Junsi Josuenan nulabe penenachunae miya joto. Miya Diosi tsanque mantaca jonan tsanhichunae tinue. 4 Nulari mantenhilaichunae Miya Diosi Sehón tinun miyaca, junsi Og tinun miyaca, jera yucapiyarinueque. Ya amorreo miyalaca, junsi yalachi toca jera yucapiyarinue. Junto Miya Diosi nula wino jonun tobi chumin tsachilaca jun tsannan quichunae. 5 Junni Miya Diosi nulachi sonba cuwato ya tsachilaca fe losa carinan, la niyaque mantanatiya, yalaca jun tsannan quinola joe. 6 Sonban tenca jolajona! Ya tsachilabe tulaito, jelechi wepanatulajona! Nulachi Miya Diosiri nulabe peayudaito, natiya puratuchunae tinue.

7 Junsi Moiseri tsanque pasi, Josueca jasa tito, jerale israelítalachi cate yabe itsantinue:

—Sonban tenca joto tuca jona! Nu in tsachilaca Miya Diosi cuwaca jun tobi tanwino joe. Numari wata poleca Miya Diosi nulachi matu tatalabe ya sen toca nulachi cuwanae tica jominue. Junni nu Josué in tsachilaca jun tobi tanwino joe yape tsacumin ilaisa. 8 Miya Diosi patsa nuchi caquele nenato, nube pejochunae; yari nuca puratuchunae. Junnan jeleratuto sonba tenca jona! tinue.

24-25 Junni weyan israelítala Levichi bolonbi nechi jominlanue. Yalachi trabajori Miya Diosichi cajonca tannenato cuidaino jominlanue. Ya cajonni Diosi israelítalabe trato quica jonunca mantenhinun cajon jominue. Junni Moisés in mantalaca pilaquidobi jera chutetobi, cajon cuidaiminlaca itsantinue:

26 —Nen, in pilaca nulachi cuwanayoe; inbi Diosichi mantá chue. In pilaca nulachi Miya Diosichi cajón quelole chutelaquede! yape junte tsoto Diosi mantaca jonunca numasitiya mantenhisa carimin josa.