Jesus kaa miiniwaachihaat naapaau aakaa nihtaa uhchi waapihtimiyich
9
1 Paayikwaau aa pimuuhtaach Jesus uchischinihamuwaakinh, chii waapimaach naapaau chihchiwaa aahaakaa nihtaa uhchi waapihtimiyich.
2 Kaa kukwaachimikut, “Chiskutimaachaasiu chaakwaayiu kaah tutaakut uu naapaau waahchi chihchiwaa aahaakaa nihtaa uhchi waapihtihk. Wiiyi aa chii michihtutihk kiyaah maak aniyaayiu uniichihiikwh aa chii michihtuutimiyich?”
3 Jesus kaa nishkwaaushihaat, “Nimiyaayiu wiiyi umichihtwaawin kiyaah maak uniichihiikwh umichihtutimuwiniyiu kaahtutaakut. Mikw maak chaa chii waapihtaakiniwiyich Chishaaminituu usuuhkaatisiiwin uhchi uu naapaau uu pimaatisiiwinihch.
4 Waash an kaa paachi iitishuhut, chipih tutimuwaanaaniu utaapitisiiwin aaskiu aa isinaakuniiyich chaa chiih tutimihkw, waash aapitisiinaaniu maakwaach aa chiishikaach. Shaash chiki utihchipiyiu chaah aakaa chii aapitisiinaaniwich maakwaach aa tipiskaach, waash aauukaastaayaach.
5 Maakwaach utih aah taayaan aschiihch aaukw niiyi wiiyaastaawinuuyaan utih aschiihch.”
6 Iishpih uyaayiu kaah iyit Jesus chii sihkuu anitaah aschiihch aakw kaauusiihaat sischiuh aniyaayiu usihkuuwin aah aapichihtaat. Aakw kaa shishushchinimwaat uschiishikuyiu aniyaayiu aakaa kaa waapihtimiyich naapaau.
7 Aakw aataat aniyaayiu naapaau, “Maachih nituuminaapaauutaah naataah kaa chii pikaashimunaaniwich Siloam kaa ishinihkaataach.” An Siloam aah iinaanuuch “Kaah iitishihwaakinut” iishi iitwaashtimuwaataakiniu. Aakw kaa nituuminaapaauutaat an naapaau aakaa kaa waapihtihk, chii waapihtim maak iishpih miin taakushihk.
8 Aakw iyaayich aniyaayiu iiyiyiuh kaa chischaayimikut kiyaah aniyaayiu kaa chii waapimikut aa nitutimaat shuwiyaan, “aaukw aa uu naapaau kaa chii apit aa nitutimaat shuwiyaanh?”
9 Pisch aakw iyaach anichii iiyiyiuch, “Aaukw an naapaau.” Kutikich maakw wiiyi aakw iyaach, “nimiyaau an, mikw aaukw aan chaakaat aa isinaakusit.” An naapaau kaa miiniwaachihaakinuut aakw iyaat, “Aaukw waash an niiyi.”
10 Aakw kaa kukwaachimaach aah iitaach, “Taanitaah kaa uhchi iispiyich chaa chii waapihtimin aakw?”
11 Aakw an naapaau kaah iyit, “An naapaau Jesus kaa ishinihkaasut, sischiu chii paachi ashunaau nischiishikuhch, aakw kaa iishit chaa minaapaauutaauch anitaah Siloam kaa ishinihkaataach kaa chii pikaashimunaaniwich. Aakutaah kaa iituhtaayaan. Iishpih maak kaa chiish minaapaauutaauch tiiwaahch nichii uhchi waapihtaan.”
12 Aakw kaa kukwaachimaach aniyaayiu kaa waachi waapihtimiich, “Taanitaah aah taat uu naapaau?” Aakw aa naaskwaasihaat, “nimui nichischaayimaau.”
