3 Dɛꞌɛ chúúcā yeenú ꞌiiⁿꞌyāⁿ chi nꞌgeeⁿ yā libro ꞌcūū chi yeⁿꞌé Ndyuūs. Ní dɛꞌɛ chúúcā yeenú ꞌiiⁿꞌyāⁿ sꞌuuuⁿ chi nꞌgiindiveéⁿ yā nduudu yeⁿꞌe libro ꞌcūū ní iꞌtéénu yā yeⁿꞌe chí ngaⁿꞌā, ti ngaⁿꞌā yeⁿꞌe denduꞌū chí cuchiī ti tiempo miiⁿ chi canee chi chóꞌōo ꞌāā snee niiⁿnuúⁿ.

4 ꞌÚú Juan idinguúⁿ cartas yeⁿꞌe ꞌiiⁿꞌyāⁿ yeⁿꞌe ndɛɛ̄chɛ̄ yaācū chi snéé na yáⁿꞌāa Asia. Neⁿꞌé chi Ndyuūs tée yā ndísꞌtiī dendúꞌū chi nꞌdai yeⁿꞌé yā ndúúcū vaādī ꞌdiiíⁿ yeⁿꞌé yā. Ní Ndyuūs ní ꞌáámá canee yā tiempo chi chóꞌōo, ní maaⁿ ní ꞌtííca yā, ní caⁿꞌá yā ndaa yā. Maaⁿ ní neⁿꞌé chi yeⁿꞌe nduꞌu ndɛɛ̄chɛ̄ espíritus chi snée yā nanááⁿ trono yeⁿꞌé Ndyuūs, espíritus tée yā ndísꞌtiī vaadī nꞌdai yeⁿꞌe Ndyuūs. 5 Ní ꞌtiicá ntúūⁿ neⁿꞌé chi Cristo tée yā ndísꞌtiī vaadī nꞌdai yeⁿꞌé yā, Jesucristo chi cuéⁿꞌé daāⁿmaⁿ ngaⁿꞌa cuaacú yā. Ní Cristo miiⁿ ní daiyá Ndyuūs ní ꞌiiⁿꞌyāⁿ chi vmnááⁿ vmnaaⁿ nacueeⁿ yā yeⁿꞌe nguaaⁿ tináⁿꞌā. Ní ngaⁿꞌa ntiiⁿnyúⁿ yā yeⁿꞌe nducyáácá reyes chi vɛ́ɛ́ iⁿꞌyeeⁿdí ꞌcūū. Ní Cristo dinéⁿꞌe yā sꞌuuúⁿ ní nadɛɛ̄vɛ́ yā sꞌuuúⁿ yeⁿꞌe nuuⁿndi yeⁿꞌe yú ndúúcū yuuúⁿ yeⁿꞌe maáⁿ yā. 6 Ní Cristo diíⁿ yā chi sꞌuuúⁿ reyes sꞌuuúⁿ ní chiiduú sꞌuuúⁿ chi dichiiꞌvɛ̄ yú Ndyuūs chi chiidá yā. Maaⁿ ní vaadī dɛɛvɛ ngii ní yeⁿꞌé yā ndúúcū nducuéⁿꞌē poder chi yeⁿꞌé yā cuuvi yeⁿꞌé yā cueⁿꞌe daāⁿmaⁿ. ꞌTíícā.

7 Cuinꞌdiichí nī. Cristo miiⁿ cuchii yā nguááⁿ meēeⁿ ní nducyáácá ꞌiiⁿꞌyāⁿ cuuvi snaaⁿ yā ndúúcū ꞌiiⁿꞌyāⁿ sꞌeeⁿ chi dichóꞌōo tíícuā Cristo ndúúcū machete chi ꞌuūvī lados ꞌcaāiⁿ. Ní nducyaaca ꞌiiⁿꞌyāⁿ yeⁿꞌe nducyaaca yáāⁿ yeⁿꞌe iⁿꞌyeeⁿdí ꞌcūū cuɛɛcú yā taachi nꞌdiichí yā Cristo. ꞌTííca rā va. Cuaacu nííⁿnyúⁿ chí ꞌtíícā.

