Jesus kiyaah wiichishaanh
7
1 Miin paatimaa aakw Jesus kaa iituhtaat anitaah Galilee kaa ishinihkaataayich aschiiyiu, nimui wiih anitaah Judea kaa ishinihkaataayich aschiiyiu iitaahchaa uhchi wiih iituhtaau waash chii chischaayihtim aa chii wiih nipihiikut aniyaayiuh Jew iiyiyiuh kaa niikaanishkiwaayichh.
2 Shaash maak chii paashunaakuniyiu kaa chii mikushaach Jew iiyiyiuch. Waahtichipiyich maak maahkiihch maan chiih taauch.
3 Aakw aatikut Jesus wiichishaanh, “Chistuhtaa maah, naataah Judeahch chaa iituhtaayin, chaa waapihtihch anichii kaa nuushuushkaasch taan aa iishi maamishkaach aa ihtuwit.
4 Nimui awaan kaataau taan chaa chii iishi tutihk naatuwaayihtimukwaa chaa chii miyu chischaayimaakinuut. Aah tutimun maak maamishkaach iyihtiwin, pichistiniisuu chaa chii chischaayimikiwiyin taan chaa chii iishi tutimin.”
5 Waash waawaach tipiyiwaa wiichishaan nimui uhchi taapwaayaayimikuu Jesus.
6 Aakw Jesus aataat, “taapaa aashkw utihchipiyiu chaa chii chistuhtaayaan, chiiyiwaau maak mikw waah ishpish iituhtaayaakw chiki chii iituhtaanaawaau.
7 Taapaa tikuniyiu chaakwaayiu chaa chii uhchi uhkaatitaakuch iiyiyiuch utih aschiihch kaah taach aakaa kaa taapwaayaayimaach Chishaaminituu, mikw maak nuuhkaatikuch niiyi waash niwiihtaan taan aa ishpish michaatisiinaaniwich.
8 Maachiikw chiiyiwaau iituhtaakw naataah aa mikushaaniwiyich, taapaa aashkw utihchipiyiu niiyi chaa chii iituhtaayaan anitaah.”
9 Iishpih maak Jesus kaah iyit uyaayiu aakutaah ayaapich anitih Galileehch kaah taat.
Jesus kaa iituhtaat anitaah aniyaayiu kaa mikushaaniwiyich
10 Iishpih maak kaa chistuhtaayich aniyaayiu wiichishaan Jesus anitaah aniyaayiu aa mikushaaniwiyich aah iituhtaayich, kiyaah wiiyi chii iituhtaau anitaah aahaakaa chischaayimikut, waash nimui uhchi nitiwaayimaau chaa chii chischaayimikut awaayiuh anitaah aah taat.
11 Aniyaayiu maak Jew iiyiyiu kaa niikaanishkiwaayich chii naanituwaayimikuu anitaah aa mikushaaniwiyich. Chii naanitu kukwaachichaamuyiu taanitaah aah taat.
12 Mihchaatu maak awaayiuh chii aayimuumikuu anitih kaah taayich. Pisch aah iiyiyich, “Naashtaapwaah miywaayihtaakusiu uu naapaau.” Aakw kutik aah iiyiyich, “nimui miywaayihtaakusiu, winipiyihaau awaayiuh.”
13 Nimui maak uhchi chishwaawaauch aah aayimuumaach Jesus waash chii kushtaauch aniyaayiu Jew iiyiyiu kaa niikaanishkiwaayich.
14 Shaash maak wiyaash aapihtuu chii ishpish chiish mikushaanuyiu, aakw Jesus kaa iituhtaat anitaah chishaaayimihaaukimikuhch aakw kaa chiskutimaachaat.
15 Anichii maak Jew iiyiyiu kaa niikaanishkiwaayich naashch chii miskaataayihtimihiikuwaauch aa ishpish miyuhtaakusiiyich aa chiskutimaachaayich aakw iyaach, “Taanitaah waahchi naashch mishtiih chii chischaayihtihk aahaakaa maak nihtaa uhchi chiskutimuwaakinuut?”
