Cuá₃ ja₁ŋɨ₅ jmɨg₂ a₂chan₂ dsa₂
22
Jaun₂ ca₂ꞌë₃ ángel caun₂ cuá₃ ja₁ŋɨ₅ jmɨg₂ a₂chan₂ dsa₂, a₂rë₂jë́₃ liaꞌ₂ lë́₅ nɨ₁ꞌɨ₂; a₂já₅ ja₁lë́₄ ne₄ta₁ quióꞌ₅ Diú₄ quianꞌ₅₄ Guein₂ Jáꞌ₂ Chaꞌ₂,
2 a₂ŋɨ₅ dsi₂jo₂ jë₄ calle dsen₅₄ quióꞌ₅ ciudad jaun₂. Liaꞌ₂ ca₂ton₂ jmɨg₂ cuá₃ në́₃, dsi₅₄ nɨ₁ꞌma₂ a₂chan₂ dsa₂;a a₂ꞌag₅ guia₃-tɨ́n₂ ne₅₄ mɨ́g₂, jma₃ca₂ne₅₄ mɨ́g₂ le₂ꞌí₁ tsɨꞌ₂.b Mogꞌ₅₄ guëꞌ₂ në́₃, jmo₅ ta₁ a₂ꞌlón₂ ca₂le₃jë́₃ juɨg₂.
3 Ia₁ ja₁jaun₂ guë́₄ në́₃, tsá₃ ma₃jág₁ uɨg₅ le₃cha₂. Jë₄ juɨg₂ ciudad të₃tsɨꞌ₅₄ ne₄ta₁ quióꞌ₅ Diú₄, quióꞌ₅ Guein₂ Jáꞌ₂ Chaꞌ₂ në́₃, jaun₂ qui₂jme₃ti₃ dsa₂ quiáin₅ ne₅₄.
4 Ja₁jaun₂ jág₂ dsi₁ne₁, qui₃cán₂ liaꞌ₂ chen₂ ꞌéi₂ le₁ton₅ chi₁quí₃.
5 Tsá₃ ma₃a₂ꞌuë₂ cha₂ ja₁jaun₂; le₂jaun₂ guëꞌ₂ táng₃ juɨ₁liaꞌ₂ i₂tiánꞌ₅ ja₁jaun₂ tsá₃ ma₃si₂ nɨ₁tsɨ́₅ ꞌnióꞌ₅ quióꞌ₅, on₃ guëꞌ₂ si₂ quióꞌ₅ ꞌiog₂. Ia₁ ꞌŋiog₅ bá₄ Te₁guiꞌ₅₄ Diú₄ téi₂ si₂ ja₁coin₂. Jaun₂ qui₃goin₃ ján₃ ca₂liaꞌ₂ co₂tan₅₄.
6 Jaun₂ ca₂juáꞌ₂ ángel ca₂tság₃ jniá₂:
―Jág₁ dsau₅ a₂rë₂tiꞌ₅₄ bá₄ la₂ a₂juɨ́g₂ jniá₂ ꞌne₂. ꞌŊiog₅ bá₄ Te₁guiꞌ₅₄, i₂lɨ́n₅ Diú₄ i₂cuë₅ bí₂ jme₂dsí₂ quióꞌ₅ dsa₂ i₂qui₂ꞌë́₂ jág₁ o₄quióꞌ₄, ꞌéi₂ bá₄ ma₂ca₂chein₃ ángel quiáin₅ në́₃, a₂ca₂jme₃jniai₂₃ ne₄ dsa₂ i₂qui₂jme₂ti₃ ne₅₄, ca₂le₃jë́₃ ꞌe₂ niog₅ lé₂ ŋiꞌ₅₄ ta₁.
Ŋiꞌ₅₄ ta₁ guanꞌ₂ bá₄ Te₁guiꞌ₅₄ Jesucristo
7 ―¡Jag₄! ¡Ŋiꞌ₅₄ ta₁ la₂ bá₄ guióngꞌ₄! ¡ꞌE₂ guë́₄ dsen₃ i₂tónꞌ₂ juɨ₅ jág₁ a₂rë₂ꞌë́₂ quióꞌ₅ Diú₄ a₂tioꞌ₅₄ ne₄ si₂ la₂!
