1 John
Niishtam umasinahamaachewin John
Pimaatisiiwin ayimuwin
1
Chimasinahamaatinaan e aayimuumachiht an shaash kaa ihtaat eshkw ekaa mitun chekwaayuu uhchi ihtakuniyich.
Nichii pehtawaanaan,
muhch nichii waapamaanaan,
kaye nichii taahtinaanaan.
Chitaayimuutamaatinaan an kaa miiwet pimaatisiiwiniyuu aniyuu uhchi taan kaa ishi waawiihtahk.
2 Muush Uhtaawiimaauh e ihtaayich chii ihtaau.
Chii nuukuhtaakanuuyuu upimaatisiiwin.
Nichii waapahtamuwaanaan.
Ekw maak tepaatutamuwachiht,
e aayimuutamaataahch kaachiche pimaatisiiwin.
3 An kaa waapamachiht kaye kaa pehtawachiht e ayimit chiwii aayimuutamaatinaan kaye chiyawaau chechii chischeyimekw mwehch niyaan e ishi chischeyimachiht.
Ekw maak chechii ishi wiichewiyaahch e ishi wiichewachiht Uhtaawiimaau ekw maak Ukusisa Jesus Christ.
4 Eukw uu wehchi masinahamaataahch chechii saakaschineshkaakuyihkw muuchicheyihtamuwin.
Waashtewinihch chipaa ishi pimaatisiinaanuu
5 Chiwii wiihtamaatinaan taan kaa ishi wiihtamaakuyaahch Jesus.
Chii iteu,
Chishemanituu eukw waashtewin,
namui mitun piihchishkaakuu wanitipiskusiiwiniyuu.
6 Chiishpin itweyihkwe Chishemanituu e wiicheuhkw,
wanitipiskusiiwinihch maak e ishi pimaatisiihkw,
chinanatayinaanuu kaye namui taapwewinihch chit ishi pimaatisiinaanuu.
7 Chiishpin waashtewinihch ishi pimaatisiihkwe mwehch wiya waashtewinihch e ishi ihtaat,
taapwe chika miyu wiicheutunaanuu,
kaye Jesus,
Chishemanituu Ukusisa,
umihkw chipayehchihiikuwaanaanuu misiwe machihtwaawinihch uhchi.
8 Chiishpin itweyihkwe ekaa nihtaa machituutamukw,
chiwiyeshimitisunaanuu,
kaye namui chichischeyihtenaanuu taapwewin.
9 Chiishpin maak kuiskw wiihtamuuhkwe Chishemanituu e chii machituutamuhkw,
taapweucheyihtaakusuu che ihtuutahk aniyuu kaa itwet che ihtuutahk.
Kaye cheshtinaash kuiskw kata ihtuu,
Chika wepeyihtamaakunuu chimachihtwaawinuuh kaye chika payehchihiikunuu taan e ishi ekaa kuiskutaatisiyuuhkw.
10 Chiishpin itweyihkwe ekaa machituutamuhkw muyaam e nanatayit chitishinaakuhaanuu Chishemanituu kaye namui chipiihchishkaakuwaanaanuu utayimuwin.