8 Díí, Juan, idingúuⁿ di yeⁿꞌe ꞌiiⁿꞌyāⁿ chi ndíí tiīiⁿ yeⁿꞌe ꞌiiⁿꞌyāⁿ yeⁿꞌe yáacū yeⁿꞌe yáāⁿ Esmirna. Denduꞌu chi ꞌtúúcā ngaⁿꞌá ꞌiiⁿꞌyāⁿ chi vmnááⁿ vmnaaⁿ ndii chí ꞌcuiinu, ꞌiiⁿꞌyāⁿ chi ꞌāā nꞌdīi yā ní maaⁿ ní ꞌāā canduuchi ntuúⁿ yā. 9 ꞌÚú deenú ntiiⁿnyuⁿ chi diiⁿ di. Deenú chi nꞌgeenu di ngii ndúúcū denduꞌū chi chɛɛchí nꞌdai yeⁿꞌe di. Deenú chi nguɛ́ɛ́ dɛꞌɛ̄ vɛɛ yeⁿꞌe di naati cuaacu nííⁿnyúⁿ chi ꞌcuiica di. ꞌÚú deenú yeⁿꞌē chi ꞌiiⁿꞌyāⁿ chi ngaⁿꞌá yā chi judíos yā chi Israel ya ní nguɛ́ɛ́ diíⁿ yā tanꞌdúúcā chi ꞌiiⁿꞌyāⁿ judíos yā. Ní deenú chi ꞌiiⁿꞌyāⁿ sꞌeeⁿ nguɛ́ɛ́ nꞌdaacā ngaⁿꞌá yā yeⁿꞌe di. Ní ꞌiiⁿꞌyāⁿ sꞌeeⁿ ní yeⁿꞌe yááⁿnꞌguiinūuⁿ. 10 Nguɛ́ɛ́ ꞌvaꞌa di yeⁿꞌē dendúꞌū chi canee chi ꞌcueenu di cuuvi. ꞌCaandiveeⁿ di yeⁿꞌé. Yááⁿnꞌguiinūuⁿ cutáꞌa sa náⁿꞌā ndísꞌtiī ní cuꞌnuuⁿ sa ꞌiiⁿꞌyāⁿ vácūū caati nꞌdiichineeⁿ sa nducyaaca ndísꞌtiī. Ní canee chi ꞌcueenú nī cuuvi ndiichí nguuvi. Naati ꞌáámá canee nī ndúúcū chi iꞌtéénu nī ndii chi ꞌcuūvi nī ní ꞌúú teé ndísꞌtiī ꞌáámá corona chi vida cueⁿꞌe daāⁿmaⁿ. 11 ꞌIiⁿꞌyāⁿ chi vɛ́ɛ́ veéⁿ yā ꞌcaandiveéⁿ yā chi ngaⁿꞌā Espíritu Nꞌdai yeⁿꞌé Ndyuūs ngii ꞌiiⁿꞌyāⁿ sꞌeeⁿ yeⁿꞌe yáacū sꞌeeⁿ. ꞌIiⁿꞌyāⁿ chi cuchɛ́ɛ yā yeⁿꞌe tanducuéⁿꞌē denduꞌū nguɛ́ɛ́ cuuvi ꞌcueenú yā cuuvi yeⁿꞌē ndii ꞌúúví vaadī nꞌgii chi infierno.

