Jë₁ca₂i₃ꞌén₂ ꞌio₅₄ juɨnꞌ₂ i₂ꞌnag₅ quióꞌ₅
17
Jaun₂ ca₂já₃ jan₂ ángel i₂lë́₂ guion₃ i₂jme₁le₁chanꞌ₂ nɨ₁uɨng₅ ꞌéi₂, ca₂tság₃ jniá₂:
―Ŋia₅, la₂ ꞌë₅₄ ꞌa₂ liaꞌ₂ lë́₅ jmɨ₁uɨg₅ a₂ꞌë́₂ Diú₄ ne₄ ꞌio₅₄ juɨnꞌ₂ i₂ꞌnag₅ quióꞌ₅, i₂guá₅ ne₄ ja₁te₁ꞌi₁ ꞌlióng₂ jmɨg₂.
2 Ca₂le₃jɨ́n₃ bá₄ rag₅₄ i₂chan₂ ne₄ guaꞌ₅₄ ꞌuë₃ ma₂qui₂ca₂nióꞌ₄ jág₁ quiainꞌ₅₄ ꞌio₅₄ ꞌéi₂; ján₃ bá₄ le₂jaun₂ ma₂qui₂ca₂rë₃ꞌen₅ dsa₂ i₂tiánꞌ₅ ne₄ guaꞌ₅₄ ꞌuë₃, quianꞌ₅₄ vino a₂co₂ꞌnióꞌ₄ dso₄ a₂ca₂jmo₃-dsáu₅ ꞌio₅₄ ꞌéi₂.
3 Jaun₂ ca₂jiog₃ ángel, të₁liaꞌ₂ ꞌeng₅₄ le₃quióꞌ₅ Jme₂dsí₂, caun₂ ꞌuë₃ quein₂ co₂ꞌŋiog₅. Ja₁jaun₂ ca₂të́₂ ne₃ ca₂jɨng₅₄ jan₂ ꞌio₅₄, co₂dsɨin₅₄ jan₂ jáꞌ₂ guén₂ i₂jniá₂ gau₂ jmáꞌ₅, i₂le₁dsɨ₅₄ guio₃ mɨ₂dsi₄, guia₃ guëꞌ₂ mɨ₂juɨ́₁, i₂jme₁quian₅ ꞌlióng₂ jág₁ ꞌlɨgꞌ₅₄ liaꞌ₂ chein₂ a₂jmo₂₃ a₂lɨ́in₅ Diú₄ në́₃.
4 ꞌIo₅₄ ꞌéi₂ në́₃ rë₂lɨin₅₄ quiꞌ₂ tsɨnꞌ₅₄ guéin₂ si₂, quianꞌ₅₄ a₂ꞌuɨꞌ₃. A₂lë́₅ jláꞌ₁, tioꞌ₅₄ cu₄nióg₄, nɨ₁cang₁ jláꞌ₁ quianꞌ₅₄ mɨ́g₂ perlas në́₃. Ján₃ guë́₄ chi₁chanꞌ₂ caun₂ copa a₂lë́₅ jmáꞌ₃ cu₄nióg₄, rë₂ꞌa₄ a₂ꞌlɨgꞌ₅₄ a₂jmo₅-dsáu₅, quianꞌ₅₄ jág₁ ꞌlɨgꞌ₅₄ a₂nióꞌ₅.
5 Le₁ton₅ jág₁ ne₄ chi₁quí₃, a₂juáꞌ₂: JÁG₁ A₂RË₂ꞌMA₄ BABILONIA JUƗNꞌ₂ CHOG₅₄ ꞌIO₅₄ I₂ꞌNAG₅ QUIÓꞌ₅ CHOG₅₄ CA₂LE₃JË́₃ NE₅₄ A₂LƗ₁ꞌIOG₅ NE₄ GUAꞌ₅₄ ꞌUË₃.
6 Jaun₂ ca₂jɨn₄ jniá₂ ꞌio₅₄, a₂ꞌein₅ guá₅, quianꞌ₅₄ jmɨ₂ ꞌan₅₄ i₂tén₅ le₃quióꞌ₅ Diú₄,a quianꞌ₅₄ guëꞌ₂ jmɨ₂ ꞌan₅₄ i₂ma₂jángꞌ₃ jág₁ dsau₅ le₃quióꞌ₅ Jesús. Jaun₂ ca₂i₃góꞌ₃ dsɨ₃ guë́₄ lɨn₃ jme₁ca₂të́₂ ne₃ a₂jaun₂.
