Jesus kaa tuumisitaanaakinuut anitaah Bethanyhch
Matthew 26:6-13; Mark 14:3-9
12
1 Kutwaashch tihtu chiishikaauh chii ishpishinaakuniyiu miyaashkaachaau mikushaawiniyiu, Jesus kaa tikushihk anitaah Bethanyhch anitaah Lazarus wiichiyihch, aniyaayiu kaa waanishkaanaat nipiwinihch uhchi.
2 Chii mikushaahaakiniu maak Jesus anitaah, Martha chii wiichihiiwaau aa maatiniwaaniwiyich, aakw Lazarus kaa wiitipimaach Jesus anitaah miichisunaahtikuhch.
3 Mary chii uhchi utinim piiywaapiskuyaakiniyiu, aa piihchishtiniiyich anitih kaa wiichiskuukiniich tuuminikiniyiuh naashch aa chii aayimichitaakuniiyichh. Kaa kutipinimwaat anitaah Jesus usitiyich, aakw kaa paahkusitaanaat ushtikwaanipiwiy aah aapichihtaat. Misiwaa maak anitaah piihtikimihch aniyaayiuh waaskaahiikiniyiuh chii miyaakuniyiuh aniyaayiuh kaa wiichiskuukiniiyichh.
4 Paayikw aniyaayiu Jesus uchischinihamuwaakinh, Judas Iscariot, aniyaayiu chaa maamishimikut, aakw iyaayich,
5 “Nishtwaau mitaahtumituniu kaa waapaapischiich piiywaapiskusich chipih chii iitichihtaakun chii ataawaachaanuuch an kaa wiichiskuukihch tuuminikin. Aakw an shuwiyaan kaa chistimaatisiiyich chipih chii miyaakinuhtaawaakuupin.”
6 Nimui wiiyi aa chistimaachaayimaat aniyaayiu kaa chistimaatisiiyich aniyaayiu waahchi iyit, wiiyi chiwiih utinimaasuu aniyaayiu shuwiyaan waash aaukw kaa chiih tik maan wiiyi kaa chii naanaakichihaat aniyaayiu ushuwiyaanimuwaau maayaakinuutwaau.
7 Mikw maak Jesus aataat Judas, “akaawii pimaayim, waash aniyaayiu kaa paachituutiwit muyaam aah aayaaskaawiihtutaauut ishpish utihchipiyichaa chaa nihiikaakuch aayuwikw aa isinaakuniiyich.
8 Muush chiki taauch kaa chistimaatisiiyich utih aahtaawaakw, niiyi maak shaash paasuunaakuun chaah aakaa taayaan utih aah taayaakw.”
Anichii kaa niikaanishkiwaach Jew iiyiyiu kaah aayimwaahiikuch chaa chii nipihaach Lazarus
9 Mihchaatu maak anichii Jew iiyiyiuch chii paahtimuch anitaah Bethanyhch aah taayich Jesus, aakw kaa iituhtaach anitaah chaa chii nitiwaapimaach kiyaah aniyaayiu Lazarus chiwiih waapimaauch, aniyaayiu Jesus kaa winishkaanaayich nipiwinihch uhchi.
10 Chii wiyaayihtimuch maak anichii kaa niikaanishiich ayimihaauchimaauch Lazarus kiyaah chaa nipihaach.
11 Waash aniyaayiu Lazarus uhchi aayuwikw waahchi nikitikuch mihchaatu Jew iiyiyiu kiyaah maak Jesus aayiukun kaa taapwaayaayimaaich.
Iiyiyiuch Jerusalemihch kaah taach kaa maamihchimaach Jesus kaa tikushiniiyich
Matthew 21:1-11; Mark 11:1-11; Luke 19:28-40
12 Miin wiyaapiniiyich mihchaatu chiimaauushikuch anichii kaa tikushihch anitaah aa mikushaaniwiyich chii paahtimuch Jesus chaa tikushiniiyich Jerusalemihch.