Phariseech kaa naanitu chischaayihtihch taanitaah kaa uhchi miiniwaachihiimaakiniwiyich aniyaayiu naapaau aakaa kaa waapihtimiyich
13 Aakw kaa iituhtihaach aniyaayiu naapaau aakaa kaa waapihtimiyich anitaah Phariseeh aah taayich.
14 Chii ayimihaauchiishikaayiu maak aniyaayiu Jesus kaa ushihaat shischuuu kiyaah kaa miiniwaachihaat aniyaayiu naapaauh aakaa kaa waapihtimiyichh.
15 Aakw anichii Phariseech miin kaa kukwaachimaach aniyaayiu naapaauh taanitaah waahchi waapihtimiyich aakw. Kaah iitikuch aniyaayiu naapaauh, “shishchuuu chii shishunaau nischiisikuhch aakw kaa nituuminaapaauutaauch aakutaah maak kaa uhchi waapihtimaan.”
16 Pisch maak anichii Phariseech aakw iyaach, “uu naapaau Jesus nimui Chishaaminituu aah taayich uhchiyiu, taapaa iyaapitaayihtim aa ayimihaauchiishikaayich.” Aakw kutikich iyaach, “taanitaah chaa chii uhchi maamishkaach ihtik awaan michihtuutimukwaa.” Chii pihkaanipiyuuch maak uyaayiu uhchi.
17 Aakw anichii Phariseech miin kaa kukwaachimaach aniyaayiu naapaau kaa miiniwaachihiimaakiniwiyich aah iitaach, “taan aataayimit maak chiiyi an naapaau kaa miiniwaachihiisk?” Aakw an naapaau kaa nishkwaaushihaat aah iitaat, “uchischiwaahiichaasiu nitiiitaayimaau.”
18 Nimui uhchi wiih taapwaahtimuch anichii Jew iiyiyiu kaa niikaanishkiwaach chihchiwaa aahaakaa uhchi waapihtimiyich aniyaayiu naapaau anuuhch maak shaash aa waapihtimiyich. Aakw kaa nitumaach aniyaayiu naapaau uniichihiikuyiu,
19 Kaa kukwaachimimaach aah iitimimaach, “aau aa uu chikusiwaau kaah iyiyaakw ishkutik kaa iiyiyiut shaash aahaakaa uhchii waapihtihk? Taanitaah waahchi waapihtihk anuuhch?”
20 Uniichihiikwh aakw iyaayich, “nichischaayihtaanaan aahaawit taapwaah nikusinaan, kiyaah kaa iiyiyiut tiwaahch aahaakaa uhchi waapihtihk.
21 Nimui maak nichischaayimaanaan taanitaah waahchi waapihtihk anuuhch, kiyaah nimui nichischaayimaanaan awaan kaah tutiwaat chaa chii waapihtimiyich? Kukwaachimaahkw wiiyi awaayiuh kaa miiniwaachihiikut, ispihtisiiu waash wiih waachichihch chaa chii wiihtihk.”
22 Chii kushtaauch aniyaayiu Jew iiyiyiu aayuwikw uyaayiu waahchi itaach uchii uniichihiikumaauch. Waash chii chischaayimaauch aniyaayiu Jew iiyiyiu kaa niikaanishkiwaayich aa chii waayaayihtaamiyich chaa wiyiwiitishihwaayich anitih ayimihaaukimikuhch awaayiuh chaa iitaayikwaanihii aa Christwiyich aniyaayiu Jesus.
23 Aayuwikw aniyaayiu kiyaah waahchi itaach, “Kukwaachimaahkw, ispihtisiiu waash chaa chii wiihtimaataakw.”
24 Aakw anichii Jew iiyiyiuh kaa niikaanishkiwaach miin kaau kaa nitumaach aniyaayiu naapaau aakaa waahchi waapihtimiyich aakw aataach, “Chishaaminituu aaukw maamihchim. Nichischaayimaanaan uu naapaau Jesus aa michaatisiit.”
25 Aakw iyaayich, “taapaa nichischaayimaau maachaatisiikwaa kiyaah maak aakaa michaatisiikwaa uu naapaau, mikw nichischaayihtaan aahaakaa uhchi waapihtimaan aakw maak anuuhch aa waapihtimaan.”
