Jesus aaukw chihchiwaa kaaisimusihch miinisaahtikw
15
1 Jesus chiih iitaau uchischinihamuwaakinh, “niiyi aaukw chihchiwaa kaaisuumusiihch miinisaahtikw aakw nuuhtaawii aaukw kaa nihtaauchihtaat kaaisuumusiihch.
2 Misiwaa utihkun niiyi aah taayaan waahchi sikimuch, aakaa kaa miinishuhch nuuhtaawii minishim. Aakw aniyaayiu utihkun kaa miinishuwiyihch misiwaa wiyaashtuutim atitiu chaa chii miinishuwiyihch.
3 Chiiyiwaau maak shaash chichii piyaahchihiikunaawaau an ayimuwin kaa iishi wiihtimaatikuch uhchi.
4 Paachi piihchishkuuk, niiyi kiyaah chaa piihchishkaatikuch. Mwaahch muuyaam utihkun nimui chiki chii miinishuu aahaakaa anitaah shuuminaahtikuhch iishi sikimuch. Aaukw maak muyaam aa isinaakusiyaakw. Nimui chiki chii nihtaauchihiisunaawaau chaa chii miinishiwiyaakw mishuu aakaa piihchishkuuyaakwaa.”
5 “Niiyi aaukw kaaisimusihch miinisaahtikw aakw chiiyiwaau utihkun. An awaan paahchiskut kiyaah niiyi nipiihchiskuwaau aaukw an chaa miyu miinishuwit, waash taapaa mitun chaakwaan chiki chitutaanaawaau nisuuwaakw taayaakwaa.
6 Awaan aakaa niiyi pihchiskuuchaa, waapinaakiniu muuyaam taan aah tutaakiniwiyich utihkun, paastaau maak. Anihii maak utihkun kaa waapinikiniwihch maamuushichinikiniu aakw maachishtiwaapinikiniwihch aakw maak aati ishkwaataach.
7 Niiyi maak piihchiskuyaakwaa kiyaah nitiyimuwin piihchishkaakuyaakwaa mikw taan chaa iishi nitutimaawaakwaa chaakwaan aaukw an chaa tutimaakuyaakw.
8 Aa miyu miinishuwiyaakw aakutaah waahchi chistaayihtaakuhaakinuut nuuhtaawii, kiyaah maak aakutaah chiyaashtinaataayihtaakuhch aa uchischinihamuwaakinitutaatikuch.
9 Muyaam aa iishi saachihiit uhtaawiimaau aaukw aan aa iishi saachihiitikuch kiyaah chiiyiwaau. Muush taakw nisaachihiiwaawinich.
10 Ninihiihtimaakwaa niti iitishuwaawin chiki taanaawaau nisaachihiiwaawinich muyaam niiyi kaa iishi ninihiihtuuk nuuhtaawii taan kaah iitishumit kiyaah aahtaauch uu saachihiiwaawinihch.”
11 “Chichii wiihtimaatinaawaau maak uhii chaakwaanihii nimuchichaayihtimuwin chaa chii piihchishkaakuyaakw mitun chaa chii saakischinaashkaakuyaakw aa muuchichaayihtimaakw.
12 Uu maak chitiiitishumitinaawaau, chaa chii saachihiituyaakw muyaam niiyi kaa ishpish saachihiitikuch.
13 Awaan aa pichistinihk upimaatisiiwin uwiichaawaakin chaa chii pimaatisiiyich, nimui tikun atitiu aah iishpaach saachihiiwaawin.
14 Chiiyiwaau chiwiichaawaakinitutaatinaawaau tutimaakwaa taan aah iitishumitikuch.
15 Nimui aakw aapichihaakinich chiki uhchi iitinaawaau waash aapichihaakin nimui chischaayihtim taan aayitiyihch uchimaam. Niiyi maak wii niwiichaawaakinich chichii iitinaawaau waash misiwaa chaakwaayiu kaa iishi wiihtimuut nuuhtaawii chichii wiihtimaatinaawaau.