8 Señor Ndyuūs chi vɛ́ɛ́ tanducuéⁿꞌē poder denduꞌū yeⁿꞌé yā chi ꞌáámá caneé yā tiempo chi chóꞌōo, ní maaⁿ ní ꞌtííca yā, ní caⁿꞌá yā ndaa yā, Señor miiⁿ ngaⁿꞌa yā: ꞌÚú chí ꞌiiⁿꞌyāⁿ vmnááⁿ vmnaaⁿ ꞌúú, ní ꞌúú ndíí cuááⁿ naachí ꞌcuiinu ꞌúú. Tanꞌdúúcā letras A ndii Z yeⁿꞌe alfabeto ꞌtíícā ꞌúú.

9 ꞌÚú apóstol Juan ꞌúú ní hermano yeⁿꞌe ndísꞌtiī. Ní caati ꞌúú ní yeⁿꞌe Jesús ꞌúú, ꞌúú dáámá chꞌeenú chii ndúúcū ndisꞌtiī ní dáámá nduucú nī yeⁿꞌē naachi Ndyuūs ngaⁿꞌa ntiiⁿnyúⁿ yā, ní dáámá nduucú nī yeⁿꞌe vaadī ꞌdiiíⁿ chi Jesucristo itée yā sꞌuuúⁿ. ꞌÚú canéé preso ꞌúú na isla Patmos cáávā chi candɛɛ́ nduudu cuaacu yeⁿꞌé Ndyuūs ní ngaⁿꞌá nduudu cuaacu yeⁿꞌé Jesucristo. 10 Ní taachi ꞌúú caneé miiⁿ ꞌáámá domingo chóꞌōo chi ꞌúú ní caneé maaⁿ poder yeⁿꞌe Espíritu Nꞌdai yeⁿꞌe Ndyuūs. Ní chꞌiindiveéⁿ ꞌáámá nduudu chꞌɛɛtɛ cuaaⁿ daamí tanꞌdúúcā chi nꞌgɛɛcú ꞌáámá trompeta. 11 Ní ꞌtíícā ngaⁿꞌā ngiī ꞌúú: ꞌÚú ꞌiiⁿꞌyāⁿ chi vmnááⁿ vmnaaⁿ ꞌúú, ꞌúú ndíí cuááⁿ naachí ꞌcuiinu ꞌúú. Tanꞌdúúcā letras A ndii Z yeⁿꞌe alfabeto ꞌtíícā ꞌúú. Dii, Juan, idingúuⁿ di na ꞌáámá libro cosa chi inaaⁿ di ní dichóꞌo di libro miiⁿ nanááⁿ ꞌiiⁿꞌyāⁿ yeⁿꞌe nduꞌu ndɛɛ̄chɛ̄ yaācū chi sneē na yáⁿꞌāa Asia. Yáacū sꞌeeⁿ ní yeⁿꞌe yáāⁿ Efeso, ní yeⁿꞌe yáāⁿ Esmirna, ní yeⁿꞌe yáāⁿ Pérgamo, ní yeⁿꞌe yáāⁿ Tiatira, ní yeⁿꞌe yáāⁿ Sardis, ní yeⁿꞌe yáāⁿ Filadelfia, ndúúcū yeⁿꞌe yáāⁿ Laodicea.