12 Díí, Juan, idingúuⁿ di ntúūⁿ ꞌiiⁿꞌyāⁿ ndíí tiīiⁿ chi yeⁿꞌe ꞌiiⁿꞌyāⁿ yeⁿꞌe yáacū yeⁿꞌe yáāⁿ Pérgamo: Chuū ngaⁿꞌá ꞌiiⁿꞌyāⁿ chi vɛ́ɛ́ machete chi ꞌuūvī lados ꞌcaāiⁿ. 13 Chuū ngaⁿꞌa yā. ꞌÚú ní deenú tanducuéⁿꞌē chi diiⁿ di. Deenú chi canee di naachi yááⁿnꞌguiinūuⁿ ngaⁿꞌa ntiiⁿnyuⁿ sa. Ní ꞌáárá chí ꞌtíícā ꞌáámá canee di lado yeⁿꞌé nguɛ́ɛ́ ndaacádaami di yeⁿꞌe chi iꞌtéénu di ꞌúú. Ní ꞌtiicá ntúūⁿ diiⁿ di nguuvi chi chóꞌōo taachi nguaaⁿ ndísꞌtiī ꞌiiⁿꞌyāⁿ sꞌeeⁿ chꞌiiⁿꞌnúⁿ yā saⁿꞌā Antipas chi ꞌáámá caⁿꞌā sa nduudu cuaacu yeⁿꞌé na yáāⁿ naachi canee yááⁿnꞌgiinūuⁿ. 14 Naati vɛ́ɛ́ nꞌduuvi denduꞌū yeⁿꞌe chi contra yeⁿꞌē di. Na yáāⁿ Pérgamo chi yáāⁿ yeⁿꞌe di vɛ́ɛ́ nguaaⁿ ndísꞌtiī náⁿꞌā ꞌiiⁿꞌyāⁿ chi nguɛ́ɛ́ neⁿꞌé yā sꞌneéⁿ yā yeⁿꞌe chi iꞌtéénu yā chi ꞌcueeⁿ Balaam. Ní Balaam miiⁿ ꞌiiⁿꞌyāⁿ chí chiꞌcueéⁿ yā saⁿꞌā Balac táácā cuuvi diiⁿ sa chi ꞌiiⁿꞌyāⁿ yeⁿꞌe Israel dinuuⁿndí yā. Ní ꞌiiⁿꞌyāⁿ sꞌeeⁿ yeⁿꞌe Israel dinuuⁿndí yā taachi cheꞌé yā denduꞌū yeⁿꞌe chi ꞌiiⁿꞌyāⁿ cáávā ofrenda caꞌa yā nátai yeⁿꞌe santos chi ídolos, ní taachi caⁿꞌá yā ndúúcū ꞌaama nꞌdaataá o ꞌaama isáⁿꞌā chi nguɛ́ɛ́ yeⁿꞌé yā. 15 Ní ꞌtiicá ntúūⁿ vɛ́ɛ́ nguaaⁿ ndísꞌtiī ꞌiiⁿꞌyāⁿ chi nguɛ́ɛ́ neⁿꞌé yā sꞌneeⁿ yā yeⁿꞌe chi iꞌtéénu yā chi caꞌcueéⁿ yā yeⁿꞌe ꞌiiⁿꞌyāⁿ yeⁿꞌe grupo yeⁿꞌe nicolaítas. Ní ꞌúú nguɛ́ɛ́ inee yiinú yeⁿꞌe chuū. 16 Ndaacadáámí dí yeⁿꞌe nducuéⁿꞌē chuū. Nduuti chi nguɛ́ɛ́ diiⁿ di ꞌtúúcā ndaa nuúⁿ naachi canee di ní ꞌcuuⁿꞌmáⁿ ndúúcū ꞌiiⁿꞌyāⁿ sꞌeeⁿ ndúúcū machete chi ꞌuūvī lados ꞌcaāiⁿ chi canéé cheendí. 17 ꞌIiⁿꞌyāⁿ chi vɛ́ɛ́ veéⁿ yā ꞌcaandiveéⁿ yā chi ngaⁿꞌā Espíritu Nꞌdai yeⁿꞌé Ndyuūs ngii ꞌiiⁿꞌyāⁿ sꞌeeⁿ yeⁿꞌe yáacū sꞌeeⁿ. ꞌIiⁿꞌyāⁿ chi cuchɛɛ yā yeⁿꞌe tanducuéⁿꞌē ꞌúú ní caꞌá ꞌiiⁿꞌyāⁿ sꞌeeⁿ pan chi duuchi maná chi canúúⁿ nꞌdeꞌei. Ní caꞌá ꞌiiⁿꞌyāⁿ sꞌeeⁿ ꞌáámá tuūu cuɛ́ɛ̄ naachi canéé nguūⁿ ꞌáámá chi duuchi chi ngai. Mar ꞌáámá ꞌiiⁿꞌyāⁿ nguɛ́ɛ́ deenú yā chi duuchi miiⁿ, dámaāⁿ ꞌiiⁿꞌyāⁿ chi cutaꞌá yā tuūu cuɛ́ɛ̄ miiⁿ deenú yā chi duuchi miiⁿ.