16 Aakw Jesus aataat, “an kaa iishi chiskutimaachaayaan nimiyaau niiyi an nichiskutimaachaawin, Chishaaminituu aniyaayiu uchiskutimaachaawin, an kaa paachi iitishuhut.
17 An maak awaan suuhk wiih tutimuchaa Chishaaminituu utitaayihtimuwiniyiu, aniyaayiu taan aa iishi chiskutimaachaauch aakutaah chaa uhchi chischaayihtihk Chishaaminituu kaa paachi iitishumiikwaanihii aniyaayiu chaa chii iishi chiskutimaachaauch kiyaah maak mikw niiyi nititaayihtimuwinihch waahchipiyiyikwaa.
18 An awaan mikw wiiyi taan aayitaayihtihk kaa iishi wiihtihk chaakwaayiu, nitiwaayihtim wiiyi chaa chii chistaayimaakinuut. Aakw an awaan kaa nitiwaayihtihk chaa chii chistaayimaakiniwiyich aniyaayiu kaa paachi iitishihukut, kuiskw ayimuu kiyaah taapwaauchaayihtaakuusuuu.
19 Nimui aa Moses kuuhchi miyikuwaau aniyaayiu wiishuwaawiniyiu kaa iyaawaakw? Nimui maak waachipaayikw anitih aa tishiyaakw chininihiihtaanaawaau an wiishuwaawin. Chaakwaan maak waahchi wiih paachi nipihiiyaakw?”
20 Aakw anichii iiyiyiuch kaa nishkwaaushihaach Jesus iyaach, “Michiahchaahkw chii piihchishkaakw. Awaan maak uu waah nipihiisk?”
21 Aakw Jesus aatikuch, “Paayikw maamishkaach iyihtiwin nichiih tutaan, chichii miskaataayihtimihiikunaawaau chiiyiwaau misiwaa.
22 Moses chii iitishuwaachaa chaa chii tutaakiniwiyich aniyaayiu wiishuwaawiniyiu kaa iitishtaayich chaa chii chischinuwaachishumaakiniwiyich naapaash. Nimiyaau maak Moses niishtim kaa pichistinihk aniyaayiu wiishuwaawiniyiu, shaash anitaah waashkich chii waahkumaakiniwich aayuwikw uyaayiu wiishuwaawiniyiu kaa iyaach. Iyaapich maak chii chischinuwaachishwaawaauch naapaashich aa utihchipiyiyich uyaayiu chaa chiih tutiwaakiniwiich aati maakwaach aa Jew ayimihaachiishikaayich.
23 Uu maak aah tutaamaakw aa Jew ayimihaauchiishikaach aa ishpish wii kiniwaayihtimwaakw Moses uwiishuwaawin, chaakwaan maak waahchi chishuwaasiistuuyaakw mitun aa chii miniwaachihiik an naapaau aa ayimihaauchiishikaayich?
24 Kuiskw maah maamitunaayihtimukw an kaah tutimaan. Akaawii ataamaayimikw chaakwaan aahaakaa niishtim mitun nituuchischaayihtimaakw chaakwaan waahchi tutimaan an kaah tutimaan,” chiih iitaau Jesus.
Iiyiyiuch kaa wiih chischaayihtihch taapwaah Christ iyaawiyikwaanihii Jesus
25 Pisch iiyiyiuch Jerusalemihch kaa uhchiich iyaach, “aayiukun aa uyaayiu naapaau kaa wiih nipihaach?
26 Kiniwaapimaahkw maah. Nimui wiyaash iitaakiniu anitaah taawaayish aa chiskutimaachaat. Nimui kaakiyaah chischaayimaauch anichii kaa niikaanishkiwaach Jew iiyiyiu taapwaah Christ iyaawiyikwaanihii, aniyaayiu Chishaaminituu kaa paachi iitishihwaayich.
