Jesus kaa chishtaapaautaawaat uchischinihamuwaakinh usitiyiu
13
1 Aamwaayaa uhchi utihchipiyiyich miyaashkaachaau mikushaawiniyiu, shaash chii chischaayihtim Jesus aa utihchipiyiyich chaa nikitihk uyaayiu aschiiyiu kiyaah chaa nitiwaapimaat uhtaawiimaau. Muush chii saachihaau misiwaa aniyaayiu taapiiwaausiit kaa taapwaayaayimikut utih aschiihch kaah taayich, aakw maak chaa utihchipiyiyich chaa chii waapihtiiyaat taan aa ishpish naashch mishtiih saachihaat.
2 Maakwaach maak chii utaakushuu miichisiwich Jesus kiyaah uchischinihamuwaakinh, paayikw maak an chischinihamuwaakin Judas kaa ishinihkaasut, Simon Iscariot ukusish, shaash anitaah chii tutaakuhtaakupin michiminituu chaa chii iitaayihtihk chaa chii maamishimaat Jesus.
3 Jesus aa chischaayihtihk uhtaawiimaau aa chii pichistiinimaakut suuhkaatisiiwiniyiu misiwaa chaakwaayiu chaa chiih tutihk, chii chischaayihtim wiiyi maak Chishaaminituuhch aa chii paachi uhchiit kiyaah aah taayich miin kaau chaa iituhtaat.
4 Chii pisikuu maak anitih miichisunaahtikuhch uhchi, kaa minihk aniyaayiu utikuhp uschich kaa uhtishkihk kaa utinaat kaasiihkwaahun kaa chikaayiwaapihsut.
5 Kaa kutipinihk nipiiyiu chistaapaauyaakinich aakw kaa chishtaapaauchisitaanaat uchischinihamuwaakinh kiyaah kaa paahkuhamwaat usitiyiu aniyaayiu kaasiihkwaahun kaa chikaayiwaapihsut aah aapichihaat.
6 Chii naataau Simon Peter aakw aatikut, “Tipaayihchichaayin, chiki chishtaapaauchisitaan aa?”
7 Aakw Jesus aataat, “nimui chii nistuhtaan anuuhch taan aayihtiyaan, mikw maak aashkw chiki nistuhtaan.”
8 Aakw Simon Peter aatikut, “nimui nihtaa chiki uhchi chishtaapaautaan nisit.” Aakw Jesus aataat, “aakaa chishtaapaautaayaanaa chisiti nimui chiki uhchi uchischinihamuwaakinitutaatin.”
9 Aakw Simon Peter aatikut, “Tipaayihchichaayin, akaawii mikw nisit chishtaapaautaah, chishtaapaautaah kiyaah nistikwaan kiyaah nitihchii.”
10 Aakw Jesus aataat, “awaan shaash aa chii pikaashimut nimui nitiwaayihtim miin chaa chii pikaashimut, mikw usit chipih chishtaapaautaakinuuyiu. Misiwaa maak aa tishiyaakw shaash chipiyaahchisiinaawaau, mikw paayikw anitih aa tishiyaakw nimui piyaahchisiu.”
11 Shaash chii chischaayihtim Jesus taaniyaayiu aniyaayiu chaa maamishimikut aayuwikw waahchi iyit uyaayiu. “Shaash misiwaa chipiyaahchisiinaawaau mikw paayikw anitih aa tishiyaakw nimui piyaahchisiu.”
12 Iishpih maak kaa chishtaapaauchisitaanaat, aakw miin kaa pushkihk aniyaayiu utikuhp kaa minihk aakw miin kaa uwaayipit. Kaa kukwaachimaat aah iitaat, “chichischaayihtaanaawaau aa chaakwaan waahchi tutaatikuch uu?
13 Chiskutimaachaasiu kiyaah tipaayihchichaasiu chitiishinihkaasinaawaau, aaukw maak taapwaah nipih ishinihkaatikuwin waash taapwaah aaukw niiyi an iyaawiyaan.
14 Niiyi aaukw chitipaayihchichaasimuwaau kiyaah chii chiskutimaachaasiimuwaau, iyaapich maak niiyi chichii chishtaapaauchisitaanitinaawaau. Kiyaah chiiyiwaau maak chipih chishtaapaauchisitaanituunaawaau.
15 Chichii waapihtiitinaawaau taan chaa chii iishi chischinuwaapimiyaakw an taan kaahtutaatikuch.
16 Taapwaah chiwiihtimaatinaawaau, aapichihaakin nimui wiih austaa iitaayihtaakusiu aa iitaayihtaakusiiyich uchimaam kiyaah awaan kaa chihchitishihwaakinuut chaa chii nitiwaawiihtihk chaakwaayiu nimui wiiyi austaa iitaayihtaakusiu aa iitaayihtaakusiiyich aniyaayiu kaa chihchitishihukut.
17 Nistuhtimaakwaa maak uhii chaakwaanihii kiyaah maak tutimaakwaa chiki miyututaakunaawaau.”
18 “Nimui maak misiwaa chitaayimuumitinaawaau, nimiyu chischaayimaauch anichii niiyi kaa uwaayaapimikwaau. Akwaachishtaach chihchimisinihiikinihch,
An naapaau kaa wiichimiichisuumit niki maamishimikw.
Aaukw maak uu shaash wiipich chipih iispiyiu.
19 Aaukw maak uu aah iitikuch aamwaayaa iispiyich, aakw maak iishpih taapwaah iispiyihchaa, aakw chaa taapwaahtimaakw niiyi taapwaah aah aawiyaan.
