4 Junnasa quiranari filistéolachi bolonbi nechi sonban soldado manca peman metro tsansi uwan jominue. Yari Goliat mumun jominue Gat pueblobi nechi. 5 Junni yachi misubi bronseca quica jun casco pun jominue. Junsi yachi tencate bronsecanan quica junca man quintali fe jadonca docarica jominue. 6 Junni yachi botebi bronseca quica junca docarica jominue. Manca lansa, bronseca quica junca, palasale panaraminue. 7 Junsi manca fe jelelen lansa taminue. Ya lansa chide jotonan, duque ayanden jominue; junsi jun lansabi fiero puntaca sitale poca jominue. Ya fiero puntari chunca junpalu libra tsansi jadon jominue. Junnasa yachi caquele yabe ayudaimin jinaminue. 8 Junni ya filisteo tsachiri wiruito, israelítalabe otito itsantinue:

—¿Ti quichun nula jeralela quicaachun ralarayun? tinue. Lari filisteo joyoe; junni nulari Saúlichi soldadola jolajoe. Junto nula tala mancacari wentelaquede! yape labe quicaabi inchi jasa. 9 Junto yari laca fe lonari, chiquilari nulabe mantailaiyanae. Junni la fe lonari, nulari chiquilabe mantaimin ilaichunae tinue. 10 Junni amana la nulabe itsanque pánayoe: Nulari labe quicaasa mancaca inchi erelaquede! tinue.

11 Junni Saúl yachi soldadolabe ya filisteo tsachi pánaminca meráto, jelechi peleilainue.

32 Junto David Saúlibe itsantinue:

—Nulari ya filisteo tsachi pánaminca meráto nin mancatiya peleilaitude! Miya, lari nube mantaimin joto yabe quicaabi jichinayoe tinue.

33 Junnan Saúl itsantinue:

—Nu mancasiri ya filistéobe quicaano podeino itoe. Yari duque numari watale nechi quera quicaamin joe. Junni nuri nalalannan cajoe tinue.

34 Junni Daviri itsantinue:

—Miya, lari lachi apachi opisaca cuidaimin joto, cuidainasa weyante oso, luquela jato opisa cato tanjinan, 35 junni tsanca lari osoca, luquelaca bene jito opisaca manjosolemin jomanyoe tinue. Junni pansile luquela, oso laca cachun jananari, teyodele chuito quito totemin jomanyoe tinue. 36 Junto tsanque lari oso, luquela, titiya totemin jomanyoe. Junni in filisteo tsachi sonnamin Diosica jeleratuto, yachi soldadolabe seitonque pato, yanan ya oso o luquela cuwenta jochunae. Yacanan toteyanae tinue. 37 Junni Miya Diosiri laca luquelabe osobe quicaanasa cuidaica joto, laca in filisteo tsachi niyanantiya quitusa cuidaichunae tinue.

Junnan Saúliri itsantinue:

—Jiniide! Miya Diosi nuca cuidaisa munarayoe tinue.

38 Junni Saúliri Davica ya quera quicaabi jinun camisacanan posa carin, misubinan bronseca quica jun cascocanan posa carin, quito, tencatenan dosa carinue. 39 Junni jun quera quicaanun camisa titiya polaquinunbi, David yachi quitsale camisa jamote espadaca telenue. Junsi aman jichique tenfenue. Juntonan yari tsan pun nenano miica itoto, Saúlibe itsantinue:

—Lari tsan potumin joto, nenano podeitiyoe tinue.

Junni tsantisi, jera manlarinue. 40 Junsi yachi tolaca mancato, manteca su layucanlaca na pibi layato, yachi tolo tanunbi pocato, filistéobe quicaabi jinue ondaca yachi tedebi tan. Junni David filistéochi quelo fenasa, 41 yanan Davichi quelo fade fade janaminue. Junnasa yachi cate yabe ayudaimin pejanaminue. 42 Junni ya filistéori Davica quiranari, yari moso, nalalan, lubacan jominue. Junnan Davica layan tennatuto, 43 yabe itsantinue:

—¿Lari susu jowan? yape nuri lachica chide tan janasari.

Junsi Davica yachi epe diosilachi mantate yucaquinue. 44 Junsi Davica itsantinue:

—Inchi janaminca lari nuca toteanae tinue yape barola, jelenchi jinamin animalila, nuca filaquisa.

45 Junnan Daviri itsantinue:

—Nuri lachica lansa tan, espada tan janae. Juntonan lari nuchica sonban Miya Diosichi mantate janayoe tinue. Yari israelita soldadolachi Diosi joe. Junni nuri yaca seitonque pánae tinue. 46 Junsi tsaina Miya Diosi nuca lachi cuwapochinae yape toteto misu poresa. Junnan nucari barola, junsi jelenchi jinamin animalila, filaquichunae tinue. Junsi weyan filistéolacanan barola, junsi jelenchi jinamin animalila, filaquichunae tinue. Junni jeralela miralarachunae Diosi israelítalabe pejoeque. 47 Junni tsanca jera quirato, inte bolon jominla miralarachunae Miya Diosiri espadachi, nin lansachi, isaitumin joeque. Junni Diosiri chiquilaca nulaca fe losa carichunae tinue.

48 Jun tsantinan, filistéori Davichi quelo jananan, Davinan we quelo fenaminue quicaachun. 49 Junto David ya tolo tanunbi sucaca laricato, onda tinunbi poto, filistéoca walaca quito lesule suchi quinue. Junnan filistéori lesule suca sitainan, palo tala tobi queereinue. 50 Junni tsanque Daviri filistéoca fe lonue suca ondabi poto walaca quito. Junsi Daviri espada iton jotonan tsanquinue. 51 David filistéochica sujito, ya filistéochi espada papabi pominca laricato, ya espadachi toteto, aman misu butunue.

Junnan weyan filistéolari fe quicaano min puyaca jonunca quirato, jera sujilainue. 52 Junni israelítala Judabi nechilanan, junsi Israel tobi nechilanan, jeralela atito filistéolaca Gat puebloca jinun minu fecári, junsi Ecrón pueblobi winun fecári jera sutanjilainue. Junnan Saarín pueblobi nechi Gat pueblo jinun minute, Ecrón puebloca jinun minute filistéola puyaca junla tsominlanue.