Miya Diosi Samuélibe panunca
3
Junni Samuel mantimini nalalan joto Miya Diosichi tenchi trabajaquinaminue Elí mantanaca jun. Junni jun malate Miya Diosi tsachilabe layan patumin jominue. Junni pansileri weyanlachi quirajamin josanan, duque ne quirajamin itominue. 2 Junnasa Miya Diosi Samuélibe itsanque panue. Eliri se quirano podeiton joto, yachi tamochi catson tsominue. 3 Junnasa Samuel mantimini Miya Diosichi tamochi tsominue catsochun Miya Diosichi cajon tsonun quelote. Junni tsenonan Miya Diosichi tamochi catularaminue. 4 Junnasa Miya Diosi itsanque otinue: Samuel tinue. Junnan Samuel mantimini itsanque tulannue: Inte joyoe tinue. 5 Junsi Elí tsonun fecári sucachi jito itsantinue:—Elí, inte joyoe. ¿Ti quichun munarayun? tinue.
Junni Eliri itsantinue:
—La otitiyoe. Manjito mantsodiniide! tinue.
Junnan Samuel manjito mantsodinue. 6 Junnasa manaman Miya Diosi manhotito, Samuel tinue. Junnan Samuel manaman cupato, Elíchica jito manan itsantinue:
—Elí, ina joyoe. ¿Ti quichun manan munarayun? tinue.
Junni Eliri Nao tito pato, itsantinue:
—La otitiyoe. Manjito mantsodiniide! tinue.
7 Junni Samuel mantimini Miya Diosica camiica itominue. Junni Miya Diosiri camiisa carica itominue. 8 Junni Miya Diosi manaman Samuélica otinue. Junnan Samuel manaman cupato jito, Elibe ina joyoe. ¿Ti quichun wari munarayun? tinue. Junni Eliri peman ne tsantinaminca meráto tenhinue Miya Diosi patsa Samuélica otinaeque. 9 Junto Samuélibe itsantinue:
—Manjito mantsodiniide! tinue. Junni manaman Miya Diosi otinari, itsanque pade! Miya Diosi, la nube mantaimin joyoe. Junto meránayoe tina! tinue.
Junnan Samuel manaman manjito, yachi lowabi mantsodinue. 10 Junni manaman wanbile Miya Diosi jato wiruito, casale cuwentanan otito, Samuel, Samuel tinue. Junnan Samuéliri yaca merasi itsantinue: Pade! Miya Diosi. La nube mantaimin joto, meránayoe tinue.
11 Junni Miya Diosiri itsantinue: La israelítalachite duque jele tintsan quechinayoe israelítalari junca quirato wepanalaisa. Meráminlari punquibi meráto, duque wepanalaichunae tinue. 12-13 Elichi naolari seiton quilaquinae. Laca seitonque palaquinae. Junni Eliri junca miratonan niyanantiya quitumin joe yape mandeilaisa. Jun tenchi numari paca jomanyoe Elibe yachi familialabeca jera casticaquechinayoeque. Junni tsarasica pachinayoe: Matu casticaqueyanae tica joto, aman casticaquechinayoe tinue. 14 Junni juraquito pánato, itsanque paca jomanyoe: Yalachi jutsaca ti animalilacatiya lachi epe cuwanatotiya, o ti uyan cosalaca lachi epe cuwanatotiya, mancasino podeilaituchunae ticayoe tinue.
15 Junni Diosi tsanque panunbi, Samuel mantimini mancatsonue ayuna nanchi fecári. Junni quepenanan wiruito, Diosichi yabi tamolanca lasito, Diosi paca junca Elibe manpano duque jeleraminue. 16 Junnasa Elí mantimini Samuélica otito, Samuel tinan, Samuéliri beco manpato, ina joyoe tinue. 17 Junsi Elí Samuélibe itsantinue:
—Nao, ¿Miya Diosi quepen nube niyaque pan? tinue. La rocainayoe Miya Diosi paca junca manpasa. Yaca pato, nin man fiquitiya tsatuto, jera pano joe. Man fiquicatiya tsanari, yape Diosi nuca sonba casticaquisa! tinue.
18 Tsanque Elí panhanunbi, Samuel mantimini jera pato, Miya Diosi paca junca nin man fiquitiya tsatuto panue. Elí yaca merasi, Diosi jera mantamin joe tito, yachi munate se jonari se joe tinue.
19 Junni Samuel uwaide uwaide jinasa, Miya Diosiri duque ayudainaminue seque quisa. Diosi ayudainasa, Samuélica tsarasi sen fiquisiri pamin jominue. 20 Junnan jerale israelítala tenhinaminlanue Samuel tsa Diosichi tenchi pamin joeque. Dan tinun pueblole nechi Beerseba tinun pueblo fecári jeralela junca miraminlanue. 21 Junni Miya Diosi Samuélibe Silo tinun pueblobi quiraito, yabe cuenta quimin jominue yape Samuel yaca seque mirasa.