—Saúlichi tenchi nantari laqui itode! Lari yaca israelítalachi miya josa munaratiyoe. Junni nuri wala cachibi aseite pocato, Belén puebloca jito, Isaíchi yaca jide! Junte lari Isaíchi nao mancaca wenteca joyoe tinue miya josa.

2 Junni Samuel itsantinue:

—¿Niyaque jiyanan? Pansile Saúl laca junchi jichinaeque merátori, totechunae tinue.

Junni Miya Diosiri itsantinue:

—Junchi jinato, wala náca cato tsachilaca layaisa caride! ya walaca lachi nin poto cuwabi jichinayoeque. 3 Junto jun walaca lachi nin poto cuwanunte Isaícanan jasa tide! Junsi lari junte tsachi mancaca wentesa pánae tinue miya suwasa.

4 Junni Samuéliri Miya Diosi mantaca junca meráto, Belén puebloca jinue. Junbi fenasa, junbi chumin mantá tanla tulaibi jato jelerato, itsanque panhalaquinue:

—¿Pa jatiyun? latinue.

5 Junnan Samuéliri itsantinue:

—Lari pa jatiyoe. Diosichi nin poto cuwabi jayoe. Junni nulanan tenca seilaide! Diosichi cate jochun. Junto labe peaconpanailaide! tinue.

Junsi Isaíca, yachi nalalaca, seilaisa tinue yabe Diosichi cate ino podeilaisa. Junto Diosichi nin poto cuwanunte jera jalaisa tinue. 6 Junni yala jera falainunbi, Samuéliri Isaíchi nao manca Eliaca quirato, yaca Miya Diosiri miya suwachun wenteca jonhoeque tenhinaminue. 7 Junni Miya Diosi Samuélibe itsantinue:

—Ya tsachiri uwan joe, junsi sennan quiran joe. Juntonan tsan jominca tennatude! Lari yaca wentetucayoe tinue. Lari tsachila cuwenta quiratumanyoe. Tsachilari jamoleri sen jonuncari quiraminla joe; lari tencabi quiramin joyoe tinue.

8 Junnasa Samuélichi cate Isaíchi manca nao Abinidácaman tanjanue. Junni Samuéliri yaca quirasi, yacanan Miya Diosiri wenteca itoe tinue. 9 Junnan Isaíri yachi manca nao, Sama mumuncaman, Samuélichi cate tanjanue. Junni yaca quirasi, yacanan Miya Diosiri wenteca itoe tinue. 10 Junni tsanque Isaíchi naola sietecaca Samuélichi cate jera tanjanue. Junnasanan Samuéliri yalaca jera quirato, nin yala mancacatiya Miya Diosiri wenteca itoe tinue. 11 Junni Isaíbe panhato itsantinue:

—¿Inla nuchi jera naola jolajun? tinue.

Junnan Isaíri itsantinue:

—Manca nanni fe nacan nao cajoe. Juntonan yari opisa cuidaito nenae tinue.

Jun tsantinan, Samuéliri itsantinue:

—Ya naoca cabi erede! Ya itosari mesate ano fichun chudino itolajoyoe tinue.

12 Junni Isaí ya naoca casa erenue. Junni ya janan quiranari, duque moso jominue. Lubacan jominue. Yachi cacaca quiranan, duque moso jominue. Junni Miya Diosi Samuélibe itsantinue:

—Inca wentecayoe. Wiruito, yaca aseite ilipode! tinue yari miya jono joe tito.

13 Junnan Samuéliri ya mosochi acola quiralaquinasa, aseite pun wala cachi cato, yachi misubi iliponue miya jono joe tito. Junni yari David mumun jominue. Junto jun mate nechi Diosichi Tenca yachibi raminue. Junsi Samuéliri yaca miya suwatobi, Ramá tinun puebloca manjinue.