—Miya Diosi laca nuchica ereca jominhe yape nuca israelítalachi miya suwasa yachi tsachilachi. Jun tenchi nuri Miya Diosi pánaminca meráde! 2 Yari jera poden joto itsantinae: Amalecítalari duque seitonla joto, yalari israelítala Egipto tobi nechi janaminlaca yalachise polarilaquitunue. Junto yalari seitonla jonan, lari yalaca casticaquechinayoe. 3 Junni nuri nuchi soldadolabe layaito, amalecítalabe quicaabi jinola joe. Junto nulari yalaca laquiratuto, titiya uyan cosa tanunlaca jera yucapiyarito, jerale unilalaca, sonalaca, nalalaca, na nacalaca, niyanlacatiya jera totenola joe. Junsi opisalaca, walalaca, burolaca, cameyolaca ticatiya jera totenola joe tinae tinue. Miya Diosi nuca tsanque mantanae tinue.

7 Junni Saúliri yachi soldadolabe amalecítalaca fe loto suerenaminlanue. Junto Havila pueblote nechi Shur tinun to fecári sutanjilainue. Shuri Egipto to quelole joe. 8 Junsi israelítalari amalecítalaca jera totelaquito, yalachi miya Agag tinunca calaquinue. 9 Junsi Saúlichi soldadolari ya miyaca totetuto, junsi nin fe sen opisalaca, walalaca, totetulajonue. Junsi ti fe mica cosalacari yucapiyarilaquitunue. Seiton pele cosalacasiri jera yucapiyarilaquinue.

10 Junnan Miya Diosi Samuélibe itsantinue:

11 —Lari duque laqui joyoe Saúlica miya suwaca jomanyoeque. Yari laca telato, obedeseitumin joe tinue.

Junnan Samuéliri duque wepanato tenca canato, man quepen Miya Diosibe rocainue. 12 Junni Samuéliri ayuna nanchi quepenanan wiruito Saúlichica jinasa, tsachila yabe tulaito itsanlatinue: Saúl Carmel tinun puebloca jica joe. Junsi junte monumento suca wirucarito, pila chuteca joe yape israelítalari tenhilaisa amalecítalaca fe lolaiyoeque. Junto junte nechi Saúlila Gilgal pueblo fecári jicala joe latinue. 13 Junni Samuéliri Saúlichica jinue. Junnan yari saludaito itsantinue:

—Samuel, Miya Diosi nuca bendesiquichunae. Lari Miya Diosi mantaca junca jera quicayoe tinue.

14 Junni Samuéliri itsantinue:

—Nuri Miya Diosi mantaca junca jera quica jonari, ¿ti tsancari firara latinan? Diosi mantaca jominue jerale opisalaca, walalaca jera totesa. Junni la mantimini opisala walala firara tinaminca meránayoe tinue.

15 Junni Saúliri Samuélibe itsantinue:

—Israelítalari amalecítalaca fe loto, fe sen opisalaca, walalaca tanjacalae tinue yape nu Miya Diosichi nin poto cuwasa. Juntonan uyan cosalacari jera yucapiyarilaquiyoe tinue.

16 Samuéliri Saúlibe itsantinue:

—Nantari patude! Lari Miya Diosi labe quepen paca junca nube pachinayoe tinue.

Junnan Saúliri paniquede! tinue. 17 Junni Samuéliri itsantinue:

—Matuleri nuri fe jono tenhica itominue. Tsan josanan, Miya Diosi nuca israelítalachi miya suwanan, nu jerale israelita bolonlaca mantamin ica joe tinue. 18 Junto Miya Diosi nuca mantato, duque seiton, jutsa quimin amalecítalaca jera toten, yucapiyarin, quisa erecae tinue. 19 ¿Junni ti quichun Diosi mantaca junca nuri merátiyun? Nuri yalachi sen cosalacari jera canue. Junto nuri amalecítalaca jera totetuto, Miya Diosichi cate duque seiton quica joe tinue.

20 Junni Saúliri Samuélibe itsantinue:

—Lari Miya Diosi mantaca junca meráto, amalecítalaca jera toteto, yalachi miya Agag tinuncari tanjacalayoe tinue. 21 Juntonan epe tsachilari walalaca, opisalaca calaquinue tinue Gilgal tinun pueblobi nu Miya Diosichi nin poto cuwasa.

22 Tsantinan, Samuéliri itsantinue:

—Miya Diosiri yaca obedeseisa fe munarae; yari animalilaca nin poto cuwasa polencari munaratue. Junsi ya mantaca junca meránari, opisalachi muluca nin poto cuwacaca fécari sen joe. 23 Junni Diosica merátuminlari tiri pone quiminla cuwenta jolajoe. Junsi Diosica obedeseituchi timinlari tiri moldeca se timinla cuwenta jolajoe. Junni Saúl, nuri Diosica merátunue; junnan yari nu miya jominca munaratiyoe tinae tinue.

24 Junnan Saúl Samuélibe itsantinue:

—Tsa tie. Lari Miya Diosi mantaca junca merátuto, jutsa quica joyoe. Junsi nu paca juncanan merátiyoe; lachi tsachilaca jelechi yalacari meráyoe. Junto laca perdonaide! 25 Junsi labe parejo manjide! tinue Miya Diosica se tichun.

26 Junnan Samuéliri itsantinue:

—Lari nube parejo manjitiyoe. Nuri Diosi mantaca junca merátuca joe. Junnan Diosiri nuca israelítalachi miya jominca josolechunae tinue.

27 Junni Samuel tsantito manjinasa, Saúliri benechi nechi jato, yachi camisa puntaca chuinasa chile jinue. 28 Tsan quinan, Samuéliri itsantinue:

—Nu lachi camisa puntaca chile cae. Junni nuca Miya Diosi israelítalachi miya jominca chile canun cuwenta josolechinayoe tinae. Junsi nu mantamin jominca josoleto, nuca fe sen israelítachi mantá mancuwachunae tinue.