Iskwaau kaa pisikwaatisiit
8
1 Anitaah maak Olives kaa ishinihkaataach aapiskutinaahch aakutaah kaa iituhtaat wiiyi Jesus.
2 Wiipich miin wiyaapiniiyich anitaah chishaaayimihaaukimikuhch miin chii iituhtaau. Misiwaa maak aniyaayiu iiyiyiuh chii paachi nitiwaapimikuu. Kaa uwaayipit aakw kaa chiskutimuwaat.
3 Anichii maak wiishuwaawiniyiu kaa chiskutimaachaach kiyaah anichii Phariseech chii paashiwaauch iskwaau aa chii wiichipisikwaatisiimaayich naapaau. Aakutaah anitih aa mihchaatinaaniwiyich kaa paashiwaach aniyaayiuh iskwaauh.
4 Aakw aataach Jesus, “chiskutimaachaasiu, chii chaaskiwaakiniu uu iskwaau maakwaach aa wiichipisikwaatisiimaat naapaau.
5 Akwaachishtaach anitaah Moses uwiishuwaawinihch chaa chii nipihaakinuut aa paahpimusinaatihwaakinuut iskwaau aa chaaskiwaakinuut kutik naapaau nitiwii aa iishi wiichaawaat. Taan maak chaa chii iyin chiiyi?”
6 Aaukw uyaayiu kaah iitaach aa chii wiih naanitu kukwaachihaach chaa piikunimiyikwaanihii uyaayiu wiishuwaawiniyiu, aakw maak piikunimiyichaa chaa tikuniiyikupinaa chaa iishi maamisimaach.
Mikw maak anitaah aschiihch chii iishi niwaakaapu Jesus, kaa misinihiichaat anitih yaakaahch utihchii aah aapichihtaat.
7 Maakwaach maak anitih aa niipuuwich aah aayihkimimaach chaa chii nishkwaaushihiikuch aniyaayiu kaa iishi kukwaachimaach, chii shihtukaapu Jesus aakw aataat, “Taan an awaan anitih aa tishiyaakw aakaa nihtaa waahchi michihtutihk wiiyi niishtim chiki pimushinaatihwaau aniyaayiuh iskwaauh.”
8 Miin kaa niwaakaaput aakw miin kaa misinihiichaat anitaah yaakaahch.
9 Iishpih kaa paahtiwaach uyaayiu aah iiyiyich, paahpaayikw chii aati chistuhtaauch, niishtim anichii kaa chishaaiiyiyiuch. Chaak mikw wiiyi Jesus chiih taau anitih kiyaah aniyaayiuh iskwaauh.
10 Kaa shutukaaput Jesus aakw aataat aniyaayiu iskwaauh, “Iskwaau, taanitaah aah taach anichii kaa maamishimisch? Nimuiaa taau awaan aa chii nishiwinaachimisk?”
11 Aakw aniyaayiu iskwaauh aatikut Jesus, “Nimui, tipaayihchichaasiu.” Aakw Jesus aataat, “Nimui kiyaah niiyi chii nishiwinaachimitin. Maachiih, akaawii miin michihtuuti.”
Jesus miyiwaau waashtaawiniyiu utih aschiihch
12 Iishpih Jesus miin aa ayimihaat aniyaayiuh iiyiyiuh aakw aataat, “Niiyi aaukw kaa miyikwaau iiyiyiuch waashtaawiniyiu utih aschiihch. An awaan kaa nuushuushkut chiki iyaau pimaatisiiwiniyiu waashtaawinihch uhchi kiyaah nimui chiki uhchi pimuhtaau aukaashtaayaawinihch.”
13 Aakw anichii Phariseech aah iitaach, “Mikw chii chitiyimiishtimaasun, nimui taapwaahtaakun an kaa iyin.”
14 Aakw Jesus aatikuch, “Aat mikw niiyi aa tipaachimisuyaan taapwaamikin taan aa iyaan. Waash nichischaayihtaan taanitaah waahchiyaan kiyaah taanitaah chaa iituhtaayaan. Chiiyiwaau maak nimui chichischaayiminaawaau taanitaah waahchiyaan kiyaah taanitaah chaa iituhtaayaan.
15 Mikw taan aa ishinuwaakw awaan aayuwikw aniyaayiu aa iishi tipaaskunaakw, niiyi maak nimui nuuyaaskunaau awaan.
16 Tipaaskunichaayaanaa maak chiki taapwaamikin an chaa iishi tipaaskunichaayaan. Waash nimui nipaayikushin aa tipaaskunichaayaan, nuuhtaawii an kaa paachi iitishuhut aaukw an waachihiit.
