Ta₁guio₃ jmɨ₁uɨg₅ a₂ꞌë́₂ Diú₄
16
Jaun₂ ca₂nag₃ jniá₂ jág₁ tiá₂ lɨn₃ i₁juáꞌ₄ dsi₂néi₂ guáꞌ₅, a₂tsɨ́ꞌ₅ le₃guion₃ ángeles ꞌéi₂:
―O₂nóꞌ₅ ꞌniaꞌ₂ o₂jen₄ ne₄ guaꞌ₅₄ ꞌuë₃ ꞌnei₂ a₂ꞌi₄ dsɨ́₅ Diú₄ a₂le₁ꞌa₁ nɨ₁uɨng₅ në₅.
2 Jaun₂ ca₂o₃ꞌɨ́n₃ jë₁le₂ꞌuɨg₅₄ ángel, jaun₂ ca₂jein₃ a₂chi₁ꞌa₄ nɨ₁uɨng₅ quióꞌ₅ ne₄ guaꞌ₅₄ ꞌuë₃. Jaun₂ ca₂le₃jɨ́n₃ dsa₂ i₂le₁quian₅ léi₄ quióꞌ₅ Jáꞌ₂ ꞌLɨnꞌ₅₄, i₂jme₂juɨnꞌ₂ nióꞌ₄ quióꞌ₄ në́₃, qui₂ca₂ꞌŋiai₂ ꞌméꞌ₅ ꞌlɨgꞌ₅₄ a₂quɨꞌ₂ guë́₄ lɨn₃.
3 Jaun₂ ca₂jen₃ jë₁ca₂të́₂ on₃ ángel a₂ꞌa₄ nɨ₁uɨng₅ quióꞌ₅ ne₄ jmɨ₁ŋíꞌ₄. Jaun₂ ca₂lë₃ jmɨ₂, në₂jag₄ bá₄ jmɨ₂ ꞌan₅₄ jan₂ ꞌlag₄. Ca₂dsan₃ ca₂le₃jɨ́n₃ jáꞌ₂ i₂jme₁chan₂ jmɨ₁ŋíꞌ₄ jaun₂.
4 Ján₃ bá₄ le₂jaun₂ ca₂jen₃ jë₁ca₂të́₂ ún₂ ángel a₂ꞌa₄ nɨ₁uɨng₅ quióꞌ₅, ne₄ jmɨg₂ cuá₃, ne₄ o₄tu₁ jmɨg₂ në́₃; jaun₂ jmáꞌ₃ jmɨ₂ bá₄ qui₂ca₂lë₃ ján₃.
5 Jaun₂ ca₂nag₃ juáꞌ₂ ángel i₂niog₅ gu₂ jmɨg₂, ca₂juáꞌ₂:
Rë₂ bá₄ cáunꞌ₂ ꞌne₂ ꞌí₁, Diú₄ Jŋió₅;
ꞌne₂ i₂lɨ́n₅, i₂jme₁lɨ́n₄,a
ia₁ a₂në₂qui₁dsɨꞌ₂ ꞌéiꞌ₃ le₂në₅.
6 Ia₁ ca₂tein₃ ꞌéi₂ jmɨ₂ a₂jme₁ꞌan₅₄
dsa₂ i₂jme₁tén₄ le₃quiángꞌ₂,
dsa₂ i₂jme₁qui₂ca₂ꞌë́₂ jág₁ quiángꞌ₂ në́₃.
Në₃ guë́₄ në́₃, në₂ꞌeinꞌ₅₄ jmɨ₂,
ia₁ le₂në₅ ꞌen₄ quióꞌ₅ bá₄.
7 Ca₂nag₃ jniá₂ ján₃ jë₄ ne₄chei₂, i₁juáꞌ₄:
Dsónꞌ₂ le₂në₅, Te₁guiꞌ₅₄ Diú₄ i₂ꞌUanꞌ₂ guë́₄ lɨn₃,
dsónꞌ₂ bá₄ qui₂dsɨ́ꞌ₁ ꞌne₂ ꞌéiꞌ₃ liaꞌ₂ conꞌ₂ dsi₂ten₅₄.
