Canto a₂ca₂ꞌë₃ caun₂ ꞌŋiá₂-lón₂ rë₂dsɨ́₂ të₂láu₃-quén₂ mei₅ (144,000) dsa₂
14
Cang₂ jaun₂ ca₂jɨng₅₄ táng₃ Guein₂ Jáꞌ₂ Chaꞌ₂ jniái₂ chéinꞌ₅ ne₄ Máꞌ₂ Sión, quiainꞌ₅₄ caun₂ ꞌŋiá₂-lón₂ rë₂dsɨ́₂ të₂láu₃-quén₂ mei₅ dsa₂ i₂jme₁le₁quian₅ léi₄, i₂le₁ton₅ chi₁quí₃ liaꞌ₂ chen₂ Guein₂ Jáꞌ₂ Chaꞌ₂ quianꞌ₅₄ ꞌa₂ liaꞌ₂ chen₂ Jmei₂ në́₃.
2 Jaun₂ guë́₄ ca₂nag₃ caun₂ mɨꞌ₅₄ a₂já₅ gueiꞌ₅₄ i₂juɨ́g₃, a₂lë́₅ në₂jag₄ bá₄ caun₂ laꞌ₅₄ juëꞌ₂ lɨn₃,a tonꞌ₂ në₂jag₄ bá₄ ja₁dein₅ quiaꞌ₂ tiá₂ lɨn₃ ŋíꞌ₃. Mɨꞌ₅₄ a₂ca₂nag₃ jaun₂ ca₂néꞌ₂ juɨ₁liaꞌ₂ ja₁jmo₅ dsa₂ son₅₄ quianꞌ₅₄ tsɨ₁ton₅ arpas b quióꞌ₅.
3 Qui₂i₁ꞌë₂₃ caun₂ canto ꞌmɨ́₂ ne₄ ne₄ta₁, ne₄ le₃quén₂ jáꞌ₂, ne₄ guiꞌ₅₄ canꞌ₅₄ në́₃. Ca₂liaꞌ₂ ꞌi₁jan₂ dsa₂ siánꞌ₂ tsá₃ ꞌein₂ lé₂ le₃tɨn₂ son₅₄ a₂ꞌë₅ dsa₂ jaun₂, jmáꞌ₃ liaꞌ₂ dsa₂ ꞌŋiá₂-lón₂ rë₂dsɨ́₂ të₂láu₃-quén₂ mei₅ i₂rë₂ꞌlianꞌ₅₄ ne₄ guaꞌ₅₄ ꞌuë₃ ꞌéi₂ bá₄.
4 Ca₂le₃jɨ́n₃ dsa₂ ꞌéi₂ i₂tsá₃ ca₂rë₃ꞌiog₅ jme₂dsí₂ quióꞌ₅ quianꞌ₅₄ ꞌio₅₄ ꞌlɨnꞌ₅₄, ia₁ qui₂ma₂ca₂rë₃cháin₃ ja₂léin₂ le₁jɨ́in₃. Quiainꞌ₅₄ bá₄ Guein₂ Jáꞌ₂ Chaꞌ₂ juɨ₁ꞌa₂ guë́₃ ja₁dsó₃ ꞌéi₂. Qui₂le₁ꞌliain₅₄ të₂le₃ jɨn₄ dsa₂ mɨ₂güɨ́g₃, co₂ꞌnióꞌ₄ i₂le₂ꞌuɨg₅₄ i₂rë₂jenꞌ₅₄ le₃ne₄ Diú₄, le₃ne₄ Guein₂ Jáꞌ₂ Chaꞌ₂ në́₃.
5 ꞌI₁caun₂ jág₁ të₂jág₁ tsá₃ ca₂ꞌuë₂ mɨ₂ꞌo₄ ꞌéi₂; tsá₃ dso₄ qui₂rë₂cáinꞌ₄.c
Jág₁ quióꞌ₅ le₃ún₂ ángeles
6 Jaun₂ ca₂jɨng₅₄ táng₃ jan₂ ángel siánꞌ₂ a₂ŋɨ₂₃ dsi₂jo₂ dsi₄ güɨg₂, i₂quian₅₄ jág₁ dse₃ a₂le₃chan₂ dsa₂ co₂tan₅₄, já₅ ja₂ꞌë́₃ ja₂chiꞌ₅₄ dsa₂ i₂tiánꞌ₅ ne₄ guaꞌ₅₄ ꞌuë₃: ca₂le₃jë́₃ juɨg₂, ca₂le₃jë́₃ tsɨ₁jon₂ dsa₂, ca₂le₃jë́₃ jág₁ jmei₅, ca₂le₃jë́₃ go₄ dsa₂;
7 i₁juáꞌ₄ tiá₂:
―Jme₁gan₃ ꞌniaꞌ₂ Diú₄; jme₁juɨnꞌ₂ ꞌniaꞌ₂ ꞌéi₂. Ia₁ ma₂gua₅ hora a₂qui₃dsɨ₂₃ ꞌéiꞌ₃. Jme₁juɨnꞌ₂ ꞌniaꞌ₂ i₂ca₂jmo₃ gueiꞌ₅₄ mɨ₂güɨ́g₃ quianꞌ₅₄ guaꞌ₅₄ ꞌuë₃, jmɨ₁ŋíꞌ₄ në́₃, quianꞌ₅₄ guë́₄ ca₂le₃jë́₃ o₄tu₁ jmɨg₂.