17 Akwaachishtaach anitaah chiwiishuwaawiniwaahch niishu iiyiyiuch paayikunihch aah iitihtaakusich aa wiihtihch taan kaa iishi waapihtihch aah iispiyiyich chaakwaayiu, taapwaamikiniyiu aniyaayiu iyaach.
18 Nitaapwaan taan aah iitaachimiisuyaan kiyaah uhtaawiimaau an kaa paachi iitishuhut wiihtim aa taapwaauch.”
19 Aakw aataach, “Taanitaah aah taat kuuhtaawii?” Jesus kaa iishi nishkwaaushihaat, “nimui taapwaah chichischaayiminaawaau kiyaah nuuhtaawii nimui chii chischaayimaawaau. Waash chischaayimiyaakw nuuhtaawii kiyaah chipih chischaayimaawaau.”
20 Aayuwikw uyaayiu kaah iyit Jesus anitaah chishaaayimihaaukimikuhch kaa chiskutimaachaat anitaah kaa chii kinuwaayihtaakiniwiiyich pichistinichaawiniyiu. Nimui maak awaayiuh uhchi maakunikuu waash nimui aashkw uhchi utihchipiyiu anitih chaa utinaakinukupinaa.
Nimui chiki chii iituhtaanaawaau taanitaah chaa iituhtaayaan
21 Miin maakw aakw aataat Jesus aniyaayiu iiyiyiuh, “Niki chistuhtaan, chiki paachi naanituwaapiminaawaau mikw maak aaukw aan chaa iishi nipiyaakw aa chichishkimaakw chii michaatisiiwiniwaau. Nimui maak chiki chii iituhtaanaawaau taanitaah chaa iituhtaayaan.”
22 Aakw anichii Jew iiyiyiu kaa niikaanishkiwaach iyaach, “Aniyaayiu maah kaah iyit, nimui chiki chii iituhtaanaawaau taanitaah chaa iituhtaayaan. Chiki nipihiisuu kaakiyaah aniyaayiu waahchi iyit?”
23 Jesus maak chiih iitaau, “Niihtaahch kuuhchiinaawaau chiiyiwaau niiyi maak anitaah ishpimihch nuuhchiin. Utih aschiihch kuuhchiinaawaau chiiyiwaau, niiyi maak wii nimui utih aschiihch nuuhchiin.
24 Aaukw an aahch chii wiihtimaatikuch chaa nipiyaakw aa chichishkimaakw chii michaatisiiwiniwaau. Aaukw aan maak taapwaah chaa iishi nipiyaakw aa chichishkimaakw chii michaatisiiwiniwaau, aakaa taapwaahtimaakwaa taapwaah niiyi aah aawiyaan.”
25 Aakw kaa kukwaachimaach Jesus aah iitaach, “Awaan maak chiiyi?” Aakw Jesus aatikuch, “Anitih uskich kaa chihchipiyihtaayaan aa chiskutimaachaayaan aakutaah shaash kaa wiihtimaatikuch awaan niiyi iyaawiyaan.
26 Mihchaan chaakwaan chaa chii wiihtimaan chaa chii uhchi tipaaskunikuyaakw. Mikw maak niki wiihtimuwaauch iiyiyiuch utih aschiihch aniyaayiu taan kaa iishi paahtuuk aah aayimuutihk an kaa paachi iitishuhut, waash muush taapwaauchaayihtaakusiu wiiyi.”
27 Anichii maak iiyiyiuch anitih kaah taach nimui uhchi nistuhtiwaauch Jesus uhtaawiimaau aniyaayiu kaah aayimuumaayich.
28 Aakw Jesus aatikuch, “Iishpih uhpaaskuhaakwaa iiyiyiukusisaan aakw chaa chischaayihtaamaakw niiyi taapwaah aah aawiyaan. Chiki chischaayihtaanaawaau kiyaah aahaakaa tutimaan chaakwaan paatish kaah iitishumich nuuhtaawii chaa chiih tutimaan. Mikw aniyaayiu taan aah iitishumit uhtaawiimaau chaa chii wiihtimuch aayuwikw aniyaayiu chaa wiihtimuch.
29 An maak kaa paachi iitishuhut, niwiichaakw, nimui nuuhchi nikitikw mikw chaa chii paayikushuuch waash muush nitihtutimwaan wiiyi taan aa iishi nihaayihtimihiikut.”