13 Aakw kaa naatwaanihch niipisiiyaahtikw kaah aati wiyiwiich anitih Jerusalemihch chaa nituunichihaach, uyaayiu aah iyich aa chishwaawaach,
“Maamihchimaataau Chishaaminituu, shiwaayihtaakusuu an tipaayihchichaasiu kaa paachi iitishihukut, Israel iiyiyiuch uchihchiuchimaamuwaau.”
14 Jesus maak chii taahtipiu aahaasis aa chii miskiwaakupinaa. Aaukw uyaayiu kaah tik muyaam taan kaah iitishtaayich chihchimisinihiikinihch chaa tikupinaa,
15 Akaawii kushtaachikw chiiyiwaau saaiyinihch kaa uhchiyaakw waash chihchiuchimaamuwaau paachi tikushin aa taahtipit aahaasis ukusiyiuh.
16 Anitih maak aniyaayiu maakwaach nimui pit uhchi nistuhtimiyiu uchischinihamuwaakinh aniyaayiu taan kaa iispiyiyich shaash anitaah niikaan aa chii wiihtaakinuwiikupinaa chaa tipipiyich uyaayiu. Paatimaa maak iishpih kaa winishkaanimaakiniwiyich nipiwinihch uhchi kiyaah chihchichiishikuhch kaa iishi utinimaakiniwiiyich aakw kaa chishchisich taan kaa iishi niikaan aayimuumaakiniwiyich anitaah chihchimisinihiikinihch taapwaah kiyipwaa aa chiih tutimaakinuwiich aniyaayiu kaa iishi misinaataayich chaa iituhtimaakinuuwiikupinaanihii.
17 Anichii maak iiyiyiuch kaa taawaakupinaa anitih Jesus kaa taapwaataayich Lazarus chaa chii paachi wiyiwiiyich anitih aniyaayiu aa chii nihiihkaamaakiniwiyich kiyaah kaa winishkaayich nipiwinihch uhchi, chii waah wiihtimuch taan kaa iishi waapihtihch kaa iispiyiyich.
18 Aayuwikw maak aniyaayiu waahchi nituunichihaach Jesus mihchaatu iiyiyiuch iishpih taakushiniiyich anitaah Jerusalemihch, aniyaayiu aa chii paahtihch taan kaa iishi maamishkaach waapihtiiwaayich.
19 Anichii Phariseech aakw aatituch, “nimui chichii tutiwaaniu aakaa chaa chii nuushuushkaakut awaayiuh, kiniwaapimaahkw maah, misiwaa awaayiuh wiih nuushuushkaakuu.”
Greek aah iitiskaanaasich iiyiyiuch kaa wiih waapimaach Jesus
20 Chii wiichihiiwaauch maak Greek iiyiyiuch aah iituhtaaniwiyich anitaah Jerusalemihch aa nituuayimihaastaamaakiniwiiyich Chishaaminituu maakwaach aniyaayiu kaa chii mikushaaniwiyich.
21 Aaukunich maak uchii kaa paachi nitiwaapimaach Philip, aniyaayiu anitaah Bethsaida kaa ishinihkaataayich ihtaawiniyiu kaa uhchiiyich anitaah Galilee aschiihch kaah tikuniiyich, aakw aah iitaach, “niwii waapimaanaan Jesus.”
22 Philip maak chii nituuwiihtimuwaau Andrew aakw taapishkun kaa nituuwiihtimuwaach Jesus aa wiih waapimikuyich aniyaayiu Greek iiyiyiu.
23 Aakw Jesus aatikuch, “shaash utihchipiyiu Chishaaminituu chaa chii waapihtiiwaat aa chistaayihtaakusiiyich iiyiyiukusisaan.
24 Taapwaa chiwiihtimaatinaawaau, mishuu aakaa iitaamihch aschiihch ashtaakinuuhchaa paayikw pihkwaasikinimin mikw aa niyaastuuhch nimui chiki uhchi nihtaauchin, mikw maak ashtaakinuuhchaa iitaamihch aschiihch aati nipiimikihchaa maak aakutaah chaa uhchi nihtaauchihch mihchaatu nitaauchihchikin.
