Caun guaꞌ₅₄ ꞌuë₃ ꞌmɨ́₂, quianꞌ₅₄ caun₂ dsɨ₄ ꞌmɨ́₂
21
Cang₂ jaun₂, ca₂jág₃ táng₃ jniá₂ caun₂ guaꞌ₅₄ ꞌuë₃ ꞌmɨ́₂, caun₂ dsɨ₄ ꞌmɨ́₂ táng₃, ia₁ jë₁le₂ꞌuɨg₅₄ dsɨ₄ quianꞌ₅₄ guëꞌ₂ le₂ꞌuɨg₅₄ guaꞌ₅₄ ꞌuë₃ co₂dsia₅ ca₂i₃ꞌén₂ bá₄ jaun₂, on₃ guëꞌ₂ jmáꞌ₃ jmɨ₁ŋíꞌ₄ ma₃cha₂ në́₃.
2 Jaun₂ ca₂jág₃ jniá₂a Juɨg₂ Ciudad Jŋió₅, Jerusalén ꞌmɨ́₂, a₂ca₂jnia₃ ca₂sio₃ gueiꞌ₅₄ i₂juɨ́g₃ ne₄ Diú₄. Jniá₂ ma₂lë́₅ co₂jŋia₅₄ jláꞌ₁ lɨn₃, në₂jag₄ bá₄ jan₂ dsa₂ mɨ́₂ i₂rë₂lɨn₄ quián₅ dsa₂ ŋeꞌ₂ i₂lɨꞌ₅₄ jág₁ quiainꞌ₅₄.
3 Jaun₂ ca₂nag₃ jág₁ a₂já₅ ne₄ta₁ ca₂juáꞌ₂ tiá₂:
―Jag₄, ma₂guá₅ bá₄ Diú₄ jɨn₄ dsa₂ mɨ₂güɨ́g₃. Jɨn₄ ꞌéi₂ ꞌí₂ co₂tan₅₄ bá₄. Lén₂ dsa₂ ꞌéi₂ dsa₂ juɨg₂ quiáin₅, jaun₂ ꞌŋiog₅ bá₄ Diú₄ jme₃quiongꞌ₅₄ a₂léin₂ Diú₄ quiáin₅,
4 Jaun₂ qui₃chí₃ jme₁ne₁ ꞌéi₂ ca₂le₃jë́₃ jmɨg₂ a₂le₁ꞌág₄. Tsá₃ ma₃le₃cha₂ guë́₄ ꞌmú₃, on₃ guëꞌ₂ juaꞌ₅₄ në₅ qui₃tónꞌ₃ guë́₄ dsa₂ quɨꞌ₂-ꞌo₂₃, on₃ guëꞌ₂ në₅ i₃nioi₅₄ guë́₄ chain₂ o₂i₁ dsɨ₅, on₃ guëꞌ₂ le₃cha₂ juaꞌ₅₄ quɨꞌ₂ uɨg₅ quióꞌ₅. Ia₁ co₂dsia₅ ca₂ŋɨ́₂ bá₄ ca₂le₃jë́₃ ꞌe₂ a₂jme₁cha₂ le₂jŋiá₅.
5 Jaun₂ ca₂juáꞌ₂ i₂guá₅ ne₄ta₁:
―La₂ jag₄, jmo₅₄ jniá₂ a₂ꞌmɨ́₂ ca₂le₃jë́₃.
Ca₂juáꞌ₂ ján₃:
―Tiong₅ ne₄ si₂, ia₁ jág₁ dsau₅ a₂rë₂tiꞌ₅₄ bá₄ la₂.
6 Jaun₂ ca₂tság₃ jniá₂:
―Ca₂lë₃. Jniá₂ bá₄ ꞌéi₂ i₂lɨ́ng₅ Alfa quianꞌ₅₄ Omega: i₂lɨ́ng₅ i₂le₂ne₁, i₂lɨ́ng₅ jë₁ca₂tóꞌ₂ në́₃. Juɨ₁liaꞌ₂ i₂rë₂quein₂ dsɨ́₅, cuë₅₄ jniá₂ a₂ꞌɨ́nꞌ₂ ꞌéi₂ jmɨg₂ a₂ꞌia₂ o₄tu₁ jmɨg₂ a₂le₃chan₂ dsa₂, on₃juaꞌ₅₄ a₂cha₂ quɨn₃ ꞌi₁caun₂.