7 Jaun₂ ca₂juáꞌ₂ ángel tság₅ jniá₂:
―¿ꞌE₂ lë₃ dsɨ₂góꞌ₃ ꞌauꞌ₂? La₂ juáꞌ₄ jniá₂ jág₁ rë₂ꞌma₄, co₂ꞌnióꞌ₄ ꞌe₂ léi₄ jángꞌ₅ ꞌio₅₄ ó₃, ꞌe₂ guëꞌ₂ léi₄ jángꞌ₅ táng₃ Jáꞌ₂ ꞌLɨnꞌ₅₄ i₂jiog₅ i₂cha₂ guio₃ mɨ₂dsi₄, i₂le₁dsɨ₅₄ guio₃ mɨ₂juɨ́₁ në́₃.
8 Jáꞌ₂ ꞌLɨnꞌ₅₄ i₂në₂jɨngꞌ₅₄ në₅, jme₁chan₂ le₂jŋiá₅, rë₂në́₃ në́₃ tsá₃ ma₃chain₂. La₁ jë₁ma₂o₃ꞌɨin₅ uɨ́g₂ ja₁ca₂jein₃ chi₁dsio₅₄, jaun₂ dsióg₄ ja₁dsɨ₃ꞌéin₂. Dsɨ₃góꞌ₃ dsɨ́₅ dsa₂ i₂chan₂ ne₄ guaꞌ₅₄ ꞌuë₃, ca₂le₃jɨ́n₃ i₂conꞌ₂ tsá₃ le₁ton₅ ne₄ si₂ ca₂le₃ ca₂nio₃ mɨ₂güɨ́g₃, mɨ₂si₂ a₂rë₂bɨn₅ a₂le₃chan₂ dsa₂; dsɨ₂qui₂dsɨ₃góꞌ₃ dsɨ́₅ jë₁ma₂jɨ́in₂ Jáꞌ₂ ꞌLɨnꞌ₅₄, ꞌuɨg₅₄ ia₁ a₂jme₁chain₂, tsá₃ ma₃chain₂ rë₂në́₃, la₁ia₁ a₂guáin₂ táng₃.
9 ꞌJág₁ la₂ cha₂ a₂lé₂ le₃ŋɨ́ꞌ₂ juɨ₁liaꞌ₂ dsa₂ i₂ŋɨ́ꞌ₂ dsɨ́₅: jángꞌ₅ jág₁ dsau₅ guio₃ mɨ₂dsi₄ jáꞌ₂, co₂ꞌnióꞌ₄ guio₃ dsɨ₂conꞌ₂ ja₁guá₄ ꞌio₅₄ ꞌéi₂.
10 Ján₃ bá₄ co₂ꞌnióꞌ₄ guion₃ rag₅₄ a₂jaun₂. Ma₂i₃ganꞌ₅₄ cau₅ ꞌŋiá₂ rag₅₄ ꞌéi₂; jan₂ bá₄ i₂gon₂ rë₂në́₃; jan₂ guëꞌ₂ i₂tsá₃ ma₂guan₅ guë́₄. Jë₁ma₂të́₂ rë₁guá₃ ꞌéi₂ guëꞌ₂ në́₃, ca₂tiá₂ bá₄ ca₂tɨ́in₂ guá₃.
11 Jáꞌ₂ ꞌLɨnꞌ₅₄ i₂jme₁chan₂, i₂tsá₃ chan₂ rë₂në́₃ ꞌéi₂ guëꞌ₂ në́₃, lén₂ i₂gon₂ i₂ca₂të́₂ jŋia₃ i₂co₂ꞌnióꞌ₄ rɨnꞌ₅₄ i₂guion₃ ꞌéi₂ bá₄. Ján₃ bá₄ dsióg₄ ja₁dsɨ₃ꞌéin₂.