26 Kwaakwaachimaach aah iitaach, “taan maak kaah tutaask? Taan kaah tutihk chischiishikw chaa chii aapihiipiyiyich?”
27 Naaskwaashiihiikuch aayitikuch, “shaash chichii wiihtimaatinaawaau mikw maak nimui chiwiih nituuhtaanaawaau. Chaakwaan waahchi nitiwaayimiyaakw miin chaa chii iyaan? Chiwiih nuushuushkuwaau kiyaah chiiyiwaau.”
28 Aakw kaa iyaastaamaam aah iitaach, “aaukw chiiyi paayikw uchischinihamuwaakinh an naapaau, niiyaan wiih Moses aaukw waauchischinihamuwaakinitutaawiyimiht.
29 Nichischaayihtaanaan Moses aa chii ayimihiikut Chishaaminituu, mikw maak nimui nichischaayimaanaan uu naapaau taanitaah waauhchiit wiiyi.”
30 Naaskwaashiihiikuch aayitikuch, “taapwaah kiyipwaa miskaataayihtaakun, aahaakaa waawaach chischaayimaakw taanitaah waahchiit, mikw maak taapwaah waash nichiih tutaakw chaa chii waapihtimuch.
31 Chichischaayihtaanaaniu Chishaaminituu aahaakaa nituuhtiwaat kaa michaatisiiyich, nituhtiwaau maak wiiyi aniyaayiuh awaayiuh kaa ayimihaastaakut kiyaah aah tutimiyich utitaayihtimuwin.
32 Kaa ishpish tikuhch uu aschii, nimui nihtaa uhchi paahtaakun awaan chaa chiih tutiwaat awaayiuh aahaakaa waapihtimiyich chaa chii waapihtimiyich.
33 An naapaau kaah tutiwit chaa chii waapihtimaan nimui nipih chii tutaakw chaa chii waapihtimuch aakaa Chishaaminituu aah taayich uhchi uhchiikupinaa.”
34 Aakw naashkwaashihaach aataach aniyaayiu naapaau, “taapi michaatisiiwinihch chichii uhchi pimaatisiin, aa iitaayihtimin maak ayaapich chaa chii chiskutimuuyaahch.” Aakw kaa wiyiwiitishihwaach chihchiwaa anitih ayimihaaukimikuhch aniyaayiu naapaau.
Jesus kaa wiihtihk awaayiuh aniyaayiu chihchiwaa aakaa wiyaapihtimiyich
35 Jesus maak chii paahtim aa chii wiyiwiitishihumaakiniwiyich aniyaayiu naapaau aakw kaa naanitiwaapimaat. Chii miskuwaau maak, aakw aataat, “chii taapwaayaayimaau aah iiyiyiukusisaan?”
36 An naapaau kaa iishi nishkwaaushihaat Jesus, “paachi wiihtimuuh awaan an, aakw maak chaa chii uhchi taapwaayaayimik.”
37 Jesus aataat, “uu kaa kiniwaapimit kaa ayimihiisk, aaukw waash an.”
38 Aakw aatikut aniyaayiu naapaau, “chitaapwaahtaatin tipaayihchichaasiu.” Kaah aatiuchihchiihkunipit aa ayimihaastiwaat.
39 Aakw Jesus iyaat, “nichii paachi tikushin utih aschiihch chaa chii tipaaskunichaayaan anitih chaa chii uhchi waapihtihch anichii aakaa kaa waapihtihch, aakw anichii kaa waapihtihch aakaa chaa chii waapihtihch.”
40 Pisch maak anichii Phariseech chiih taauch anitih kiyaah chii paahtiwaauch aniyaayiu kaa iiyiyich, aakw aataach, “chishin aa kiyaah niiyaan aakaa waapihtimaahch?”
41 Aakw Jesus aatikuch, “aakaa waapihtimaakw nimui chipih uhchi iitikunaawaau aa michihtuutimaakw, mikw maak aah iyiyaakw niwaapihtaanaan, aakutaah waahchi chischaayihtaakusiyaakw aashkw aa michihtuutimaakw.”