Jesus aaukw maaskiniu
14
1 “Akaawii kiti mikushkaataayihtimumikin chitaahiiwaau. Taapwaachaayimaahkw Chishaaminituu kiyaah niiyi taapwaachaayimikw.
2 Anitaah nuuhtaawii wiichihch mihchaan aa pischaachh. Niki iituhtaan naataah chaa chii iyaaskuushtwaatikuch anitih chaa taayaakw. Nimui chipih uhchi iititinaawaau uu aakaa uhchi taapwaamikihch.
3 Chiishihtaayaanaa maak anitih chaa taayaakw, aakw chaa paachi nitiwaapimitikuch aakw chaa chistuhtihiitikuch waash chinitiwaayimitinaawaau chaa chiih taayaakw anitih aah taayaan.
4 Chichischaayihtaanaawaau maak an maaskiniu anitih atimuuch anitaah niiyi aatuhtaayaan.”
5 Aakw Thomas aatikut, “Tipaayihchichaayin, nimui nichischaayihtaanaan taanitaah chaa iituhtaayin, taanitaah chaa chii uhchi chischaayihtimaahch an maaskiniu?”
6 Aakw Jesus aataat, “Niiyi aaukw maaskiniu kiyaah taapwaawin kiyaah pimaatisiiwin, nimui awaan chiki chii naataau uhtaawiimaau mikw niiyi uhchi.
7 Shaash maak aa chischaayimiyaakw shaash chipih chischaayimaawaau kiyaah nuuhtaawii. Anuuhch uhchi shaash chii chischaayimaawaau kiyaah shaash chichii waapimaawaau.”
8 Philip aatikut, “Tipaayihchichaayin waapihtiyinaan maah uhtaawiimaau, aakw chaa nihaayihtimaahch.”
9 Aakw Jesus aataat, “Philip, shaash naawish kaah taayaan utih aah taayaakw ayaapich maak nimui chichischaayimin? An awaan kaa waapimit shaash waapimaau uhtaawiimaau. Chaakwaan maak waahchi kukwaachimiyin chaa chii waapihtiyitaan uhtaawiimaau?
10 Philip, nimui aa chii taapwaahtaan aa piihchishkuuk uhtaawiimaau kiyaah maak uhtaawiimaau aa piihchishkut? Nipaayikunaan. Uu kaa iishi ayimihiitikuch Chishaaminituu nichiih iitikw chaa chii iyiuch, nimui niiyi aapaayikusiyaan kaa iyaan. Uhtaawiimaau an paahchishkut wiiyi tutim iyihtiwin niiyi uhchi.
11 Paachi taapwaahtuukw uu aah iitikuch aa piihchishkuuk uhtaawiimaau kiyaah uhtaawiimaau aa piihchishkut. Aakaa maak chaa taapwaahtimuwaakwaa uu aah iitikuch taapwaahtuukw an uhchi taan kaa iishi ninaahkiu tutimaan.
12 Taapwaah chiwiihtimaatinaawaau, an awaan tiyaapwaayaayimit chikitutim taan aa iishi tutimuch kiyaah atitiu ayitaayihtaakuniiyich iyihtiwin chikitutim waash anitaah uhtaawiimaau aah taat niki iituhtaan niiyi.
13 Niki tutaan taan aa iishi nitutimaayaakw nitishinihkaasuwin aapichihtaayaakwaa, uhtaawiimaau chaa chii chichistaayihtaakuuhaakinuut ukusisimaau uhchi.
14 Mikw taan chaa iishi nitutimaawaakwaa nitishinihkaasuwin aah aapichihtaayaakw niki tutaan.”
Jesus kaah iyit chaashtinaash chaa miyaakiniwiyich uchischinihamuwaakinh kaa piyaahchisiiyichh ahchaahkwh
15 “Mishuu maak siyaachihiiwaakwaa chiki ninihiihtiwinaawaau taan kaah iitishumitikuch chaa chii tiyaakw.
16 Niki nitutimuwaau maak uhtaawiimaau chaa chii iitishihamaataakw miin kutik awaayiuh chaa chii wiichihiitiyitaahkw kiyaah muush kaachich chaa chiih taayich anitih aahtaawaakw.
