Caque fiqui: Diosi israelítalaca Egipto tobi nechi manse larito, yalachi cuwano jun tobi chuteno jominue. Junni Moisés puyanunbi, manca israelita tsachi, Josué mumun, israelítalaca jun tobi tanwinue. Junni yala wino jun tobi duque uyan bolon tsachila numa chuminlanue. Junni israelítalari quera quilaquinue jun to tsachilabe. Diosi ayudaica jun, ya tsachilabe quera quicaato, jera fe isi, jun toca josoleto jun tobi chudilainue. Junni “Josué tanwinun” tinun pilabi junca jera pamin joe israelítala niyaque yalachi toca josoleto wilainunca.

Israelítalari casale yalachi tobi chubi wino mate jeralela man posto man posto jera ara cura chudilainue. Itsanque jominue: Matu to Israel tinun tsachiri chunca paluca naola taminue. Junni yalachi alicalari chunca paluca bolon israelítala jominlanue. Junni yala chuno jun tobi wito, man bolon man postote, man bolon man postote, chumin jominlanue. Josueri jera mantanue bolon cura tile chunola jonunca. Rubenchi alicalacari man postote chusa carinue, Judáchi bolonlaca man postote chusa carinue, junsi uyanlanan tsanquenan bolon cura chudisa carinue. Bolon cura yalachi to case amana mate probinsia cuwenta inue. Junca fécari miichun, “Israelítala chunun to” tinun mapaca quirade!