18 Díí, Juan, idingúuⁿ di yeⁿꞌe ꞌiiⁿꞌyāⁿ ndíí tiīiⁿ yeⁿꞌe ꞌiiⁿꞌyāⁿ yeⁿꞌe yáacū yeⁿꞌe yáāⁿ Tiatira: Daiyá Ndyuūs chi vɛ́ɛ́ nduutináaⁿ yā tanꞌdúúcā nguuchi yaⁿꞌā ni caꞌa yā tanꞌdúúca cūū cuaaaⁿ chi dɛɛvɛ́ nꞌdai ngaⁿꞌá yā ꞌtíícā. 19 ꞌUú deenú nducuéⁿꞌē chi diiⁿ di. Deenú chi dineⁿꞌe di ꞌúú, chi iꞌtéénu di ꞌúú, ní dichiiꞌvɛ di ꞌúú. Ní vɛ́ɛ́ paciencia nanáaⁿ di. Deenú chi maaⁿ diíⁿ nī ntiiⁿnyuⁿ chi nꞌdeee nꞌdáí nguɛ́ɛ́ ti ntiiⁿnyuⁿ yeⁿꞌé nī chi vmnaaⁿ. 20 Naati vɛ́ɛ́ duūꞌvī dendúꞌū contra yeⁿꞌē di. Ndísꞌtiī ní ꞌcuaáⁿ nī táⁿꞌā Jezabel chi ngaⁿꞌa tá chi chííⁿ chi ngaⁿꞌa tá ní nduudu cuaacu yeⁿꞌé Ndyuūs. Nginncheꞌei tá ꞌiiⁿꞌyāⁿ chi dichííꞌvɛ̄ ꞌúú ndúúcū chí ngíꞌcueeⁿ tá. Ní ngaⁿꞌa tá chí ꞌiiⁿꞌyāⁿ cuuvi caⁿꞌá yā ndúúcū nꞌdaataá o isaⁿꞌā chi nguɛ́ɛ́ yeⁿꞌé yā ní cuuvi chéꞌe yā denduꞌū chi ꞌiiⁿꞌyāⁿ sꞌeeⁿ cáávā ofrenda caꞌa yā nátai yeⁿꞌe santos chi ídolos. 21 ꞌÚú ní caꞌá lugar táⁿꞌā miiⁿ chi ndaacadaami tá yeⁿꞌe chi diiⁿ tá chí nguɛ́ɛ́ nꞌdaacā naati nguɛ́ɛ́ ꞌcuūⁿ ta ndaacadaami tá yeⁿꞌe nducuéⁿꞌē chí diiⁿ tá chi nguɛ́ɛ́ nꞌdaacā. Ní neⁿꞌe tá chi tanáⁿꞌā ꞌiiⁿꞌyāⁿ dinuuⁿndí yā ndúúcu tá. 22 Maaⁿ ní ꞌúú diíⁿ chi nééné ngiitā tá miiⁿ ní nducyáácá isaⁿꞌā chi diíⁿ yā tanꞌdúúcā chi ngiꞌcueeⁿ tá neené ꞌcueenu yā cuuvi. ꞌTíícā maaⁿ ní diíⁿ ndúúcū nducyáácá yā nduuti chi nguɛ́ɛ́ ndaacadáámí yā yeⁿꞌe chi ngiꞌcueeⁿ nꞌdaataá mííⁿ. 23 ꞌTiicá ntúūⁿ ꞌúú ní ꞌcaāⁿꞌnúⁿ nducyaaca ꞌiiⁿꞌyāⁿ chi diíⁿ yā