—Lari wari duque unica joyoe tinue. 3 Junni Miya Diosiri nulaca pa jominlaca niyan quinunca nulanan quiralaquee tinue. Junto Diosi patsanan nulachi tenchi quicaanaminue tinue yape nulari duque toca josoleto cano podeilaisa. 4 Junni lari Diosi cuwaca jun toca chunca palu bolon israelítalachi quitsaleto cuwacayoe tinue. Juntonan nula caya jun tocasiri quitsaletucayoe tinue. Diosi to cuwaca jun weyancari nulari cacaya itolajoe. Junni lari ya tocanan numa jera quitsaleto cuwacayoe tinue. Junni tsanque toca nulachi quitsaleto cuwanato, numa josoleca juncanan, cajosoleca itoncanan, quitsalecayoe tinue. Junni Jordán pile nechi Medeterráneo tinun lamari fecári toca quitsalecayoe tinue. 5 Junni weyan tori cacaya itolajoyoe. Junni Miya Diosiri jun tobi chumin tsachilaca jera larito erechunae. Tsanqueyanae tica joe yape nulari ya tocanan jera tsacumin jolajosa. Diosiri tsantica joto, tsanquichunae tinue.

6 Juntonan nulanan Moisés chuteca jun Diosichi Pilabi pánaminca seque meráto, mantaito nenachique duque duque tenfelaina! 7 Weyan tsachila in tote chuminlaca Diosi larito eresa tenjalaquinari, nulari yalabe natiya palailaituna! Junsi yalachi diosi joe tinunlachi cale telenhitulajona! Ya diosi joe tinunlabe mantaitulajona! tinue. Ya diosilachi mumunte juraquito patulajona! Yachi mumuncari nin pantiya quitulajona! tinue. 8 Numatotiya nulachi Miya Diosibesiri nenalarana! tinue amana fecári cuwenta.

9 Nulachi catenan Miya Diosiri duque sonban wa bolon tsachilaca jun tote nechi larito erenue. Amana fecári monantiya nulabe quera quicaato fe lono podeitucala joe. 10 Diosi patsanan nulachi tenchi quicaanaminue. Junto nula narin tsachila jotonan duque tsachilaca suerelaquichunae tinue Diosi ayudainasa. Yari tsanqueyanae tica joe. 11 Jun tenchi nulari tsarasi seque nenachique tenfelaina! nulachi Miya Diosica laquirato.

12-13 Pansile nulari in to tsachilabe palailainari, Diosi nulaca ayudaituchunae tinue. Junsi Diosica purato yalachi bolon sonabe casalain ilainari, Diosi ya tsachilaca jun postote nechi larito eretuchunae tinue. Yalaca juntenan jera purachunae tinue yape yalari nulaca pasuwalaquisa. Junni ya tsachila juntenan purailaito, nulachiri dila cuwenta jolajochunae. Junsi nulachi betendeca asotaquica cuwenta jolajochunae tinue. Junsi aman nulachi cacabi po cuwenta jolajochunae. Aman Diosi in uraran toca nulachi cuwaca joe. Junni nula in seiton tsachilabe palailainari, yalari nulaca numasitiya pasuwalaquichunae in tote nula iton ino fecári.

14 Junni Josueri capánato, itsantinue:

—Lari wari puyachinayoe. Juntonan nulaca seque miralarasa tenjae Miya Diosiri ticatiya tsanqueyanae tito jera tsanquica joeque. Diosi paca junni man fiquitiya epe poleca itoeque miralarasa tenjae tinue. 15 Junni tsanque Miya Diosi jera sen pacaca tsanquica jotori, jun tsanquenan casticaqueyanae tito, yacanan tsanquichunae. Seiton quiminlaca, yaca merátuminlaca niyantiya queyanae titori, jun tsannan quichunae tinue. Yari titiya seque quimin joto, tsanquenan tsachilaca casticaquito seitonquenan quichunae tinue. Nulaca niyaquetiya casticaquichunae yape nula in sen to Diosi cuwaca junbi purailaitusa.

16 Junni nulari Diosi mantacaca seque merátuto epe diosi joe tinunlaca se titori, yalachi cale telenhilainari, Miya Diosiri nulaca duque duque paichunae. Junto tsanque paito, nulachi toca moora manjosolechunae tinue. Junto nulaca ya cuwaca jun sen tobi nechi manlarichunae tinue.

Josué puyachinato israelítalabe tsanque cuenta quinue.