Caun₂ mei₅ ŋi₂
20
Jaun₂ ca₂jɨng₅₄ táng₃ jan₂ ángel, ca₂sióin₃ gueiꞌ₅₄ i₂juɨ́g₃. Chi₁chanꞌ₂ ŋí₁ llave quióꞌ₅ ja₁ca₂jein₃ chi₁dsio₅₄, caun₂ guëꞌ₂ cadena pa₁ quian₅.
2 Jaun₂ ca₂jŋaiꞌ₃ i₂të́ꞌ₂ jáꞌ₂ dragón, dsɨ₂mɨꞌ₂ ꞌón₅ ꞌéi₂, i₂lɨ́n₅ i₂së₃dsen₃ i₂chen₂ Satanás, jaun₂ ca₂ꞌnéiꞌ₃ caun₂ mei₅ ŋi₂.
3 Ca₂ꞌliogꞌ₃ ja₁ca₂jein₃ chi₁dsio₅₄, ca₂jnéi₃ ja₁jaun₂, tonꞌ₂ ca₂tióng₃ caun₂ sello ia₁jaun₂ tsá₃ ma₃lé₂ jme₃gain₂₃ guë́₄ juɨg₂ a₂cha₂ ne₄ guaꞌ₅₄ ꞌuë₃, ca₂liaꞌ₂ ca₂dsɨn₃ caun₂ mei₅ ŋi₂. Cang₂ jaun₂ jë₁ma₂ca₂dsɨn₃ caun₂ mei₅ ŋi₂, jaun₂ guë́₄ cheinꞌ₂ táng₃ co₂ꞌna₂.
4 Jaun₂ ca₂jág₃ táng₃ jniá₂ ja₁tióng₂ ne₄ta₁; ja₁jaun₂ tiánꞌ₅ i₂ma₂ŋɨ₂ juɨ₅bí₂ a₂qui₃dsɨ₂₃ ꞌéiꞌ₃. Ján₃ bá₄ ca₂jág₃ jme₂dsí₂ quióꞌ₅ dsa₂ i₂qui₂ca₂quíꞌ₃ dsa₂ dsɨ₂lag₄ ne₄ ꞌuɨg₅₄ ia₁ a₂qui₂ca₂jángꞌ₃ jág₁ dsau₅ quióꞌ₅ Jesús, o₄quióꞌ₄ jág₁ quióꞌ₅ Diú₄ në́₃. Tsá₃ ca₂jme₃juɨinꞌ₂ Jáꞌ₂ ꞌLɨnꞌ₅₄, on₃ guëꞌ₂ ca₂gue₃ të₃ton₅₄ léi₄ quióꞌ₅, dsoꞌ₂ chi₁quí₃, on₃ guëꞌ₂ coꞌ₅₄ gú₃ në́₃. Jaun₂ ca₂jenꞌ₅₄ táng₃ ꞌéi₂, ca₂rë₃goin₂ quiainꞌ₅₄ Cristo caun₂ mei₅ ŋi₂.
5 (La₁ ca₂le₃jɨ́n₃ guë́₄ ꞌlag₄ siánꞌ₂ guëꞌ₂ në́₃, tsá₃ ca₂jeinꞌ₅₄ ca₂liaꞌ₂ ca₂dsɨn₃ caun₂ mei₅ ŋi₂.) Co₂ꞌnióꞌ₄ a₂jaun₂ bá₄ le₃juaꞌ₅₄ jë₁le₂ꞌuɨg₅₄ a₂jenꞌ₅₄ ꞌlag₄.
6 ¡ꞌE₂ guë́₄ dsen₃, ꞌe₂ guë́₄ jŋió₅, juɨ₁liaꞌ₂ dsa₂ i₂quenꞌ₄ jë₁le₂ꞌuɨg₅₄ a₂jenꞌ₅₄ dsa₂! Ia₁ ja₁con₂ ꞌéi₂ guë́₄ në́₃ tsá₃ ma₃juɨ₅bí₂ ꞌio₃ jë₁ca₂të́₂ táng₃ ꞌmú₃. Dsa₂ ꞌéi₂ guë́₄ në́₃ léin₂ jme₂dsa₂ le₃ne₄ Diú₄, quianꞌ₅₄ le₃ne₄ Cristo, tonꞌ₂ goin₃ ján₃ quiainꞌ₅₄ ꞌéi₂ caun₂ mei₅ ŋi₂.
7 Jë₁ma₂ŋɨ́₂ caun₂ mei₅ ŋi₂ jaun₂, jaun₂ guë́₄ chenꞌ₂ táng₃ Satanás ja₁rë₂jnɨ́i₅,
8 a₂o₃ꞌɨin₅, dsɨ₃jme₃gain₂₃ juɨg₂ ta₁quén₂ quiꞌ₅₄ quióꞌ₅ guaꞌ₅₄ ꞌuë₃: ca₂të₂ ja₁chei₂ Gog quianꞌ₅₄ Magog.a Ja₁jaun₂ guë́₄ në́₃ chi₃liainꞌ₃ a₂jmo₃ caun₂ jág₁ a₂jmo₃ ꞌnei₂. I₂juɨn₅ lɨn₃ lë́₂, liaꞌ₂ ja₁lë́₄ mɨ₂tsag₄ a₂cha₂ cheiꞌ₅₄ jmɨ₁ŋíꞌ₄.