27 Iinaaniu maak aakaa chaa uhchi chischaayimaakinuut taanitaah chaa uhchiit Christ tikushihkaa. Uu maak wiiyi naapaau chii chischaayimaaniu taanitaah waahchiit.”
28 Maakwaach Jesus aa chiskutimaachaat anitaah chishaaayimihaaukimikuhch, chii chishwaawaau aakw iyaat, “Taapwaah aa chichischaayiminaawaau awaan niiyi iyaawiyaan? Taapwaah aa chii chischaayihtaanaawaau taanitaah waahchiyaan? Nimui nuuhchi tikushin niiyi mikw aa chii iitaayihtimaan chaa chii tikushiniyaan. An muush kuiskw kaah tik aaukw an kaa paachi iitishuhut, nimui maak chii chischaayimaawaau chiiyiwaau an awaan.
29 Mikw maak nichischaayimaau niiyi waash wiiyi aah taat nuuhchiiwaan kiyaah wiiyi nichii paachi iitishihuukw.”
30 Aakutaah kaa wiih utinaachh Jesus mikw maak nimui uhchi pimaayimaauch, waash aashkw nimui uhchi utihchipiyiu anitih chaa utinaawaakupinaa.
31 Mihchaatu maak awaayiuh anitih kaah taayich chii taapwaayaayimikuu aah iiyiyich, “Mishtiih chii iishi maamishkaach iiyihtuu uu naapaau. Paachi iitishihwaachaa maak Chishaaminituu aniyaayiu Christ, austaa aa kiti iishi maamishkaach tutimiyiu chaakwaayiu taan aa iishi tutimiyich uyaayiu naapaau.”
Kaa naanaakichihtaach chishaaayimihaaukimikuyiu kaa iitishihwaakiniwiyich chaa chii nitiutinaachh Jesus
32 Aakw anichii Phariseech kaa paahtiwaach aniyaayiu iiyiyiuh taan kaa iishi chiimuch aayimuumaayich Jesus. Anichii maak kaa niikaanishiich ayimihaauchimaauch kiyaah anichii Phariseech chii iitishihwaauch aniyaayiu chipihuwaashuu kaa naanaakichihtaayich chishaaayimihaaukimikuyiu chaa chii nituuutinaayich Jesus.
33 Aakw Jesus iyaat, “Aashkw waaipishchiish niki taan utih aah taayaakw. Mikw maak shaash wiipich niki iituhtaan anitaah aah taat an kaa paachi iitishuhut.
34 Chiki paachi naanituwaapiminaawaau maak, nimui mikw chiki uhchi miskunaawaau, waash anitaah chaa iituhtaayaan nimui chiki chii iituhtaanaawaau chiiyiwaau.”
35 Aakw anichii Jew iiyiyiuch aatituch, “Taanitaah chaa iituhtaat chaa uhchi aakaa miskuuhk? Kwaashwaan kukwaataayihtimuchaa anitaah kutik chiich Jew iiyiyiu aah taayich kaa wiichimaayich Greek chaa iituhtaat chaa chii chiskutimuwaat aniyaayiu Greek kaah iitiskaanaasiiyich iiyiyiu.
36 Taan aaschishwaamikiniiyich uyaayiu kaah iyit, chiki naanituwaapiminaawaau mikw maak nimui chiki uhchi miskaaunaawaau? Kiyaah kaah iyit, nimui chiki chii iituhtaanaawaau anitaah chaa iituhtaayaan? Aaukw kaa iishi ayimihiituch.”
Nipii kaa pimaachihiiwaamikihch
37 An maahchaayi aa chiishikaach an kaa mikushaaniwiyich aaukw maauch kaa chistaayihtaakuhch. Aayuwikw maak aniyaayiu aa chiishikaayich Jesus kaa pisikut aa chishwaawaat aah iyit, “Awaan nuuhtaayaapaakwaakwaa niki paachi nitiwaapimukw aakw maak chaa minihiik.