7 Juɨ₁liaꞌ₂ i₂ca₂tióꞌ₃, a₂lë₁ŋei₃ cuë₅₄ jniá₂ ca₂le₃jë́₃ a₂në₅, jaun₂ jniá₂ bá₄ léng₂ Diú₄ quiáin₅, ꞌéi₂ guëꞌ₂ léin₂ chiꞌ₂-guein₂ quiáng₃.
8 La₁ juɨ₁liaꞌ₂ dsa₂ i₂ténꞌ₅, juɨ₁liaꞌ₂ dsa₂ i₂tsá₃ ꞌén₂, juɨ₁liaꞌ₂ i₂lɨ₁ꞌŋio₅, juɨ₁liaꞌ₂ i₂jme₂dsian₅ rɨnꞌ₅₄, juɨ₁liaꞌ₂ i₂nióꞌ₅ jág₁ a₂tsá₃ dsi₂ten₅₄ nióꞌ₃, juɨ₁liaꞌ₂ i₂tɨn₂ mɨ́₅ a₂chan₂ dsɨ́₅, juɨ₁liaꞌ₂ i₂jme₂juɨnꞌ₂ diú₄ lag₄, ca₂le₃jɨ́n₃ i₂co₂jmo₅ jág₁ të₂jág₁ në́₃; ca₂le₃jɨ́n₃ dsa₂ në₅ tɨin₃ dsɨ₃léin₂ ja₁ꞌa₄ si₂ a₂cau₂ quianꞌ₅₄ azufre, a₂lë́₅ jë₁ca₂të́₂ táng₃ ꞌmú₃.
Caun₂ Jerusalén ꞌmɨ́₂
9 Jaun₂ ca₂guan₃ jan₂ ángel i₂lë́₂ i₂guion₃ i₂jme₁le₁chanꞌ₂ guio₃ nɨ₁uɨng₅ le₁canꞌ₂ le₃guio₃ jmɨ₁uɨg₅ jë₁ca₂tóꞌ₂ ꞌéi₂, ca₂juáꞌ₂ ca₂tság₃ jniá₂:
―Ŋia₅, la₂ ꞌɨ́n₄ jniá₂ dsa₂ mɨ́₂ i₂lé₂ dsɨ₂i₂gu₂ Guein₂ Jáꞌ₂ Chaꞌ₂.
10 Jaun₂ ca₂jiog₃ a₂ꞌeng₅₄ le₃quióꞌ₅ Jme₂dsí₂, ca₂të₂ ja₁lë́₄ máꞌ₂ juëꞌ₂ a₂ŋei₅. Ja₁jaun₂ ca₂ꞌë₃ Juɨg₂ Jŋió₅, Jerusalén, a₂sió₅ gueiꞌ₅₄ i₂juɨ́g₃ ne₄ Diú₄.
11 A₂jniá₂ tág₅ ꞌŋio₅ lɨn₃ quianꞌ₅₄ a₂co₂tág₅ quióꞌ₅ Diú₄, a₂jniá₂ co₂tág₅ co₂ꞌnéꞌ₅ juɨ₁liaꞌ₂ jniá₂ nɨ₁cang₁ jláꞌ₁, juɨ₁liaꞌ₂ nɨ₁cang₁ Jaspe a₂rë₂jë́₃ liaꞌ₂ lë́₅ nɨ₁ꞌɨ₂.
12 Le₃lágꞌ₃ juɨg₂ jaun₂, chíꞌ₅ caun₂ nɨ₁ꞌiaꞌ₂ pa₁ lɨn₃ a₂ŋei₅, a₂le₁dsɨ₅₄ guia₃-tɨ́n₂ o₄ꞌné₄, tión₂ guia₃-tɨ́n₂ ángeles o₄ꞌné₄. Qui₂le₁ton₅ o₄ꞌné₄ liaꞌ₂ chen₂ le₃guia₃-tɨ́n₂ tsɨ₁jon₂ Israel*.
13 ꞌNɨ₅ o₄ꞌné₄ le₁dsɨ₅₄ të₂le₃ ja₁ꞌia₂b ꞌiog₂, ꞌnɨ₅ guëꞌ₂ të₂le₃ ca₂ton₂ norte, ꞌnɨ₅ guëꞌ₂ të₂le₃ ca₂ton₂ sur, ꞌnɨ₅ guëꞌ₂ táng₃ të₂le₃ ja₁rɨn₂ ꞌiog₂.