8 Jniá₂, Juan₅₄, jniá₂ bá₄ lɨ́ng₅ i₂ca₂jág₃, i₂ca₂nag₃ ca₂le₃jë́₃ cosa në₅. Jaun₂ jme₁ma₂në₂jág₃ ma₂në₂nag₃, jaun₂ ca₂tón₂ jniá₂ ꞌuë₃ ja₁tión₂ mɨ₂tag₄ ángel, a₂jme₁jme₁juɨinꞌ₂.
9 La₁ jaun₂ ca₂tság₃ jniá₂:
―ꞌA₃ jmo₂ le₂në₅. Ia₁ jan₂ rɨ́nꞌ₂ ꞌne₂ bá₄ lɨ́ng₅, i₂jme₂ti₃ ta₁ ne₄ Diú₄, tonꞌ₂ lɨ́ng₅ jan₂ rɨnꞌ₅₄ rɨ́nꞌ₂ ꞌne₂ i₂qui₂ꞌë́₂ jág₁ o₄quióꞌ₄ Diú₄, quianꞌ₅₄ i₂tónꞌ₂ juɨ₅ jág₁ a₂tioꞌ₅₄ ne₄ si₂ la₂. Jme₁juɨnꞌ₂ Diú₄.
10 Jaun₂ juáꞌ₂ tság₅ jniá₂:
―Tsá₃ lë₁ꞌma₂ tei₄ jág₁ a₂rë₂ꞌë́₂ quióꞌ₅ Diú₄ a₂tioꞌ₅₄ mɨ₂si₂ rë₂bɨn₅ la₂. Ia₁ ma₂ja₂quián₃ jmɨg₄ jaun₂.
11 Juɨ₁liaꞌ₂ i₂jmo₅ a₂ꞌlɨgꞌ₅₄, caun₂ juɨ₁jmo₂₃ a₂ꞌlɨgꞌ₁₂; juɨ₁liaꞌ₂ i₂rë₂ꞌŋió₄, caun₂ juɨ₁jme₂ꞌŋiói₃. Le₂jaun₂ guëꞌ₂ táng₃, juɨ₁liaꞌ₂ i₂ŋɨ₅ juɨ₅ co₂dsau₅, juɨ₁ŋɨ₁₂ liaꞌ₂ ma₂ŋɨ₂₃ jaun₂, juɨ₅ co₂dsau₅; jaun₂ juɨ₁liaꞌ₂ i₂lɨ́n₅ i₂jŋió₅, caun₂ juɨ₁lein₅₄ bá₄ rë₂jŋiói₅.
12 ―¡Dsónꞌ₂ bá₄ ŋiꞌ₅₄ ta₁ guióngꞌ₄! Quion₅₄ ꞌliaꞌ₅₄ premio quió₃; dsióꞌ₄ cuë́₄ le₂jan₂ le₂jan₂ liaꞌ₂ conꞌ₂ lë́₅ ma₂jmo₃.
13 Jniá₂ bá₄ lɨ́ng₅ Alfa quianꞌ₅₄ Omega; i₂le₂ne₁, i₂jë₁ca₂tóꞌ₂ në́₃; i₂le₂ꞌuɨg₅₄, i₂jë₁ca₂dsan₃ táng₃.
14 ꞌE₂ guë́₄ dsen₃ juɨ₁liaꞌ₂ i₂ma₂le₁jë́₃ tsɨnꞌ₅₄, ia₁jaun₂ bá₄ ŋei₃ bí₂ a₂tɨin₃ nɨ₁ꞌma₂ a₂le₃chan₂ dsa₂, a₂tɨin₃ dsɨ₃toinꞌ₅₄ le₃o₄ꞌné₄ juɨg₂ ciudad në́₃.
