Le₃on₃ Jáꞌ₂ ꞌLɨnꞌ₅₄
13
Jaun₂ ca₂jág₃ ca₂ꞌŋio₂ ne₄ jmɨ₁ŋíꞌ₄ jan₂ jáꞌ₂ i₂jniá₂ gau₂ jmáꞌ₅, i₂le₁dsɨ₅₄ guio₃ mɨ₂dsi₄, guia₃ guëꞌ₂ mɨ₂juɨ́₁. Ne₄ mɨ₂juɨ́₁ në́₃, jme₁le₁dsɨ₅₄ guia₃ coronas. Ne₄ mɨ₂dsi₅₄ në́₃, jme₁le₁ton₅ jág₁ liaꞌ₂ chein₂ a₂jmo₂₃ a₂lɨ́in₅ Diú₄.
2 Jme₁lɨ́n₄ jáꞌ₂ i₂ca₂jɨng₅₄ ꞌéi₂ liaꞌ₂ lɨ́n₅ dsɨ₂ꞌiaꞌ₂ leopardo. Le₁dsɨ₅₄ mɨ₂tag₅₄ liaꞌ₂ lë́₅ gu₂-tag₄ oso. Mɨ₂ꞌo₅₄ guëꞌ₂ lë́₅ liaꞌ₂ lë́₅ mɨ₂ꞌo₄ ꞌiaꞌ₂ león. Ca₂cuë₃ dragón juɨ₅bí₂ ca₂cuë́ꞌ₃ jáꞌ₂ ꞌéi₂ liaꞌ₂ jma₃quianꞌ₅₄ ne₄ta₁ quióꞌ₅ në́₃, a₂qui₃dsɨ₂₃ ꞌéiꞌ₃ a₂ꞌuainꞌ₂ lɨn₃.
3 Ca₂mɨ́g₂ mɨ₂dsi₄ Jáꞌ₂ ꞌLɨnꞌ₅₄ ꞌéi₂, lë́₅ liaꞌ₂ lë́₅ a₂rë₂cuɨ́ꞌ₃ ꞌŋio₅ lɨn₃, lë́₅ në₂jag₄ bá₄ a₂chain₂ join₅₄. La₁ia₁ ca₂ꞌláu₂ bá₄. Ta₁caun₂ mɨ₂güɨ́g₃ bá₄ ca₂i₃góꞌ₃ dsɨ́₅ dsa₂, ca₂ꞌein₃ Jáꞌ₂ ꞌLɨnꞌ₅₄ ꞌéi₂.
4 Jaun₂ ca₂jme₃juagꞌ₂ dsa₂ ca₂jme₃juɨinꞌ₂ dragón, ia₁ ca₂cuë₃ ꞌéiꞌ₃ ca₂cuë́ꞌ₃ Jáꞌ₂ ꞌLɨnꞌ₅₄. Ca₂jme₃juiinꞌ₂ Jáꞌ₂ ꞌLɨnꞌ₅₄ në́₃, qui₂ca₂juáꞌ₂ ca₂tóinꞌ₂:
―¿ꞌEin₂ chan₂ i₂lɨ́n₅ liaꞌ₂ lɨ́n₅ i₂në₅? ―ꞌɨin₂₃ Jáꞌ₂ ꞌLɨnꞌ₅₄ ꞌéi₂―. ¿ꞌEin₂ bá₄ tióꞌ₅ jmo₃ ꞌnei₂ ja₁coin₂?
5 Ján₃ bá₄ ca₂ŋɨi₂ jág₁ a₂le₃róin₂ a₂qui₃jmo₃ a₂lɨ́in₅ Diú₄; ca₂ŋɨi₂ bí₂ në́₃ a₂qui₃dsɨ₂₃ ꞌéiꞌ₃ conꞌ₂ të₂láu₃-tɨn₃ tsɨꞌ₂.