14 Jme₁lë́₂ guia₃-tɨ́n₂ ꞌuɨg₅₄ nɨ₁ꞌiaꞌ₂ juɨg₂ ciudad jaun₂; ne₄ jaun₂ qui₂le₁ton₅ liaꞌ₂ chen₂ dsa₂ guia₃-tɨ́n₂ i₂chen₄ quián₅ Guein₂ Jáꞌ₂ Chaꞌ₂.
15 Chi₁chanꞌ₂ ángel i₂dsia₅ jniá₂ jág₁ quiangꞌ₅₄ caun₂ nɨ₁ꞌma₂ a₂quiog₂ dsa₂ ꞌéiꞌ₃, a₂lë́₅ jmáꞌ₃ cu₄nióg₄, a₂qui₃quióg₃ ꞌéiꞌ₃ juɨg₂ jaun₂, ca₂le₃jë́₃ o₄ꞌné₄ quióꞌ₅, dsoꞌ₂ nɨ₁ꞌiaꞌ₂ në́₃.
16 Ta₁caun₂ juɨg₂ jaun₂ lë́₅ cha₂ quiꞌ₅₄, co₂jaun₂ bá₄ ꞌɨ́₂ conꞌ₂ cu₂. Ca₂quiog₂ ꞌéiꞌ₃ ta₁caun₂ juɨg₂ quianꞌ₅₄ ꞌma₂ꞌéiꞌ₃ jaun₂. Jaun₂ jme₁ca₂të₁ron₅₄ ꞌéiꞌ₃, ca₂dsióg₃ tɨn₃ mei₅ rë₂dsɨ́₂ tɨn₃ ꞌŋiá₂-láu₂ (2,200) kilómetros conꞌ₂ të₂le₃ jang₄ juɨg₂. Conꞌ₂ jaun₂ bá₄ ján₃, ca₂dsióg₃ të₂le₃ ꞌɨ́₂ quianꞌ₅₄ guëꞌ₂ të₂le₃ ŋei₅ niog₅ juɨg₂.
17 Jaun₂ ca₂quiog₂ ꞌéiꞌ₃ jmáꞌ₃ nɨ₁ꞌiaꞌ₂. Jaun₂ ca₂dsióg₃ caun₂ ꞌŋiá₂-láu₂ rë₂dsɨ́₂ të₂láu₃-quén₂ (144) lë₂, ꞌéiꞌ₃ quióꞌ₅ dsa₂ mɨ₂güɨ́g₃, ꞌéiꞌ₃ a₂jmóꞌ₂ ángel ta₁.c
18 Nɨ₁ꞌiaꞌ₂ në́₃, jme₁lë́₄ jmáꞌ₃ quianꞌ₅₄ nɨ₁cang₁ jaspe; ta₁caun₂ ciudad guëꞌ₂ në́₃, jmáꞌ₃ cu₄nióg₄ jmáꞌ₅, a₂tág₅ liaꞌ₂ tág₅ nɨ₁ꞌɨ₂ rë₂jë́₃.
19 ꞌUɨg₅₄ nɨ₁ꞌiaꞌ₂ ciudad në́₃, qui₂rë₂lag₄ quianꞌ₅₄ ca₂le₃jë́₃ ne₅₄ nɨ₁cang₁ jláꞌ₁.
Jë₁le₂ꞌuɨg₅₄ rë₂lag₄ quianꞌ₅₄ jaspe;
jë₁ca₂të́₂ tɨn₃ në́₃, quianꞌ₅₄ zafiro;
jë₁ca₂të́₂ ꞌnɨ₅ në́₃, quianꞌ₅₄ ágata;
jë₁ca₂të́₂ quén₂ guëꞌ₂, quianꞌ₅₄ esmeralda;
20 jë₁ca₂të́₂ ꞌŋiá₂ rë₂lag₄ quianꞌ₅₄ ónice;
jë₁ca₂të́₂ jŋéi₂ guëꞌ₂ në́₃, quianꞌ₅₄ cornalina;
jë₁ca₂të́₂ guio₃ táng₃, quianꞌ₅₄ crisólito;
jë₁ca₂të́₂ jŋia₃ në́₃, quianꞌ₅₄ berilo;
jë₁ca₂të́₂ ŋi₃ në́₃, quianꞌ₅₄ topacio;
jë₁ca₂të́₂ guia₃ guëꞌ₂ në́₃, quianꞌ₅₄ crisoprasa;
jë₁ca₂të́₂ guia₃-cáun₃ në́₃, quianꞌ₅₄ jacinto;
jë₁ca₂të́₂ guia₃-tɨ́n₂ guëꞌ₂ në́₃, rë₂lag₄ quianꞌ₅₄ amatista.