8 Jaun₂ ca₂jen₃ jë₁ca₂të́₂ quén₂ ángel a₂ꞌa₄ nɨ₁uɨng₅ quióꞌ₅ ne₄ ꞌiog₂, jaun₂ ca₂ŋɨ₂ ꞌiog₂ bí₂ a₂dsɨ́inꞌ₂ dsa₂ mɨ₂güɨ́g₃ quianꞌ₅₄ si₂.
9 Jaun₂ ca₂dsɨnꞌ₂ ca₂le₃jɨ́n₃ dsa₂ quianꞌ₅₄ a₂dséi₂ gau₂ lɨn₃. Jaun₂ qui₂ca₂ꞌag₃ dsa₂ ꞌlɨgꞌ₅₄ qui₂ca₂ꞌɨin₃ Diú₄ i₂ꞌio₅ bí₂ ne₄ jmɨ₁uɨg₅ jaun₂. Tsá₃ ca₂jme₃tsɨ́in₃ dsɨ́₅, juaꞌ₅₄ ca₂jme₃juɨinꞌ₂ ꞌéi₂.
10 Jaun₂ ca₂jen₃ jë₁ca₂të́₂ ꞌŋiá₂ ángel a₂ꞌa₄ nɨ₁uɨng₅ quióꞌ₅ ne₄ ne₄ta₁ quióꞌ₅ Jáꞌ₂ ꞌLɨnꞌ₅₄, jaun₂ ca₂të₁tsɨꞌ₅₄ qui₁néꞌ₃ ja₁goin₂ jaun₂. Dsa₂ në́₃ qui₂ca₂quɨgꞌ₂ le₁tsɨꞌ₂ a₂ca₂jme₃uɨ́ꞌ₃.
11 Conꞌ₂ siáꞌ₂ ca₂ꞌɨin₃ ꞌlɨgꞌ₅₄ Diú₄ i₂quióꞌ₅ gueiꞌ₅₄ i₂juɨ́g₃, ne₄ ꞌuɨg₅₄ a₂le₁quian₂₃ jmɨ₁uɨg₅, ꞌuɨg₅₄ ia₁ a₂lɨ́in₅ ꞌméꞌ₅ në́₃. La₁ tsá₃ ca₂dsi₃quéinꞌ₅ dsɨ́₅ juaꞌ₅₄ ca₂tí₂ a₂jmo₂₃-dsáu₅.
12 Jaun₂ ca₂jen₃ jë₁ca₂të́₂ jŋé₂ ángel a₂ꞌa₄ nɨ₁uɨng₅ quióꞌ₅ ne₄ cuá₃ juëꞌ₂ Eufrates. Jaun₂ co₂dsia₅ ca₂rë₃quéin₃ cuá₃ jaun₂, ia₁jaun₂ ma₂lë́₅ co₂jŋia₅₄ caun₂ juɨ₅ quein₂ ja₁i₃nio₄ rag₅₄ i₂ja₃lén₂ të₂le₃ ja₁ꞌia₂b ꞌiog₂.
13 Jaun₂ ca₂jág₃ ca₂ꞌuɨn₂ ún₂ jme₂dsí₂ ꞌlɨnꞌ₅₄, i₂jniá₂ liaꞌ₂ jniá₂ i₁jë́ꞌ₅, ca₂ꞌuɨin₂ jma₃ján₃ juɨ₅ mɨ₂ꞌo₄ jáꞌ₂ dragón, mɨ₂ꞌo₄ Jáꞌ₂ ꞌLɨnꞌ₅₄, quianꞌ₅₄ mɨ₂ꞌo₄ i₂të́ꞌ₂ dsa₂ i₂ꞌë́₂ jág₁ a₂juɨ₁gain₂ në́₃.
14 Jme₂dsí₂ i₂lɨ́n₅ je₂naꞌ₅₄ bá₄ ꞌéi₂, i₂qui₃jmo₃ léi₄ juëꞌ₂, i₂qui₂dsɨ₃lén₂ uɨ́ng₂ ja₁con₂ rag₅₄ quián₅ dsa₂ i₂chan₂ ta₁caun₂ mɨ₂güɨ́g₃, ia₁jaun₂ chi₃loꞌ₃ a₂dsia₃ ꞌnei₂ jmɨg₄ juëꞌ₂ jaun₂ quióꞌ₅ Diú₄ i₂ꞌUanꞌ₂ guë́₄ lɨn₃.
