Guion₃ ángeles i₂le₁quian₅ guio₃ jmɨ₁uɨg₅ jë₁ca₂tóꞌ₂
15
Ca₂jág₃ jniá₂ gueiꞌ₅₄ i₂juɨ́g₃ caun₂ léi₄ juëꞌ₂ a₂dsɨ₂góꞌ₃ dsɨ₅: guion₃ ángeles i₂quian₅ guio₃ guë́₄ jmɨ₁uɨg₅ ja₁con₂ dsa₂. Co₂ꞌnióꞌ₄ a₂jaun₂ guë́₄ lë́₅ jë₁ca₂tóꞌ₂, ia₁ co₂jaun₂ ca₂ꞌŋia₅ a₂ꞌi₄ ꞌnei₂ dsɨ́₅ Diú₄.
2 Jaun₂ ca₂jág₃ jniá₂ juɨ₁liaꞌ₂ caun₂ jmɨ₁ŋíꞌ₄ a₂lë́₅ nɨ₁ꞌɨ₂ a₂rë₂cónꞌ₅ quianꞌ₅₄ si₂. Ne₄ jmɨ₁ŋíꞌ₄ a₂lë́₅ nɨ₁ꞌɨ₂ jaun₂, jme₁tión₂ dsa₂ i₂ca₂tióꞌ₃ ne₄ Jáꞌ₂ ꞌLɨnꞌ₅₄, ne₄ nióꞌ₄ quióꞌ₅, ne₄ número quióꞌ₅ liaꞌ₂ chein₂ në́₃. Qui₂le₁chanꞌ₂ tsɨ₁ton₅ arpasa a₂ca₂cuë₃ Diú₄.
3 Tióin₂ ꞌë₂₃ canto quióꞌ₅ Moisésb dsa₂ i₂ca₂jme₂ti₃ quián₅ Diú₄, quianꞌ₅₄ canto quióꞌ₅ Guein₂ Jáꞌ₂ Chaꞌ₂, a₂juáꞌ₂:
ꞌE₂ guë́₄ juëꞌ₂ a₂jláꞌ₁ lɨn₃ ca₂le₃jë́₃ a₂ma₂jmoꞌ₅₄ ꞌne₂,
Te₁guiꞌ₅₄ Diú₄ i₂ꞌUanꞌ₂ guë́₄ lɨn₃.
A₂dsau₅, a₂tí₅ lɨn₃ bá₄ juɨ₅ quiángꞌ₂,
ꞌNe₂ Rag₅₄ quián₅ ca₂le₃jë́₃ juɨg₂.
4 ¿ꞌEin₂ bá₄ ꞌéi₂ i₂tsá₃ jme₃gon₃ ꞌne₂, Te₁guiꞌ₅₄?
¿ꞌEin₂ bá₄ i₂tsá₃ jme₃juagꞌ₂ guëꞌ₂ ján₃?
Ia₁ janꞌ₂ ꞌne₂ bá₄ lɨ́ngꞌ₅ i₂jŋió₅.
Ca₂le₃jë́₃ juɨg₂ qui₂ja₃léin₂ qui₂jme₃juɨinꞌ₂ ꞌne₂,
ia₁ ma₂ca₂rë₃jniá₂ ꞌéiꞌ₃ a₂qui₂dsɨ́ꞌ₂ ꞌne₂.
5 Cang₂ jaun₂ ca₂jág₃ jniá₂ gueiꞌ₅₄ i₂juɨ́g₃, ca₂niá₃ guáꞌ₅, co₂ꞌnióꞌ₄ le₃juaꞌ₅₄ ja₁jŋió₅ guë́₄, ja₁rë₂ꞌma₄ jág₁ dsau₅ a₂lɨꞌ₅₄ quianꞌ₅₄ Diú₄.
6 Guáꞌ₅ jaun₂, ca₂ꞌuɨn₂ guion₃ ángeles i₂le₁quian₅ le₃guio₃ jmɨ₁uɨg₅. Le₁quiꞌ₂ ꞌmɨꞌ₂ lino jláꞌ₁, a₂tág₅ lɨn₃. A₂jme₁rë₂jénꞌ₅ le₁dsɨ́₅ guëꞌ₂ në́₃, jme₁lë́₄ jmáꞌ₃ cu₄nióg₄.
7 Jaun₂ guë́₄ jan₂ jáꞌ₂ quén₂ i₂tión₂ ne₄ ne₄ta₁, ca₂cuë́ꞌ₃ le₂jan₂ le₂jan₂ ta₁guion₃ ángeles jma₃cáun₃ nɨ₁uɨng₅ jɨꞌ₂ a₂lë́₅ cu₄nióg₄, le₁ꞌa₁ co₂ꞌnióꞌ₄ a₂ꞌnei₂ a₂ꞌi₄ dsɨ́₅ Diú₄ i₂chan₂ ca₂liaꞌ₂ co₂tan₅₄.
8 Jaun₂ ca₂canꞌ₂ dsi₂néi₂ guáꞌ₅ quianꞌ₅₄ jme₁ŋi₁ a₂já₅ ja₁con₂ a₂jláꞌ₁ a₂ꞌuanꞌ₂ Diú₄. Ca₂liaꞌ₂ ꞌi₁jan₂ tsá₃ lé₂ dsɨ₃tonꞌ₅₄ ja₁jaun₂, ca₂liaꞌ₂ ca₂rë₃ꞌŋia₅ le₃guio₃ jmɨ₁uɨg₅ a₂le₁quian₅ ta₁guion₃ ángeles.