tanꞌdúúcā chi chiꞌcueeⁿ tá. Ní nducyaaca ꞌiiⁿꞌyāⁿ yeⁿꞌe nducyáácá yaācū caⁿꞌá yā cadíínuuⁿ yā chi ꞌúú chi nꞌdiichí dɛꞌɛ̄ vɛɛ chi ꞌiiⁿꞌyāⁿ nadicadíínuuⁿ yā ndii na staava yeⁿꞌé yā. Ní ꞌúú nadiiꞌvɛ́ ndísꞌtiī tuunu tuunu ca denduꞌū chi diíⁿ nī. 24 Chuū ngaⁿꞌá ngīi ndísꞌtiī ndúúcū tanáⁿꞌā ꞌiiⁿꞌyāⁿ chi iꞌtéénu yā Ndyuūs ní chi snée yā na yáāⁿ Tiatira chi nguɛ́ɛ́ diíⁿ yā tanꞌdúúcā chi ngiꞌcueeⁿ táⁿꞌā miiⁿ. Ní nguɛ́ɛ́ déénu nī dɛꞌɛ̄ chi nuuⁿndi sꞌeeⁿ chi chꞌɛɛtɛ chí yeⁿꞌe yááⁿnꞌguiinūuⁿ. Tanꞌdúúcā chi ngaⁿꞌa náⁿꞌā ꞌiiⁿꞌyāⁿ ꞌúú ngaⁿꞌá chi nguɛ́ɛ́ cuꞌneéⁿ táámá dendúꞌū chi díítūu nanááⁿ ndísꞌtiī. 25 Naati chííⁿ chi ꞌāā vɛ́ɛ́ yeⁿꞌé nī cundɛɛ́ nī cuidado yeⁿꞌē ndii ꞌúú nindaá nanáaⁿ nī. 26 ꞌIiⁿꞌyāⁿ chi cuchɛ́ɛ yā yeⁿꞌe tanducuéⁿꞌē denduꞌū ní nguuvi nguuvi diíⁿ yā tanꞌdúúcā ꞌúú neⁿꞌé ndíí cuaaⁿ ná nꞌgiinu, ꞌúú ní caꞌá ntiiⁿnyuⁿ ꞌiiⁿꞌyāⁿ sꞌeeⁿ chi ꞌiiⁿntyéⁿꞌē yeⁿꞌe nducuéⁿꞌē naciones. 27 Ní caⁿꞌa ntiiⁿnyúⁿ yā yeⁿꞌe ꞌiiⁿꞌyāⁿ sꞌeeⁿ tanꞌdúúcā chiidá tee yā poder ꞌúú chi ꞌúú ngaⁿꞌa ntiiⁿnyúⁿ yeⁿꞌe nducuéⁿꞌē naciones ndúúcū ꞌáámá nduucu cūū yeⁿꞌé. Ní ndúúcū nduucu cūū miiⁿ ꞌcueⁿꞌé naciones chí chīcheiyei tanꞌdúúcā chi naciones ní ꞌaama vaso yeⁿꞌe yáⁿꞌāa chi ꞌcueēeⁿ. 28 Ní ꞌiiⁿꞌyāⁿ chi cuchɛɛ yā yeⁿꞌe tanducuéⁿꞌē ꞌúú ní caꞌá ꞌiiⁿꞌyāⁿ miiⁿ ꞌííⁿnyúⁿ yeⁿꞌe nguɛɛtiyaaⁿ. 29 ꞌIiⁿꞌyāⁿ chi vɛ́ɛ́ veéⁿ yā ꞌcaandiveéⁿ yā chi ngaⁿꞌā Espíritu Nꞌdai yeⁿꞌé Ndyuūs ngii ꞌiiⁿꞌyāⁿ sꞌeeⁿ yeⁿꞌe yaācū sꞌeeⁿ.