6 Jaun₂ ca₂jáin₃ mɨ₂ꞌo₅₄, ca₂ton₃ ꞌlɨgꞌ₅₄ le₃quióꞌ₅ Diú₄. Ca₂ton₃ rëꞌ₂ ꞌlɨgꞌ₅₄ ca₂ꞌë₃ ja₁guá₄ Diú₄; ca₂ꞌɨin₃ rëꞌ₂ ca₂liaꞌ₂ i₂tionꞌ₅₄ gueiꞌ₅₄ i₂juɨ́g₃ në́₃.
7 Ca₂ŋɨi₂ bá₄ jmɨg₄ a₂jmo₃ ꞌnei₂ ja₁con₂ dsa₂ i₂tén₅ le₃quióꞌ₅ Diú₄,a a₂jo₃ në́₃; ca₂ŋɨi₂ bí₂ a₂qui₃dsɨ₂₃ ꞌéiꞌ₃ ne₄ quióꞌ₅ ca₂le₃jë́₃ tsɨ₁jon₂, ca₂le₃jë́₃ go₄ dsa₂, ca₂le₃jë́₃ jág₁ jmei₅, ca₂le₃jë́₃ juɨg₂ në́₃.
8 Jme₃juagꞌ₂ ca₂le₃jɨ́n₃ dsa₂ i₂chan₂ guaꞌ₅₄ ꞌuë₃ jme₃juɨinꞌ₂ Jáꞌ₂ ꞌLɨnꞌ₅₄ ꞌéi₂: ca₂le₃jɨ́n₃ i₂conꞌ₂ tsá₃ le₁ton₅ ne₄ si₂ rë₂bɨn₅ a₂le₃chan₂ dsa₂, a₂ron₅ quióꞌ₅ Guein₂ Jáꞌ₂ Chaꞌ₂, i₂jme₁ma₂ꞌi₄ ꞌéiꞌ₃ a₂jŋagꞌ₃ dsa₂, ca₂le₃ ca₂nio₃ mɨ₂güɨ́g₃.
9 Në₁juaꞌ₂ ꞌein₂ le₁dsɨ₅₄ rë₂gua₄, rë₂ juɨ₁nei₅₄.
10 Juɨ₁liaꞌ₂ i₂jŋia₅ dsa₂ juɨ₅ néꞌ₃ má₃,
ján₃ bá₄ juɨ₅ néꞌ₃ má₃ dsɨ₃léin₂;
juɨ₁liaꞌ₂ dsa₂ i₂jme₂dsian₅ dsa₂ quianꞌ₅₄ ŋi₁tág₂,
quianꞌ₅₄ ŋi₁tág₂ dsiáin₃.b
ꞌUɨg₅₄ në₅ në́₃, ca₂le₃jɨ́n₃ i₂tén₅ le₃quióꞌ₅ Diú₄, ꞌnióꞌ₅ jmo₃ tióꞌ₃ dsɨ́₅, a₂tsá₃ qui₂dsɨ₃uɨ́in₂ a₂ꞌéin₂.
11 Cang₂ jaun₂ ca₂jɨn₄ táng₃ jniá₂ jan₂ jáꞌ₂ ꞌlɨnꞌ₅₄ siánꞌ₂, ca₂ꞌŋioi₂ ne₄ guaꞌ₅₄ ꞌuë₃. ꞌÉi₂ në́₃ jme₁le₁dsɨ₅₄ tɨn₃ mɨ₂juɨ́₁ liaꞌ₂ lë́₅ mɨ₂juɨ́₁ jan₂ guein₂ jáꞌ₂ chaꞌ₂. La₁, liaꞌ₂ lë́₅ jág₁ quióꞌ₅ dragón bá₄, jme₁lë́₄ jág₁ quióꞌ₅.
12 Co₂jaun₂ bá₄ jme₁ꞌio₂₃ bí₂ ján₃, juɨ₁liaꞌ₂ Jáꞌ₂ ꞌLɨnꞌ₅₄ i₂le₂ꞌuɨg₅₄, a₂qui₃dsɨ₂₃ ꞌéiꞌ₃ o₄quióꞌ₄; chi₃quióng₂ jmɨg₄ jme₃juagꞌ₂ ta₁caun₂ mɨ₂güɨ́g₃ quianꞌ₅₄ i₂chan₂ ja₁jaun₂, jme₃juɨinꞌ₂ Jáꞌ₂ ꞌLɨnꞌ₅₄ i₂le₂ꞌuɨg₅₄ i₂ca₂ꞌlón₂ i₂jme₁rë₂cuɨ́nꞌ₃ ꞌéi₂.