9 Jaun₂ ca₂i₃léin₂ ta₁caun₂ juɨ₅ conꞌ₂ lë́₅ ꞌɨ́₂ guaꞌ₅₄ ꞌuë₃, jaun₂ ca₂jë₂lɨꞌ₅₄ le₃lágꞌ₃ ja₁tionꞌ₅₄ dsa₂ i₂tén₅ le₃quióꞌ₅ Diú₄, co₂ꞌnióꞌ₄ juɨg₂ ciudad a₂ꞌnio₃ Diú₄. Jaun₂ qui₂ca₂séiꞌ₂ si₂ gueiꞌ₅₄ i₂juɨ́g₃, ca₂dsɨinꞌ₂ co₂ŋeiꞌ₅₄.
10 Jaun₂ i₂së₃dsen₃ i₂ca₂jme₃gau₅ quióꞌ₅ dsa₂ ꞌéi₂ në́₃, i₂ꞌɨ́in₃ ja₁ꞌa₄ si₂ a₂cau₂ quianꞌ₅₄ azufre, ja₁ma₂ꞌen₅₄ Jáꞌ₂ ꞌLɨnꞌ₅₄ quiainꞌ₅₄ dsa₂ i₂ꞌë́₂ jág₁ a₂juɨ₁gain₂, a₂ŋág₃ uɨg₅ liaꞌ₂ ꞌuë₂-jmɨ₂ ca₂liaꞌ₂ co₂tan₅₄.
Jë₁të₃dsɨ₅₄ ꞌéiꞌ₃ ne₄ta₁ tiog₂ a₂juëꞌ₂
11 Jaun₂ ca₂jág₃ táng₃, ca₂jnia₃ caun₂ ne₄ta₁ juëꞌ₂ tiog₂, jaun₂ ca₂jɨng₅₄ i₂guá₅ ne₄ta₁. Ne₄ ꞌéi₂ ca₂cuɨng₃ guaꞌ₅₄ ꞌuë₃ quianꞌ₅₄ gueiꞌ₅₄ dsi₂güɨg₂, ca₂liaꞌ₂ tsá₃ ma₃ja₁ca₂dsáuꞌ₂.
12 Ja₁jaun₂ guë́₄ ca₂jɨng₅₄ ca₂le₃jɨ́n₃ ꞌlag₄, liaꞌ₂ i₂canꞌ₅₄ liaꞌ₂ i₂meꞌ₂, jniái₂ tióin₂ ne₄ Diú₄. Jaun₂ qui₂ca₂niá₃ mɨ₂si₂ rë₂bɨn₅. Conꞌ₂ siáꞌ₂ ca₂niá₃ mɨ₂si₂ a₂le₃chan₂ dsa₂ co₂tan₅₄. Ca₂të₁dsɨ₅₄ ꞌéiꞌ₃ ja₁con₂ ꞌlag₄ liaꞌ₂ conꞌ₂ lë́₅ ca₂jmo₃ le₂jain₂ le₂jain₂ conꞌ₂ lë́₅ le₁ton₅ ne₄ mɨ₂si₂ jaun₂.
13 Ca₂jɨ́nꞌ₂ jmɨ₁ŋíꞌ₄ ca₂jɨ́inꞌ₂ ꞌlag₄ i₂jme₁tionꞌ₅₄ jë₄ jaun₂; qui₂ca₂jɨ́nꞌ₂ ꞌMú₃ quianꞌ₅₄ guëꞌ₂ Tau₂ ꞌŊio₅a qui₂ca₂jɨinꞌ₂ ꞌlag₄ i₂jme₁tionꞌ₅₄ ja₁jaun₂. Jaun₂ ca₂të₁dsɨ₅₄ ꞌéiꞌ₃ quióꞌ₅ le₂jain₂ le₂jain₂ liaꞌ₂ conꞌ₂ lë́₅ a₂ca₂jmo₃.
14 Jaun₂ qui₂i₃ganꞌ₅₄ ꞌMú₃ quianꞌ₅₄ Tau₂ ꞌŊio₅b ja₁ꞌa₄ si₂. Co₂ꞌnióꞌ₄ ja₁ꞌa₄ si₂ jaun₂, lë́₅ jë₁ca₂të́₂ táng₃ ꞌmú₃.
15 Juɨ₁liaꞌ₂ i₂tsá₃ ca₂dsánꞌ₂ chi₁toin₂₃ ne₄ mɨ₂si₂ a₂chan₂ dsa₂ co₂tan₅₄, ja₁ꞌa₄ si₂ bá₄ ca₂i₃ꞌɨ́in₃.