25 An awaan kaa saachihtaat upimaatisiiwin kiti winihtaau. An awaan kaa uhkaatihk upimaatisiiwin utih aschiihch kaachich pimaatisiiwiniyiu kiti iyaau.
26 An maak awaan niiyi chaa aapitishiishtuut yaayitaai niki paachi nuushuushkaakw. Aakw maak chaa taat nitaapichihaakin taanitaah chaa aati iyihtaauch. Kiti chistaayimikuu nuuhtaawii an awaan chaa aapitishiishtuukwaa.”
Jesus kaa wiihtihk chaa puunipimaatisiit
27 “Naashch misimaayihtim nitihchaahkw, taan maak chaa chii iitikw nuuhtaawii. Niki iitaau aa, nuuhtaa, akaawii paachi pichistin chaa chii ninaahkaataayimuyaan. Nimui, nimui niki uhchi iitaau uyaayiu waash aaukw waahchi tikushiniyaan utih aschiihch chaa chii ninaahkaataayimuyaan.
28 Nuuhtaa, chistaayihtaakutaah chitishinihkaasuwin.” Aakw piyaach paahtaakuniiyich Chishaaminituuh upaahtaakusiwin anitaah chihchichiishikuhch uhchi aah iyit, “shaash nichii chistaayihtaakuhtaan nitishinihkaasuwin miin maak niki chistaayihtaakuhtaan.”
29 Anichii maak iiyiyiuch kaa niipuuwich piyaahtaahch aniyaayiu paahtaakusiwiniyiu aakw iyaach, “nimischiuch paahtaakusiwich.” Aakw kutikich kaah iyich, “aanchin chii ayimihiikuu.”
30 Aakw Jesus iyaat, “uu paahtaakusiwin kaah paahtaakuhch nimui paahtaakun niiyi uhchi, mikw chiiyiwaau uhchi.
31 Anuuhch utihchipiyiu chaa chii tipaaskunaakiniwich iiyiyiuch utih aschiihch kaah taach kiyaah anuuhch aakw waatihchipiyiyich chaa chii ishpishihaakinuut michiminituu, an kaa tipaayihchichaat utih aschiihch.
32 Iishpih uhpinikuyaanaa utih aschiihch uhchi, misiwaa awaan niki tutiwaau chaa chii paachi naasit.”
33 Uyaayiu maak kaah iyit Jesus chii wiihtim taan chaa iishi nipihaakinuut chaa uhpaaskuhwaakinuut.
34 Aakw aniyaayiu kaah maamuu michaahtiyich iiyiyiuh aatikut, “niwiihtimaakunaan anitaah niwiishuwaawinaahch, Christ muush kaachich aah taat. Chaakwaan maak waahchi iyin, iiyiyiukusisaan chaa uhpaaskuhwaakinuut aa nipihaakinuut? Awaan an iiyiyiukusisaan kaa ishinihkaataakinuut?”
35 Aakw Jesus aataat, “waaipishchiish miin chiki tikun waashtaawin utih aah taayaakw. Pimuhtaakw aashkw aa iyaayaakw waashtaawin chaah aakaa maak akunuuhuukuuyaakw aauukaastaayaawin. Awaan aa pimuhtaat anitaah aukaashtaayaawinihch nimui chischaayihtim taanitaah aatuhtaat.
36 Taapwaayaayimaahkw an awaan kaa miyiwaat waashtaawiniyiu aashkw aah taat utih aahtaawaakw, aakw muyaam maak aa utiwaashishiimitaakuuyaakw waastaawin.” Uyaayiu maak kaah iyit Jesus aakw kaa nikitaat, anitaah aakaa chaa miskaakut aakutaah kaa nituuihtaat.