38 Waash akwaachishtaach chihchimisinihiikinihch, ‘An awaan chaa paachi taapwaayaayimikwaa, utaahiihch chiki uhchiiwiniyiu aniyaayiu iyihpiiyiu kaa pimaachihiiwaamikiniiyich.’ ”
39 Aayuwikw uyaayiu kaah iyit Jesus aah aayimuumaat kaa piyaahchisiiyichh ahchaahkwh, aniyaayiu misiwaa awaan kaa taapwaahtihk chaa iyaawaat. Anichii kaa taapwaahtihch aashkw nimui uhchi miyaakiniwich aniyaayiu kaa piyaahchisiiyichh ahchaahkwh, waash aashkw nimui uhchi nitiwaapimaau Jesus uhtaawiimaau chaa chii chistaayihtaakuhaakinuut.
Iiyiyiuch kaa waawaanaayihtihch awaayiuh aah aawiyich Jesus
40 Pisch maak anichii iiyiyiuch kaa paahtiwaach uyaayiu aah iiyiyich, aakw iyaach, “Aaukw uu taapwaah uchischiwaahiichaasiu kaa paachi iitishihwaakinut utih aayihtaayiukw.”
41 Kutikich wiih aakw iyaach, “Aaukw uu Christ.” Mikw maak kutikich aakw iyaach, “Nimiyaachaa uu Christ, waash nimui anitaah Galileehch uhchi uhchiiu an Christ.
42 Akwaachishtaach chihchimisinihiikinihch, ‘Anitaah David aah taayich chiki uhchi aanischaa pimaatisiiu an Christ, anitaah maak Bethlehemihch anitaah aniyaa David kaa uhchiit aakutaah chipih pimaatisiiu.’ ”
43 Aakw kaa pihkaanipiyihuch anichii iiyiyiuch aniyaayiu uhchi aahaakaa paayikunihch iitaayimaach Jesus.
44 Pisch iiyiyiuch chiwiih utinaauch mikw nimui awaan uhchi pimaayimaau.
Jew iiyiyiu kaa niikaanishkiwaach aakaa kaa wiih taapwaayaayimaach Jesus
45 Anichii maak kaa chipihuwaashuwich kaau chii nitiwaapimaauch aniyaayiu kaa niikaanishiich ayimihaauchimaauh kiyaah aniyaayiuh Phariseeh. Chii iitikuch maak, “Chaakwaan waahchi aakaa uhchi paashuwaakw?”
46 Aakw iyaach anichii kaa chipihuwaashuwich, “Nimui nihtaa uhchi ishpish miyu chiskutimaachaau awaan aa ishpish miyu chiskutimaachaat uu naapaau.”
47 Aakw aatikuch aniyaayiuh Phariseeh, “Kiyaah aa chiiyiwaau chichii winipiyihiikuwaau.
48 Nimui nihtaa awaan aa niikaanishkaachaat kiyaah maak anichii Phariseech uhchi taapwaahtimuch Jesus aah aawiyich Christ.
49 Mikw anichii iiyiyiuch aakaa kaa chischaayihtihch Moses uwiishuwaawiniyiu aaukunich uchii waah taapwaayaayimaach Jesus aah aawiyich Christ, nishiwinaachimikuch maak Chishaaminituu uyaayiu aah tich,” chii iitaauch anichii Phariseech.
50 Paayikw an Pharisee an paayikwaau kaa nitiwaapimaakupinaa Jesus, Nicodemus kaa ishinihkaasut, chiih iitaau aniyaayiu wiichipaarisiyih,
51 Akwaatistaahch chiwiishuwaawininuu, “Nimui chipih uhchi tipaaskunaaniu awaan aashkw aahaakaa waawaach uhchi nituuhtiwihkw aa ayimit kiyaah aashkw aahaakaa chischaayimaakw taan kaah tik.”