3 Junnasa mantimini weyan filisteo soldadolari dubi chudica jominlanue israelítalachi tobi. Junni Jonatánlari yalachica jito quera quicaalaquinue. Junni weyan filistéolari meralaquinue Jonatanla filistéolaca totelaquinueque. Junto duque painan, Saúl tenhinue jerale israelítalari filistéolabe quera quintsan jochunaeque. Junto jerale israelítalachi pueblo cura meracuwaminlaca erenue. Meracuwaminla pueblo cura fesi, tutu quilaquinue yape tsachila yalaca seque meralaquisa. 4 Tsanque jerale israelítalari meralaquinue Saúlichi soldadolari filistéolaca totelaquinueque. Junsi weyan filistéolari duque pa joto quera quicaabi jalaichinaequenan meralaquinue. Junca meráto, jerale quera quicaano poden israelítalari Gilgal tinun pueblobi Saúlibe layailainue quera quicaachun.

5 Junni filistéolanan layailainue israelítalabe quera quicaachun. Jun layaito, yalari peman chunca mili quera quicaanun caro tan, junsi sota mili soldadola calubi chudiminla, junsi uyan soldadola duque jominlanue. Duque jocachinan, lamari queloca tsalan cuwenta mitun piyari jominlanue. Junni ya filisteo soldadolari Micmas tinun puebloca jito, junte jelen ya quito chuminlanue. Aman Micmas Betavenle nechi yo lanun nanchi joe.

6 Junni israelítalari duque wepanalainue filistéola quera quicaato fe lolaichinaeque. Junni duque jele tito, weyanlari sujin, weyanlari to forochi tsain, to foro quicabi tsain, junsi to towaca minu wito tsain, ilainue. 7 Junnasa weyan israelítalari junte nechi sujito, Jordán pica poleto, Gad tobi, junsi Galaad tobi felainue. Tsanlainasanan, Saúl mantimini israelita soldadolabe Gilgal tinun pueblobi duque jelenasa méraminlanue filistéolari quera quilaquechinaeque.

8 Junni Samuéliri Saúlibe paca jominue siete ma poleto janaeque Miya Diosichi epe cuwachun, filistéolaca fe lono podeichun ayudaisa. Junni tsantica jotonan, Samuéliri jun mate fatunue. Junnan Saúliri duque tenca canaminue. Junnasa israelítalanan jelechi manca cura jera manjinaminlanue. 9 Junnan Saúl itsantinue:

—Animalilaca tanjalaide! la Miya Diosichi epe cuwachun. Lari jera nin poto Miya Diosichi cuwano munarayoe. Junsi weyan animalilacanan epe cuwano munarayoe tinue jeralelaca Miya Diosibe fe quelo suwachun.

Junni animalilaca tanjalainunbi, Saúlinan jera toteto, nin poto Miya Diosichi cuwanaminue. 10 Junni Saúl animalilaca jera nin ponasale, Samuel janaminue. Junni Saúl Samuélica facaricabi jito, yabe saludainue. 11 Junni Samuel itsantinue:

—¿Ti quichun nuri animalica nin poto Diosichi cuwanayun? tinue. Nuri tsanno itoe; lasiri tsanno joyoe tinue.

Junnan Saúl itsantinue:

—La quiranasa israelítalari manca cura yaca jera manjilainaminhe. Junsi nuri jun mate janae tica jotonan fatue. Junnasa filistéolari Micmas tinun pueblote jera layaito jolajoe chiquilabe quicaachun. 12 Junnan lanan titotiya quino patíyoe. Junsi tenhiyoe filistéolari Gilgal puebloca jalaichinaeque chiquilabe quicaabi. Junsi Miya Diosichi tenchi animalica nin poto epe cuwano jola itosanan falaichunaequenan tenhiyoe. Jun tenchi lanan animalilaca Miya Diosichi nin poto cuwano patíyoe tinue yape yalaca fe lono podeichun ayudaisa.

13 Junni tsantinan, Samuéliri itsantinue:

—Nuri tenca iton quica joe. Nu Miya Diosi paca junca merámanpari, yari nuca, nuchi naoca, nietoca, ticatiya israelítalachi miyala josa carino jomin jonhoe. 14 Junni amanari tsanquica jonun tenchi, nuchi nao, nieto, titiya miya itolajochunae. Junnan Miya Diosiri manca tsachiri Diosichi cate seque quimin jonan, yaca israelítalaca mantamin mansuwachunae tinue. Nuri Diosi paca junca obedeseitunun tenchi miya jominca manlarichunae.