Josueri quiracaminlaca Jericoca erenunca
2
Aman Sitim tinun postote nechi calotuminnan, Josueri paluca tsachilaca Jericoca, junsi quelote pueblolaca, nosa quiracalaquisa erenue. Junni yalari Jericoca jito, niyan unilalabetiya seiton imin sonachi yabi felainue. Ya sonari Rahab mumun jominue. Junni yalari jun sonachi yabi man quepen catsolainue. 2 Juntonan Jericobi chumin tsachilari yala jacala jonunca tenhito, Jericobi mantamin miyabe pato itsanlatinue:—Israelítala paluca in toca nosa quiracabi jacala joe tilatinue.
3 Junni miyari Rahábichi itsanque fiqui erenue:
—Nuca quirabi jaca junlari quiracaminla joe. Junni yalaca larito chiquilachi cuwapode! tinue.
4 Junni ya sonari jaca jun tsachilaca tsaisa carito, itsantinue:
—Tsa tie. Paluca tsachila chiqueca quirabi jalaie. Juntonan chiqueri tile nechi jacala jonunca natiya miitomanyoe. 5 Junni yalari neme ino inasa inte nechi manjilaie. Pueblo tamolan doino inasa chiquechi yabi nechi manloto jilaie. Nunchi jicala jonunca miitoyoe. Juntonan nulari tsainanan bene jitori, juntele bene ilaichunae tinue.
6 Juntonan ya paluca israelítalari natiya manjica itominlanue. Ya sonachi yabinan jamochi loto, lino tinun tape tuntu tenpe tsaica jominlanue. Rahábinan tsanque tsaisa carica jominue.
7 Junni miya ereca jun tsachilari israelítalaca bene jilainayoeque tenhito, Jordán pi nan tala pi patari jilainue. Ya miyachi soldadola Rahábichi yabi nechi loto jilainasaleri, pueblo tamolanca dolaquinue. 8 Junni aman quiracaminlari cacatsolaitusanan, Rahab yala tsaranun jamochi loto, yalabe itsantinue:
9 —Chique mirayoe Miya Diosiri in toca israelítalachi cuwaca joeque. Junni yari duque jele tisa carica joe. Jerale Jericobi chuminlari israelítalaca duque duque jele timinla joyoe tinue. 10 Aman junsi chiquilari meralaquiyoe nulari Egíptobi nechi loto jalainasa, Diosi Mar Rojo pica fu suwato cuwaeque yape nulari funse pola jalaisa. Junsi nula amorreo tinunlabe quera quicaato fe localaequenan meralaquiyoe. Junsi Jordán pi becochi miya Sehonbe, junsi miya Oguibeca fe loto, tilacatiya jera yucapiyaricalaequenan meralaquiyoe tinue.
11 Junca tsanque jera meráto, chiquilari duque jele timinla joyoe. Junto molanantiya nulabe quera quicaatuchi timinla joe. Junsi Miya Diosiri nulachi Diosi joe. Yari jamochinan, tótenan sonban Diosi joe. 12-13 Jun tenchi chiqueri ayudaisa rocainayoe. Junni nulari Miya Diosichi cale juraquito palaquede! chiquechi apaca, ayanca, cayanlaca, miyanlaca, junsi chiquechi familialacari totetulajoanaeque. Chiquebe seque Diosichi cale juraquito palaquede! tinue. Chiqueri nulaca isainun cuwenta, nulanan chiquilaca isailaina! yape puyatulajosa. Tsanque se larilaquina! tinue.
14 Junni ya paluca israelítalari itsantilatinue:
—Nuchi familialaca totelaquinari, chiquilanan puyacaichunae tilatinue. Juntonan nunan chiquilaca inte raminlaeque mobenantiya patuna! tilatinue. In toca Diosi chiquilachi cuwanunbi, nube sen jolajoanae tilatinue.
15 Aman jun pueblo awinta wa serica jominue. Junni Rahábichi yari jun sericabi quica jun jominue. Junni Rahábiri ya quiracamin israelítalaca bentanase cabochi patarito manherenue. 16 Junto aman yalabe itsantinue:
—Nulari we du minu jilaide! tinue yape nulaca neyato nenaminlari felaitusa. Junte peman ma fecári tsaito chularana! tinue. Miya ereca jun neyato nenaminla puebloca manjalainunbi, aman manjilaina! tinue.
17-19 Junni ya paluca israelítalari Rahábibe itsanlatinue:
—Nube juraquito pato, jun tsannan quilaqueyanae tilatinue. Junni aman chiquilari layaito quera quebi jalainasa, nuri in luba silin cabo silica in chiquila manlonun bentanale wilocarino joe tilatinue. Junsi jerale nuchi apaca, ayanca, cayanlaca, miyanlaca, junsi nuchi jera familialaca nuchi yabi layasuwano joe yape querabi puyalaitusa. Juntonan nuchi familia manca jun yabi nechi loto jito querabi puyanari, yachi culpa jochunae. Natiya chiquilachi culpa itochunae. Juntonan yabi chumincanan totelaquinari, aman chiquilachi culpa jochunae tilatinue. 20 Junsi pansile nuri Jericobi chuminlabe chiquilaca inte raminlaeque panari, chiquilari nuchi familialaca isaitulajoanae tilatinue.
21 Junni Rahábiri se joe tinue. Junni ya quiracamin israelítalari ina manquirantsan joe tito, aman manjilainue. Jilainunbi, Rahábiri ya luba silin cabo silica jun bentanale telenue.
22 Junni nosa quiracamin israelítalari peman ma fecári du minu tsaraminlanue. Junnasa soldadolari tiletiya neyato nenaminnan peleito, fetuminnan Jericoca manjilainue. 23 Junni aman ya nosa quiracaminlari dubi nechi manjito, Jordán pi becochi manpolelainue. Junto Josué ranunte manfelainue. Junni yalari niyaque nenato manjaca jonunca Josuebe jera cuenta manquilaquinue. 24 Junsi Josuebe itsantilatinue:
—Miya Diosiri in toca chiquilachi cuwaca joe. In tobi chuminlari chiquilaca duque duque jeleralarae tilatinue.