15 “Rë₂jánꞌ₁ ꞌniaꞌ₂ ia₁ guiónꞌ₄ jniá₂ conꞌ₂ tiá₂, në₂jag₄ bá₄ jan₂ ꞌang₂. ꞌE₂ guë́₄ dsen₃ juɨ₁liaꞌ₂ i₂rë₂jnio₄ ne₄, i₂lë́₅ ꞌí₁ tsɨnꞌ₅₄, conꞌ₂ tsá₃ ŋó₅ në₁juaꞌ₂ i₃ŋɨ₅₄ rë₂ŋɨ́i₅ të₃ jág₅ dsa₂ o₂quíꞌ₃ quióꞌ₅.”
16 Jaun₂ qui₂ca₂liainꞌ₃ rag₅₄ caun₂ ja₁chei₂ Armagedón quianꞌ₅₄ jág₁ jmei₅ hebreo.
17 Jaun₂ ca₂jen₃ jë₁ca₂të́₂ guion₃ ángel a₂ꞌa₄ nɨ₁uɨng₅ quióꞌ₅, ca₂ꞌéin₂ dsi₂güɨg₂. Jaun₂ ca₂néꞌ₂ dsi₂néi₂ guáꞌ₅ a₂chíꞌ₅ gueiꞌ₅₄ i₂juɨ́g₃, jág₁ a₂juáꞌ₂ tiá₂, a₂já₅ ne₄ta₁, i₁juáꞌ₄:
―¡Ma₂ca₂lë₃ bá₄!c
18 Jaun₂ qui₂ca₂lë₃ si₁ŋíꞌ₃, ca₂të₁tsɨꞌ₅₄ co₂mɨꞌ₅₄, ca₂quiaꞌ₂ ŋíꞌ₃. Ta₁caun₂ guaꞌ₅₄ ꞌuë₃ qui₂ca₂jë́ꞌ₂ ca₂i₁bi₅₄ ꞌuë₃ tiá₂ lɨn₃, ca₂liaꞌ₂ ꞌi₁cónꞌ₂ tsá₃ le₂jaun₂ juaꞌ₅₄ a₂ma₂i₁bi₅₄ ꞌuë₃ ca₂le₃ ca₂rë₃chán₃ dsa₂ ne₄ guaꞌ₅₄ ꞌuë₃, ia₁ a₂ŋɨ́₄ lë₃ gau₂ ca₂lë₃.
19 Ca₂lë₃ ꞌnɨ₅ dsoꞌ₅₄ ciudad dsen₅₄ jaun₂, jaun₂ qui₂ca₂i₃lé₂ juɨ₅ ꞌuë₃ ca₂le₃jë́₃ juɨg₂ ciudad jme₁te₁ꞌi₁ mɨ₂güɨ́g₃. Jaun₂ guë́₄ ca₂dsáuꞌ₃ dsɨ́₅ Diú₄ Babilonia juëꞌ₂; ca₂cuë́ꞌ₃ copa a₂ꞌa₄ vino a₂ꞌi₄ ꞌnei₂ dséi₂ dsɨ́₅.
20 Jaun₂ qui₂ca₂cuɨng₃ ca₂le₃jë́₃ ꞌuë₃ a₂qui₂le₁quɨ́ꞌ₅ jë₄ jmɨ₁ŋíꞌ₄; ca₂le₃jë́₃ nɨ₁máꞌ₂ në́₃, co₂dsia₅ ca₂i₃cóꞌ₂.
21 Qui₂ca₂tang₂ ne₄ quióꞌ₅ dsa₂ mɨ₂güɨ́g₃ dsɨ́₅ ca₁caꞌ₅₄ ꞌŋio₅ lɨn₃, a₂guei₂ jma₃të₂láu₃ kilo liaꞌ₂ ca₂mɨ́g₂.d Ján₃ bá₄ le₂jaun₂ qui₂ca₂ꞌag₃ dsa₂ ꞌlɨgꞌ₅₄ ꞌɨin₂₃ Diú₄, ꞌuɨg₅₄ ia₁ a₂ca₂séiꞌ₂ dsɨ́₅ jaun₂, ia₁ a₂ŋɨ́₄ lë₃ ca₂i₁juɨn₅₄ gau₂ jmɨ₁uɨg₅ a₂ca₂lë₃.