Diosi manaman mansen quino jonunca
30
Moisés israelítalabe capánato, itsantinue: Nula nulachi Miya Diosica obedeseilainari nulabe sen jochunae; juntonan obedeseilaitunari casticaquichunae. Junni nulanan niyanhino jonunca wentenola jochunae. Obedeseilaitunari, Diosi nulaca casticaquito, bare toca suerechunae. Junni jun tobi padeseito chuto, pansile jutsa quinunca telaquepoto, casan tala tenca mancato, Miya Diosibe mannenano munaralarachunae. 2-3 Aman nulari jera tencachi sele Miya Diosichica manquelo falainari, nulaca laquirato ayudaichunae. Nula, nulachi naolanan, jera tencabe manquelo fato, la nulaca Diosibe obedeseisa tica jun fiquica meránari, Miya Diosi jera canbiyaito, nulabe jera sen jochunae. Junsi uyan toca ara cura ereca jominlaca inchi jera manlayachunae. 4 Nisi nuwiri toca jica jominlacatiya nulachi Miya Diosi junbi nechi manjasa carichunae.5 Nulari Miya Diosi cuwaca jun tobi chubi winola inae. Matu nulachi tatalari jun tobi chumin jominlanue; amana nulanan junbi chuno jolajoe. Pansile Miya Diosi nulaca casticaquito bare toca ereca jonari, aman nula sen tenca ito Diosibe quelo manfalainari, nulaca jun sen toca manan manjasa carichunae. Nulaca seque chusa carito, nulachi matu to tatalaca fécari na serasa carichunae.
6 Tenca calaquede! Diosi nulachi matu tatalaca mantaca jominue nulachi jerale unila nalalachi numi quido punta nacaca poresa yape tenhilaisa Miya Diosichi jolajoyoeque. Junni Diosi nulaca sen tobi manchusa carino mate, nulachi Miya Diosinan nulachi tencacanan poreca jun cuwenta nulachi tencaca jera mansechunae yape Diosica seque laquiralarasa. Nulaca, junsi nulachi alicalacanan tsanquichunae yape jera tencachi laquirato yabe pechuno podeilaisa. 7 Junni nulabe tsanque sen joto, nulaca pa joto seiton quiminlacari casticaquichunae tinue.
8 Jun mate israelítala Miya Diosibe manquelo facala joto, jera obedeseilaichunae. La amana mantá cuwaca juncanan jera obedeseilaichunae. 9 Jun tsanlainari, Miya Diosiri yala ti quilaquinasatiya sequesiri losa carichunae. Duque nalala talarachunae; duque wala, junsi uyan animalila, junsi tica waquetotiya, seque calaquichunae. Matu numari wata poleca nulachi matu tatalabe sen quimin jominue; junto nulachi alicalabenan jun tsannan jochunae. 10 Yalari Miya Diosica jera tencachi manquelo fato, in pilaquidobi chuteca jun mantalaca obedeseilainari, jun tsanquenan sen jochunae tinue.
11 Junsi Moisés itsantinue: La mantanaca junca obedeseino nulabe polencari duque tenfe itochunae. Obedeseino podeilaichunae. 12 In mantá jamochi Diosichi tobi itoe; jun tenchi nulari itsanque pano itolajoe: ¿Mo Diosichi toca mantá cabi lochunan? chiquilaca micarinan obedeseichun. 13 Lamari becochinan itoe; junnan nula itsanque pano itolajoe: ¿Mo chiquilachi tenchi lamari becochi poleto Diosichi mantaca tanjato, chiquilaca micarichunnan? yaca meráto obedeseichun. 14 Diosichi mantá nuwiri itoe; nulachi fiquiforobi joe; junsi nulachi tencabinan poe. Junto nula obedeseino polencari duque tenfe itoe tinue.
15 Meralaquede! Amana in palu cosaca wentelaquisa tinayoe. Wentenola joe sonnanoca o puyanoca. Sen cosa tanoca, o seiton cosa tanoca wentenola joe. 16 In mantaca obedeseito Miya Diosica laquirato, yabe penenato yachi mantaca obedeseilaina! Obedeseilaitori, seque sonnalarato duque nalala talarachunae. Miya Diosinan nula chuno jun tobi duque seque quichunae. 17 Juntonan inca jera merátuto uyan epe diosi joe tinunlaca se tito yachi cale telenhilaitori, 18 puyalaichunae tinayoe; jun sen tobi seque sonnalaratuchunae. Jordán pica poleto jun sen toca catotiya, junte duque wata fecári chularatuchunae Diosica obedeseitutori.
19 In mate Diosica lachi testico joe tinayoe; junsi jun to patsanan testico pejoe. Jun tenchi nulacanan wentelaquisa tinayoe: sonnanoca o puyanoca, Diosi bendesiquisa tenjanari o seiton quisa tenjanari. Junni senca wentelaquede! yape nulanan junsi nulachi alicalanan seque sonnano podeilaisa. 20 Miya Diosica laquirato obedeseilaide! Junsi puralaquitude! Yaca puratutori, in sen tobi duque sonnano podeilaichunae. Numari wata poleca Miya Diosi nulachi matu tatalabe juraquito pato, in toca cuwanae tica jominue. Abrahanbe, yachi nao Isaabe, junsi yachi nieto Jacóbobe tsantica jominue tinue.