Moisés puyanunca
34
Moisés Moab tobi nechi jito, Nebo tinun dubi lonue. Junsi Pisga tinun du puntabi lonue. Ya duri Jordán pi man becochi joe Jericó pueblo man becochi. Junni Moisés junte wirurasa, Miya Diosiri yabe israelítala chuno jun toca quirawonue. Man nan talari Galaad tinun to jominue. Junni nanni fe jabi Danchi alicala chuno jun to jominue. 2 Man nan tala Neftalichi, Efraínchi, junsi Manasechi alicala chuno jun to jominue. Junsi man postoteri Mar Medeterráneo fecári Judachi alicala chuno jun to jominue. 3 Junsi Neguev tinun postocanan, jun quelole wa conti jomincanan, Jericó pueblo quelole duque sen to jomincanan, jera quirawonue Zoar pueblo fecári. Aman Jericó puebloca Palmera Pueblo tinunnan joe. 4 Junni Miya Diosiri jun tólaca jera quirawonato itsantinue: In toca israelítalachi cuwano joyoe. Lari juraquito pacayoe Abrahanbe, Isaabe, junsi Jacóbobe, in toca yalachi alicalachi cuwanaeque. Juntonan nuri jun tobi wino itosanan, ya toca nuchi cacachi quirasa carinayoe tinue.5 Junni Moisés Miya Diosibe mantaimin joto, Moab tote puyanue. Miya Diosi tsanhino joe tica jominue; junni jun tsannan inue. 6 Junnan Moab contite menanue Bet-peor pueblo catenle. Menaca jun postoca amanachitiya monantiya miitolajoe. 7 Patsa palu chunca wata tan puyanue. Puyano fecári sonban joto ura quirano podennan cajominue. 8 Junni israelítalari peman chunca ma fecári warelaquinue Moisés puyanun tenchi. Monantiya chutunun posto, Moab tinunte warelaquinue Moisés puyanan laquichi.
9 Capuyatuminnan Josueca tedechi tale quica jominue duque miramin suwachun. Jun tenchi israelítala Josuécanan obedeseilainue. Miya Diosi Moisechi jera mantá cuwaca jonunca, obedeseilainue. (Aman Josuechi apari “Nun” mumun jominue.)
10 Junni israelítalale nechi monantiya Moisés cuwenta Diosichi mantate pamin tsachi itominlanue. Moiséberi Miya Diosiri cale cale pamin jominue. 11-12 Yacari Egíptobi duque wepanato quirantsan quisa carinue. Diosi yaca ereca jominue wepanato quirantsan quisa yape Egipto miyaca, junsi mantaminlacanan, junsi jerale Egipto tobi chuminlacanan, wepanato quiralaquisa. Monantiya Moisés cuwenta mantá itominlanue. Monantiya israelítalachi cate Moisés cuwenta wepanato quirantsancari quilaquitunue.