Caque fiqui: Israelítalari yalachi tobi chutobi, duque tsachila yalaca mantamin jominlanue. Casale Josué yalaca jun tobi tanwitobi, yanan yalaca mantamin jominue. Junni Josué puyanunbi israelítala Diosica merátumin ilainue. Junnan Diosi yalaca telaqueponue yape yalachi quelote chumin tsachilari yalaca seiton quilaquisa. Junni israelítalari michi padeseinaminnan, Diosibe ayudaideque manrocainan, Diosi tsachi mancaca manse larimin suwanue yape israelítala nantari padeseilaitusa. Junni ya manse larimin tsachi yalaca mantamin jominue puyano fecári.

Junni ya puyanunbi israelítalari manaman Diosica manmerátuminla inan, Diosi yalaca manaman padeseisa carimin jominue. Junni michi padeseinaminnan Diosibe manaman manrocainan, manca tsachicaman manse larimin suwamin jominue yape nantari padeseilaitusa. Junni junpalu patsa wata fecári israelítala tsantin chumin jominlanue. Junni in pilari ya manse lariminlaca cuenta polarimin joe. (Aman castila fiquichi ya manse lariminlaca “jueces” tinunla joe. Juntonan amana mate juela cuenta natiya itominlanue. Case miya cuwenta mantamin jominlanue.)