30 Mihchaatu maak anichii iiyiyiuch kaa paahtiwaach Jesus uyaayiu aah iiyiyich chii taapwaayaayimaauch.
Jesus kaah aayimuutihk taanitaah chaa chii uhchi pikuhiimaakiniwiyich awaayiuh michiihtwaawinihch uhchi
31 Aakw Jesus aataat aniyaayiu Jew kaa taapwaayaayimikut, “Muush ninihiihtimaakwaa nichiskutimaachaawinh, chiiyiwaau aaukw taapwaah nichischinihamuwaakinich.
32 Chiki chischaayihtaanaawaau taapwaawin kiyaah chiki aapihkunikunaawaau an taapwaawin.”
33 Aakw aatikut, “Aniyaa Abraham aah taat nichii uhchi aanischaa pimaatisiinaan, nimui nihtaa nuuhchi tipaayimikunaan awaan. Chaakwaan maak waahchi iyin chiki aapihkunikunaawaau?”
34 Aakw Jesus aataat, “taapwaah chiwiihtimaatinaawaau, misiwaa awaan kaa michihtutihk tipaayimikuu aniyaayiu taan aa iishi michihtutihk.
35 Aa tipaayimaakinuut aapichihaakin nimui muush wiichiu anitaah uchimaam aah taayich mikw an ukusisimaau aaukw an chihchiwaa waachit anitih.
36 Pikuhiitaakwaa maak ukusisimaau michiihtwaawinihch uhchi taapwaah chiki pikuhiikunaawaau.
37 Chichischaayimitinaawaau aniyaa Abraham aah taat aa chii uhchi aanischaa pimaatisiiyaakw, mikw maak ayaapich chiwiih nipihiinaawaau aahaakaa wii nituhtimaakw taan aa iishi chiskutimaachaayaan.
38 Nitiaayimuutaan taan kaa iishi waapihtiyit nuuhtaawii. Chiiyiwaau maak kiyaah aniyaayiu taan aah iitishumitaakw kuuhtaawiiwaau aayuwikw aniyaayiu aah tutimwaahkw.”
39 Aakw aniyaayiuh Jew iiyiyiuh kaa nishkwaaushihiikut aah iitikut, “Abraham aaukw nuuhtaawiinaan.” Aakw Jesus aataat, “Taapwaah aniyaa Abraham aah taat kaa uhchi aanischaa pimaatisiiwaakwaa aniyaayiu taan kaah tik aniyaa Abraham aaukw an chipih tinaawaau.
40 Chichii wiihtimaatinaawaau an taapwaawin taan kaa iishi paahtimaan anitaah Chishaaminituu aah taat uhchi, mikw maak ayaapich chiwiih paachi nipihiinaawaau. Aniyaa Abraham nimui nihtaa uhchi tutim wiiyi uyaayiu.
41 Aaukw aaihtiyaakw taan aahtik kuuhtaawiiwaau.” Aakw miin kaa nishkwaaushihiikut aah iitikut, “Chishaaminituu aaukw mikw aa paayikut waauuhtaawiyaahch. Nimui nitiwii nuuhchiinaan.”
42 Aakw Jesus aataat, “Taapwaah Chishaaminituu waauhtaawiiwaakwaa, chipih saachihiinaawaau waash Chishaaminituu aah taat nuuhchiin aakw maak utih piyaachi taayaan. Nimui niiyi nuuhchi paachi iitishuhusun, wiiyi Chishaaminituu nichii paachi iitishihukw.
43 Chaakwaan waahchi aakaa chii nistuhtimaakw taan aa iyaan? Nimui chiwiih ninihiihtaanaawaau taan aa iishi chiskutimaachaayaan aaukw waahchi aakaa nistuhtimaakw.
44 Michiminituu aaukw waauuhtaawiyaakw, aniyaayiu aa iishi nitiwaayimitaakw chaa iishi michihtuutimwaakw aaukw mikw an waah iihtutimaakw. Muush chii nipihiiwaau kaa ishpish tikuniiyich uyaayiu aschiiyiu. Nimui nihtaa uhchi nitiwaayihtim kuiskw chaa chii iishi wiihtaakuniiyich chaakwaayiu waash nimui mitun tikuniyiu taapwaawiniyiu anitih aah taat. Muush nitiyiu waash aaukw chihchiwaa aataatisiit, aaukw maak an taapwaah waauhtaawiimikut aniyaayiu kaa ninitiyich.