17 Aaukw maak an kaa piyaahchisiit ahchaahkw, an kaa chischaayihtimihiiwaat taapwaawiniyiu. Anichii iiyiyiuch utih aschiihch aakaa kaa taapwaayaayimaach uhtaawiimaau nimui chiki chii piihtikihaauch upimaatisiiwiniwaahch kaa piyaahchisiiyichh ahchaahkwh, waash nimui waapimaauch kiyaah nimui chischaayimaauch. Mikw maak chiiyiwaau chii chischaayimaawaau waash chii wiichaaukuwaau kiyaah maak chiki piihchishkaakuwaau.”
18 “Nimui muuyaam chiiwishishaanishihch chiki iishi nikititinaawaau utih aschiihch. Miin chiki paachi nitiwaapimitinaawaau.
19 Mikw aashkw waayipischish aakw nimi niki waapimikuch iiyiyiuch utih aschiihch, mikw chiiyiwaau chiki waapiminaawaau. Chiki pimaatisiinaawaau kiyaah chiiyiwaau waash niiyi nipimaatisiin.
20 Iishpih maak utihchipiyihchaa, aakutaah chaa chischaayihtimaakw aa piihchishkuuk nuuhtaawii kiyaah aa piihchishkuuyaakw, kiyaah maak aa piihchishkaatikuch.”
21 “An awaan chaaschaayihtihk kiyaah ninihiihtimukwaa taan aah iitishuwaayaan aaukw an siyaachihiit. Chiki saachihiikuu nuuhtaawii an chaa paachi saachihiit, kiyaah niiyi maak niki saachihaau an awaan kiyaah niiyi niki nukuusistiwaau.”
22 Judas, nimui wiiyi an Iscariot kaa ishinihkaasut, chiih iitaau, “Tipaayihchichaayin, chaakwaan waahchi mikw niiyaan wiih nukuusistuuyaahch, aahaakaa maak wiih nukusistuutwaau kutikich aschiihch iiyiyiuch.”
23 Jesus aataat, “an awaan kaa saachihiit kiti ninihiihtim nitiyimuwiniyiu. Nuuhtaawii maak chiki saachihiikuu. Taapishkun nuuhtaawii kiyaah niiyi niki paachi nitiwaapimaanaan aakw maak chaa wiichimichiht.
24 An awaan aakaa kaa paachi saachihiit nimui ninihiihtim nitiyimuwiniyiu. Uu ayimuwin piyaahtimaakw nimui niiyi aah taayaan uhchipiyiu, nuuhtaawii aah taat uhchipiyiu, an kaa paachi iitishuhut.”
25 “Aaukw uu aa iishi wiihtimaatikuch aashkw maakwaach aah taayaan utih aah taayaakw.
26 Aniyaayiu wiichihiiwaasuuu kaa piyaahchisiiyichh ahchaahkwh nuuhtaawii chaa paachi iitishihamaataakw nitishinihkaasuwinihch uhchi aaukw wiiyi misiwaa chaakwaayiu chaa chiskutimaataakw kiyaah chiki chischisuumikuwaau misiwaa chaakwaayiu kaa iishi wiihtimaatikuch.”
27 “Chiyaamaayihtimuwin chinikitimaatinaawaau. Niiyi chiyaamaayihtimuwin chimiyitinaawaau. Nimui utih aschiihch aa iitaayihtaakuhch chiyaamaayihtimuwin chimiyitinaawaau. Akaawii maak mikushkaataayihtimukw chitaahwiiwaahch kiyaah akaawii kushtaachikw.
28 Chichii paahtuunaawaau kaah iitikuch, ‘niki chistuuhtaan mikw maak miin kaau chiki paachi nitiwaapimitinaawaau.’ Chii saachihiiyaakw maak chipih miywaayihtaanaawaau uhtaawiimaau aah taat aah iituhtaayaan, waash wiiyi austaa chistaayitaakusiu ishpish niiyi.
29 Misiwaa chiwiihtimaatinaawaau uu amwaayaa paachi utihchipiyich, iishpih maak utihchipiyichaa chaa taapwaahtimaakw.
30 Nimui shaash naashch naaush chiki chii ayimihiitinaawaau, waash michiminituu, an kaa uchimaakaatihk uyaayiu aschiiyiu shaash paachi iituhtaau. Mikw maak nimui mitun niki chii uchimaahkihtaakw,
31 Mikw maak uhtaawiimaau muush aninihiihtuukw misiwaa taan aah iitishumit, aakutih maak chaa chii uhchi chischaayihtihch iiyiyiuch utih aschiihch aa saachihiimich uhtaawiimaau. Aastimukw maak chistuhtaataau.”