁿ ꞌcaandiveéⁿ yā nduudu yeⁿꞌé ní nnꞌguaaⁿ yā cheendi vaꞌāī caavā ꞌúú, tuuꞌmi ní ꞌúú choꞌó cuaaⁿ chɛɛti vaꞌāī ní nꞌdiichí ꞌiiⁿꞌyāⁿ miiⁿ. Ní cheꞌé ndúúcu yā ní ꞌiiⁿꞌyāⁿ miiⁿ cheꞌé yā nduucú. 21 ꞌIiⁿꞌyāⁿ chi cuchɛɛ yā yeⁿꞌe tanducuéⁿꞌē denduꞌū ꞌúú ní caꞌá lugar yeⁿꞌe yā chi ꞌcuūndí yā ndúúcū ꞌúú na trono yeⁿꞌé tanꞌdúúcā chí ꞌúú chichɛɛ́ yeⁿꞌe tanducuéⁿꞌē denduꞌū ní chꞌiindí ndúúcū chiidá na trono yeⁿꞌé yā. 22 ꞌIiⁿꞌyāⁿ chi vɛ́ɛ́ veéⁿ yā ꞌcaandiveéⁿ yā chi ngaⁿꞌā Espíritu Nꞌdai yeⁿꞌé Ndyuūs ngii nducyaaca ꞌiiⁿꞌyāⁿ yeⁿꞌe yaācū sꞌeeⁿ.