12 Tuuꞌmi ní ꞌúú nanꞌguaacúndií ní nꞌdiichí duꞌū chi yaāꞌvi ꞌúú. Taachi nꞌdiichi cuaaⁿ daamí nꞌdiichí ndɛɛ̄chɛ̄ candeleros yeⁿꞌe ꞌdííⁿnguāaⁿ. 13 Ní náávtaⁿꞌa yeⁿꞌe nduꞌu candeleros miiⁿ ꞌáámá yā cheendii yā tanꞌdúúcā ꞌaama saⁿꞌā daiyá ꞌiiⁿꞌyāⁿ iⁿꞌyeeⁿdí ꞌcūū. Canúuⁿ yā ꞌáámá catecai chi ngɛɛ yā chi ndaa ndii ná daandu caꞌa yā. Ní ndɛ́ɛ́ chiichí ꞌáámá cinta yeⁿꞌe ꞌdííⁿnguāaⁿ cuaaⁿ ꞌnííⁿnúⁿ yā. 14 Ní tiíⁿ yā ndúúcū yundutiíⁿ yā ní cuɛ́ɛ̄ tanꞌdúúcā duudū ꞌiiti cuūchī cuɛ́ɛ́, ní ꞌtiicá ntúūⁿ cuɛ́ɛ̄ tanꞌdúúcā yaāⁿ. Ní nduutináaⁿ yā tanꞌdúúcā ꞌáámá nguuchi yaⁿꞌā. 15 Ní caꞌa yā tanꞌdúúcā cūū cuááⁿ chi ndísꞌtiī ꞌāā ngiichí nī chɛɛti ꞌáámá horno ní dɛɛvɛ́ diiⁿ nī. Ní nduudu yeⁿꞌé yā ní tanꞌdúúcā chí nꞌgɛɛcú ꞌyaa nꞌdáí yíícú. 16 Ní ndɛɛ yā na taꞌa cuaacú yā ndɛɛ̄chɛ̄ ꞌííⁿnyúⁿ. Ní na cheendí yā miiⁿ canéé ꞌáámá machete chi ꞌcaāiⁿ nduu ꞌuuví lados. Ní núúⁿmáⁿ naaⁿ yā ngíí nꞌgāi tanꞌdúúcā chi nꞌgāi ꞌyáⁿꞌā taachi nééné íniguaaⁿ nááⁿ.

17 Ní taachi ꞌúú snaáⁿ ꞌiiⁿꞌyāⁿ miiⁿ sndɛɛvɛ́ na caꞌa yā tanꞌdúúcā chi chꞌií. Ní ꞌiiⁿꞌyāⁿ miiⁿ sꞌneéⁿ yā taꞌā cuaacú yā vmnaaⁿ yeⁿꞌē ꞌúú ní caⁿꞌa yā chīi yā ꞌúú: Nguɛ́ɛ́ ꞌvaꞌa di. ꞌÚú chí vmnááⁿ vmnaaⁿ, ꞌúú ndíí cuaaⁿ naachí ꞌcuiinu ꞌúú. 18 ꞌÚú ꞌáámá canduuchí. Cuáácú chꞌīi naati cuinꞌdiichí nī maaⁿ ní ꞌúú canduuchí cueⁿꞌe daāⁿmaⁿ ꞌtíícā. ꞌÚú ní ndɛɛ́ llaves yeⁿꞌe vaadī nꞌgii chi yeⁿꞌe lugar naachi snéé ꞌiiⁿꞌyāⁿ chi nꞌdíí ní nguɛ́ɛ́ chiꞌtéénu yā Ndyuūs. 19 Maaⁿ ní dii dingúuⁿ di denduꞌū chi ꞌtúúcā chi nꞌdiichi di ndúúcū denduꞌū chi ꞌtíícā ndúúcū denduꞌū chi ndaa cuayiivi. 20 Maaⁿ ní ꞌúú nꞌgiⁿꞌí dii dɛꞌɛ neⁿꞌe caaⁿꞌmaⁿ ndɛɛ̄chɛ̄ ꞌiiⁿnyúⁿ miiⁿ chi nꞌdiichi di na taꞌā cuaacú ní yeⁿꞌe chi ndɛɛ̄chɛ̄ candeleros yeⁿꞌe ꞌdiiⁿnguāáⁿ miiⁿ. Nduꞌu ndɛɛchɛ́ ꞌiiⁿnyúⁿ miiⁿ chiíⁿ chí duꞌū ndɛɛ̄chɛ̄ ꞌiiⁿꞌyāⁿ chi ndíí tiīiⁿ yeⁿꞌe nduꞌū ndɛɛ̄chɛ̄ yaācū miiⁿ. Ní nduꞌū ndɛɛ̄chɛ̄ candeleros chí nꞌdiīchī di chííⁿ chí ndɛɛ̄chɛ̄ yáacū miiⁿ.