Jew iiyiyiuch aakaa kaa wiih taapwaayaayimaach Jesus
37 Aat maak mihchaatwaau naashch aa maamishkaataayihtaakuniiyich chaakwaayiu aa chiih tutihk anitih Jew aah taayich ayaapich nimui uhchi wiih taapwaayaayimikuu wiiyi aahaawit Christ.
38 Aaukw taapwaah kaa tipipiyich taan kaa iishi niikaan wiihtimukupinaa aniyaa uchischiwaahiichaasiu Isaiah aa chii iyikupinaa,
Tipaayihchichaasiu, awaan tiyaapwaahtuyimiht taan kaa iishi wiihtimaahch? Awaayiuh kaa waapihtiiyaat tipaayihchichaasiu usuuhkaatisiiwin?
39 Aayuwikw maak waahchi aakaa taapwaahtimiyich. Isaiah aayiu kiyaah aa chii iyikupinaa,
40 Chishaaminituu chii tutaakuch aakaa chaa chii waapihtihch kiyaah aakaa chaa chii nistuhtihch, aakw maak nimui waapihtimuch kiyaah nimui nistuhtimuch. Nimui maak niwii paachi nitiwaapimikuch chaa chii miiniwaachihiikwaau, iyiu Chishaaminituu.
41 Isaiah chii iyiu uyaayiu waash chii waapihtimwaau Jesus uchistaayihtaakusiwiniyiu, aakw maak kaah aayimuumaat.
42 Mihchaatu maak ayaapich anichii Jew iiyiyiu kaa niikaanishkiwaach chii taapwaayaayimaauch Jesus mikw maak nimui uhchi aayimuutimuch anitaah aa paahtiwaakiniwich waash chii kushtaauch aniyaayiuh Phariseeh kiyaah nimui uhchi nitiwaayihtimuch chihchiwaa chaa chii wiyiwiitishihwaakiniwich anitih utiyimihaaukimikuwaahch.
43 Waash austaa chii iitaayimaauch iiyiyiu chaa chii maamihchimikuch ishpish wiiyi Chishaaminituu chaa chii maamihchimikuch.
Taan aa iishi tipaaskunikuwaat awaan Jesus utiyimuwiniyiu
44 Jesus maak chii iyiu aa chishwaawaat, “awaan tiyaapwaayaayimikwaa nimui mikw niiyi ni paachi taapwaayaayimikw kiyaah taapwaayaayimaau aniyaayiu kaa paachi iitishihuyich.
45 An awaan paachi waapimit, waapimaau kiyaah aniyaayiu kaa paachi iitishihuyich.
46 Nichiitikushin utih aschiihch aa waastaawinuuyaan misiwaa maak an chaa taapwaayaayimikwaa nimui shaash kitaa chiih taau anitaah aukaashtaayaawinihch.
47 An awaan piyaahtimukwaa taan kaa iishi wiihtimaan aakaa maak ninihiihtimukwaa, nimui niiyi niki tipaaskunaau. Nichiitikushin utih aschiihch nimui wiih chaa chii tipaaskunikwaau iiyiyiuch mikw maak nichiitikushin chaa chii pimaachihiikwaau.
48 An awaan iyaatuwaayimikwaa, kiyaah aakaa ninihiihtimukwaa nitiiyimuwiniyiu, chiki tipaaskunaakiniu. Aniyaayiu uhchi taan kaah iyiuch nitiiyimuwiniyiu aaukw aniyaayiu chaa uhchi tipaaskunaakinuut maahchich chiishikaayichaa.
49 Nimui mikw niiyi aa iitaayihtimaan nuuhchi iishi ayimin. An uhtaawiimaau kaa paachi iitishuhut wiiyi nichii wiihtimaakw taan chaa iyiuch aaukw maak mikw kaa iishi wiihtimaan.
50 Nichischaayihtimwaan maak wiiyi utitishiwaawin chiki tutaakuwaanaawaau chaa chii iyaayaakw kaachich pimaatisiiwin. Taan aa iishi miyit uhtaawiimaau chaa chii iitikuch aaukw an aa iishi wiihtimaan.”