8 Chi₁quɨ́n₃ guë́₄ jaun₂ ján₃, ca₂já₃ jan₂ ángel siánꞌ₂ i₂ca₂juáꞌ₂:
―Ma₂ca₂i₃ꞌén₂, ma₂ca₂i₃ꞌén₂ Babilonia juëꞌ₂, ꞌuɨg₅₄ ia₁ a₂ca₂jmo₃ a₂qui₂ca₂ꞌɨnꞌ₃ ca₂le₃jë́₃ juɨg₂ vino a₂ca₂jme₃cón₂ dsɨ́₅ a₂qui₂nióꞌ₃ jág₁ ꞌlɨgꞌ₅₄ quióꞌ₅.
9 Jaun₂ ca₂guan₃ táng₃ jë₁ca₂të́₂ ún₂ ángel, ján₃ guëꞌ₂ tiá₂ ca₂juáꞌ₂:
―Chi₂juaꞌ₂ ꞌein₂ ca₂guen₃ jme₃juɨnꞌ₂ Jáꞌ₂ ꞌLɨnꞌ₅₄, quianꞌ₅₄ nióꞌ₄ quióꞌ₅, o₃ në₁juaꞌ₂ ca₂guein₃ cán₂ léi₄ dsoꞌ₂ chi₁quí₃, o₃ coꞌ₅₄ gú₃ ꞌe₂,
10 ján₃ bá₄ ꞌɨ́nꞌ₂ ꞌéi₂ vino a₂ꞌi₄ ꞌnei₂ dsɨ́₅ Diú₄ a₂ma₂i₂tang₄ a₂tsá₃ ꞌe₂ qui₂rë₂cónꞌ₅ ꞌŋióꞌ₃ copa a₂cha₂ ꞌuɨg₅₄ a₂le₃ꞌnei₂; qui₃ŋág₃ uɨg₅ quianꞌ₅₄ si₂ quianꞌ₅₄ azufre të₃ne₄ ángeles jŋió₅ quián₅ Diú₄ quianꞌ₅₄ guëꞌ₂ le₃ne₄ Guein₂ Jáꞌ₂ Chaꞌ₂.
11 Jme₁ŋi₁ a₂tsáu₃ ja₁ŋág₃ uɨg₅ në́₃, dsi₅₄ co₂tan₅₄ lé₂, on₃ guëꞌ₂ ꞌuë₂-jmɨ₂ bá₄ lé₂ juaꞌ₅₄ a₂le₃jŋia₃ a₂tsá₃ ŋág₃ ca₂tiá₂ uɨg₅ ca₂le₃jɨ́n₃ i₂jme₃juɨnꞌ₂ Jáꞌ₂ ꞌLɨnꞌ₅₄ ꞌéi₂ quianꞌ₅₄ nióꞌ₄ quióꞌ₅, ca₂le₃jɨ́n₃ i₂ca₂guen₃ cán₂ léi₄ liaꞌ₂ chein₂ në́₃.
12 Ja₁në₅ bá₄ ꞌnióꞌ₅ jmo₃ juɨnꞌ₂ dsɨ́₅ dsa₂ i₂tén₅ le₃quióꞌ₅ Diú₄,d dsa₂ i₂tión₂ tiá₂ jme₂ti₃ ꞌéiꞌ₃ quióꞌ₅, a₂ꞌéin₂ le₃quióꞌ₅ Jesús në́₃.