45 Niiyi maak muush kuiskw nishin aaukw maak an waahchi aakaa taapwaahtuuyaakw.
46 Nimui waawaach paayikw anitih aa tishiyaakw chiki chii wiihtaanaawaau kaa michihtuutimuwaanaa. Kuiskw maak muush aa iyaan chaakwaan. Chaakwaan maak waahchi aakaa chii taapwaahtuuyaakw?
47 An awaan Chishaaminituu aah taayich kaa uhchiit nituhtim Chishaaminituu utiyimuwiniyiu. Chiiyiwaau maak nimui Chishaaminituu aah taat kuuhchiinaawaau aaukw waahchi aakaa nituhtimaakw.”
Jesus kaa wiihtihk shaash aa chii taat aamwaayaa uhchi pimaatisiiyich aniyaa Abraham
48 Anichii maak Jew iiyiyiuch kaa nishkwaaushihaach aah iitaach Jesus, “Nichii taapwaanaan kaa iyaahch Samaria aa uhchiyin kiyaah aa piihchishkaask michiahchaahkw.”
49 Aakw Jesus aatikuch, “Nimui nipiihchishkaakw michiahchaahkw. Nichishtaayimaau nuuhtaawii mikw maak chiiyiwaau nimui chichistaayiminaawaau niiyi.
50 Nimui ninaanitiwaayihtaan taanitaah chaa chii uhchi chistaayimikiwiyaan. Mikw maak taau awaan aa nitiwaayihtihk chaa chii chistaayimikuwich, wiiyi maak aaukw waayaaskunaat aniyaayiuh awaayiuh aakaa kaa chistaayimiyich.
51 Taapwaah chiwiihtimaatinaawaau, an awaan chaa ninihiihtimukwaa taan aah iyiuch nimui nihtaa kiti uhchi puunipimaatisiiu.”
52 Aakw anichii Jew iiyiyiu aah iitaach, “Aakw maak chiyaashtinaahuyaahch, taapwaah aa piihchishkaask michiahchaahkw. Aniyaa Abraham chii puunipimaatisiiu kiyaah maak anichii uchischiwaahiichaasuch chii puunipimaatisiiwich. Chiiyi maak aah iyin an awaan chaa ninihiihtimukwaa taan aah iyiuch nimui nihtaa chiki uhchi puunipimaatisiiu.
53 Chititaayihtaan aa chiiyi austaa aa chistaayihtaakusiyin ishpish aniyaa Abraham? Aniyaa Abraham chii puunipimaatisiiu kiyaah anichii uchischiwaahiichaasuch chii puunipimaatisiiwich, awaan maak chiiyi aah iitaayimiisuyin?”
54 Aakw Jesus aatikuch, “Niiyi chistaayihtaakuhiisuyaanaa nimui mitun chaakwaan chiki uhchi isinaakun an aa chistaayihtaakuhiisuyaan. Nuuhtaawii aaukw chaastaayihtaakuhiit, an kaah iyiyaakw aa uchishaaminituumiyaakw.
55 Nimui nihtaa kuuhchi chischaayimaawaau mikw maak niiyi nichischaayimaau. Iyaanaa maak aahaakaa chischaayimik, niki ninitiyin muyaam chiiyiwaau aa iishi ninitiyaakw. Mikw maak nichischaayimaau kiyaah ni ninihiihtimwaan utiyimuwin.
56 Aniyaa kuuhtaawiiwaau Abraham chii muuchichaayihtim aa chii chischaayihtihk chaa waapihtihk nichiishikaamiyiu. Chii waapihtim, chii miywaayihtim maak.”
Shaash chiih taau Jesus aashkw aamwaayaa uhchi pimaatisiit aniyaa Abraham
57 Aakw anichii Jew iiyiyiuch aah iitaach, “nimui waawaach chii niyaayuumitinuwaapunwaashin, taapwaah aa maak chichii waapimaau aniyaa Abraham?”
58 Aakw Jesus aatikuch, “taapwaah chiwiihtimaatinaawaau, aashkw aamwaayaa uhchi taat aniyaa Abraham, shaash nitihtaan.”
59 Aakw kaa maamuushichinich asinii chaa paahpimusinaatihwaach. Mikw maak Jesus chii kaasuustiwaau aakw kaa wiyiwiit anitaah chishaaayimihaaukimikuhch.