Josuela puyalainunbi niyanhilainunca
2
6 Israelítalari Josué cuwaca jun toca manca cura josoleto cabi jilainue. 7 Junto Josué casonnano fecári jerale israelítalari Miya Diosica sequenan tennamin jominlanue. Aman jun mate fe unica israelítalari Diosi yalachi tenchi titiya sen cosa quito, Mar Rójose, junsi Jordán pise polarica junca quiramin jominlanue. Junni yala casonnano fecárinan jerale israelítala Miya Diosica seque catennamin jominlanue.8 Juntonan Josueri patsa chunca wata tamin puyanue. Yari Miya Diosibe mantaimin jominue; aman yachi apa “Nun” tinun jominue. 9 Junni yacari yachi tencachique tobi menalaquinue. Ya postori Timnatsera tinun jominue. Yari Gaas tinun dule nechi butunnin tala jominue Efraínchi bolon chunun tobi, du minu. 10 Junni Josué, junsi yabe pemantaminla jera puyalainunbi, benete na manhuwaiminlari natiya miiton jominlanue Diosi yalachi tenchi titiya sen cosa quica jonunca.
Israelítala Miya Diosica puralaquinunca
11 Junni aman ya israelita mantaminla jera puyalainunbi, jerale israelítalari Miya Diosica purato, epe Baal tinun moldeca tennamin ilainue. 12 Yalachi matu tatalari Egíptobi nechi manse larimin Miya Diosica tennamin jominlanue. Aman casan canaca jun tobi chuminla mantimini diosi joe tinunlaca tennamin jominlanue. Junnan israelítalanan tsa Diosica purato, jun tsanquenan moldeca tennamin ito Miya Diosica duque paisa carilaquinue. 13 Diosica purato, yala tennanun molde weyanni Astaret tinunlaca, junsi Baal tinunca tennamin jominlanue.
14 Junni israelítalari tsanque tsa Diosica puralaquinan, Diosiri paito, tarinlaca ereto, yalachi ticatiya jera tarinsa carinue. Junsi numasitiya quera quicaanato, peleilaisa carinue. 15 Israelítala quera quicaabi jilainasa, Miya Diosinan yalachi contra jonan, yalari fe lono podeituto peleimin jominlanue. Matulenan Miya Diosiri israelítalabe juraquito paca jominue yaca puralaquinari, tsanque casticaqueyanaeque.
Juntonan Miya Diosinan israelítalachi tsanque problema josa carito, 16 aman yanan manca manca mantamin suwamin jominue yape israelítalaca manse larilaquisa. 17 Juntonan israelítalari mantaminla pánaminca merátumin jominlanue. Junto Diosibe seque nenatuto, epe diosi joe tinunlaca tennamin jominlanue. Yalachi matu tatalari Miya Diosibe seque penenamin jominla josanan, inlari jun mica natiya tatuminlanue.
18 Junni Diosiri mantaminla suwamin jominue. Tsanque suwato, ya mantaminlaca ayudaimin jominue. Junni ya mantaminlari israelítala padeseinaminlaca manse larimin jominlanue. Israelítalari padeseinato duque warenaminlanue. Junnan Diosi junca meráto laquitito, mantaminlaca wentemin jominue yape manse larilaquisa. 19 Juntonan israelítalari manca mantamin puyano fecári seque mannenamin jominlanue. Aman ya mantamin puyanunsiri, fécari seiton jutsa quimin jominlanue. Epe diosi joe tinunlaca tennato, ya epe diosilabe mantaimin jominlanue. Junto yalachi jutsaca puralaquituchique Diosica pa nenamin jominlanue.
20 Junni aman Miya Diosiri yalaca duque paito itsantinue: Lari nulachi matu to tatalabe trato quica jomanyoe tinue. Juntonan nulari ya tratoca tennatuto, merátuchi timinla joe tinue. 21 Lari nula wino jun tobi uyan chuminlaca jera larito sueresa cariyanae tica jomanyoe tinue. Juntonan amanari israelítalari tsanque seiton quito laca puracala josa, lari wari ya uyan tsachilaca sueresa carituanae tinue. Josué cason josa, sularica itonlacari yape juntenan chularasa quiraniqueyanae tinue.
22 Miya Diosiri yalaca sueresa caritunue israelítalaca miichun yalachi matu tatala cuwenta nenanola jonunca, o tsanle yaca puranola jonunca.