Josué israelítalaca yalachi jono jonun tobi tanwinunca
Diosi Josueca wentenunca
1
Junni aman Moiseri Miya Diosibe mantaimin jominue. Junni aman manca tsachi Josué mumun, Nun tinunchi nao, yari Moisebe duque ayudaimin jominue. Junni Moisés puyanunbi, Miya Diosiri Josuebe itsanque panue: 2 Labe mantaimin Moisés numa puyae tinue. Junni amanari nu lachi tsachilabe Jordán pica poleto, nulachi cuwano jun tobi tanwino joe. 3 Lari Moisebe pato, itsantica jomanyoe: Nula tile nenanatiya, toca cuwanae tica jomanyoe tinue. Junni ya toca cuwachinayoe. 4 Tinantiya chutunun postole nechi, man nanchi Líbano tinun dule nechi, Eufrates tinun wa pi fecári nulachi to jochunae tinue. Hetéolachi tocanan nulachi cuwachinayoe. Junni nulachi tori Medeterráneo tinun lamari fecári jochunae tinue. 5 Lari Moisebe peranun cuwenta nubenan perato numatotiya puratuanae. Junnan nucari molanantiya fe lolaituchunae.6 Junni peleituto sonba tenca jona! Nuri ya toca israelítalachi quitsaleto cuwachunae. Ya toca nulachi matu tatalabe pato, cuwanae tica jomanyoe; yaca amana cuwachinayoe. Junni nuri ya toca jerale israelítalachi jera quitsaleto cuwano joe. 7 Nuca incari mantaquechinayoe tinue: Peleituto sonba tenca jona! tinayoe. Junsi lachi mantate pamin Moisés mantacaca jera tuca meraná! tinayoe. Jun mantabi chutecaca jera meráto titiya quinari, jera se lochunae tinue. 8 Numasitiya Diosichi mantá pilabi chuteca junca manpana! Junsi numasitiya Diosichi mantá pilabi chuteca junca quepen, malon quirato seque tenca cana! Tsanque Diosichi mantaca seque miratori, ticatiya seque quimin jochunae. Junni tsanque quinari, titiya jera se lochunae. 9 La Diosi tsanque mantanayoe yape sonba tenca ito jeleratuto peleitusa. La nuchi Miya Diosi joto, nunchitiya nube parejo pejoanae tinue.