16 Nimui chiiyiwaau kuuhchi uwaayaapiminaawaau, niiyi aaukw kaa uwaayaapimitikuch. Aakw maak chaa chistisihutikuch chaa chii miyu miinishuwiyaakw aa miyu iihtutimaakw kiyaah muush chaa tikuhch. Aakw maak uhtaawiimaau chaa miyitaakw taan mikw chaa iishi nitutimuwaakw nitishinihkaasuwin aah aapichihtaayaakw.
17 Aaukw maak uu aatishumitikuch, chaa chii saachihiituyaakw.”
Jesus uchischinihamuwaakinh kaa uhkaatikuyich awaayiuh utih aschiihch
18 “Uhkaatitaakwaawaa anichii aschiihch iiyiyiuch chaa chishchisiyaakw niiyi niishtim aa chii uhkaasich aashkw aamwaayaa chiiyiwaau uhchi uhkaatitaakuch.
19 Wiichiitaatiisimaakuuchaa anichii aschiihch iiyiyiuch chipih saachihiikuwaauch muyaam aa iishi saachihiituch wiiyiwaau. Mikw maak aa chii uwaayaapimitikuch chiiyiwaau iiyiyiuch aschiihch uhchi aayuwikw waahchi uhkaatitaakuch, waash taapaa anitaah aah taach chiti iishi wiichihiiwaanaawaau shaash.
20 Chaa chishchisiyaakw taan kaah iitikuch, ‘aapichihaakin nimui austaa uchimaawaayihtaakusiu ishpish wiiyi uchimaam.’ Mishuu kaa naanaakaachihiiwaawaakwaa kiyaah chiiyiwaau chiki ninaahkaachihiikuwaauch. Kaa ninihiihtimuwaakwaa taan kaa iishi aayimutimuukwaau chiki ninihiihtimuch kiyaah chiiyiwaau taan chaa iishi aayimuutimuwaakuch.
21 Mikw misiwaa uyaayiu chiki tutaakuwaauch nitishinihkaasuwiniyiu uhchi, waash taapaa uhchi chischaayimaauch aniyaayiu kaa paachi iitishihuyich.
22 Aakaa uhchi paachi nitiwaapimikwaau kiyaah ayaamihiikwaau nimui chipih uhchi ataamaayihtaakusiwich michihtwaawiniyiu. Anuuhch maak taapwaah aa chii paachi ayimihiikwaau nimui chiki chii iyuuch aahaakaa uhchi chiischaayihtaach aa michihtutihch.
23 Waash an kaa uhkaasit nuuhtaawii kiyaah uhkaataau.
24 Nimui chipih uhchi ataamaayihtaakusiwich michihtwaawiniyiu aakaa uhchi tutimuch iyihtiwin tipiyiwaa anitih aah taach. Nichiih tutaan chaakwaanihii aahaakaa nihtaa kutik awaan uhchi tutihk. Misiwaa maak chii waapihtimuch. Iyaapich maak nichii uhkaatikunaanich taapishkun niiyi kiyaah nuuhtaawii.
25 Uyaayiu maak kaa uhchi chii tipipiyiu kaah iitishtaayich uwiishuwaawiniwaahch. Niikaan chii wiihtaakuniyiu anitaah kaah iitishtaayich,
Chaaskaah nitiwii nichiih iishi uhkaataakuch.”
26 “Chiki paachi tikushin an awaan chaa wiichihiitaakw, aaukw kaa piyaahchisiit ahchaahkw. Niiyi niki paachi iitishihwaau anitaah uhchi uhtaawiimaau aah taayich. Chiki wiihtim taapwaawiniyiu. Niiyi maak niki aayimuumikw.
27 Kiyaah chiiyiwaau maak chiki aayimuuminaawaau taapwaainihch, waash anitih uskich kaa uhchi chihchi chiskutimaachaayaan aakutaah shaash kaa uhchi waawiichaauyaakw.”