12 ꞌA₂lë́₅ guia₃ mɨ₂juɨ́₁ a₂në₂jagꞌ₅₄ në́₃, co₂ꞌnióꞌ₄ guian₃ rag₅₄ i₂tsá₃ ma₂ŋɨ₂ ja₁le₃goin₂. La₁ ŋei₃ bí₂ ꞌéiꞌ₃ ca₂tiá₂ le₂jaun₂, në₂jag₄ caun₂ hora, liaꞌ₂ ma₂quiainꞌ₅₄ Jáꞌ₂ ꞌLɨnꞌ₅₄.
13 Tóinꞌ₃ caun₂ ta₁ co₂dsia₅, ꞌei₅ caun₂ jág₁, tonꞌ₂ qui₃cuë₃ juɨ₅bí₂ quianꞌ₅₄ ꞌéiꞌ₃ quióꞌ₅ cuë́ꞌ₃ Jáꞌ₂ ꞌLɨnꞌ₅₄.
14 Qui₃jmo₃ ꞌnei₂ quɨ́inꞌ₂ quianꞌ₅₄ Guein₂ Jáꞌ₂ Chaꞌ₂. La₁ Guein₂ Jáꞌ₂ Chaꞌ₂ bá₄ i₂líꞌ₂, ia₁ ꞌéi₂ bá₄ lɨ́n₅ Juɨg₅₄ quián₅ ca₂le₃jɨ́n₃ juɨg₅₄ dsa₂; tonꞌ₂ lɨ́in₅ Rag₅₄ quián₅ ca₂le₃jɨ́n₃ rag₅₄. Ca₂le₃jɨ́n₃ i₂quianꞌ₅₄ Guein₂ Jáꞌ₂ Chaꞌ₂ në́₃, lɨ́in₅ i₂ma₂quióinꞌ₂ i₂ma₂të́ꞌ₃ Diú₄, tióin₂ lɨ́in₅ dsa₂ i₂rë₂tiꞌ₅₄ quiáin₅.
15 Jaun₂ ca₂tság₃ jniá₂:
―Juɨ₁liaꞌ₂ a₂lë́₅ ꞌlióng₂ jmɨg₂ ja₁guá₄ ꞌio₅₄ ꞌlɨnꞌ₅₄ a₂në₂jagꞌ₅₄ në₅, co₂ꞌnióꞌ₄ ca₂le₃jë́₃ go₄ dsa₂, ca₂le₃jë́₃ nióꞌ₃ dsa₂, ca₂le₃jë́₃ juɨg₂, ca₂le₃jë́₃ jág₁ jmei₅ në́₃.
16 Jaun₂ jme₃ꞌiog₅₄ dsa₂ i₂co₂ꞌnióꞌ₄ a₂lë́₅ guia₃ mɨ₂juɨ́₁ i₂në₂jagꞌ₅₄, jme₃ꞌiog₅₄ Jáꞌ₂ ꞌLɨnꞌ₅₄ guëꞌ₂ në́₃, jme₃ꞌŋiai₅₄ ꞌio₅₄ ꞌéi₂. Co₂dsia₅ qui₃téi₂ co₂ꞌnióꞌ₄ të₃tsɨinꞌ₅₄ rë₃ŋɨ́i₅; qui₃quɨ́gꞌ₃ nɨ₁ŋɨ₁₂, jaun₂ guë́₄ dságꞌ₂ quianꞌ₅₄ si₂.
17 Ia₁ Diú₄ në́₃ ma₂jmo₃ dsɨ́₅ dsa₂ ꞌéi₂ juɨ₁jmo₁₂ ca₂le₃jë́₃ ꞌe₂ niog₅ dsɨ́₅ jmo₃, ia₁jaun₂ jmo₃ caun₂ jág₁ a₂cuë₃ juɨ₅bí₂ a₂goin₂, cuë́ꞌ₃ Jáꞌ₂ ꞌLɨnꞌ₅₄, ca₂liaꞌ₂ ca₂dsióg₃ jmɨg₄ a₂le₃ti₃ jág₁ quióꞌ₅ Diú₄ a₂ma₂ron₅.
18 ꞌIo₅₄ i₂në₂jɨngꞌ₅₄ në́₃, co₂ꞌnióꞌ₄ ciudad juëꞌ₂ ja₁o₂ꞌag₅ ꞌéiꞌ₃ ne₄ quióꞌ₅ ca₂le₃jɨ́n₃ rag₅₄ i₂chan₂ mɨ₂güɨ́g₃.