Caque Samuel
Miya Diosi Anachi na cuwanae tinunca
1
Manca tsachi jominue Elcana mumun. Junni yari Efraínla pejoto, yalachi tobi du minu chuminue. Junni ya tsachi Zofim tinun postobi, Ramataim pueblobi, chuminue. Junsi yachi apa Jeroham, junsi yachi tata Eliú, junsi yachi tatachi apa Tohu jominlanue. Junsi Tóhuchi apa mantimini Zuf jominue. Ya bolon israelítala Efraínchi alicala jominlanue. 2 Junni Elcánari paluca sona tan jominue manca Ana, manca Penina. Junni Penina mantimini na tan jominue. Aman Anari na iton jominue. 3 Junnasa Elcana mantimini wata cura ya chunun pueblobi nechi jimin jominlanue Silo tinun puebloca. Junbi duque poden Miya Diosica se tibi, junsi ticatiya epe cuwabi, jimin jominlanue. Junni jun pueblobi patele manca chuminue yachi mumun Elí. Junsi yachi naola paluca Miya Diosichi tenchi patelela pejominlanue. Manca Ofni, manca Finees mumun jominlanue.4 Junni Elcánari animalilaca Diosichi epe cuwanato, aman yachi familialabe layaito jun tsachicaca pefimin jominlanue. Junni Elcana Penínachi, junsi yachi naolachi, namalachi tsachica cuwamin jominue. 5 Juntonan Anachi weyanlachica fe seque cuwamin jominue yaca fécari laquiramin joto. Tsan josanan, Miya Diosi Anaca na tasa carica itominue. Juntonan Elcánari Anaca duque laquiramin jominue.
6 Junnasa Elcánachi manca sona Penina, yari Anaca duque pasuwanaminue Diosi yaca na tasa caritueque. 7 Elcánala wata cura Diosichi yaca jimin jominlanue. Junni jica cura Penina mantimini Anaca duque pasuwamin jominue. Jun tenchi Anari waren, ano fitun, jominue. 8 Junni Elcánari Anabe itsantinue:
—¿Ti quichun waren, laquiin, ano fitun jun, joyun? tinue. ¿La nu chunca unila nalala tanun tsansi se jotuan? tinue.
9 Junni man nete Anari Silo tinun pueblobi rato, Miya Diosichi yaca jinue. Junnasa Eliri, ya patele joto, Miya Diosichi yabi tutan quelote chuminue. Junni Ana ano fitobi cupato, 10 Miya Diosibe rocainaminue. Duque laqui jomin joto, wareto, Miya Diosibe rocaito itsantinaminue:
11 Miya Diosi, nu jera podeimin joe. Junsi chique nube mantaimin joyoe. Juntonan na itoyoeque padeseinayoe. Junni niya josatiya na manca cuwade! chiqueca laquiramin joto. Ya náca cuwanan, nuchi mancuwanae yape nube mantaimin josa. Junsi ya náca nuchi mancuwaca joeque miralarasa, aca poresa carituanae tinue.
12 Junni Ana duque numarinca Miya Diosibe tsanque rocainaminue. Junnan Elí quiranue Ana fiqui foroca wecacarinaminca. 13 Junni Anari sonba paca itominue. Junnan Eliri yachi fiquica meraca itoto, quiracachiri quiranaminue yachi fiqui foro wecacarinaminca. Junni Elí yaca winan jonhoeque tenca cato, 14 itsantinue:
—¿Numasi fecári winan jochun? Wari binoca nanta cuchitude! tinue.
15 Junni Elí tsantinunsi, Ana itsantinue:
—Chique winan itoyoe. Nin bino nin mala cuchitiyoe. Duque laqui, padesein, inato, Miya Diosibe rocainato jera paniquinayoe tinue. 16 Junni Elí, nuri chiqueca seiton sona joeque tenca catuna! Duque laqui, junsi padesein, inato Miya Diosibe rocainayoe tinue.
17 Junni Elí yaca merasi itsantinue:
—Tsanque jotori, seque manjide! Chiquila israelítalachi Diosi nu titiya panhaca jonunca jera cuwasa tenjae tinue.
18 Junnan Anari beconan pato, duque acradeseinayoe tinue. Junsi manjito, ano fibi manjinue. Junsi wari laqui manhiton inue.
19 Junsi aman ayuna nanchi quepenanan Miya Diosibe rocaitobi, Ramá puebloca manjilainue. Junbi chumin jominlanue. Junni Elcánari Anabe mancatsonue. Junnasa Miya Diosi Ana panhacaca mantenhito, 20 yaca na wisa carinue. Junni yari unila na quito yaca Samuel mumun ponue Miya Diosibe panhaca jomanyoe tito.
21 Junni Elcana wata cura Miya Diosichi epe cuwabi jimin joto, man watatenan jerale yachi familialabe Síloca jilainue. 22 Junnasa Ana itsantinue:
—Chique Miya Diosichi yaca jitiyoe na cu purano fecári. Junni na cu puranunbi yaca tanjiyanae Miya Diosichi mancuwachun. Junca tanjito, junbi puranae tinue yape Miya Diosibe mantaisa.
23 Junni Ana tsantinunsi, yachi unila Elcánari itsantinue:
—Nube se jonari, na cu purano fecári purainiide! tinue. Junsi Miya Diosi yachi tenca munate quisa tenjae tinue.
Junni Ana náca cuidainato, na cu purano fecári jitunue. 24 Junni na cu puranunbi, aman Anari náca Silo puebloca tanjinue Miya Diosichi yaca. Junsi wala na pemanca, trico man tasá, bino junpalu calon tsansi, tanjinue. 25 Junsi Anala Sílobi fetobi, wala na manca Diosichi epe cuwasi, náca Elichi cuwalaquinue. 26 Junsi Ana itsantinue:
—Elí, nube cuenta quino muquee. Chique matu nuchi quelole Miya Diosibe rocainamanyoe; ya sona joyoe. Ya duque numari joe. 27 Junni jun mate chiqueri Miya Diosibe na cuwasa rocaiyoe. Junni ya nari ina joe; Miya Diosi cuwae tinue. 28 Junni chiquechi parte tenchi náca Miya Diosichi mancuwanayoe. Ya sonnano fecári, yari Miya Diosichi tenchi jochunae.
Junca merasi Eliri telenhito, Miya Diosibe acradeseinue.