21 Ta₁guia₃-tɨ́n₂ o₄ꞌné₄ në́₃, jme₁lë́₄ mɨ́g₂ perlas, ia₁ jma₃cáun₃ o₄ꞌné₄ jme₁lë́₄ jma₃ca₂mɨ́g₂ perla. Calle dsen₅₄ dsi₂jo₂ juɨg₂ ciudad jaun₂, jme₁lë́₄ cu₄nióg₄ a₂le₁jë́₃ në₂jag₄ bá₄ nɨ₁ꞌɨ₂ rë₂jë́₃.
22 Tsá₃ ca₂jág₃ jniá₂ ꞌi₁caun₂ guáꞌ₅, juaꞌ₅₄ chíꞌ₅ jë₄ juɨg₂, ia₁ ꞌŋiog₅ bá₄ Te₁guiꞌ₅₄ Diú₄ i₂ꞌUanꞌ₂ guë́₄ lɨn₃, ꞌéi₂ bá₄, quiainꞌ₅₄ Guein₂ Jáꞌ₂ Chaꞌ₂, lɨ́in₅ guáꞌ₅ quióꞌ₅.
23 Tsá₃ si₂ quióꞌ₅ ꞌiog₂ on₃ guëꞌ₂ si₂ quióꞌ₅ tsɨꞌ₂ ꞌnióꞌ₅ quióꞌ₅ juɨg₂ jaun₂, ia₁ quianꞌ₅₄ a₂co₂tág₅ co₂ꞌneꞌ₂ quióꞌ₅ ꞌŋiog₅ bá₄ Diú₄, jmo₅ jniá₂ ja₁jaun₂, quianꞌ₅₄ guëꞌ₂ Guein₂ Jáꞌ₂ Chaꞌ₂, i₂lɨ́n₅ co₂ꞌnióꞌ₄ si₂ nɨ₁tsɨ́₅.
24 Jaun₂ qui₂i₃nio₄ ca₂le₃jë́₃ juɨg₂d ja₁tág₅ si₂ quióꞌ₅ ꞌéi₂; qui₂ja₃lén₂ rag₅₄ chan₂ guaꞌ₅₄ ꞌuë₃, qui₂le₁quian₅ a₂jláꞌ₁ quióꞌ₅ jë₄ jaun₂.
25 Liaꞌ₂ o₁lɨ́gꞌ₂ jmɨg₄ tsá₃ jnág₃ o₄ꞌné₄ a₂jmɨ₂, ia₁ tsá₃ ma₃a₂ꞌuë₂ le₃cha₂.
26 Ja₁jaun₂ qui₂dsɨ₃toꞌ₅₄ ca₂le₃jë́₃ a₂jláꞌ₁, a₂quen₅ quióꞌ₅ juɨg₂ a₂te₁ꞌi₁ guaꞌ₅₄ ꞌuë₃.
27 La₁ ja₁jaun₂ tsá₃ qui₂dsɨ₃toꞌ₅₄ ꞌi₁caun₂ a₂lë₁ꞌiog₅, on₃ guëꞌ₂ ꞌi₁jan₂ dsa₂ i₂qui₂jmo₅ a₂o₂guíꞌ₃, i₂juɨ₁gan₂ në́₃. Jmáꞌ₃ liaꞌ₂ conꞌ₂ i₂ma₂tionꞌ₅₄ le₁ton₅ liaꞌ₂ chein₂ ne₄ mɨ₂si₂ a₂le₃chan₂ dsa₂ co₂tan₅₄ quióꞌ₅ Guein₂ Jáꞌ₂ Chaꞌ₂ bá₄, jmáꞌ₃ liaꞌ₂ i₂ꞌéi₂ bá₄ dsi₁len₃ ja₁jaun₂.