13 Jaun₂ ca₂néꞌ₂ táng₃ jág₁ a₂já₅ gueiꞌ₅₄ i₂juɨ́g₃, ca₂juáꞌ₂ tság₅ jniá₂:
―Jmo₄ si₂ tiong₅ ca₂le₃jë́₃ a₂në₅ a₂juáꞌ₂: “ꞌE₂ guë́₄ ꞌŋio₅ dsen₃ dsa₂ i₂dsián₃ le₃ne₄ juɨ₅ la₂, i₂ꞌén₂ le₃quióꞌ₅ Te₁guiꞌ₅₄.” Ján₅, juáꞌ₂ Jme₂dsí₂, ia₁jaun₂ jŋia₃ ca₂le₃jë́₃ ta₁ quióꞌ₅, jaun₂ qui₃le₃quen₅ ꞌi₄ ta₁ ca₂le₃jë́₃ a₂ca₂jmo₃.”
A₂ráu₃ ne₄ guaꞌ₅₄ ꞌuë₃
14 Jaun₂ ca₂jág₃ táng₃ ca₂jnia₃ caun₂ jnei₅ tiog₂ jmáꞌ₅. Ne₄ jnei₅ jaun₂, guá₅ jan₂ i₂lɨ́n₅ liaꞌ₂ lɨ́n₅ Jaun₅* dsa₂ mɨ₂güɨ́g₃.e Chi₁ꞌi₁ caun₂ corona a₂lë́₅ jmáꞌ₃ cu₄nióg₄ mɨ₂dsi₅₄, chi₁chanꞌ₂ caun₂ ŋí₁ hoz a₂ꞌmu₃.
15 Jaun₂ o₂ꞌɨ́n₃ táng₃ jan₂ ángel dsi₂néi₂ guáꞌ₅ templo, ca₂juáꞌ₂ tiá₂ ca₂tsɨ́ꞌ₃ i₂guá₅ ne₄ jnei₅:
―Tiá₃ ŋí₁ hoz quiángꞌ₂, cagꞌ₅₄; ia₁ ma₂gua₅ hora cagꞌ₅₄, ia₁ ma₂ca₂ron₂ a₂ráu₃ ne₄ guaꞌ₅₄ ꞌuë₃.
16 Jaun₂ ca₂tiá₂ hoz ne₄ guaꞌ₅₄ ꞌuë₃, dsa₂ i₂guá₅ ne₄ jnei₅ ꞌéi₂, ca₂cágꞌ₃ a₂ma₂ca₂rau₂ ja₁jaun₂.
17 Jaun₂ ca₂o₃ꞌɨ́n₃ táng₃ jan₂ ángel siánꞌ₂ dsi₂néi₂ guáꞌ₅ chíꞌ₅ gueiꞌ₅₄ i₂juɨ́g₃; ján₃ bá₄ chi₁chanꞌ₂ caun₂ ŋí₁ hoz a₂ꞌmu₃.
18 Jaun₂ ca₂o₃ꞌɨ́n₃ táng₃ ne₄chei₂ jan₂ ángel siánꞌ₂ guë́₄ táng₃, i₂ꞌio₅ bí₂ ne₄ si₂. Jaun₂ ca₂juáꞌ₂ tiá₂ ca₂tsɨ́ꞌ₃ i₂chanꞌ₂ ŋí₁ hoz ꞌmu₃, ca₂juáꞌ₂:
―Tiá₃ ŋí₁ ꞌmu₃ quiángꞌ₂; chi₁loꞌ₂ cagꞌ₅₄ nɨ₁ꞌmuꞌ₂ a₂qui₂le₁ꞌág₄ nɨ₁uɨng₂ a₂cha₂ guaꞌ₅₄ ꞌuë₃, ia₁ ma₂ca₂juɨg₂ mɨ́g₂ uvas quióꞌ₅.
19 Jaun₂ ca₂tiá₂ ꞌéi₂ hoz quióꞌ₅ ne₄ guaꞌ₅₄ ꞌuë₃, ca₂cágꞌ₃ mɨ́g₂ uvas quióꞌ₅ guaꞌ₅₄ ꞌuë₃. Ca₂tóꞌ₂ caun₂ ja₁juëꞌ₂ ja₁qui₂jlenꞌ₃ dsa₂, co₂ꞌnióꞌ₄ le₃juaꞌ₅₄, ja₁ꞌi₄ ꞌnei₂ dsɨ́₅ Diú₄.
20 Jaun₂ ca₂rë₂tsoꞌ₄ a₂jaun₂ ꞌnɨꞌ₂ juɨg₂, ca₂ꞌio₂ jmɨ₂. Jmɨ₂ jaun₂ në́₃ ca₂i₃ꞌo₅₄ a₂jɨꞌ₂ conꞌ₂ ꞌei₅ rë₂ꞌo₄ dsɨ₂cua₁, a₂juëꞌ₂ ja₁ca₂ꞌa₃ tí₅ conꞌ₂ ꞌnɨ₅ ꞌŋiá₂-láu₂ (300) kilómetros.