20 Taapwaah chiwiihtimaatinaawaau, an awaan chaa utinaakwaa aniyaayiuh awaayiuh chaa iitishuhumich nutinikw kiyaah niiyi. An maak awaan chaa utinit, utinaau aniyaayiuh awaayiuh kaa paachi iitishihuyich.”
Jesus kaa wiihtihk chaa maamishimaakinuut
Matthew 26:20-25; Mark 14:17-21; Luke 22:21-23
21 Iishpih Jesus kaah iyit uyaayiu, naashch chii misimitaahaau aakw kuiskw kaa wiihtimuwaat aah iitaat, “taapwaah chiwiihtimaatinaawaau, paayikw utih aa tishiyaakw niki maamishimikw.”
22 Aakw anichii chischinihamuwaakinich kaa kiniwaapimituch naashch waawaanaayihtihch, aahaakaa chischaayihtihch awaayiuh aniyaayiu kaah aayimuumaakiniwiyich.
23 An maak paayikw chischinihamuwaakin, aniyaayiu Jesus kaa saachihaat, uhpimaa anitih aah taat chii apiyiuh.
24 Simon Peter kaa naamiskuwaayistuwaat aniyaayiu chischinihamuwaakin kaah iitaat chaa chii kukwaachimaayich awaayiuh aniyaayiu kaah aayimuumaayich.
25 Aakw an chischinihamuwaakin Jesus aah taayich kaa iispiyihut aakw aataat, “Tipaayihchichaayin awaan an kaah aayimuumit?”
26 Aakw Jesus aatikut, “niki akuhchimaau uu aaihkunaau anitih minihkwaakinich aakw chaa miyik an awaan.” Kaa akuhchimaat aniyaayiu aaihkunaau aakw kaa miyaat aniyaayiu Judas, Simon Iscariot ukusiyiuh.
27 Judas kaa utinaat aniyaayiu aaihkunaau, aakw tiiwaahch kaa piihchishkaakut michiminituu. Aakw Jesus aataat Judas, “chiiyipiih, tutih an chaa tutimupinaa.”
28 Nimui maak waachipaayikw uhchi nistuhtimuch anichii chischinihamuwaakinich chaakwaayiu aniyaayiu waahchi iitaayimaakiniwiyich.
29 Chii iitaayihtimuch aah iitaamaakiniwiyich chaa chii nituuutinichaayich mikushaaniyiu kiyaah maak chaa chii nituuutinimuwaayich chaakwaayiu aniyaayiu kaa chistimaatisiiyich, waash wiiyi Judas chii kiniwaayihtim aniyaayiu shuuyaanuutiyiu.
30 Iishpih maak Judas kaa utinaat aniyaayiu aaihkunaau tiiwaahch chii aati wiyiwiiu, chii tipiskaayiu maak.
Kaa uskaach iitishuwaawin
31 Iishpih maak kaa wiyiwiit Judas, Jesus iyaat, “aakw maak chaastaayihtaakuhaakinuut iiyiyiukusisaan, aakw maak kiyaah Chishaaminituu chaastaayihtaakuhaakinuut iiyiyiukusisaan uhchi.
32 Aakw maak Chishaaminituu uchistaayihtaakusiwin nuukuhtaakiniwiyich ukusisimaau aah taayich uhchi, aakw wiiyi Chishaaminituu chaa waapihtiiyaat iiyiyiu taan aa ishpish chistaayihtaakusiiyich ukusisimaau. Chishaaminituu maak tiiwaahch chiki waapihtiiwaau.
33 Nitiwaashishiimituk, shaash nimui naaush nikiuhchihtaan utih aah taayaakw. Chiki paachi naanituwaapiminaawaau, mikw maak chiki wiihtimaatinaawaau taan kaa iishi wiihtimuukwaau anichii Jew iiyiyiu kaa niikaanishkiwaach, nimui chiki chii iituhtaanaawaau anitaah chaa iituhtaayaan.
34 Aa uskaach iitishuwaawin chimiyitinaawaau aaukw chaa chii saachihiituyaakw. Muyaam niiyi kaa iishi saachihiitikuch aaukw an chipih iishi saachihiitunaawaau.
35 Saachihiituyaakwaa maak aakutaah chaa uhchi chischaayimikuwiyaakw aa uchischinihamuwaakinitutaatikuch.”
Jesus kaa wiihtihk Simon Peter chaa iiyiyich aahaakaa chischaayimikut
Matthew 26:31-35; Mark 14:27-31; Luke 22:31-34
36 Aakw Simon Peter aatikut, “Tipaayihchichaayin, taanitaah chaa iituhtaayin?” Aakw Jesus aataat, “nimui chiki chii wiichaawin taanitaah chaa iituhtaayaan, aashkw anitaah paatimaa aakw chaa chii wiichaawiyin.”
37 Simon Peter miin kaa kukwaachimaat, “Tipaayihchichaayin, chaakwaan chaa uhchi aakaa chii wiichaataan anuuhch? Nipimaatisiiwin waash niki pichistinaan chiiyi uhchi.”
38 Aakw Jesus aataat, “taapwaah aa shaash chitaayaaskiwiin chaa chii pichistinimin chii pimaatisiiwin niiyi uhchi? Taapwaah chiwiihtimaatin, wiipich chaachishaapaayaachaa aashkw aahaakaa waawaach chistutaa naapaapaahkihaahkwaan, shaash nishtwaau chiki ninitiyin aah iyin aahaakaa chischaayimiin.”