15 Ca₁ꞌné₄ bá₄ tionꞌ₅₄ juɨ₁liaꞌ₂ i₂lɨ́n₅ liaꞌ₂ lɨ́n₅ dsɨ₂jɨꞌ₅₄, juɨ₁liaꞌ₂ i₂tɨn₂ mɨ́₅ a₂chan₂ dsɨ́₅,c juɨ₁liaꞌ₂ i₂qui₂nióꞌ₅ jág₁ ꞌlɨgꞌ₅₄, juɨ₁liaꞌ₂ i₂jme₂dsian₅ rɨnꞌ₅₄, juɨ₁liaꞌ₂ i₂jme₂juɨnꞌ₂ diú₄ lag₄, ca₂le₃jɨ́n₃ guë́₄ i₂të₅ dsɨ́₅ qui₂jme₂gan₅ rɨnꞌ₅₄, a₂qui₂jmo₂₃ jág₁ të₂jág₁ në́₃.
16 ꞌJniá₂ Jesús, ma₂ca₂tsɨ́ng₂ ángel quiáng₃, a₂jángꞌ₃ jág₁ dsau₅ në₅ ja₁conꞌ₂ ꞌniaꞌ₂ ne₄ ca₂le₃jɨ́n₃ guáꞌ₅. Jniá₂ bá₄ lɨ́ng₅ liaꞌ₂ choꞌ₅₄ liaꞌ₂ tsɨ₁jon₂ Rag₅₄ David, ján₃ bá₄ lɨ́ng₅ Nei₅ ꞌIóg₁ i₂tág₅ quióꞌ₅.
17 Jme₂dsí₂ Jŋió₅, quianꞌ₅₄ dsa₂ mɨ́₂ quián₅ Guein₂ Jáꞌ₂ Chaꞌ₂ juáꞌ₂:
―Ŋia₅.
Le₂jaun₂ guëꞌ₂ juɨ₁liaꞌ₂ i₂nag₅ juáꞌ₂ i₂në₅, juɨ₁juaꞌ₅₄:
―Ŋia₅.
Chi₂juaꞌ₂ ꞌein₂ i₂rë₂quein₂ dsɨ́₅, juɨ₁jia₂; chi₂juaꞌ₂ ꞌein₂ ꞌnio₃, juɨ₁ja₂ꞌénꞌ₃ jmɨg₂ a₂le₃chain₂, on₃juaꞌ₅₄ cha₂ quɨn₃ ꞌi₁caun₂.
18 Ca₂le₃jɨ́n₃ i₂nag₅ jág₁ dse₃ a₂rë₂ꞌë́₄ quióꞌ₅ Diú₄, a₂tioꞌ₅₄ mɨ₂si₂ la₂, ꞌë́₅ jniá₂ jág₁ dsau₅ la₂: chi₂juaꞌ₂ ꞌein₂ ca₂jmo₃ ŋag₅₄ conꞌ₂ lë́₅ jág₁ a₂ma₂tioꞌ₅₄, Diú₄ bá₄ jme₃juëꞌ₂ jmɨ₁uɨg₅ quióꞌ₅ liaꞌ₂ conꞌ₂ lë́₅ le₁ton₅ ne₄ mɨ₂si₂ la₂.
19 Në₁juaꞌ₂ ꞌein₂ guëꞌ₂ ca₂jŋiáꞌ₂, ca₂jmo₃ meꞌ₂ jág₁ a₂rë₂ꞌë́₂ ne₄ si₂ la₂, Diú₄ bá₄ jŋiáꞌ₂ a₂jme₁ca₂tɨ́in₂ quióꞌ₅ nɨ₁ꞌma₂ a₂chan₂ dsa₂, quianꞌ₅₄ guë́₄ quióꞌ₅ ciudad jŋió₅ a₂le₁ton₅ ne₄ si₂ la₂.
20 I₂jángꞌ₅ jág₁ dsau₅ la₂ juáꞌ₂:
―Dsónꞌ₂ bá₄ ŋiꞌ₅₄ ta₁ guióngꞌ₄.
A₂jaun₂ guëꞌ₂ dsónꞌ₂. ¡Ŋiáꞌ₅ ꞌne₂, Te₁guiꞌ₅₄ Jesús!
21 Juɨ₁jme₂guꞌ₅₄ bá₄ Te₁guiꞌ₅₄ Jesucristo ca₂le₃jɨ́nꞌ₃ ꞌniaꞌ₂.
Co₂në₅.