Israelítala uyan to miyabe mantainaminlaca Otoniel manse larinunca
3
7 Israelítalari yalachi Miya Diosica telaquepoto, Baal tinun, junsi Asera tinun moldelaca tennato, Miya Diosichi cale duque seiton quinaminlanue. 8 Jun tenchi Miya Diosiri paito, israelítalabe Mesopotámiabi chuminlaca quera quicaato fe losa carinue. Mesopotamia miyari Cusanrisataim mumun jominue. Junni fe loto, ya miyari ochu wata fecári israelítalaca mantanaminue.9 Junni israelítalari ya miyabe mantainato duque padeseinayoeque tenhito, aman Miya Diosibe manrocailainue. Junni aman Miya Diosiri Otoniélica wentenue yape mantamin ito israelítalaca manse larisa. Ya Otoniel Cenachi nao jominue; junni Cenari Calébichi benele aco jominue. 10 Junni Diosichi Tencari Otoniélichibi janue sonba tenca suwabi. Junni aman yari israelítalaca jera layaisa carito, yalaca mantamin jominue. Junto aman Otoniel israelítalaca layaisa carito, Cusanrisatainchi soldadolabe quera quicaalaquinue. Junni Miya Diosi israelítalabe peranan, quera quicaato manfe lolainue. 11 Junni aman juntele nechi junpalu chunca wata fecári jun tobi quera manhitominue.
Israelítala moabítalabe padeseinaminlaca Aod manse larinunca
Juntonan Otoniel puyanunbi, 12 israelítalari manaman Miya Diosichi cale jutsa quilaquinue. Junni Diosiri yalaca casticaquichun moabítalacari israelítalaca fe poden jolajosa carinue. Junni moabítalaca mantamin Eglón mumun jominue. 13 Aman ya Eglonni uyan palu bolonbe cuenta quinue. Yala amonítala man bolon, amalecítala man bolon, jominlanue. Junni tsanqueri peman bolon ito, israelítalaca quera quito fe loto, israelítalachi Jericó puebloca josolelaquinue.
14 Junto ya Eglón mantaminni chunca ochu wata fecári israelítalaca mantanaminue. 15 Junnasa aman israelítalari Diosibe manaman rocailainue. Junni aman Diosiri manca tsachicaman wentenue yape israelítalaca manse larisa. Junni ya tsachiri Aod mumun jominue Gérachi nao, Benjaminchi bolonbi nechi israelita.
Gedeonca cuenta quica
Junni israelítalari Miya Diosichi cale seiton caquinaminlanue. Junnan Miya Diosiri yalaca casticaquichun madianítalaca israelítalaca fe poden josa carinue. Junni madianítalari israelítalaca fe loto duque pasuwanaminlanue. Junnasa aman yalari Diosibe duque duque rocailainue yape ayudaisa. Junni Diosiri manan tsachi manca, Gedeón tinunca, wentenue yape yari israelítalaca ayudaisa. Junni aman israelítalachi trico waqueca jun jera seica jominue. Junni madianítalari, amalecítalabe, junsi weyan jun tobi chumin tsachilabe layaito, israelítalachi tricoca tarinquebi jamin jominlanue.