13 ꞌLióng₂ léi₄ juëꞌ₂ a₂o₂dsain₂ ca₂jmo₃ ján₃. Ca₂jmo₃ ca₂táꞌ₂ si₂ gueiꞌ₅₄ mɨ₂güɨ́g₃ në₃, ca₂jmo₃ të₃ne₄ dsa₂ mɨ₂güɨ́g₃.
14 Të₂le₃ quianꞌ₅₄ léi₄ juëꞌ₂ a₂ca₂jmo₃ o₄quióꞌ₄ i₂ꞌlɨnꞌ₅₄ i₂le₂ne₁ ꞌéi₂, ca₂jme₃gain₂₃ dsa₂ i₂chan₂ guaꞌ₅₄ ꞌuë₃. Ca₂jmo₃ ꞌéiꞌ₃ a₂chiꞌ₃ dsa₂ caun₂ nióꞌ₄ quióꞌ₅ Jáꞌ₂ ꞌLɨnꞌ₅₄ i₂jme₁rë₂cuɨ́nꞌ₃ quianꞌ₅₄ ŋi₁tág₂ i₂ca₂ꞌlón₂ ꞌéi₂.
15 Ca₂ŋɨi₂ bí₂ a₂toinꞌ₂ jme₂dsí₂ nióꞌ₄ quióꞌ₅ Jáꞌ₂ ꞌLɨnꞌ₅₄, ia₁jaun₂ juáꞌ₂ jág₁, ia₁jaun₂ jme₃dsiain₂₃ ca₂le₃jɨ́n₃ i₂tsá₃ gue₃ jme₃juɨnꞌ₂ nióꞌ₄ quióꞌ₅ ꞌéi₂.
16 Ca₂chi₃quiáin₂ jmɨg₄ liaꞌ₂ dsa₂ canꞌ₅₄ liaꞌ₂ dsa₂ meꞌ₂, liaꞌ₂ dsa₂ i₂cha₂ cu₄ liaꞌ₂ dsa₂ te₂ŋé₂, liaꞌ₂ dsa₂ i₂jme₂ti₃ ta₁ ne₄ juɨg₅₄ liaꞌ₂ dsa₂ i₂tsá₃ ꞌein₂ ne₄ jme₂ti₃ në́₃, a₂guein₃ léi₄ dsoꞌ₂ gu₂ ne₁, o₃ chi₁quí₃ ꞌe₂.
17 Jaun₂ tsá₃ ma₃lé₂ lá₃ ꞌi₁jan₂, on₃ guëꞌ₂ ma₃lé₂ ꞌnag₃, juaꞌ₅₄ tsá₃ lɨ́in₅ léi₄, o₃ tsá₃ le₁quian₅ jág₁ liaꞌ₂ chen₂ Jáꞌ₂ ꞌLɨnꞌ₅₄, o₃ tsá₃ le₁quian₅ número quióꞌ₅ liaꞌ₂ chein₂.
18 Le₂la₂ bá₄ jág₁ a₂ŋɨ́ꞌ₂ dsɨ́₅: juɨ₁liaꞌ₂ dsa₂ i₂ꞌi₄ jág₁, juɨ₁cheinꞌ₄ cuentas ꞌa₂ liaꞌ₂ lë́₅ número quióꞌ₅ Jáꞌ₂ ꞌLɨnꞌ₅₄. Ia₁ número quióꞌ₅ dsa₂ mɨ₂güɨ́g₃ bá₄ jaun₂. Le₂la₂ lë́₅ número quióꞌ₅: jŋéi₂ ꞌŋiá₂-láu₂ rë₂dsɨ́₂ ꞌnagꞌ₂ ne₂guióg₂ rë₂dsɨ́₂ jŋéi₂ (666).